Sekant Kingz
14 Da mi Jehoawash sekant yaa az king; fi hihn pa da-mi Jehoawahaz, hoo yoostu bee king oava Izrel. An eena Jehoawash sekant yaa az king, Amazaiya staat tu rool az king, ahn fi hihn pa da-mi Jehoawash, hoo yoostu bee king oava Jooda. 2 Hihn mi 25 yaaz oal wen ih staat tu rool az king, an ih rool oava Jeroosalem fi 29 yaaz. Fi hihn ma da-mi Jehoawadin, ahn shee da-mi fahn Jeroosalem. 3 Hihn kantinyu fi du weh rait eena Jehoava sait, bot noh laik ih ansesta Dayvid. Hihn mi du evriting laik weh ih pa Jehoawash mi du. 4 Bot di hoali hai plays dehn mi stil dehdeh, ahn di peepl stil mi-di aafa sakrifais pahn di hoali hai plays ahn mek di smoak fahn di sakrifais goh op tu dehn gaadz. 5 Az soon az ih geh ful kanchroal oava di kingdom, hihn mi kil di ofishal dehn hoo mi kil ih pa, wen ih pa da-mi king. 6 Bot ih neva kil di merdara dehn son, bikaaz a Jehoava komanment weh Moaziz mi rait eena di buk a di Laa: “Yu noh fi kil di pa fi di sin dehn weh ih pikni komit, ahn yu noh fi kil di pikni fi di sin dehn weh ih pa komit; yu onli fi kil di wan weh komit di sin.” 7 Hihn kil 10,000 man fahn Eedom eena di Saalt Vali, ahn joorin di waar hihn kanka Seela siti ahn naym it Joktiyel, ahn dat da how ih naym op tu tudeh.
8 Den Amazaiya sen sohn mesinja tu Izrel king, Jehoawash, hoofa pa da Jehoawahaz, hoofa pa da Jeehoo, an ih seh: “Kohn, mek wi fait gens eech ada.” 9 Jehoawash, di king a Izrel sen dis mesij tu Amazaiya, di king a Jooda: “Di prikl bush da Lebanon sen wahn mesij tu di seeda chree da Lebanon, ‘Mek yu daata bee mai son waif.’ Ahn wahn wail animal fahn Lebanon paas bai ahn chrampl op di prikl bush. 10 Da chroo yu kanka Eedom, ahn yu ful a yuself now. Injai yu gloari, bot stay eena yu palis. Wai yu wuda waahn kaaz chrobl fi yuself ahn jreg dong Jooda lang wid yu?” 11 Bot Amazaiya neva lisn.
Soh Jehoawash, di king a Izrel, gaahn da Bet-sheemesh weh da paat a Jooda teritori, ahn hihn an Amazaiya fait gens eech ada. 12 An Izrel kanka Jooda, soh aala di soalja dehn ron bak hoam. 13 Wen Izrel king Jehoawash mi deh da Bet-sheemesh, hihn kyapcha Jooda king Amazaiya, hoofa pa da Jehoawash, hoofa pa da Ayhazaiya. Den ih reech Jeroosalem, an ih brok dong 584 fut* a Jeroosalem waal, fahn Eefrayim Gayt tu di Kaana Gayt. 14 Hihn tek aala di goal, di silva, an aala di preshos tingz weh dehn mi fain da Jehoava templ an eena di chrezhri da di king palis, ahn dehn mi aalso tek sohn man az prizna. Den ih gaahn bak da Samayrya.
15 Ahn di res a Jehoawash hischri weh taak bowt ih powa, evriting weh hihn mi du, ahn how hihn mi fait gens Amazaiya di king a Jooda, deh rait dong eena di hischri buk a Izrel king dehn. 16 Den Jehoawash ded,* ahn dehn beri ahn da Samayrya jos laik Izrel ada king dehn. Ahn fi hihn son Jeroboawam* staat tu rool az king afta ahn.
17 Amazaiya, hoofa pa da Jehoawash di king a Jooda, mi liv fi 15 yaaz afta Jehoawahaz son Jehoawash mi ded. Ahn Jehoawahaz yoostu bee di king a Izrel. 18 Ahn di res a Amazaiya hischri deh rait dong eena di hischri buk a Jooda king dehn. 19 Laytaraan dehn mek sohn planz fi goh gens ahn da Jeroosalem, soh hihn ron gaahn da Laykish. Bot dehn sen sohn man afta ahn da Laykish, ahn dehn kil ahn deh. 20 Soh dehn kehr ahn bak eena wahn chariyat, ahn dehn beri ahn da Jeroosalem da Dayvid Siti jos laik ih ansesta dehn. 21 Den aala di peepl fahn Jooda geh Azaraiya* ahn mek hihn staat tu rool az king afta ih pa Amazaiya. Hihn mi 16 yaaz oal wen ih staat tu rool az king. 22 Afta di king* ded,* Azaraiya kanka Eelat, den ih bil it bak op ahn giv it bak tu Jooda.
23 Da mi Amazaiya 15th yaa az king. Fi hihn pa da-mi Jehoawash, hoo yoostu bee king oava Jooda. An eena Amazaiya 15th yaaz az king, Jeroboawam staat tu rool az king da Samayrya, ahn hihn rool fi 41 yaaz. Fi hihn pa da-mi Jehoawash, hoo yoostu bee king oava Izrel. 24 Hihn mi kantinyu fi du weh bad eena Jehoava sait. An ih neva stap komit di sin dehn weh Izrel komit bikaaz a Neebat son Jeroboawam. 25 Hihn put bak Izrel boada fahn Leebo-haymat* tu di see weh deh eena di Araba,* jos laik weh Jehoava di Gaad a Izrel mi prafesai chroo Amitai son Joana, hoo da-mi wahn prafit fahn Gat-heefer. 26 Jehoava mi si how Izrel mi sofa wahn lat. Nat wan persn mi deh da Izrel weh kuda mi help dehn, nat eevn dehn wan weh mi week ahn kyaahn difen dehnself. 27 Bot Jehoava mi pramis dat ih noh wahn kil owt aala di Izrelait dehn. Soh hihn yooz Jehoawash son Jeroboawam fi sayv dehn.
28 Ahn di res a Jeroboawam hischri weh taak bowt ih powa, evriting weh hihn mi du, how hihn mi fait, ahn how hihn mi gi bak Damaskos ahn Haymat tu Jooda eena Izrel, deh rait dong eena di hischri buk a Izrel king dehn. 29 Den Jeroboawam ded,* ahn dehn beri ahn jos laik ih ansestaz, laik Izrel ada king dehn. An ih son Zekaraiya staat tu rool az king afta hihn.