Afiñe humá gunda lan Heowá hau

1. Ka saminaü gayaraabei liabin hachügüwagun fiu lubúeingu Heowá?

MA LUBUIDUN wasubudiruni gunda lan Heowá hau lumutuniña! (Sal. 149:4). Íbini ítara, másiñati añahein lan íbirigu aba heferidiruni haguraasun ani aba hasaminarun: “Inarüni gunda lan Heowá hau lubúeingu, lau sun lira, gúndaati funa san nau?”. Añahein meha lubúeingu Heowá ha lánina binadu dan ha meha únbaña hénrengu lan hafiñerun luagu gunda lan Heowá hau (1 Sam. 1:​6-10; Hob. 29:​2, 4; Sal. 51:11).

2. Kátaña áubaña lagundaara Heowá?

² Furanguti tariñaguni Bíbülia íbini lan chará wamá gayaraati lagundaarun Heowá wau. Kati lunbei wadügüni? Warufuduni afiñe wamá luagu Hesukrístu ani badisei wagíame (Huan 3:16). Ítara liña warufuduni hagibugiñe sun gürigia asakürihaadiwa lan tídangiñe sun wanigi luagu figóu le wadügübei ani füramasehaadiwa lan lun Bungiu wadügübei lan lugundan (Adü. 2:38; 3:19). Wéiriti lugundan Heowá dan le wádaruni pasu le lun lumadagu wamá. Ánhawa áfaagua buidu lun wagunfuliruni le füramase wabéi lun Heowá, lagundaaruba wau ani gamadaguabei wama (Sal. 25:14).

3. Kaba álügüdahani wóunaba lidan aturiahani le?

³ Kati uagu añahein lubéi íbirigu asaminarutiña magundan lan Heowá hau? Ida liña larufuduni Heowá woun gunda lan wau? Ani kaba íderaguawa lun wachoururuni gunda lan Heowá wau?

KA SAN UAGU AÑAHEIN LUBÉI ASAMINARUTIÑA MAGUNDAN LAN HEOWÁ HAU?

4, 5. Íbini sandigua wamá woungua mebegi wamá, ka gayaraabei wachoururuni?

⁴ Añahein saragu wádangiñe, lúmagiñe wañüraü sandiguatiwa woungua mebegi wamá (Sal. 88:15). Ariñagati aban íbiri gíriti Adrián: “Lúmagiñe furumiñeti dan sandigua nan nungua kamá mebegitina ni kata. Haritagua nágili amuriaha nan meha luma Heowá dan meha ñǘraügidina lun líderaguniña niduheñu lun hawinwandun lidan Paraísu, íbini meha samina nan madüna nan lun ñein nan”. Ariñagati Tony luagu ligaburi hagüriaruni lagübürigu ani mama Gefentiña: “Mariñaguntiña nun ni aban wéiyaasu hínsiñe nan houn ni luagu gunda hamá nau. Adügarügütiña meha lun nasandirun ua lan buiti nadüga”.

⁵ Anhein anihein lubéi burí dan wageindagun luma luriban saminaü luagu ni kata wamá, haritagua waméi Heowá lan achawahabaliwa hadoun lumutuniña (Huan 6:44). Ariha lumuti lubuidun igaburi le wawagubei —íbini másiña lan marihin wamani— ani subudi lumuti ídatima waña lan (1 Sam. 16:7; 2 Kro. 6:30). Ligíati, dan le lariñagun gebegi wamá, gayaraati wafiñerun lun (1 Huan 3:​19, 20).

6. Ka meha lasandirubei Pábulu dan le lasaminarun luagun lifigoun?

⁶ Háfuga añahein lan wádangiñe awanhagua asandira duru ladüga meha charati le wadügübei lubaragiñe wasubudiruni inarüni (1 Fe. 4:3). Añahein amu barühaña saragu dan eseriwida lun Heowá lau úaraguni, lau sun lira añahagua ageindagua luma luriban échuni. Agia huguya? Tíchuguña san hanigi duru huagu? Anhein ítara liña lubéi, líchuguba gurasu hun hasubudiruni añahein lan meha lubúeingu Heowá ha asandirubalin ligiaméme. Kéiburi apostolu Pábulu le meha ariñagubei luougua fugiabu lan ligía, dántima meha lasaminarun luagu charati le meha ladügübei (Rom. 7:24). Íbini asakürihaali lan meha lídangiñe lifigoun ani badisei ligía, anihagua meha ariñaga luougua ‘ni kata lan ligía hadan apostolugu’ ani ariñagati ligía lan “furumiñeti hádangiñe” ha gafigounbaña (1 Ko. 15:9; 1 Tim. 1:15).

7. Ka gayaraabei wachoururuni ánhawa asaküriha tídangiñe sun wanigi?

⁷ Füramaseti Wáguchi Bungiu le siélubei woun feruduna lubadiwa lan ánhawa asaküriha luagu wafigoun (Sal. 86:5). Ligía lubeiti, ánhawa asaküriha tídangiñe sun wanigi luagu figóu le wadügübei, mébunabei lun wasandirun machouruni luagu lagunfulirubei lan Heowá le füramase lubéi: chóuruti feruduna laadiwa lan (Kol. 2:13).

8, 9. Kaba íderaguawa lun masaminarun wamá memeni lan le wadügübei lun Heowá?

⁸ Sun wagía busentiwa wíchuguni le buídutimabei wámagiñegua lun Heowá. Íbini ítara, másiñati añahein lan asandiragutiña houngua ua lan buídurügü lan le hadügübei lun lagundaarun Bungiu hau. Ariñagatu aban íbiri gíritu Amanda: “Súnwandan nasaminarun, lun lan níchuguni sun le buídutimabei númagiñegua lun Heowá, lunti lan gíbetima lan níchugun eibu lásügürün dan. Ligíati, súnwandan lubéi náfaagun lun níchugun lóugiñe le niyaraabei adüga. Danti le madügün nani ítara, aba nasaminarun magundan lan Heowá nau ítara kei magundan nan naugua”.

⁹ Kaba íderaguawa lun masaminarun wamá memeni lan sun le wadügübei lun Heowá? Haritagua waméi mafosu lániwa lun wadügüni katei, gunfurandarügü lumutiwa ani maweiyasunbei amuriaha wama lun wadügün lóugiñe le wayaraabei adüga. Wéiriti lugundan lau le wadügübei buídurügaali ligía, meberesenga anhein ñüraü lubéi o weiri lan. Samina wamá giñe hawagu gürigia ha awinwandubaña lidan tidaani Bíbülia ha meha eseriwidubaña lun Heowá tídangiñe sun hanigi. Kei meha Pábulu, nadagimeinti meha mabuchadunga luagu, luagu saragu irumu aweiyasuha saragu milu kilometuru lun lagumeserun saragu damuriguaü. Aba lachülürün aban dan lun lasansirun le gádanbalin ani siñá meha lapurichihan kei meha. Aba san magundanhali lan Heowá lau? Uá, mítaranti. Sigiti Pábulu adügei sun liyaraati, ani sigiti Heowá abinirei (Adü. 28:​30, 31). Ítarameme, mama súnwandan gayaraabei lan wíchuguni ligiaméme lun Heowá, létima súdinitimabei, lébuna wadügüni. Wariha fiu igaburi le ídanbei larufudei Heowá gunda lan wau.

IDA LIÑA LARUFUDUNI HEOWÁ GUNDA LAN WAU?

10. Ida liña “lariñaguni” Heowá woun gunda lan wau? (Huan 16:27).

¹⁰ Tau Lererun. Hínsiñeti lun Heowá larufuduni houn lubúeingu hínsiñe hamá lun ani gunda lan hau. Bianñein wéiyaasu ladarirún tidan Bíbülia ariñaga lan Heowá lun Hesusu ligía lan Liraübei le hínsiñebei lun ani le aubei óunwenbu lan lugundan (Mat. 3:17; 17:5). Hínsiñeti hamuga san hun lariñagun Heowá huagu gunda lan hau? Inarüni mayanuhan lan Heowá wama lúmagiñe siélugiñe. Gama lumoun, ayanuhati wama tídangiñe Bíbülia to Lererun. Dan le waliihani dimurei lánina ínsiñeni le lariñagubei Hesusu houn lani disipulugu, aba wasandiruni kamá hamuga Heowá ariñagubalin woun (aliiha huméi Huan 16:27). Áyeiha lumuti Hesusu ligaburi Lúguchi buidu buidu. Ligíati, dan le waliihan luagu ariñaga lan Hesusu houn lani disipulugu ha úaraguabaña hínsiñe hamá lun íbini chará hamá, gayaraati wasaminarun lariñaguñein lan Heowá ligiaméme dimurei woun (Huan 15:​9, 15).

11. Ka uagu moun lumuti lubéi warihini lénrengunga kamá aban seini luagu féridi wamaali lan lugundan Bungiu? (Santiagu 1:12).

¹¹ Lau le ladügübei. Busenti Heowá lun líderaguniwa, kei hénpulu, lau líchuguni le wemegeirubei woun. Íbini ítara, anihein dan ígirati lun wásügürün lídangiñe lénrengunga, ítara kei meha lidan likesin Hobu (Hob. 1:​8-11). Mariha waméi lénrengunga kamá aban seini luagu féridi wamaali lan lugundan Bungiu, ariha waméi kei aban chansi lun warufuduni hínsiñe lan woun lídangiñe sun tilulin-agei wanigi ani afiñe wamá luagu (aliiha huméi Santiagu 1:12). Lídanme dan hénrenguti ligía, warihibei ida liña lan líderaguniwa Heowá luma ida liña lan larufuduni línsiñehabu woun lun gayara lan wawandun.

12. Ka wafurendeirubei lídangiñe lásügürün Dimitri?

¹² Ariha waméi le asuseredubei lun aban íbiri ásiana le gíribei Dimitri. Aba meha leferidiruni luadigimari. Kei aba lubéi lásügürün saragu hati madarirunga wadagimanu, ábagubei lapurichihan saragu oura lun larufuduni lun Heowá afiñe lan luagu. Lau sun lira, sügüti burí hati madarimémeti Dimitri wadagimanu. Lárigiñe, aba lagumeserun asandira ani adügati katei le lun lerederun róundügü. Lagumuhóun, aba lagumeserun asaminara aban lan úguchili wuribati ligía, ani magundan lan Heowá lau. Aban weyu guñoun, aba tabürüdün lisaani aban gárada lun lau dimurei le lídanbei Isaíasi 30:​15, le ariñagubei: “Darangilu humá, ábame hesefurun. Lídanbei darangilaü luma emenigini here”. Lárigiñe, aba tíchugunu lun ariñageina: “Papi, danme le hiru ban, haritaguabei bérusu le”. Aba líchugun Dimitri fe seremei lan Heowá, géigingiña lan tílana luban, gadaüragun hagía ani gaban. Ariñagati: “Le lunbei nadügüni lun darangilu nan luma lun nasigirun afiñera luagu Bungiu”. Anhein hásügürüña lubéi lídangiñe aban sügǘ ítarati, gayaraati hachoururuni samina lan Heowá huagu ani líchugubei lan erei le hemegeirubei hun.

13. Ka amu igaburi ídanbei larufudei Heowá woun gunda lan wau?

¹³ Lau layusuruniña íbirigu. Gayaraati línchahaniña Heowá lubúeingu lun hariñagun dimurei le ruti gurasu woun dántima le wemegeiruni. Ligía asuseredubei tun aban íbiri ásiana. Aba terederun mawadigimaridunga ani aba tasandirun darí lun takomaradun. Lárigiñe, aba ladügün tani weiriei aban figóu wéiriti ani mosu meha lígiruni leseriwidun keisi wéiyaali lidan afiñeni. Wéiriti meha lénrengun le tawinwandubei darí lun tariñagun: “Úati meha gunfuranda nani le asuseredubei. Saminatina yebe háfuga lan meha adügaadina somu katei wuribati ani magundanhali lan Heowá nau”. Ábati tayumuragun lun Heowá lun lachoururagüdüni tun hínsiñegiru lan lun, ani óunaba lumuti tafurieidun. Ida liña lóunabunu? Ariñagatu: “Aba hayanuhan wéiyaaña lidan afiñeni numa ani íderagua hamutina arihei hínsiñegidina lan lun Heowá”. Dan lárigiñe, ábaya tayanuhan luma Heowá lun tariñagun lun megei tan tarihini lídehan. Kati asuseredubei? Ariñagatu: “Weyuméme ligía, aba neresibirun aban gárada hámagiñe saragu lílana damuriguaü to habürüdüboun nun lau saragu ínsiñeni. Dan naliihanbarun, sanditina aganba laali lan Heowá nayumuragun”. Kei le aubei warihei, liibe-agei dan, arufuda lumuti dimurei lánina ínsiñeni le hariñagubei amu woun gunda lan Heowá wau (Sal. 10:17).

14. Ka amu igaburi layusurubei Heowá lun larufuduni houn íbirigu gunda lan hau?

¹⁴ Arufuda lumuti giñe Heowá gunda lan wau lau ladügün lun híchugun wábirigu adundehani woun dan le wemegeiruni. Kei hénpulu, lidan furumiñeti sígulu, yusu lumuti meha Heowá apostolu Pábulu lun labürühan 14 gárada houn kristiánugu ani tidan gárada tuguya anihein adundehani furanguti le ichugúbei lau ínsiñeni. Ka uagu ladüga Heowá lun labürüdüni apostolu Pábulu adundehani burí le? Kei buidu lubéi ligaburi Heowá, ererehati houn lumutuniña “kei ladüga aban úguchili lun liráü le hínsiñetimabei lun” (Ari. 3:​11, 12). Ligíati, anhein erereha aban íbiri woun tau Bíbülia, masaminara wamá féridi wamaali lan lugundan Bungiu. Lubaragiñe lira, larufuduña hínsiñememegidiwa lan lun (Ebü. 12:6). Ka amu katei arufudubalin woun gunda lan Heowá wau?

AMU BURÍ KATEI LE ARUFUDUBALIN GUNDA LAN HEOWÁ WAU

15. Ka un líchiga Heowá sífiri sandu, ani ka gayaraabei wachoururuni?

¹⁵ Ru lumuti Heowá lani sífiri sandu houn sun ha áubaña lagundaara (Mat. 12:18). Gayaraati wálügüdagun woungua: “Arufuda numuti san igaburi burí le líchugubei lani Bungiu sífiri sandu lidan nibagari?”. Kei hénpulu, gaguraasuntimaahadün san guentó sügǘ lau lubaragiñe hafurendeiruni inarüni luagu Heowá? Le linarün aban katei, éibutima harufuduni igaburi le, furangutimabei gunda lan Heowá hau (ariha huméi giñe rekuáduru “Igaburi le líchugubei sífiri. . . ”).

16. Según 1 Tesalónikana 2:​4, kátaña layusurubaña Heowá lun hapurichihani uganu buiti ani ida liña ladügün katei le lun hasandiragun hungua?

¹⁶ Ru lumuti Heowá dasi lánina lapurichihóun uganu buiti houn gürigia ha áubaña lagundaara (aliiha huméi 1 Tesalónikana 2:4). Ariha waméi ida liña lan tíchugun aban íbiri gíritu Jocelyn fe luagu ítara liña lan. Aban weyu, aba tásaarun lau maguraasuni. Ariñagatu: “Méreti nasandiragun nungua weyu ligía ani hénrenti nun adüga ni kata. Neseriwiduña meha kei prekursora ani weyu meha ligía náfurida apurichiha. Ítara liñati, aba nafurieidun lun Heowá, ani aba náfuridun”. Binaafin ligía, aba tayanuhan Jocelyn tuma Mary, aban würi hínsiñehabutu ani ánhatu lun taturiahanu Bíbülia. Fiu hati lárigiñe, aba tabahüdahan Mary, binaafin lan le tapurichihanbei Jocelyn tun, tafurieiduña lan meha lun Bungiu amuriaha ídemuei luma. Ka larufudahabei sügǘ le tun Jocelyn? Ariñagatu: “Aba nasandiruni lariñaguña lan Heowá nun: ‘Gúndaatina bau’”. Lau sun inarüni lan maganbun habéi lan sun gürigia uganu le wanügübei, gayaraati wachoururuni gunda lan Heowá dan le larihini áfaaguni le wadügübei lun wapurichihani uganu buiti.

17. Ka hafurendeirubei lídangiñe le tariñagubei Vicky luagu lebegi esefuruni? (Sálumu 5:12).

¹⁷ Yusu lumuti Heowá lebegi esefuruni houn gürigia ha áubaña lagundaara (1 Tim. 2:​5, 6). Ánheinti hénrengu lubéi lun wánharun gunda lan Heowá wau íbini afiñe wamá luagu lebegi esefuruni ani badisei wagía? Haritagua waméi moun lumuti lan wafiñerun luagu katei le wasandirubei, lunti wafiñerun súnwandan luagu Heowá. Lun Heowá, gürigia ha afiñebaña luagu lebegi esefuruni, hagía gürigia ha richabaña, ani füramaseti houn labinirubaña lan (aliiha huméi Sálumu 5:12; Rom. 3:26). Ligía meha asuseredubei tun aban íbiri gíritu Vicky, íderagua lumutu saragu tararamagun asaminara luagu lebegi esefuruni. Íbini meha hénrengu lan tun tafiñerun hínsiñe tan lun Heowá, ariñagatu: “Aba níchugun fe luagu barühali lan meha Heowá saragu dan arufuda gaguraasuni nubá [ . . . ]. Ánheinti nuguya, anaha meha óusera kamá hamuga nariñaguña lun: ‘Siñati hínsiñe nan bun. Úati buídurügü lan lani Biráü sákürifisiu lun ferudunawa lan nifigoun’”. Ítara kei Vicky, ánhawa araramagua asaminara luagu lebegi esefuruni wasandirubei giñe línsiñehabu Heowá ani wachoururubei woungua gunda lan wau.

18. Ka gayaraabei wachoururuni ánhawa ítarameme arufuda ínsiñeni lun Wáguchi le siélubei?

¹⁸ Íbini wáfaagun lun wadügüni sun le furendei wamaalibei lidan aturiahani le, másiñati aniheinbei lan dan lábürühaba lan warüna murusunraü, háfuga liabin burí álügüdaguni le wachüguagu anhein gunda lubéi Heowá wau. Anhein ligía lubéi asuseredubei hun, haritagua huméi gunda lan Heowá hau “ha hínsiñehabubaña lun” (Sant. 1:12). Ligíati, ítarameme humá ayarafada lun Heowá ani áfaagua humá lun harihini sun igaburi le ñein lubéi larufudei hun gunda lan hau. Maweiyasun humá abulieidei “madise lan Bungiu luéi kada aban wádangiñe” (Adü. 17:27).