Haritagua humagili san?
Aliiha humaaru san sun Garüdia Awisahatu to lánina irumu le? Ariha huméi anhein gayara lubéi hóunabuni álügüdahani burí le:
Ka ínchahabaliwa lun wíchugun uéiriguni lun Heowá?
Rútiwa uéiriguni lun Heowá ladüga weiri lan inebesei le wasandirubei luagu ani hínsiñeti woun tídangiñe sun wanigi. Rútiwa giñe uéiriguni lun ladüga busén wamá lun hasubudiruni gürigia (w25.01, páhina 3).
Anhein acharara somu gürigia woun, kaba íderaguawa lun feruduna wamani?
Míchuguntiwa mebereseni luagu le wasandirubei; lau sun lira, líderagubadiwa wígiruni iyereehabúni luma igañi lun mabuinchun lan igarihabu tidan wanigi (w25.02, páhina 15 luma 16).
Ka uagu aban lubéi hénpulu buiti disipulu Márükosu houn wügüriña nibureintiña?
Aranseñu liña meha Márükosu lun leseriwidun houn amu. Íbini gayara lan meha lasandirun Márükosu igarigu luma maguraasuni ladüga somu katei le asuseredubei lun, mábürühanti larüna. Lubaragiñe lira, áfaaguati lun buidu lan lumadagua dandu luma Pábulu kei hama amu kristiánugu ha derebuguti hafiñen (w25.04, páhina 27).
Ka meha uagu layanuha Hesusu dan le lariñagunbei lun Heowá lidan furíei “Subudigüda naali biri houn”? (Huan 17:26, TNM).
Subudi hamuti meha lani Hesusu disipulugu Heowá lan líribei Bungiu. Lau lariñagun Hesusu subudigüda laali lan liri Bungiu houn, le meha labusenrunbei lariñagun, arufudaha laali lan houn ka lan Heowabei, ka lan labusenrunbei ladügün, ka lan ligaburibei luma le adüga láalibei (w25.05, páhina 20 luma 21).
Anhein ǘnabugu wabéi, ka katei lunbei gunfuranda wamani?
Gunfuranda wabéi anihein lan katei ibidiñeti woun. Kei hénpulu, ibidiñeti woun ídaba lan liabin lagumuchagüle ubóu ani kaba lan ladüga Heowá lun líderaguniwa. Ibidiñeti giñe woun kaba lan asusereda haruga ani siñati gunfuranda wamani sunsuinagubei sun le lasubudirubei Heowá wawagu (w25.06, páhina 15 darí 18).
Kaba íderaguawa lun wasagarun buiti lídangiñe aban aturiahani o lídangiñe aban yanu?
Gayaraati wálügüdagun woungua: “Ka ariñahani ayusurúbei lun gayara lan hafiñerun ha aganbubalün? Anihein san somu hénpulu le gayaraabei lahuudun nun lun narufudahani inarüni le? Kaba hamuga un lahuuda ariñahani le?” (w25.07, páhina 19).
Ka wafurendeirubei luagu ferudun le líchugubei Heowá lau ligaburi feruduna lani Dawidi dan le lafigouhanbei?
Íbini adüga lan Dawidi figóu burí wéiriti, asakürihati tídangiñe sun lanigi ani aba feruduna lani Heowá (1 Uru. 9:4, 5). Dan le feruduna lani Heowá wafigoun, aba labulieiduni ani meredeti asagahei woun (w25.08, páhina 17).
Anhein hénrengu lubéi lun aban aturiahati Bíbülia lun gunfuranda lani o lun lánharun lun somu arufudahani, ka gayaraabei wadügüni?
Ánhawa ariha hénrengu lan houn aturiahatiña gunfuranda hamani somu puntu lárigiñe wafuranguagüdüni houn tau Bíbülia, sigí wamá wabaruaguóun ani ábame wagiribudun ayanuha luagu katei ligía amu dan (w25.09, páhina 24).
Ka uagu tariñaga Lererun Bungiu geyeedaguadi lan figóu? (Ebü. 3:13).
Ladüga ínchaha lumutiwa figóu le wádanbei lun wadügün katei wuribati, adügati giñe lun burí lebelurun machouruni woun luagu hínsiñe wamá lun Heowá (w25.10, páhina 16).
Ida luba wafurieidun lun Heowá lúntima wayarafadun lun?
1) Ráramagua wamá asaminara luagu burí lubuidun ligaburi Heowá. 2) Samina wamá luagu turobuli le gádanbaliwa ani abahüdaha waméi lun Heowá, kei burí anhein anihein lubéi somu gürigia le úagili feruduna wamani. 3) Barǘ waméi wadaani lun wafurieidun. Ítarati, ménrenguntimabei woun wabahüdahani lun Heowá sun le wasandirubei (w25.10, páhina 19 luma 20).
Ida luba wíderaguniña gürigia derebuguhaña?
Gayaraati wabisidahaniña o wagúarun houn. Gayaraati giñe woudin hama arihei surusia o wíderaguniña lidan ámuñegueinarügü dasi lidan ministeriu (w25.11, páhina 6 luma 7).
Ka katei súdiniti lunbei hadügüni adarigu lun híchugun uéiriguni lun Heowá lidan hamarieidun?
Mosu hagunfulirun lau le lamuriahabei lúrudu, lunti giñe háfaagun lun furangu lan larihín úara lan aransehani le hadügübei lubá fedu luma igaburi le líchugubei lani Bungiu sífiri, lunti giñe buidu tan hadaüragun ani gadünama tuguya luma lun buidu lan haranseragun houngua, moun lumuti giñe hafalaruni échuni le múaranbei luma le tariñagubei Bíbülia ani lunti giñe furangu lan hayanuhan luagu aransehani le hadügübei lubá hamarieidun (w25.12, páhina 21 darí 24).