Di Tent Ponishment

Moaziz mi pramis Fayro dat ih noh wahn chrai goh si ahn agen. Bot bifoa ih lef, ih tel Fayro: ‘Rong midnait, aala di fersbaan son dehn da Eejip, fahn di son a Fayro tu di son a di slayv dehn, wahn ded.ʼ

Jehoava mi tel di Izrelaits fi pripyaa wahn speshal meel. Hihn mi seh: ‘Kil wahn wan-yaa-oal mayl sheep er goat, ahn put som a ih blod pahn yu doa fraym. Roas di meet, an eet it wid sohn bred weh noh gat een ees. Mek shoar fi gat aan unu kloaz ahn sandalz, ahn bee redi fi lef. Tunait Ah wahn set unu free.ʼ Yoo ku imajin how eksaitid di Izrelait dehn mi eksaitid?

Rong midnait, Jehoava aynjel gaahn da evri hows da Eejip. Da di hows dehn weh neva ga blod pahn di doa fraym, di fersbaan son mi ded. Bot di aynjel mi paas oava di hows dehn weh mi maak wid blod. Evri Ijipshan famili, noh mata if dehn mi rich er poa, mi looz dehn fersbaan son.

Eevn Fayro oan son mi ded. Fayro kudn tek it nohmoh. Ih kaal Moaziz an Ayron ahn tel dehn: ‘Unu get owt fahn mi lan. Goh wership unu Gaad. Goh fahn ya ahn kehr aala unu animal wid unu!ʼ

Di nait wen di Izrelait dehn mi maach owta Eejip dehn mi ga wahn ful moon. Dehn mi aaganaiz bai famili ahn chraib. Da mi bowt 600,000 Izrelait man ahn lata wuman ahn chiljren. Aalso, wahn lata peepl gaahn wid dehn soh dat dehn ku wership Jehoava tu. Di Izrelait dehn mi fainali free!

Fi memba how Jehoava mi sayv dehn, dehn mi need fi ga da saym speshal meel evri yaa. Dehn mi kaal it di Paasoava.