Aagas

Noatis how di skripcha teks fi tudeh bring owt dehnya too impoatant point: (1) Di raichos fays wahn lata prablemz. (2) Jehoava sayv wi fahn aala wi prablemz. How Jehoava sayv wi? Wan way how hihn du dat da wen ih help wi fi andastan dat laif eena dis werl noh eezi. Hihn pramis wi dat wi wahn hapi di serv ahn, bot wi kyaahn ekspek fi noh ga prablemz. (Isa. 66:14) Hihn inkorij wi fi foakos pahn di fyoocha weh hihn waahn fi wi, wen wi wahn ku reeli injai laif fareva. (2 Kor. 4:​16-18) Bot fi now, Hihn di help wi soh dat wi ku kip aan di serv ahn. (Lam. 3:​22-24) Weh wi ku laan fahn Jehoava faytful servants weh mi liv eena Baibl taimz ahn fahn tudeh day? Wi mait haftu fays prablemz weh wi noh ekspek. Bot wen wi pen pahn Jehoava, wi noa fi shoar dat hihn wahn aalwayz dehdeh fi help wi.—Saa. 55:22. w23.04 14-15 ¶3-4

Wi ku laan fahn Joazef ahn Mayri egzampl bikaaz dehn mi redi fi obay di atariti dehn eevn wen ih neva eezi. (Look 2:​1-6) Wen Mayri mi bowt nain monts pregnant, di govament mi aks Joazef ahn Mayri fi du sohnting weh mi haad fi mek dehn du. Agostos, hoo mi-di rool di Roaman Empaiya, mi waahn evribadi goh rejista da dehn hoamtong. Soh Joazef ahn Mayri mi haftu chravl 93 mailz fi goh da Betlihem. Dat da-mi wahn lang jerni op ahn dong lata hil. Fi shoar da chrip neva mi wahn bee komfatabl fi Mayri. Dehn mosi mi-di wori bowt Mayri helt ahn dehn baybi weh neva baan yet. Wat if shee mi ga di baybi wen dehn mi deh pahn di road? Dehn mosi mi wahn feel veri angshos fi kip di baybi sayf sins hihn da-mi di Mesaiya. Yu tink dehn kuda mi yooz dat az wahn ekskyoos fi noh obay di govament? Eevn doa Joazef ahn Mayri mi-di wori, dehn mi stil obay di laa. Ahn bikaaz dehn mi obeedyant, Jehoava mi tek kayr a dehn. Mayri mi reech sayf da Betlihem, shee mi gi bert tu wahn helti baybi, an ih eevn help mek Baibl prafesi kohn chroo!—Mic. 5:2. w23.10 8 ¶9; 9 ¶11-12

Yoo feel tu nervos fi giv wahn koment da meetin? Sohnting weh ku help da fi pripyaa gud. (Prav. 21:5) If yu tek taim fi stodi di mateeryal, dat wahn help yu fi feel les nervos wen da taim fi put op yu han fi koment. Yu ku aalso mek yu koment dehn shaat. (Prav. 15:23; 17:27) Wen yu pripyaa wahn shaat koment eena yu oan werdz, yu shoa dat yu mi pripyaa gud ahn dat yu andastan weh yu mi stodi. Wat if yu chrai som a dehnya sojeshan bot yu stil feel nervos fi koment moa dan wan taim? Yu ku bee shoar dat Jehoava wahn apreeshiayt evriting weh yu du fi gi wahn koment. (Look 21:​1-4) Fi gi yu bes noh meenz yu haftu put tu moch presha pahn yuself. (Fil. 4:5) Figa owt humoch koment yu waahn giv, mek it wahn goal fi du it, an aks Jehoava fi help yu stay kaam. Maybi di fers goal weh yu ku set da fi gi jos wan shaat koment. w23.04 21 ¶6-8

Di apasl Paal seh dat wi fi bee laik soaljaz weh aalwayz redi fi waar. Wahn soalja sopoas tu aalwayz bee redi fi fait wen wahn waar di hapm. Saym way soh, wee fi bee redi fi Jehoava day ahn kip aan wi ves a fayt ahn lov, ahn di helmit a hoap. Jos laik how wahn ves wuda protek wahn soalja haat, fayt ahn lov wahn protek fi wee simbolik haat. Dehnya kwaliti wahn aalso help wi fi kantinyu wership Gaad ahn fala Jeezas egzampl. Wen wi ga fayt, ih help wi fi bee shoar dat Jehoava wahn bles wi az lang az wi wership ahn wid aala wi haat. (Heeb. 11:6) Wi fayt wahn aalso help wi fi stay laayal tu Jeezas, wi Leeda, eevn wen wi di goh chroo wahn tof sichuwayshan. Wan way wi ku schrentn wi fayt da wen wi reed bowt di egzampl a bradaz ahn sistaz weh stay laayal eevn wen dehn goh chroo persikyooshan er ga moni prablemz. Wee ku avoid di daynja fi lov moni ahn mateeryal tingz if wi kapi di egzampl a bradaz ahn sistaz weh put spirichwal tingz fers eena dehn laif. w23.06 10 ¶8-9

Self-kanchroal ku help wahn persn kanchroal ih feelinz ahn di tingz weh ih du. Ih ku aalso moov yu fi reech yu goal, espeshali if yu feel laik da goal haad fi reech er if yu noh feel laik du it. Memba dat self-kanchroal da paat a di froot weh hoali spirit bayr eena peepl. Soh aks Jehoava fi hoali spirit fi help yu laan fi shoa da impoatant kwaliti. (Look 11:13; Gal. 5:​22, 23) Tingz eena dis werl wahn neva bee perfek, soh noh wayt fi di perfek taim. If wi chrai wayt fi di perfek taim, wi mait neva reech wi goal. If yu feel laik yu goal tu haad fi reech, den yu mait noh eevn waahn werk pan it. If dis da how yoo feel, den maybi yu ku set sohn smaala goalz. If yu goal da fi werk pahn wahn spesifik kwaliti, den chrai fain sohn lee wayz how yu ku staat shoa it. If yu goal da fi reed di hoal Baibl, den maybi yu ku chrai staat aaf di reed jos wahn fyoo vers evri day. w23.05 29 ¶11-13

Aal chroo di laas dayz, Jehoava di yooz ih aaganaizayshan fi mek shoar wi aalwayz ga spirichwal food fi help wi stay pahn “di Way a Hoalinis.” (Isa. 35:8; 48:17; 60:17) Wi mait seh dat weneva wahn persn aksep wahn Baibl stodi, ih geh di apachooniti fi waak pahn “di Way a Hoalinis.” Som chravl pahn da road jos fi wahn lee wail ahn den dehn lef di road. Adaz mek op dehn main fi stay pan it til dehn reech wehpaat dehn di goh. Soh, da wehpaat dehn di goh? Fi dehn wan weh ga di hoap fi liv da hevn, “di Way a Hoalinis” wahn leed tu “di paradais a Gaad” weh deh eena hevn. (Rev. 2:7) Fi dehn wan weh ga di hoap fi liv pahn ert, da haiway wahn leed tu di en a di Towzn-Yaa Rool wen evribadi wahn bee perfek. If yoo di chravl pahn da haiway, noh luk bak. Ahn stay pan da road til yu reech di nyoo werl! w23.05 17 ¶15; 19 ¶16-18

Wen yu tink bowt evriting weh Jehoava du fi yu, yu feel soh tankful dat yu kyaahn help bot waahn dedikayt yu laif tu ahn. (Saa. 116:​12-14) Di Baibl seh dat “evri gud ahn perfek gif” kohn fahn Jehoava. (Jay. 1:17) Di moas preshos gif weh Jehoava gi wi da wen ih alow ih Son fi giv op ih laif az wahn ransom sakrifais. Tanks tu da sakrifais, ih pasabl fi mek wi bee frenz wid Jehoava ahn ga di privilij fi liv fareva. (1 Jan 4:​9, 10) Soh wen yu dedikayt yu laif tu Jehoava, yu shoa humoch yu apreeshiayt da preshos gif lang wid aala di ada blesinz weh ih gi yu.—Deut. 16:17; 2 Kor. 5:15. w24.03 5 ¶8

Wen wi si di bad moaralz weh peepl ga tudeh, wi feel di saym way how Lat mi feel. Lat “kudn stan di laales way a laif di peepl mi-di liv ahn di brayzn way dehn mi-di bihayv,” bikaaz hihn mi noa dat Jehoava hayt dehndeh tingz. (2 Peet. 2:​7, 8) Lat mi lov ahn rispek Jehoava, soh hihn mi rijek aala di imoaral tingz weh di peepl mi-di du. Jos laik eena Lat dayz, wee di liv monks peepl weh noh ga no rispek fi Jehoava raichos standadz. Eevn if dat da di kays, wi ku stil stay kleen eena wahn moaral way if wi kip wi lov ahn rispek fi Jehoava schrang. Jehoava help wi fi du dat chroo di inkorijment wi fain eena di buk a Praverbz. Az Kristyanz, aala wi ku benifit fahn dis kongsl, noh mata if wi yong er oal. Wen wi rispek Jehoava, wi wahn mek shoar dat wi noh du notn bad ner sopoat enibadi weh du bad tingz. w23.06 20 ¶1-2; 21 ¶5

Yoo ku chros dat Jehoava si aal weh yu du fi stay laayal tu ahn. (Heeb. 6:10) Ih ku bee dat yu mi fays persikyooshan fahn famili membaz, er yu praabli mi haftu giv op mateeryal tingz fi put Gaad Kingdom fers eena yu laif. (Mach. 6:33) Ahn bikaaz a aala dehndeh sakrifais weh yoo mek, yu praabli don ekspeeryens di blesinz weh Jeezas mi pramis ih disaiplz. Dis da weh ih mi tel dehn: “Enibadi weh lef dehn hows er breda er sista er ma er pa er chiljren er lan bikaaz dehn da mai falowaz ahn fi di sayk a di gud nyooz wahn geh 100 taimz moa now. Dehn wahn geh moa hows, breda, sista, ma, chiljren, ahn lan. Bot saym taim, dehn wahn fays persikyooshan tu. An eena di fyoocha, dehn wahn get evalastin laif.” (Maak 10:​29, 30) Soh wateva blesin yu get faar beta dan eni sakrifais yu eva mek.—Saa. 37:4. w24.03 9 ¶5

Wen di Kristyanz da Judeeya mi ekspeeryens wahn famin, di bradaz da Antiyak “mi get tugeda fi sen help tu di bradaz da Judeeya; eech wan a dehn mi giv akaadn tu weh dehn kuda mi afoad.” (Aks 11:​27-30) Eevn doa di bradaz ahn sistaz weh mi need help mi liv faar, di Kristyanz da Antiyak mi mek shoar dehn du aal weh dehn kud fi help dehn. (1 Jan 3:​17, 18) Jos laik di bradaz da Antiyak, wi ku shoa kompashan tu wi bradaz ahn sistaz weh di sofa bikaaz a wahn dizaasta. Wee ku shoa dat wi redi fi help dehn wen wi tel di eldaz dat wi waahn help owt pahn wahn proajek, wen wi gi kanchribyooshan tu di werlwaid werk, ahn wen wi pray fi dehn. Som a wi bradaz ahn sistaz mait need wi help fi geh di tingz weh dehn need fi servaiv. Wen wi King Jeezas Krais kohn fi joj evribadi, wee waahn mek shoar hihn fain wi di shoa kompashan, soh dat ih ku invait wi fi “inherit di Kingdom.”—Mach. 25:​34-40. w23.07 4 ¶9-10; 6 ¶12

Jeezas mi reeznabl jos laik ih Pa. Jehoava mi sen Jeezas pahn ert fi preech tu “di peepl a Izrel weh da laik sheep weh laas.” Bot Jeezas mi shoa dat ih reeznabl wen ih mi du weh ih Pa sen ahn fi du. Fi egzampl, wahn laydi hoo da neva wahn Izrelait mi tel Jeezas: “Wahn deemon di kaaz mi daata fi sofa bad.” Ahn shee mi bayg Jeezas fi heel ahn. Soh Jeezas mi shoa kompashan ahn heel di laydi daata. (Mach. 15:​21-28) Tink bowt wahn nada egzampl. Joorin Jeezas minischri pahn ert, hihn mi seh: “Hooeva seh dat dehn noh noa mee . . . , Ai wahn seh dat Ai noh noa dehn needa.” (Mach. 10:33) Bot weh Jeezas mi du wen Peeta mi disoan ahn chree taimz? Hihn neva disoan Peeta. Jeezas mi noa dat Peeta mi sari fi weh ih mi du ahn dat hihn da-mi wahn faytful man. Afta Jeezas mi kohn bak tu laif, ih mi gaahn si Peeta an ih pasabl dat ih tel ahn dat ih fergiv ahn an lov ahn. (Look 24:​33, 34) Jehoava ahn Jeezas reeznabl. Bot wat bowt wee? Jehoava waahn mek wi bee reeznabl. w23.07 21 ¶6-7

Wat da sohn reezn wai wi ku bee shoar dat dis ert wahn bee wahn paradais? Weh wi ku tel adaz fi mek dehn noa fi shoar dat dis wahn hapm? Fers, Jehoava ihself mi mek di pramis. Eena di buk a Revilayshan, ih seh: “Di Wan weh mi-di sidong pahn di chroan seh: ‘Ai di mek evriting nyoo.ʼ” Jehoava ga di wizdom, di dizaiya, ahn di powa fi mek dis pramis kohn chroo. Sekant, Jehoava soh shoar dat hihn wahn du weh ih seh, dat tu hihn da laik ih don hapm aredi. Hihn seh: “Dehndeh werdz don kohn chroo!” Terd, notn ku stap Jehoava fahn finish sohnting weh ih staat. Dat da wai hihn seh: “Ai da di Alfa an di Omayga.” (Rev. 21:6) Jehoava wahn proov dat Saytan laiyad ahn dat hihn kyaahn stap Jehoava fahn du weh ih seh ih wahn du. Soh wen sohnbadi tel yu, “Dis song tu gud fi bee chroo,” yu ku reed Revilayshan 21:​5, 6 an eksplayn dat da laik if Jehoava sain wahn garantee pan ih pramis.—Isa. 65:16. w23.11 7 ¶18-19

Jehoava mi mek da pramis tu Aybraham wen hihn mi 75 yaaz oal ahn neva ga no pikni. Yu tink Aybraham mi geh fi si da pramis kohn chroo? Hihn mi onli geh fi si paat a da pramis kohn chroo. Afta 25 yaaz, wen Aybraham mi kraas di Yoofraytis Riva, hihn mi geh fi si ih son Aizak baan. Ahn 60 yaaz layta, hihn mi geh fi si ih granson Eesaa ahn Jaykob baan. (Heeb. 6:15) Bot Aybraham neva geh fi si ih disendant dehn bee wahn big nayshan an inherit di Pramis Lan. Stilyet, hihn da-mi wahn faytful man weh mi ga wahn kloas frenship wid ih Kriyayta. (Jay. 2:23) Ahn wen Jehoava bring Aybraham bak tu laif, yoo ku imajin how hapi hihn wahn bee fi fain owt dat bikaaz hihn mi payshent ahn ga fayt eena Jehoava, aala di nayshan dehn mi geh bles? (Jen. 22:18) Weh wi ku laan fahn Aybraham egzampl? Wi mait noh geh fi si aala Jehoava pramis dehn kohn chroo rait now, bot if wi payshent laik Aybraham wi ku bee shoar dat Jehoava wahn bles wi now an eena di fyoocha.—Maak 10:​29, 30. w23.08 24 ¶14

Wen King Yuzaiya mi yong, ih mi hombl. (2 Chron. 26:​1-4) Ih mi aalso laan fi ga “lata rispek” fi Gaad. Hihn mi liv til ih 68 yaaz oal an ih mi faytful fi moas a ih laif. Jehoava mi bles ahn wahn lat. King Yuzaiya mi win wahn lata waar gens ih enimi dehn an ih mi mek shoar fi kip Jeroosalem sayf. (2 Chron. 26:​6-15) Yuzaiya mosi mi hapi bikaaz a aal di tingz weh Jehoava mi help ahn du. (Ikl. 3:​12, 13) King Yuzaiya mi don geh yoostu di tel peepl weh fi du. Yu tink hihn mi feel laik ih kuda du eniting weh ih waahn? Wan day, ih gaan eena di templ ahn chrai bon insens pahn di alta, eevn doa dis da sohnting weh ih neva ga di atariti fi du. (2 Chron. 26:​16-18) Hai Prees Azaraiya mi chrai karek ahn, bot Yuzaiya mi geh beks wid ahn. Sad fi seh, Yuzaiya neva stay faytful ahn Jehoava mi ponish ahn wid leprosi. (2 Chron. 26:​19-21) If Yuzaiya mi stay hombl, ih laif wuda mi bee soh moch beta! w23.09 10 ¶9-10

Eevn afta di apasl Peeta mi geh anointid, hihn mi haftu kantinyu werk haad fi geh rid a ih weeknis dehn. Eena 36 C.E., Kerneelyos, wahn man weh da neva wahn Joo, mi geh anointid wid hoali spirit, ahn Peeta mi deh rait deh. Dis da-mi proof dat “Gaad chreet evribadi di saym way” ahn dat peepl weh da neva Joo kuda bee paat a di Kristyan kangrigayshan. (Aks 10:​34, 44, 45) Afta dat, Peeta mi staat eet wid dehn wan weh da neva Joo. Dat da sohnting weh hihn wuda neva du bifoa. Bot dehn mi stil ga sohn Jooish Kristyanz weh mi feel laik ih neva rait fi mek dehn eet wid peepl weh da neva Jooz. Wen som a di Kristyanz weh mi tink laik dat gaahn da Antiyak, Peeta mi stap eet wid di bradaz weh da neva Jooz. Hihn praabli mi du dat bikaaz ih mi frayd fi weh som a di Jooish Kristyanz mi wahn seh er tink bowt ahn. Wen di apasl Paal mi si dat Peeta di goh aan laik wahn hipokrit, hihn mi karek ahn. (Gal. 2:​13, 14) Eevn doa Peeta mi mek da mistayk, hihn neva giv op. w23.09 22 ¶8

Eldaz, unu mek op unu main fi bee wilin fi werk haad fi shepad Jehoava sheep? If yu aanis wid yuself, yu mait noatis dat yu ga tingz weh yu need fi werk pan, bot noh feel diskorij. “Di Laad kain” ahn hihn wahn help yu fi du beta. (1 Peet. 2:3) Di apasl Peeta tel wi: “Gaad . . . wahn finish unu chraynin. Ahn hihn wahn mek unu schrang.” Peeta yoostu feel laik ih neva dizerv fi deh kloas tu Gaad Son. (Look 5:8) Bot Peeta mi aybl fi kantinyu werk haad fi fala Krais bikaaz a di lov ahn sopoat weh ih get fahn Jehoava ahn fahn Jeezas. Sayka dat, Jehoava mi alow Peeta fi goh een chroo “di doa tu di evalastin Kingdom a wi Laad ahn Sayvya Jeezas Krais.” (2 Peet. 1:11) Dat da-mi wahn wandaful blesin! If yoo da laik Peeta ahn noh giv op ahn yu mek Jehoava chrayn yu, yoo ku geh evalastin laif tu. Yu “fayt wahn gi [yu] salvayshan.”—1 Peet. 1:9. w23.09 31 ¶16-17

Di tabernakl mi ga wahn koatyaad. Di koatyaad da-mi wahn oapm ayrya rong di tabernakl weh mi ga wahn fens rong it. Da rait deh di prees dehn mi du fi dehn werk. Fi egzampl, dehn yoostu aafa op bon aafrin pahn wahn alta weh mi mek owta kapa, ahn dehn yoostu kleen dehnself wid di waata weh deh eena di baysn weh mek owta kapa. (Eks. 30:​17-20; 40:​6-8) Tudeh, di res a Jeezas anointid bradaz serv Jehoava eena di sekant koatyaad eena di spirichwal templ. Di big baysn wid waata weh mi deh fronta di tabernakl ahn di templ help di 144,000, an aala wee az Kristyanz, fi memba dat wi need fi liv op tu Jehoava standadz ahn wi need fi kip wiself spirichwali kleen. Soh den, da wehpaat di “big krowd a peepl” di wership Jehoava eena di spirichwal templ? Di apasl Jan mi si di big krowd di “stan op fronta di chroan.” Dehn deh eena di fers koatyaad “di wership hihn [Gaad] day ahn nait eena ih templ.” (Rev. 7:​9, 13-15) Wi soh graytful fi di apachooniti Jehoava gi wi fi wership hihn eena ih spirichwal templ! w23.10 28 ¶15-16

Wan way weh Jehoava gi wi di schrent ahn help weh wi need da chroo di eldaz. (Isa. 32:​1, 2) Soh wen wi di wori, wi noh waahn mek notn hoal wi bak fahn tel di eldaz di prablemz weh wi di fays. Den aksep di help weh dehn gi wi, kaaz da chroo di eldaz Jehoava ku gi yu di schrent fi bayr op. Di pramis dehn weh wi reed eena di Baibl—weda fi liv da hevn, er fi liv eena wahn Paradais rait ya pahn ert fareva—gi wi di schrent fi kantinyu serv Jehoava. (Roam. 4:​3, 18, 19) Wi hoap help wi fi bayr op chroo wateva chraiyalz wi mait fays, preech di gud nyooz, ahn help owt eena di kangrigayshan. (1 Tes. 1:3) Da saym hoap da weh mi gi di apasl Paal di schrent fi bayr op. Sohntaim Paal mi “fays lata prablemz fahn aal bowt,” ih neva “noa weh fi du,” peepl mi “persikyoot” ahn, peepl mi “chroa [ahn] dong,” an eevn ih laif mi eena daynja. (2 Kor. 4:​8-10) Paal mi geh di schrent fi bayr op bikaaz ih mi foakos pan ih hoap fi di fyoocha (2 Kor. 4:​16-18) Paal mi foakos pahn di fyoocha hoap fi liv fareva da hevn. Bikaaz Paal mi meditayt pahn da hoap, fi hihn fayt mi geh “schranga ahn schranga evri day.” w23.10 15-16 ¶14-17

Wen yu pray, maybi yu ku tink if da taim fi mek Jehoava ansa yu pryaaz. Wi mait tink dat wi need wahn ansa tu wi pryaaz rait away, bot Jehoava noa wen da di rait taim fi help wi. (Heeb. 4:16) Wen wi noh geh weh wi aks fa rait away, wi mait feel laik Jehoava di tel wi ‘No.ʼ Bot ih ku bee dat ih akchwali di tel wi ‘Noh yet.ʼ Tink bowt wahn yong brada weh mi pray fi mek Jehoava kyoar ih siknis, bot ih neva geh beta. If Jehoava mi du wahn mirakl ahn heel ahn, den Saytan kuda mi seh dat di onli reezn wai di brada mi kantinyu serv Jehoava da-mi bikaaz ih kyoar ahn. (Joab 1:​9-11; 2:4) Bot, Jehoava don set wahn taim wen ih wahn geh rid a aal kaina siknis. (Isa. 33:24; Rev. 21:​3, 4) Til da taim kohn, wi noh fi ekspek Jehoava fi du wahn mirakl fi heel wi. Soh insted, di brada kud aks Jehoava fi giv ahn di schrent fi indyoar ih siknis soh dat ih ku stay faytful ahn kantinyu serv ahn. w23.11 24 ¶13

Samson mi mek wahn big mistayk, bot ih neva giv op. Ih mi stil waahn du weh Jehoava aks ahn fi du, soh ih mi chrai fain wahn nada way how ih kuda mi fait gens di Filisteen dehn. (Joj. 16:​28-30) Samson mi beg Jehoava fi help ahn wan laas taim, an ih seh: “Mek Ah tek rivenj pahn di Filisteen dehn.” Jehoava mi ansa Samson pryaa an ih giv ahn bak di saym powa weh ih yoostu gat. Dis taim Samson mi kil moa Filisteen dan eva bifoa. Samson mi sofa di kansikwens a ih mistayk, bot dat neva stap ahn fahn serv Jehoava. If wi mek wahn mistayk ahn need karekshan er looz wahn privilij, wi noh fi giv op. Memba dat Jehoava noh giv op pahn wi, bot hihn redi fi fergiv wi. (Saa. 103:​8, 9) Eevn if wi mek mistayk, Jehoava ku stil yooz wi fi du fi hihn wil jos laik how hihn mi kantinyu yooz Samson. w23.09 6 ¶15-16

Soh wi ku bee shoar dat wi mek Jehoava hapi wen wi bayr op anda chraiyalz. Dat noh meen dat Jehoava hapi fi si yu di sofa er di goh chroo haad taimz. Bot di reezn hihn hapi da bikaaz hihn si yoo di bayr op noh mata wat. Dat soh wandaful fi noa dat wee ku mek Jehoava feel da way bikaaz wi bayr op! (Saa. 5:12) Memba dat Jehoava mi hapi wid Aybraham bikaaz ih mi bayr op chroo ih chraiyalz, ahn bikaaz a dat Jehoava si ahn az wahn raichos persn ahn kaal ahn Ih fren. (Jen. 15:6; Roam. 4:​13, 22) Dis help wi fi si dat Jehoava ku si wi di saym way tu. Hihn noh pleez wid wi jos bikaaz a humoch wi du far ahn er di privilij dehn weh wi gat. Hihn hapi wen wi stay faytful ahn bayr op chroo wi chraiyalz. Dat da sohnting weh aala wi ku du, noh mata wi ayj, weh wi di goh chroo, er humoch wi ku du. If yoo di goh chroo wahn chraiyal rait now, yu ku bee shoar dat yu di mek Jehoava hapi bikaaz yu stay faytful tu ahn. Wen wi tink bowt dat, dat ku reeli mek wi hoap geh schranga. w23.12 11 ¶13-14

Wahn Kristyan man need fi laan fi lisn an ekspres ihself gud. Wahn man weh du dat wahn lisn an andastan how adaz tink ahn feel. (Prav. 20:5) Hihn ku laan fi andastan how sohnbadi di feel bai di way dehn taak, di ekspreshan pahn dehn fays, ahn di way how dehn ak. Yu kyaahn laan how fi du dis if yu noh spen taim wid peepl. If yu aalwayz yooz eemayl, teks mesij, er ada ilekchranik divais fi taak tu peepl, den dat wahn mek it moa haada fi taak tu dehn fays tu fays. Soh chrai luk fi wayz fi taak tu peepl fays tu fays. (2 Jan 12) Wahn machoar Kristyan man need fi tek kayr a ihself an ih famili tu. (1 Tim. 5:8) Ih wuda gud fi laan wahn skil er chrayd weh ku help yu fain wahn jab. (Aks 18:​2, 3; 20:34; Ifee. 4:28) Mek adaz noa yu az sohnbadi weh werk haad ahn finish weh yu staat. If yu du dat, ih wahn eeziya fi fain wahn jab ahn kip it. w23.12 27 ¶12-13

Wen di Baibl taak bowt “Jehoava day,” ih di taak bowt di taim wen Jehoava wahn sayv ih peepl ahn dischrai ih enimi dehn. Jehoava mi du dis eena di paas wen ih mi ponish sohn nayshan. (Isa. 13:​1, 6; Ezek. 13:5; Zeph. 1:8) Eena fi wee taim, “Jehoava day” wahn staat wen di politikal leedaz dischrai Babilan di Grayt ahn den ih wahn finish aaf wid di waar a Armagedon. If wi waahn servaiv da “day,” wi haftu pripyaa now. Jeezas mi seh dat wi haftu pripyaa fi di “grayt chribyulayshan.” Pahn tap a dat, ih mi aalso seh dat wi haftu aalwayz “bee redi” far it. (Mach. 24:21; Look 12:40) Eena di fers leta weh Jehoava mek di apasl Paal rait tu di Tesaloanyanz, di apasl mi yooz sohn iloschrayshan fi help di Kristyanz fi aalwayz bee redi fi Jehoava day. Paal mi noa dat Jehoava day neva mi wahn kohn rait away. (2 Tes. 2:​1-3) Bot hihn mi stil waan di Kristyanz fi bee redi fi da day jos laik if da mi tumaaro. Fi hihn advais gud fi wee tu. w23.06 8 ¶1-2

Eena 1978, da Tokyo, Japan, dehn mi bil wahn taal taal bildin weh 60 floa hai. Peepl mi-di wanda how da bildin mi wahn hoal op wen wahn ertkwayk hapm bikaaz eena da siti, dehn wuda aalwayz gat ertkwayk. How di peepl weh dizain dis bildin mi mek shoar dat ih noh geh dischrai wen wahn ertkwayk hapm? Dehn mi mek it schrang inof, bot ih mi aalso fleksibl soh dat eevn if wahn ertkwayk shayk it, ih mi wahn stil stay di stan op. Kristyanz da jos laik da taal bildin. Eena weh way? Wahn Kristyan need fi bee balans. Ih kyaahn bee tu schrik an ih kyaahn bee tu fleksibl. Wen ih kohn tu Jehoava laa ahn standadz, ih need fi stan op schrang an ih noh fi du notn weh brok Gaad laa. Wahn Kristyan need fi bee “redi fi obay” Gaad laa noh mata wat. Bot ih aalso need fi bee reeznabl ahn shoa dat ih “noh waahn ih oan way aal di taim.” (Jay. 3:17) Wahn Kristyan weh noa how fi bee balans noh wahn bee tu schrik ner tu saaf wen ih kohn tu di way how ih vyoo Gaad laa. w23.07 14 ¶1-2

Saytan mi chrai temp Jeezas fi sin, an ih mi eevn chrai get ahn fi wership hihn insteda Gaad. (Mach. 4:​1-11) Saytan neva waahn Jeezas pay di ransom prais, soh hihn mi du evriting weh ih kud fi chrai stap ahn. Wen Jeezas mi staat ih minischri, hihn gaahn chroo eevn moa chraiyalz. Ih enimiz mi persikyoot ahn, an eevn chretn fi kil ahn. (Look 4:​28, 29; 13:31) Hihn mi haftu put op wid di mistayk dehn weh ih disaiplz mek. (Maak 9:​33, 34) Ahn wen dehn mi put ahn pahn chraiyal bifoa dehn kil ahn, tingz mi geh eevn wers far ahn. Joorin da taim, dehn mi taacha ahn, tek ahn mek papishoh, ahn mek ih sofa wahn lat bifoa dehn fainali kil ahn laik wahn kriminal. (Heeb. 12:​1-3) Den ih mi haftu sofa ahn ded pahn di taacha stayk hihn wan, widowt Jehoava help. (Mach. 27:46) Ih klyaa fi si dat Jeezas mi haftu gaahn chroo wahn lat fi giv ih laif az wahn ransom fi wi. Wen wi tink bowt aal di sakrifais weh Jeezas mi mek fi wi, wi lov ahn eevn moa, noh chroo? w24.01 10-11 ¶7-9

Wen wi ga payshens, dat help wi fi ga wahn gud rilayshanship wid adaz. Ih help wi fi reeli pay atenshan tu adaz wen dehn di taak tu wi. (Jay. 1:19) Payshens help wi fi kip pees wid adaz tu. Soh wi noh wahn hori fi seh sohnting weh wuda hert sombadi feelinz if wi feel schres owt. If wi ga payshens, wi noh wahn eezi fi geh beks wen adaz hert wi feelinz. Insteda insolt dehn bak, wi wahn “kantinyu fi put op wid wan anada ahn fergiv wan anada wid aala [wi] haat.” (Kol. 3:​12, 13) Payshens ku aalso help wi fi mek beta disizhanz. Insteda bee haysti wen wi di chrai mek wahn disizhan, wi need fi tek di taim fi tink bowt wi opshanz ahn den si wich wan wuda werk owt bes fi wee. Fi egzampl, if wi di luk fi wahn jab, wi mait waahn tek di fers jab weh wi fain. Bot wen wi payshent, wi wahn tek di taim fi tink bowt how faar wi wahn haftu chravl fi get da werk, ahn how dis jab wuda afek wi famili ahn wi rilayshanship wid Jehoava. Wen wi payshent, wi ku sayv wiself fahn mek bad disizhanz. w23.08 22 ¶8-9

If yu feel diskorij bikaaz yu haftu fait gens rang dizaiyaz, tink bowt di pramis weh yu mek tu Jehoava wen yu dedikayt yu laif tu ahn, ih wahn help yu fi stay faytful noh mata weh kaina temtayshan kom op. How yu dedikayshan ku help yu wen yu fays temtayshan? Wen yu dedikayt yu laif tu Jehoava, yu disoan yuself. Dis meenz dat yu wahn seh no tu eni rang dizaiya er goal weh noh pleez Jehoava. (Mach. 16:24) Soh wen yu fays sertn tes, yu noh wahn haftu di wanda weh yu wahn du. Yu mayn goal now da fi pleez Jehoava, ahn yu don mek op yu main fi stay laayal tu ahn noh mata wat. Yu wahn bee laik Joab, hoo mi seh: “Ah wahn stay faytful tu Gaad til Ah ded!”—Joab 27:5. w24.03 9 ¶6-7

Jehoava, “di Gaad a lov,” deh wid wi! (2 Kor. 13:11) Hihn kay bowt eech wan a wi, ahn wee ku bee shoar dat “Jehoava laayal lov wahn protek enibadi weh chros eena ahn.” (Saa. 32:10) Di moa wi meditayt pahn how Jehoava shoa ih lov fi wi, di moa wi wahn si humoch ih kay bowt wi ahn wi wahn feel kloasa tu ahn. Wee ku pray tu Jehoava widowt feel frayd ahn tel ahn humoch wi need ih lov. Wee ku tel Jehoava eniting weh di bada wi, bikaaz wi ku bee shoar dat ih andastan wi an ih waahn help wi. (Saa. 145:19) Jos laik how wahn faiya ku mek wi feel waam pahn wahn koal day, da rait soh Jehoava lov ku gi wi komfert. Eevn doa Jehoava lov powaful, ih aalso waam. Soh bee hapi wen yu feel Jehoava lov. Ahn den yu wahn ku rispan tu Jehoava lov ahn seh: “Ai lov Jehoava”!—Saa. 116:1. w24.01 31 ¶19-20

Jeezas mi du moa dan jos tel peepl dat Gaad naym da Jehoava. Di Jooz weh Jeezas mi teech mi don noa Gaad naym. Bot Jeezas da “di wan weh . . . eksplayn hoo da Gaad.” (Jan 1:​17, 18) Fi egzampl, di Heebroo Skripchaz shoa wi dat Jehoava da wahn Gaad weh shoa lata mersi ahn weh ga kompashan. (Eks. 34:​5-7) Jeezas shoa wi dat dis da chroo wen ih tel wi bowt di iloschrayshan a di prodigal son an ih pa. Eena dis iloschrayshan, wi laan dat wen di pa mi si ih son “wail ih mi stil deh wahn distans fahn di hows,” ih ron fi meet ahn, hog op ahn, an fergiv ahn fan ih haat. Dis mek it klyaa dat Jehoava da wahn Pa weh shoa wahn lata mersi ahn kompashan. (Look 15:​11-32) Jeezas help wi fi reeli noa weh kaina Persn Jehoava. w24.02 10 ¶8-9

Jehoava komfert ahn rifresh wi wen wi schres owt kaaz a wi woriz. How wi ku kapi Jehoava ahn feel kompashan fi wi bradaz ahn sistaz ahn gi dehn di komfert weh dehn need? Wan way wi ku du dis da wen wi werk pahn kwalitiz weh wahn help wi fi fain wayz fi komfert dehn. Mek wi si sohn kwalitiz weh ku help wi. Weh wahn help wi fi kip di lov weh wi need soh dat wi ku “kantinyu fi komfert wan anada” evri day? (1 Tes. 4:18) Aala wi need fi kantinyu werk haad fi shoa kompashan ahn kainis fi adaz ahn lov wan anada laik famili. (Kol. 3:12; 1 Peet. 3:8) Wen wi ga kompashan fi wi bradaz ahn sistaz ahn wi reeli kay bowt dehn, ih mek wi ga wahn schrang dizaiya fi help dehn wen dehn di sofa. Jos laik weh Jeezas mi seh, “wateva ful op wahn persn haat, dat da weh ih wahn taak bowt. Di gud man seh gud tingz kaaz ih ga gud tingz eena ih haat.” (Mach. 12:​34, 35) Wen wi komfert wi bradaz ahn sistaz enitaim dehn need it, wi shoa dat wi reeli lov dehn wahn lat. w23.11 10 ¶10-11

If wee noh andastan wahn Baibl prafesi, wi need fi aks fi help. Mek wi luk pahn wahn egzampl. Imajin yoo deh da wahn plays weh yu noh noa. Bot yu ga wahn fren weh noa evriting bowt da plays an ih deh wid yu. Hihn noa wehpaat fi goh er weh road fi tek. Yu hapi dat yu fren mi agree fi kohn wid yu, noh chroo? Jos laik da fren, Jehoava noa di taim weh wi di liv eena ahn hihn noa weh wahn hapm eena di fyoocha. Soh if wi waahn andastan Baibl prafesi, wi need fi aks Jehoava fi help. (Dan. 2:28; 2 Peet. 1:​19, 20) Jos laik wahn lovin pa, Jehoava waahn ih pikni dehn ga wahn hapi fyoocha. (Jer. 29:11) Bot hihn difrent fahn wahn hyooman pa bikaaz hihn ku tel wi di fyoocha an evriting weh hihn seh da chroo. Ahn fi mek wee ku noa bowt impoatant ivents bifoa dehn hapm, Jehoava mi pik sohn man fi rait sohn prafesi eena di Baibl.—Isa. 46:10. w23.08 8 ¶3-4