Di Neks Siks Ponishment

Moaziz an Ayron gaahn tel Gaad mesij tu Fayro: ‘If yu noh let goh mi peepl, Ah wahn sen da Eejip sohn big flai weh bait.ʼ Noh mata if di Ijipshan dehn mi rich er poa, aala dehn hows mi ful op a di big flai dehn. Di hoal konchri mi ful op a dehndeh big flai. Bot eena di lan a Goashen, wehpaat di Izrelait dehn mi liv, dehn neva ga dehndeh big flai. Dis foat ponishment ahn di adaz afta dat mi afek onli di Ijipshan dehn, noh di Izrelaits. Fayro mi beg Moaziz: ‘Tel Jehoava fi geh rid a dehnya flai, ahn yu peepl dehn wahn ku goh.ʼ Az soon az Jehoava mi geh rid a di big flai dehn, Fayro chaynj ih main. Yu tink Fayro wuda eva laan ih lesn?

Jehoava mi seh: ‘If Fayro noh mek mi peepl goh, di Ijipshan animal dehn wahn geh sik ahn ded.ʼ Di neks day, di animalz staat tu ded. Bot di Izrelait animalz neva did ded. Stilyet, Fayro mi stobant, an ih neva let goh di Izrelaits.

Den Jehoava tel Moaziz fi goh bak da Fayro ahn chroa sohn ashiz eena di ayaa. Di ashiz mi ton intu dos weh mi kova di hoal lan a Eejip an ih mi jrap pahn di Ijipshan dehn. Di dos mi mek di peepl ahn di animal dehn kech sohn terabl bail weh spred aal oava dehn badi. Fayro stil neva obay. Ih neva mek di Izrelait dehn goh.

Jehoava sen Moaziz bak tu Fayro wid dis mesij: ‘Yoo stil noh let goh mi peepl? Tumaaro, Ah wahn sen wahn bad haylstaam.ʼ Soh di neks day, Jehoava sen dong haylstoan, tonda, ahn faiya. Da mi di wers staam weh mi eva hapm da Eejip. Aala di chree ahn plaant dehn mi geh dischrai, bot notn hapm da Goashen. Fayro mi seh: ‘Beg Jehoava fi mek dis stap! Den unu wahn ku goh.ʼ Bot az soon az di haylstaam ahn di rayn mi stap, Fayro chaynj ih main.

Den Moaziz mi seh: ‘Di loakos dehn wahn eet evri plaant weh mi lef bihain afta di haylstaam.ʼ Milyanz a loakos mi eet op evriting weh mi lef eena di feel dehn ahn pahn di chree dehn. Fayro seh: ‘Pleez beg Jehoava fi tek weh dehnya loakos fahn ya.ʼ Bot eevn afta Jehoava mi stap di loakos, Fayro mi stil stobant.

Jehoava mi tel Moaziz: ‘Schrech owt yu han tuwaadz di skai.ʼ Rait away, Moaziz mi schrech owt ih han tuwaadz di skai ahn di hoal a Eejip mi kova wid daaknis. Fi chree dayz di Ijipshan dehn kudn si wan anada ahn dehn kudn si eniting. Onli di Izrelaits mi ga lait eena dehn hows.

Fayro mi tel Moaziz: ‘Yoo ahn yu peepl ku goh wership Jehoava. Jos lef yu animal dehn ya.ʼ Moaziz tel ahn: ‘Wi need fi kehr wi animal dehn soh dat wi ku mek wahn aafrin tu wi Gaad.ʼ Fayro mi geh soh beks dat ih seh: ‘Get fahn fronta mi! If Ah si yu agen, Ah wahn kil yu.ʼ