Ru humá uéiriguni lun Heowá lidan hamarieidun

1, 2. Ka labusenrunbei Heowá hámagiñe adarigu?

GADARADUNÑADÜN SAN? Hadügüña san aransehani lubá hamarieidun? Anhein ítara liña lubéi, gúndaatiwa hau! Chóuruti hadügüña lan aransehani lubá hamarieidun. Busenti Heowá lun gunda humá weyu ligía luma lun buidu lan lidin hun lidan hibagari keisi maríeitiñaa (Ari. 5:18; Ure. 3:11).

² Gadünati Heowá lun híchugun uéiriguni lun danme le hamarieidun. Ka uagu? Ani ida luba hachoururuni lun ítara luba lan? Lidan aturiahani le, wóunabubei bián álügüdahani le. Íbini houn lan adarigu ha lúnbaña hamarieidun aturiahani le, lahuuduba giñe woun sun wagía wakutihani adundehani le lun wíchugun sun wagía uéiriguni lun Heowá, ánhawa amisurahóua o lamuriahóun adundehani wama.

KA UAGU LUNTI LUBÉI LICHUGÚN UÉIRIGUNI LUN HEOWÁ

3. Ka lunbei gabaroun hamani kristiánugu inarünitiña danme le hadügüña lan aransehani lubá hamarieidun, ani ka uagu?

³ Danme haransehaña lan kristiánugu inarünitiña lun hamarieidun, lunti gabaroun hamani le lariñagubei Heowá tidan Lererun. Ka uagu? Ladüga Heowá íchugubalin maríei. Ligía amarieidagüdübaliña furumiñetiña gürigia, Adán tuma Ewa (Agu. 1:28; 2:24). Ligíati, huguya le gadaradunbei lunti súdinitima lan ladundehan Bungiu hun.

4. Ka amu katei lunbei hadügüni lun gabaroun humani ligaburi larihini Heowá maríei danme le hadügün aransehani lubá hamarieidun?

⁴ Aban katei le lunbei gabaroun hamani ha lúnbaña hamarieidun danme le hadügüña lan aransehani lubá maríei, lunti gabaroun hamani ligaburi larihini Heowá maríei, lugundun ligía Wáguchibei ani ligía giñe bésibei wamada (Ebü. 12:9). Kei busén hubéi lun hóunigiruni humadagua luma, mabusenrunbadün lun lasuseredun ni kata wuribati lidan hamarieidun ni lun hagañidagüdüni (Sal. 25:14). Lau hasaminarun luagu sun le adüga láalibei Heowá huagu, ma gadünati lun híchugun uéiriguni lun lidan luéyuri hamarieidun? (Sal. 116:12).

IDA LUBA HÍCHUGUN UÉIRIGUNI LUN HEOWÁ

5. Ida luba tíderaguniña Bíbülia adarigu lun buidu lan le lunbei hanúadiruni lubá hamarieidun?

⁵ Úatu aban lísüta tidan Bíbülia libügürü ida luba lan ladügǘn o lefeduhóun maríei. Anihein ámuñegueinarügü katei le lunbei hadügüni ha lúnbaña hamarieidun según le gádanbaliña o hechun o le hínsiñebei houn. Lau sun lira, inebeti giñe lilurudun ageiraü woun wagía kristiánugu inarünitiña luagu katei le (Mat. 22:21). Anhein hafalara ha lúnbaña hamarieidun adundehani le tídanbei Bíbülia meberesenga le hanúadirubei, líchuguba le lunbei hanúadiruni uéiriguni lun Heowá ani hagundaaragüdübei. Ariha wamá fiu lídangiñe adundehani le.

6. Ka uagu súdini lubéi lun hagunfulirun ha gadaradunbaña luma le lamuriahabei lúrudu lun gayara lan hamarieidun? (Rómana 13:​1, 2).

⁶ Gúnfuli humá lau le lamuriahabei lúrudu (Rom. 13:​1, 2). Lidan saragu ageiraü anihein lúrudu le lunbei hagunfuliruni ha gadaradunbaña lun gayara lan hamarieidun. Ligíati, álügüdaha humá lidan fulasu le ñein lubéi hawinwanda ka lan lamuriahabei lúrudu lun gayara lan hamarieidun. Anhein megei hubéi ídemuei gayaraati hamuriahani hama wéiyaaña lidan afiñeni.b

7. Ka igaburi lunbei larihín lidan aban maríei le hani kristiánugu inarünitiña?

⁷ Chouru huméi híchugun uéiriguni lun Heowá (1 Ko. 10:​31, 32). Áfaagua humá harufuduni lidan le hadügübei lidan hamarieidun áyeiha humani igaburi le líchugubei lani Bungiu sífiri, mama igaburi le lídanbei ubóu (Gal. 5:​19-26). Keiti le adariba lan ichügüdinaü lidan libagari keisi maríeiti, ligía lunbei larihin lun lichugún uéiriguni lun Heowá luma lun ñein lan ugundani. Kaba adüga lun buidu lan léibugun katei? Sagatiña ha achülürübaña buiti lídangiñe yanu tídangiñeti Bíbülia le ichugúbei lau ínsiñeni luma lau inebesei, ani ariha hamuti maríei kei aban idewesei lúmagiñeti Bungiu ani ariha hamuti giñe kei aban katei súdiniti mama kei aban huraraü. Ligía lébubei hanúadirun saragu adarigu lun lichugún yanu houn tidan Luban Adamuridaguni, anhein gayara. Anhein busén habéi ha lúnbaña hamarieidun hayusurunu Luban Adamuridaguni, lunti habürühan houn wéiyaaña lidan afiñeni ha ñéinbaña lau dan.

8. Anhein hefeduhabei lubéi hamarieidun, ka lunbei hadügüni lun líchugun fedu ligía uéiriguni lun Heowá? (Rómana 13:13).

⁸ (Aliiha huméi Rómana 13:13). Anhein hadügüba lubéi fedu o adineruni, ka lunbei hadügüni lun máyeihan humani ligaburi ubóu? Dimurei güriegu le ásügürawagüdübei kei “lanarime fedu” lidan Rómana 13:​13, layanuhaña luagu fedu le ñein lubéi hátagua gürigia saragu, ani dáüngüda músika áriebu. Anhein ñeinbei lubéi uniñein, góunigi huméi ligaburi heseriwihan lun ua ni aban átuti lóugiñe le lunbei látuni luéi labacharuadun.c Anhein ñeinbei lubéi músika, chouru huméi lun buidu lan lamuri lun lígirun lun hayanuhan gürigia lau darangilaü. Lau lira, chekü huméi buidu kaba lan músika híchiga luma ka lan lariñagubei lila uremu burí ligía lun ua hamá ni aban gürigia asandiragutiña hougua wuriba.

9. Ka lunbei gabaroun hamani ha lúnbaña hamarieidun luagu le lunbei ladügǘn lidan fedu le lánina maríei?

⁹ Hayanuhaba san somu hiduheñu o humadagu lidan fedu le o harufuduba somu iyawaü o bidéu o ñeinbei somu isebáhari lun léheragüdüniña gürigia? Gayaraati ladügün katei le lun buidu lan hásügürüni idewenegu. Ligíati chouru huméi gadünamabei lan sun katei le lunbei hadügüni ani adüga ligíame lun buidu lan hasandiragun gürigia houngua (Fili. 4:8). Álügüdagua humá hungua: “Larufuduba san le lunbei ladügǘn lidan fedu inebe lan le hasaminarubei amu hun? Larufuduba san inebesei lun maríei?”. Ani le súdinitimabei: “Líchuguba san uéiriguni lun Heowá?”. Íbini gayaraabei lan ñein lan somu katei le adügübei lun héherahan gürigia, moun lumuti hariñagun katei le madünamati o le adügüti lun hasaminarun gürigia luagu agamariduni (Efe. 5:3). Anhein hadimurehaba lubéi hiduheñu o humadagu chouru huméi kaba lan hariñaga luma lun hasubudiruni le hisaminanbei ani lunti inebe lan houn.

10. Ka uagu moun lumuti lubéi hadügün adarigu katei le aweiridagüdüti hanigi gürigia? (1 Huan 2:​15-17; ariha humóun giñe iyawaü).

¹⁰ Madüga humá katei le adügüti lun haweiridagüdünu hanigi amu (aliiha huméi 1 Huan 2:​15-17). Wéiriti lebegi lun Heowá dan le híchugun lubúeingu uéiriguni lun lubaragiñe híchugun uéiriguni hóuniwagua lidan aban igaburi le mabuidunti. Ligía háfaagunbei íbirigu ha lúnbaña hamarieidun lun magastarun hamá saragu seinsu luma lun “madügün hamá katei lau pantaü”, lidan amu dimurei, lun mapantahan hamá lau hamati. Kaba buiti hibiha ánhadün adüga aban fedu le manarimeguti? Aganba huméi le lariñagubei aban íbiri noruegana gíriti Mike: “Mebelutiwa lidan dúeiti, adügati lira lun wasigirun eseriwida kei prekursoru. Íbini manarimegu lan fedu le wadügübei, mabulieidun wamagili buidu lan wásügürüni weyu ligía”. Ariñagatu aban íbiri indiana gíritu Tabitha: “Kei mabouchagun wabalin wachügü adüga saragu katei, ligía ua lubéi sigenei waganagua. Adügati lira lun madiheridun wamá saragu”.

11. Ida luba harufuduni ha lúnbaña hamarieidun mabusenrun hamá haweiridagüdünu hanigi gürigia lau ligaburi hadaüragun luma haranseragun houngua? (Ariha humoun giñe iyawaü).

¹¹ Subudi humaali san ida tuba lan hadaüragun? Chóuruti busenbadün lan lun wendei humá weyu ligía. Íbini lidan tidaani Bíbülia dandu meha wügüri kei würi wéndeñu liña meha hariawagúniwa (Isa. 61:10). Inarüni, másiñati lan daüguaü lan to lunboun hadaürünu weyu ligía mítaran tan kei to hadaürüboun lidan amu burí dan, lau sun lira, lunti buidu tan ani gadünama tuguya (1 Tim. 2:9). Madüga humá lun taweiridun hanigi gürigia tau to hadaüragun o luagu katei le hayusurubei lidan hamarieidun (1 Fe. 3:​3, 4).

12. Ka uagu lunti lubéi hakutihani ha lúnbaña hamarieidun somu échuni lubaragiñe hafalaruni?

¹² Maha humá lun échuni le múaranti luma le tariñagunbei Bíbülia (Aruf. 18:4). Kamaniti lafalarúniwa lidan maríei échuni le mébunati, échuni le gániti tuma relihión mama inarünitu, luma échuni le hámagiñeti máfianu. Lau sun lira wéiridi lumutiwa Heowá lun díseñu wamá luéi sun katei le wíyeti (2 Ko. 6:​14-17). Ligíati, anhein machourun hubéi luagu somu échuni le adügǘbei lidan maríei lidan fulasu le ñein lubéi hawinwanda, akutiha huméi halíagiñe lan láhücha ani áluaha huguyame ariñahani tídangiñe Bíbülia ani áluaha huguyame adundehani lun hasubudiruni anhein úara lubéi luma le tariñagubei Bíbülia, lubaragiñe hanúadirun hafalaruni lidan hamarieidun.

13. Ida luba harufuduni adarigu ariha hamani idewesei kei larihini Heowá?

¹³ Héchuwati san lidan fulasu le ñein lubéi hawinwanda lun lichugún idewesei houn amarieidutiña? Másiñati según lan lila habusendun gürigia ítara liña idewesei le híchugunbei. Lau sun lira ínchaha tumutiña Bíbülia kristiánugu inarünitiña lun gíchigadi hamá, ani lau hadügüni katei le adügati lun gunda hamá (Ari. 11:25; Adü. 20:35). Lau sun lira mabuseeruntiña adarigu lun hasandiragun ha agunbirahóubaña houngua hafosurúña lan lun híchugun somu idewesei houn, ni giñe lun harufudun amarieidutiña magundani luagu idewesei le íchugubei houn ladügarügü maserun lan. Ani áfaaguatiwa wagía lubúeingu Heowá lun warihini idewesei kei larihini, ani teinki wamutiña ha íchugubaña furumiñeguarügü katei woun lau ínsiñeni mama ladüga hafosuruña lan lun híchugun (2 Ko. 9:7).

IDA LUBA HARANSERUN SOMU TUROBULI

14. Ka burí uma hagagibudagua ha lúnbaña hamarieidun?

¹⁴ Másiñati hénrengu lan ladügǘn aransehani lun ladügǘn aban maríei le íchuguti uéiriguni lun Heowá. Kéiburi, ladügǘn aban fedu le maweirinti. Ariha waméi le asuseredubei lun Charlie, le awinwandubei lidan ubouhu Salomón: “Güreweiti meha woun, wanúadirun kaba lan wagunbirahan lugundun gíbetiña wamadagu ani lidan fulasu le ñein lubéi wawinwanda agurabatiña gürigia lun hagunbirahóuniwa”. Ariñagatu Tabitha, to uáguboun wayanuhan lidan párafu 10: “Lidan fulasu le ñein lubéi nawinwanda kamaniti hagunbirahóun saragu gürigia. Ligíati barüti meha dan lun wadügün lun hánharun wagübürigu lun le wasaminarubei libügürü sánrügübaña lan gürigia wagunbirahan”. Ariñagatu Sarah, to lídangiñeboun ageiraü India: “Añahein hagía wéiriti híchaagun houngua lun harufuduni gaseinsun hamá. Kei hanarime lan fedu le hadügübei libasenu núguchi aba hadügüdarun fiu gürigia nuagu mosu lan nadügün aban fedu le hanarimetimati luéi”. Ka gayaraabei líderagunün lidan sügǘ le luma burí lidan amu?

15. Ka uagu súdini lubéi lun lafurieidúniwa dan le ladügǘña lan aransehani lubá maríei?

¹⁵ Gabügürügua lan hafurieidun luagu aransehani le hadügübei lubá hamarieidun. Gayaraati hayanuhan luma Heowá luagu furumiñeguarügü katei le lunbei hanúadiruni luma luagu furumiñeguarügü le adiheridagüdübadün (Fili. 4:​6, 7). Gayaraati giñe hamuriahan luma lun líderagunün lun buidu lan hanúadirun, lun hakipurun darangilaü dan le gibe lan katei lun hichügü luma lun harufudun ganigi dan le mégeiwa lan (1 Fe. 5:7). Éibume harihini ida liña lan lóunabuni Heowá hafurieidun, ábatimaame lederebugudun hafiñen luagu. Sigitu Tabitha ariñaga: “Dandu meha nuguya luma nadari nidiheritiwa meha luéi anihein lan magundani wadan luma hadan waduheñu. Ligíati, lubaragiñe wayanuhan luagu kaba lan wadüga, furíeitiwa meha súnwandan. Ariha wamuti ida liña lan líderaguniwa Heowá lun darangilu wamá”.

16, 17. Ka uagu lunti lunbei lañuurúniwa ayanuha dan le ladügün aransehani lubá maríei?

¹⁶ Ayanuha humá furangu ani lau inebesei (Ari. 15:22). Gíbeti katei lunti ladügǘn dan le ladügǘniwa aransehani lubá aban maríei, kei burí kaba lan weyu, átiribei lan seinsu agastarúa, átiribaña lan gürigia agunbirahóua, katei líbeina lira. Lubaragiñe hanúadiruni kaba lan hadüga, akutiha huméi úara, ka lan buídubei hun; ka lan adundehani tídangiñeti Bíbülia gayaraabei hafalaruni lúmati lun hakutihani adundehani le híchugubei kristiánugu ha derebugu tafiñen hun. Danme hariñaguni le hasaminarubei, ariñaga huméi lau ínsiñehabuni áfaagua humá lun gunfuranda humaniña ha úmabaña hayanuhan ani ánhara humá lun le hasaminarubei anhein gayara. Ánhaña amuriaha hiduheñu, kei burí hagübürigu lun hadügün somu katei le hínsiñebei hamuga houn, houcha humá lun hagundaaragüdüniña. Lugundun aban giñe weyu espechaliti lira houn. Anhein siñá lubéi hagundaaragüdüniña afuranguagüda huméi houn lau ínsiñeni luma inebesei ka lan uagu siñá lubéi (Kol. 4:6). Íderagua humaña arihei létima lan habusenrunbei lun buidu lan hásügürüni weyu ligía luma lun híchugun uéiriguni lun Heowá.

¹⁷ Ánheinti mama lubéi gefentiña luagu Heowá hagübürigu? Gayaraati hénrengubei lan hun lun hafuranguagüdüni houn ka lan hanúadirubei hadügün, lau sun lira buídubei lidin hun anhein hafuranguagüda houn lau ínsiñeni. Ariñagati aban íbiri gíriti Santhosh: “Busentiña meha waduheñu wafalarun fiu échuni hani indú lidan wamarieidun. Barüti saragu dan lun gunfuranda hamani waduheñu le wasaminarubei wadügün. Ábati wagundaaragüdüniña lau fiu katei le aubei wasaminara magañidagüdün wabéi lan Heowá. Kéiburi, sansi wamuti éigini le lunbei wíchaahani lun lichaahóuniwa éigini le aubei hagundaara wagübürigu. Aba giñe wanúadirun lun ua lan eremuhani ni abinahani ladüga méchuntiña wagübürigu luagu lira”.

18. Kaba íderaguaña amarieidutiña lun láfuridun sun katei le aranserúaalibei lidan dan? (1 Korintuna 14:40; ariha humoun giñe iyawaü).

¹⁸ Houcha humá lun lidan lan lubudubu aransehani le hadügübei. Anhein buidu lubéi aransehani le hadügübei danme le lachülürün luéyuri maríei, manarimebei idiheri hasandirun (aliiha huméi 1 Korintuna 14:40). Ariñagati Wayne, le taiwána: “Fiu weyu lubaragiñe wamarieidun adügatiwa aban liraüraü adamuridaguni hama gürigia ha lúnbaña híderaguniwa. Aba wechekürüni aransehani le aranserúaalibei ani asayaha wagía fiu katei le lunbei lanügün fulasu lidan maríei lun wachoururuni buídubei lan léibugun sun katei”. Lun harufudun inebesei houn ha agunbirahóubaña adüga huméi sun hiyaraati lun hagunfulirun lau programa le aranserúaalibei lidan dan.

19. Kaba íderaguaña maríeitiña lun buidu lan láfuridun sun katei lidan fedu lánina hamarieidun?

¹⁹ Anhein gabaroun humá le lunbei lasuseredun, aransebadün lun hagagibudagun luma furumiñeguarügü turobuli (Ari. 22:3). Kei hénpulu, lidan fulasu le ñein lubéi hawinwanda, héchutiña san gürigia achülaagua lidan maríei magunbirahouga? Samina humá ka lan gayaraabei hadügüni lun masuseredun lan aban katei ítarati. Lanwoun lira, ánhadün amisurahaña hiduheñu ha mámabaña gefentiña luagu Heowá, afuranguagüda huméi houn ida liña lan hamarieidun Gefentiña lúmati ida liña lan harihini ítaga échuni. Gayaraati harufuduni ariñahani le houn le lídanbei wani páhina jw.org le gíribei “¿Cómo son las bodas de los testigos de Jehová?”. Lun gayara lan léibugun sun katei lidan dan lidan fedu lánina maríei amuriaha humá ídemuei luma aban íbiri derebuguti lafiñen lun ligía lan ariha lau fedu (Huan 2:8). Anhein hariñaga lun furangu lau dan le hanúadirubei hadügün, gayaraabei líderagunün lun buidu lan láfuridun sun katei ani ru ligíame uéiriguni lun Heowá.

20. Ka lunbei gabaroun hamani ha lúnbaña hamarieidun?

²⁰ Lau hasaminarun luagu sun aransehani le lubéi hadügüni lubá hamarieidun, másiñati hasandiragun hungua lau liibe saminaü. Lau sun lira, haritagua huméi ábanrügüñein lan weyu lidura fedu lánina maríei, ligía furumiñeti lagumesera weyu hau úara eseriwida lun Heowá. Adüga huméi sun hiyaraati lun manarimegu lan fedu ligía luma lun líchugun uéiriguni lun Heowá. Afiñe humá luagu Heowá. Ánhadün afalarei adundehani le líchugubei hun danme le haritaguni weyu hamarieidun haritagubei weyu ligía lau saragu ugundani (Sal. 37:​3, 4).