Agosto

Ka dibhuku da Masalmo hi mana timhaka timbidi ta lisima: 1) Vathu vo lulama va wonisana ni sikarato. 2) Jehovha wa hi hulukisa ka sikarato sathu. A ti mahisa kutxani toneto? Nzila yimwani ngu hi vhuna hi va ni mawonelo a manene ngu wutomi ka mafu awa. Jehovha a hi gela ti to ngako hi txi mthumela hi na va ni litsako, kambe kha hi thembisa ti to hi na mbi va ni sikarato ka mafu awa. (Isaya 66:14) Ene a hi kuzeta kuveka mapimo ka timhaka ta mbimo yi yi tako aha hi no ta ti dila ngu wutomi wa wunene ngu ha ku si gumiko. (2 Vak. 4:16-18) Ene wa hi vhuna ti to hi simama hi mthumela. (Sid. 3:22-24) Ngu tihi ti hi nga ti gondako ka sikombiso sa malanda o thembeka a Jehovha a timbimo ta kale ni ya ngweno? Mbimo yimwani hi na wonisana ni sikarato si hi nga mbi si rinzela. Kambe ngako hi txi themba Jehovha ene a na hi khatalela mbimo yotshe.—Mas. 55:22. w23.04 14-15 ¶3-4

Hi nga gonda ka txikombiso txa Josefa ni Mariya, ava va ngati tiemisete kuengisa wukoma hambi ku ti nga si va hehukeli. (Luka 2:1-6) Mbimo yi Mariya a ngati ni txirumbu txa 9 wa mitxima, ene ni Josefa va wonisani ni txirumo txa wukoma txo karata nguto. Augustu, wu i ngati mkoma wa Roma, a vekile mlayo wo ve ya ti bhalisa. Ti lavile Josefa ni Mariya va enda veya Bhetlehema mnava wa 150 km ka wukhalo wa mimango. Vona va nga va va di karatekile ngu ku alakanyela dihanyo da Mariya ni da mwanana wu a ngati ngadi mndani. Se ngaku a to ko khata kulumwa? Mwanana wu a ngati mndani kwakwe a ndina va Mesiya. Ina eto ti ndina va tsivela kuengisa wukoma? Sikarato sotshe siya kha sa maha ku Josefa ni Mariya va si engisi wukoma. Jehovha a katekisile kuengisa kwawe. Mariya a hokile Bhetlehema a di xayisekile, e hefemula mwanana wa dihanyo dinene e tshumela e vhuneta kuhetiseka ka wuprofeti wa mu ka Bhiblia!—Mika 5:2. w23.10 8 ¶9; 9 ¶11-12

U nga maha txani ngako u txi thava kuxamula ka mitshangano? Kasiku u vhuneka lulamisela kwati. (Mav. 21:5) Ngako u txi di ziva kwati didungula donedo ti na kuhehukela kugula diwoko ti to u xamula. (Mav. 15:23; 17:27) Xamulo yo koma yi nga ku vhuna to u si thavi ngutu. Ku ningela xamulo yo koma ngu mapswi ako ti na kombisa to u lulamisete kwati ni ku wa di pfisisa kwati didungula donedo. Se kuwombwa txani ngako u di duketile tinzila tiya, kambe u simama u thava kuguleta diwoko ko pinda kumbidi? Tsaniseka ti to Jehovha wa yi wona yotshe mizamo yi u yi mahako kasi kuxamula. (Luka 21:1-4) Jehovha kha hi kombeli ti hi no mbi ti kota kumaha. (Vaf. 4:5) Tiemisele kumaha totshe ti u nga ti kotako ni ku tivekela makungo o maha toneto. Dikungo do khata, zama kuningela xamulo yo koma. w23.04 21 ¶6-8

Mpostoli Paulo a hi fananisile ni masotxhwa aya ma nga ti lulamisela kulwa yimbi. Ku emelwa ti to mbimo yotshe disotxhwa di zumba di di ti lulamisete kulwa yimbi. Ngu ti ti emelwako kwathu. Hi zumba hi di ti lulamisete ditshiku da Jehovha ngu kuzumba hi di ambate txikatawu txa txikete txa likholo ni lirando ni kuambala txithembo txi va txigoko txathu. Txikatawu txa txikete txi txi vhikela mbilu ya disotxhwa. Likholo ni lirando si vhikela mbilu yathu yo fanekisela. Likholo li hi tsanisekisa ti to Jehovha a na hi hakela aku hi mu lavako ngu mbilu yathu yotshe. (Vaheb. 11:6) Eto ti na hi vhuna kusimama hi di thembekile ka Mthangeli wathu Jesu hambi hi txi wonisana ni sikarato. Hi nga tsanisa likholo lathu ni kutimisela sikarato ngu kugonda ka sikombiso sa ngweno sa va va nga simama va di thembekile. Hi nga vayilela mlawu wo thangetisa silo sa nyama ngu kuetetela ava va nga hehukisa wutomi wawe kasi ku thangetisa timhaka ta Mfumo. w23.06 10 ¶8-9

Kutiñola wusikoti wo kontrolara matipfelo ni simaho sathu. Eto ti nga tshumela ti susumeta makungo athu, ngutu-ngutu ngako ati hi ti mahako ti txikarata mwendo hi si nga ni minavelo yo ti maha. Khumbula ti to kutiñola yimweyo ya mihando ya moya, ngu toneto, kombela moya wo sawuleka wa Txizimu ti to wu ku vhuna kuhokelela fanelo yiya ya lisima. (Luka 11:13; Vag. 5:22, 23) U nga verele siemo sa sinene. Ka mafu awa ti nga maha hi si si mani siemo sa sinene. Se hi txo verela siemo sa sinene, ti nga maha hi si hokeleli makungo athu. Hi nga luza minavelo yo hokelela makungo athu, ngako ma txi woneka nga ma karata. I di toneto, ma hungule me va a madotho. Ngako dikungo dako i di kusakulela fanelo yo kari, khata ku yi thumisa kudotho-kudotho. Ngako dikungo dako i di kulera Bhiblia yotshe, khata ngu ku ti vekela mbimo ya yidotho ti to u lera. w23.05 29 ¶11-13

Ka masiku awa o gwita, Jehovha a thumisa sengeletano yakwe kasi ku hi ninga sakudya sa moya ti to si hi vhuna kusimama hi tsimbila ka “Nzila yo Sawuleka.” (Isaya 35:8; 48:17; 60:17) Hi nga womba ti to yotshe mbimo yi m’thu a tumelako gondo ya Bhiblia, ene a mana mkhanjo wo tsimbila ka “Nzila yo Sawuleka.” Vamwani va tsimbila ka yona ta mbimonyana ve gwita ve huma ka yona. Vamwani va ti emisete kutsimbila ka yona kala aha yi no ya gwitela kona. Yi gwitela hani? Ava va ku ni themba yo ya hanya nzumani, “Nzila yo Sawuleka” yi va kongomisa “paradhiseni ka Txizimu” nzumani. (Mtu. 2:7) Ka va va ku ni themba yo hanya hamafuni, nzila yiya yi va kongomisa ku va vo pelela ngu magwito ka 1.000 wa malembe. Ngako nyamsi u txi tsimbila ka nzila yiya, u nga woneteli msana. Ni ku u nga yi leke kala u hoka amu u yako kona, i ku ka mafu a maphya. w23.05 17 ¶15; 19 ¶16-18

U txi alakanya ngu totshe ati Jehovha a nga ku mahela wa bonga ngutu aha ko ti ku kuzeta kuningetela wutomi wako kwakwe. (Mas. 116:12-14) Bhiblia yi womba to Jehovha ngene ahi ningako “sotshe sihiwa sa lisima” ni “sotshe siningo sa ku hetiseka.” (Jak. 1:17) Ningo ya lisima ka totshe digandelo do hetiseka da mwanana wakwe Jesu. Alakanyisisa ngu eto! Mterulo wu mahile ti to ti koteka ku u va ni wuxaka wo tsana ni Jehovha. Hahanze keto aku ningile lungelo yo hanya ngu ha ku si gumiko. (1 Joh. 4:9, 10) Kutiningetela ka Jehovha i nzila yo kombisa kubonga mterulo ni otshe makatekwa aya Jehovha a nga kuninga.—Dhewut. 16:17; 2 Vak. 5:15. w24.03 5 ¶8

Hi txi wona mahanyelo o biha a vathu va mafu yawa nyamsi, hi ti pfa ngu nzila yi Loti a nga ti pfa ngu yona. Ene a txi “xaniseka ngu mhaka ya wubihi wa vathu vale vo xanga,” nguko ene a txi ti ziva ti to Tate wathu wa nzumani wa ma nyenya mahanyelo ale. (2 Pedro 2:7, 8) Lirando ni kuthava Txizimu si vhuni Loti ku e vayilela mahanyelo a vathu vale va nga ti hafuhi nayo. Nathu hi randetwe ngu vathu ava va si xoniphiko milayo ya Jehovha. Hambi keto, hi nga va ni mahanyelo a manene ngako hi txi simama hi randa Jehovha ni kusakulela txithavo ngu ngene. Kasi ku ti koteka toneto, Jehovha wa hi kuzeta ni ku hi ninga txitsaniso ngu kuthumisa dibhuku da Mavingu. Otshe Makristu, vavamna ni vavasikati, vanana ni va hombe, hi nga wuyelwa ngutu ngu kugonda txialakanyiso txi ku ka dibhuku donedo. Ngako hi txi thava Jehovha hi na vayilela kumaha to biha. w23.06 20 ¶1-2; 21 ¶5

Ti nga maha u di wuketwe ngu siro sa mwaya wako mwendo u di lekile ku londisela tithomba kasi kuthangetisa kumaha kudhunda ka Jehovha. (Mat. 6:33) I di toneto, tsaniseka ti to Jehovha kha ti divali totshe ti u nga maha. (Vaheb. 6:10) Ti nga maha u di tsanisekile ka ti to mapswi ya Jesu a nga ma womba ditshuri: “Kha ku nga ni m’thu wu a nga leka nyumba, vanawe, tindiyakwe, mame, tate, vanana mwendo tithembwe, ngu mhaka yangu ni ngu mhaka ya Evhangeli, awu a no mbi amukela, ka txona txikhati txa nyamsi, 100 da tinyumba, da vanawe, da tindiya, da vamame, da vanana mwendo da tithembwe, kumweko ni sixaniso; se ka txikhati txi txi tako, wutomi wo mbi guma.” (Marku 10:29, 30) Ti ha kubasani ti to makatekwa ya u nga ma mana nga hombe ngutu kupinda yotshe mizamo yi u nga yi maha.—Mas. 37:4. w24.03 9 ¶5

Mbimo yi Makristu a khe Judheya ma nga wonisana ni nzala ya hombe dibanza da Antiyokiya di sawute ku “ rumela asi a si manako kasi kuya vhuna vanawe va va zumbako ditikoni ka Judheya.” (Mith. 11:27-30) Hambiku vanathu ava va ngadi ka nzala va nga txi zumba kule, Makristu a Antiyokiya ma di tiemisete ku ya va vhuna. (1 Joh. 3:17, 18) Nathu nyamsi hi nga kombisa wumbilu ngako hi txi ziva ti to vanathu va wetwe ngu phango. Hi nga kuluveta ku ningela txivhuno ngu kuwotisa madhota ti to ina hi nga vhuneta ka projeto, ngu kumaha miningelo yo ti dhundela mwendo kuva pata ka mikombelo yathu. Ti nga maha vanathu ve lava txivhuno ka so ti hanyisa ngu sona. Mbimo yi Mkoma wathu Jesu Kristu a no ta kasi ku ta lamula, hi navela ti to e ta hi mana hi txi kombisa wumbilu se e hi ramba a txi “Amukelani thomba ya Mfumo.”—Mat. 25:34-40. w23.07 4 ¶9-10; 6 ¶12

Jesu a etetete ku dinganisela ka Jehovha, ene a rumetwe hamafuni kasi ku ta txhumayela “tinvuta ti ti nga mwalala ka nyumba ya ka Israyeli.” Dikhambi dimwani wamsikati wu i singa Muisrayeli a kombete Jesu ti to e hanyisa mwanana wakwe wa txihoranana awu a nga ti “xupheka ngutu ngu madhimoni.” Ngu wumbilu Jesu a mahile ti a nga kombelwa ngu wule wamsikati ni ku a hanyisile mwanana wakwe wa txihoranana. (Mat. 15:21-28) Wona txikombiso tximwani. Makhatoni ka mthumo wakwe wo txhumayela, Jesu a wombile tiya: “Aniko awule a no ni lamba . . . , nanani ni na mlamba.” (Mat. 10:33) Ina Jesu a lambile Pedro nguko a nga mlandula makhambi mararu? Ahim-him. Msana kova Jesu a di wusilwe, a ti wonekisile ka Pedro e mtsanisekisa ti to a ti mu divalete ni ku wa mranda. (Luka 24:33, 34) Aku hi nga wona to Jehovha ni Jesu va dinganisela, se kuwombwa txani ngu ngathu? Jehovha a emela to nathu hi va vo dinganisela. w23.07 21 ¶6-7

Ngu sihi sitsanisekiso hi nga bhulelako ava va si kholwiko ti to txithembiso txa Jehovha ngu Paradhise txi na hetiseka? Txo khata, ngene Jehovha apune a hi thembisako. Dibhuku da Mtuletelo di khene: “Awule a nga ti maneka a di khalahatshile ha txikhaloni ka wukoma, a ti khene: ‘Wonani: sotshe na si hindula si txi maha sa siphya.’” Txa wumbidi, ku hetisisa sithembiso sakwe nda ditshuri ngutu ka Jehovha aha ko kwakwe ti mahekile. Ene a womba a di tsani a txi: “Nguko mapswi awa ngo thembeka ni a ditshuri. . . . Ma tatisekile.” Txa wuraru, ngaku Jehovha a txi khata to maha, wa ti hetisisa nga ha mapswi awa ma kombisako ngu kona: “Ani ngani Alfa ni Omega.” (Mtu. 21:6) Jehovha a na ti veka ha kubasani ti to Sathani m’hembi ni ku mbwo tandeka mbimo yotshe. Se m’thu a txi khene: “Ina ni na tiwona toneto?” U nga m’gondela Mtuletelo 21:5, 6 m’kombe nzila yi Jehovha a xambanyako ngu yona ku hetisisa txithembiso txakwe kufana ni ku a txo sayina.—Isaya 65:16. w23.11 7 ¶18-19

Jehovha a mahile txithembiso txonetxo ka Abrahamu Mbimo yi Abrahamu a nga ti ni 75 wa malembe a si se va ni mwanana. Ina Abrahamu a ku woni kuhetiseka ka txithembiso txonetxo? Kha kuwona kotshe. Msana ko tshawunyeta mnambo wa Ewufrate, Abrahamu a emete 25 wa malembe ku za kumaheka txidiwukiso txo velekwa mwanana wakwe Isaake, kutshumela kupinda 60 wa malembe kasi kuvelekwa vatukulo vakwe Esawu ni Jakobe. (Vaheb. 6:15) Kambe Abrahamu kha nga wona liveleko lakwe li va lihunzu la hombe ni ku li dya thomba ya ditiko da txithembiso. Hambiketo, wamwamna wuwa wa likholo a txi tidila ngu wuxaka wa hombe ngutu ni Jehovha. (Jak. 2:23) Mbimo yi Abrahamu a no wuswa ngu ka va kufa, a na tsaka ngutu ngu kuziva to likholo lakwe ni kulaphisa kwakwe mbilu si bhindute makatekwa ka otshe matiko! (Gen. 22:18) Ti nga maha hi si ku woni konkuwa kuhetiseka ka sotshe sithembiso sa Jehovha. Hambiketo, hi txi kombisa kulaphisa mbilu kufana ni Abrahamu, hi nga tsaniseka ti to Jehovha a na hi hakela konkuwa ni ka mafu a maphya.—Marku 10:29, 30. w23.08 24 ¶14

Mbimo yi Uziya a nga khata kufuma i di nga di jovhem, a txi tiveka hahatshi. A gondete “kuthava Txizimu txa ditshuri.” Uziya a hanyile 68 wa malembe, kutala ka malembe oneyo Jehovha a txi m’katekisa. (2 Mak. 26:1-4) Uziya a xute valala va ditiko dakwe ni kutshumela e vhikela Jerusalema. (2 Mak. 26:6-15) Uziya a di tsakile ngu totshe ti Jehovha a nga txi m’vhuna kumaha. (Ekl. 3:12, 13) Mkoma Uziya a ti tolovete kuwona vamwani ve londisa mkongomiso wakwe. Ina eto ku ti lava ti m’mahile e pimisa ti to kha fanela kuengisa yotshe milayo ya Jehovha? Uziya a sungile kubela nyumbani ka Mkoma e zama kuhisa digandelo txiluveloni, i ku ti vakoma va nga si tumelelwi ku ti maha. (2 Mak. 26:16-18) Mphaxeli wa hombe Azariya a zamile ku m’kawuka, kambe Uziya a henyile ngutu. Uziya kha nga simama a di thembekile, se Jehovha a m’tsayisile ngu wulwati wa xokonho. (2 Mak. 26:19-21) Wutomi wakwe wu di vile wo tsakisa ngako a ti ko simama e tiveka hahatshi! w23.09 10 ¶9-10

Hambi msana kova mpostoli Pedro a di sawutwe ngu moya wo sawuleka, a wonisanile ni ku tandeka kwakwe. Ngu dilembe da 36 E.C., Txizimu txi rumile Pedro ti to e ya manana ni Korneliyo awu i ngati si nga Mjudha, koneho Korneliyo a to sawulwa ngu moya wo sawuleka. Eto ti txi tiveka hakubasani ti to “Txizimu kha txi khedhi m’thu” ni ku ava i ngati si nga Majudha va ndina maha txienge txa Makristu a ditshuri. (Mith. 10:34, 44, 45) Se kukhukhela ka koneho Pedro a to khata kudya ni va i ngati si nga Majudha i ku ti a nga si khali kumaha. Hambiketo, Makristu mamwani ya i nga ti Majudha ma ti nga di ma tipfa ti sa fanela kudya ni va i nga ti si nga Majudha. Mbimo yi Makristu ya i nga ti Majudha ma nga ti ni mawonelo onewo ma nga hoka Antiyokiya, Pedro a lekile kudya ni Makristu ya i nga ti si nga Majudha, ngu ku thava Makristu ya i nga ti Majudha. Mbimo yi Paulo a nga wona Pedro a txi maha toneto a to m’kawuka masoni ka votshe. (Vag. 2:13, 14) Hambiku Pedro a nga maha phazamo yiya a simamile e timisela. w23.09 22 ¶8

Va na wo thembeka, u ti xola upune kasi kuwona ha u nga tshukwatisako kona, kambe u nga godholi. Nguko “wunene wa Mkoma” wu nga kuvhuna ku u tshukwatisa. (1 Pedro 2:3) Mpostoli Pedro a wombile tiya: “Txizimu . . . txi na mi wusa ni ku mi aka ni ku mi tsanisa.” Makhatoni Pedro a txi tipfa a si faneleki kuva masoni ka mwanana wa Txizimu. (Luka 5:8) Kambe ngu kuvhunwa ngu Jehovha ni Jesu, Pedro a simamile e timisela ni kuva wo thembeka. Kota wuyelo Jehovha a tulete Pedro “diphango da wukoma wo mbi guma da Mkoma wathu ni muhanyisi wathu Jesu Kristu.” (2 Pedro 1:11) Hi nga wona wuyelo ya yinene! Nawe ngaku u txi timisela kufana ni Pedro ni ku tumelela ku Jehovha e kuaka, u na amukela hakelo ya wutomi wo mbi guma. Ni ku u na ‘amukela hakelo ya likholo lako, i ku kuhanyiswa ka moya wako.’—1 Pedro 1:9. w23.09 31 ¶16-17

Ditenda da sengeletano di ti ni mthanda a wu wu nga ti bhiyilwe, a ha vaphaxeli va nga txi maha mithumo yawe. Txiluvelo txa hombe txa koporo txi ti ka mthanda, kumweko ni mkamba wa koporo awu wu nga txi thelwa mati kasi ku vasawuleki ve samba va si se khata mthumo wawe. (Eks. 30:17-20; 40:6-8) Nyamsi masalelwa a vasawuleki ma thuma ngu kuthembeka ka mthanda wa mndani ka dithempele da moya hamafuni. Se mkamba wu wu ku ni mati wu khumbutisa vona ni Makristu otshe ti to va fanete kuzumba va di basile ngu didhawa da moya. Se ngu hayi mu “dibutho da hombe” di ningelako kona wukhozeli? Mpostoli Johani a va woni “va ti ti emile masoni ka txiluvelo mwendo txikhalo” atxi txi emelako mafu ka mthanda wa hahanze a ha ‘va manekako masoni ka txikhalo txa wukoma txa Txizimu, va txi txi khozela wusiku ni mitshikari.’ (Mtu. 7:9, 13-15) Ha ninga lisima lungelo yi hi ku nayo yo pateka ka malulamiselo ya Jehovha ngu wukhozeli wa ditshuri! w23.10 28 ¶15-16

Nzila yimwani yi Jehovha a hi ningako ngu yona mtamo ngu thumisa madhota. (Isaya 32:1, 2) Ngu toneto, ngaku u txi tipfa u txi karateka, bhulela madhota ku karateka kwako. Se ngaku va txi kuninga txivhuno, kombisa kubonga, u txi tumela. Jehovha a nga va thumisa kasi ku ku ninga mtamo. (Var. 4:3, 18, 19) Themba yathu yi hi vhuna kutsanisela sikarato, kutxhumayela mahungu ya manene ni ku hetisisa siavelo so hambana-hambana dibanzani. (1 Vat. 1:3) Themba yi yi fanako, yi tsanisile mpostoli Paulo. Ene a wombile to: “Ha manwa ngu sixaniso, ha xuphwa, ha vengelwa, ha kanakana aniko kha hi rereki.” Tiwombako to wutomi wakwe wu ti haphangoni. (2 Vak. 4:8-10) Paulo a mani mtamo wo tsanisela ngu kuveka mapimo ka themba yakwe. (2 Vak. 4:16-18) A vekile mapimo ka themba yakwe yo hanya nzumani ngu ha ku si gumiko. Ene a txi alakanyisisa ngu themba yoneyo. Kota wuyelo, a ti pfite a txi maha wamphya ditshiku ni ditshiku. w23.10 15-16 ¶14-17

Ngako u txi maha mkombelo, ti wotise ti to, ‘ina yiya i mbimo ya yinene yo Jehovha e xamula mikombelo yangu?’ Ti nga maha hi lava xamulo ya mikombelo yathu ngu txikuluveta. Kambe Jehovha wa yi ziva mbimo ya yinene yo hi vhuna. (Vaheb. 4:16) Ngako hi si amukeli xamulo ya mikombelo yathu ngu txikuluveta, ti nga maha hi pimisa to xamulo ya Jehovha i “Ahim him.” Kambe ti nga maha xamulo yakwe i di “Ema nyana.” Ngu txikombiso mwanathu wa jovhem awu a nga kombela ku e hanyiswa ka malwati akwe. I ti ku Jehovha a to mu hanyisa ngu txidiwukiso, Sathani a di wombile to mwanathu wule o thumela Jehovha ngu ku a nga mu hanyisa. (Jobe 1:9-11; 2:4) Hahanze keto, Jehovha a vekile mbimo ayi a no hanyisa otshe malwati. (Isaya 33:24; Mtu. 21:3, 4) Yi si se hoka mbimo yoneyo, kha ha fanela ku emela kuhanyiswa ngu txidiwukiso. Ngu toneto, mwanathu wule a di kombete Jehovha ku e mu ninga mtamo ni kurula kasi ku e sikota kutsanisela malwati. w23.11 24 ¶13

Samsoni a mahile phazamo ya hombe, kambe kha rereka. Ene a lavile mkhanjo wo hetisisa txiavelo txi a nga ti ningilwe ngu Txizimu, txo lwa ni Vafilista. (Val. 16:28-30) Samsoni a dite ka Jehovha, a txi khene: “Ni leke ni ti photela ka Vafilista.” Txizimu txi xamute mkombelo wa Samsoni txi tshumela txi maha txidiwukiso txo wuseta mtamo wakwe. Samsoni a xute Vafilista kupinda otshe makhambi mamwani. Hambi ku Samsoni a nga va ni wuyelo yo panda ngu mhaka ya phazamo yakwe, kha leka kuzama kumaha kudhunda ka Jehovha. Hambi i di ti to ha maha tiphazamo ati ti no lava hi kawukwa mwendo hi luza malungelo, kha ha fanela ku godhola. Khumbula ti to, Jehovha a ti emisete ku hi divalela. (Mas. 103:8, 9) Ti singa ni mhaka ni tiphazamo tathu, hi nga simama hi va va lisima masoni ka Jehovha. w23.09 6 ¶15-16

Mbimo yi u tsaniselako, u tsakelwa ngu Jehovha. Eto kha ti lavi kuwomba ti to mbimo yi u wonisanako ni kuwukelwa mwendo sikarato, Jehovha wa tsaka. Ta tsanisa ngutu kuziva ti to mbimo yi hi tsaniselako hi tsakisa Jehovha. (Mas. 5:12) Khumbula ti to Abrahamu a tsanisete, hambi ku a nga txi wonisana ni sikarato so hambana-hambana. Ni ku Jehovha a tsakile ngutu ngu toneto. Jehovha atxi mu wona kota mngana wakwe ni kutshumela e mu wona kota wamwamna wo lulama. (Gen. 15:6; Var. 4:13, 22) Ati ti fanako ti nga maheka ni kwathu. Kutsakelwa ku hi ku manako ka Jehovha, kha ku yi ngu ti hi ti kotako kumaha ka mthumo wakwe, hambi ngu malungelo ya hi ku nawo. Jehovha a hi tsakela nguko ha tsanisela ngu likholo. Ina u wonisana ni txikarato txo kari atxi ti lavako u tsanisela ka mbimo yiya? I di ina, khumbula ti to u tsakisa Jehovha. Mbimo yi hi tumbulako ti to hi tsakisa Jehovha, themba yi hi ku nayo ya ti to a na hetisisa ti a nga hi thembisa, yiya yi tsana. w23.12 11 ¶13-14

Mkristu tilava e ziva kuwomba womba kwati ni vamwani. M’thu wu a zivako kuwomba womba kwati ni vamwani wa engisela kha kwati ni ku wa sikota kupfisisa matipfelo ni mapimiselo a vamwani. (Mav. 20:5) Wa tshumela e pfisisa mpfumawulo wa dipswi da vathu mbimo yi va womba wombako, ni nzila yi va womba wombako ngu yona. Awe khu na kusikota kugonda totshe tiya u si ngo heta mbimo ni vathu. Ngako mbimo yotshe u txi bhula ni vathu ngu kuthumisa sithumiswa sa eletroniko so fana ni ma e-mail ma mesaji, eto ti nga hungula wusikoti wako wo bhula ni vathu. Ngu toneto, zama kulava mikhanjo yo va ni vathu u bhula navo. (2 Joh. 12) Mkristu wu a nga vitwa a fanete e ziva ku ti khatalela apune, ni ku khatalela mwaya wakwe. (1 Tim. 5:8) Nda tinene ngutu kugondela to kari ati ti nga kuvhunako ku u mana mthumo. (Mith. 18:2, 3; 20:34; Vaef. 4:28) Zama kumana nduma yo u zivaneka ti to u m’thu wu a thumako ngutu ni ku wa hetisisa ati u ti khatako. Ngako u txi maha toneto, ti na kuhehukela kumana mthumo ni kusimama ka wona. w23.12 27 ¶12-13

Bhiblia yi txi womba-womba ngu “ditshiku da Jehovha,” yi womba mbimo yi Jehovha a no ta lamula valala vakwe ni kuhulukisa vathu vakwe. Ka timbimo ta kale, Jehovha a lamute matiko o kari. (Isaya 13:1, 6; Eze. 13:5; Zef. 1:8) Se ka timbimo ta nyamsi, “ditshiku da Jehovha” di na khata ngu ku xaselwa ka Bhabhilona wa hombe ku ya hokela ka yimbi ya Armagedhoni. Kasi ku hi ta huluka ka “ditshiku” donedo ti lava hi ti lulamisela konku. Jesu a hi gondisile ti to hi fanete “kuzumba hi di ti lulamisete” mbimo yotshe i si nga ku ti lulamisela dwe ka kuta ka “xanisa ya hombe.” (Mat. 24:21; Luka 12:40) Ka dipasi dakwe do khata adi a nga bhalela Vatesalonika, mpostoli Paulo a thumisile sikombiso so tala kasi kuvhuna Makristu ku me zumba ma di lulamile ka ditshiku da hombe da kulamula ka Jehovha. Paulo a txi ti ziva ti to ditshiku da Jehovha di na mbi hoka ngu mbimo yile. (2 Vat. 2:1-3) Hambiketo a alakanyisile Makristu a mbimo yile ti to me ti lulamisela ditshiku dile nga do hoka mangwana, se nathu hi nga thumisa txialakanyiso txakwe. w23.06 8 ¶1-2

Ngu 1978, ku akilwe di predhiyu do lapha ngutu ka didhoropa da Tokyo, khe Japão. Ava va nga di wona di txi akwa va txi ti wotisa to ina di na tsana ka ku zinginikela ka mafu ka didhoropa diya? Se vaaki va di predhiyu va mahile txani kasi ku di tsana? Va di akile ngu nzila yo di si hoxoki hambi ku txo thuka ku va ni ku zinginikela ka mafu. Makristu ni ona ma fana ni di predhiyu diya. Ngu nzila yihi? Mkristu a fanete ku e tsana ni ku ti pfananisa ni txiemo. Ti lava e tsana a si xulwi ngu txilo ti txi ta ko engisa milayo ya Jehovha. A na ti emisele “kuengisa” a si tshumeleli msana. Ngu ma wombelo mamwani, ene a fanete “ku dinganisela,” mwendo ku ti pfananisa ni txiemo ngako ti txi sunga ku e maha toneto. (Jak. 3:17) Mkristu wu a nga gonda ku va ni mawonelo o dinganisela wa vayilela ku tumeletela totshe. w23.07 14 ¶1-2

Mbimo yi Jesu i nga ti wa hombe ti lavile e vayilela m’kuzetelo wa Sathani, awu a nga ti lava ti to a si engise Jehovha. (Mat. 4:1-11) Sathani a ti ti emisete kumaha ti to Jesu e onha kasiku a si ti koti kuhakela mtengo wa mterulo. Mbimo yi a nga ti ka mthumo wakwe wo txhumayela hamafuni, Jesu a wonisanile ni simwani sikarato. Valala vakwe va m’wukete ni ku va zamile ku m’daya. (Luka 4:28, 29; 13:31) Hahanze keto, ti lavile e wonisana ni kwa mbi pelela ka vagondiswa vakwe. (Marku 9:33, 34) Mbimo yi a nga txi thethiswa, Jesu a xanisilwe ni ku tseketselwa. Ngu magwito, Jesu a datwe ngu nzila ya tshofu ngutu ni yo pandisa. (Vaheb. 12:1-3) Timbimo to gwitisa ta wutomi wakwe a wonisanile nato ekha a si nga ni kuvhikelwa ngu Jehovha. (Mat. 27:46) Ditshuri ti to Jesu a xanisekile ngutu kasiku e ningela wutomi wakwe ti to e hi khulula ka txionho ni lifo. Mbimo yi hi pimisako ngu kotshe kuxaniseka ku Jesu a nga di ti emisete kuwonisana nako ngu kona ha kwathu, eto ti hi maha hi va ni lirando la hombe ngutu ngu ngene. w24.01 10-11 ¶7-9

Kasi ku hi va ni wuxaka wa wunene ni vamwani ti lava hi laphisa mbilu. (Jak. 1:19) Kulaphisa mbilu ku maha ti to kuva ni kurula. Ngako hi di vo laphisa mbilu, kha hi nambi angula ngu txikuluveta se hi womba mapswi aya ma si vhuniko, mbimo yi hi nga henya. Makhaloni yo phota hi na “timiselana ni kudivalelana mmwani ni mmwani.” (Vakl. 3:12, 13) Kulaphisa mbilu ka tshumela ku hi vhuna ku hi maha sisungo sa sinene. Hahanze ko tutumela kumaha txisungo hi na ti ha mbimo yo xolisisa ni kuwona tinzila ti hi nga ti thumisako. Ngu txikombiso, ngaku hi txi lava mthumo, ti nga maha hi tumela mthumo wo khata awu wu nga humelelako. Kambe Ngako hi di vo laphisa mbilu, hi na ti ha mbimo yo alakanyisisa ngu ti to wuna gwesa ngu nzila yihi wuxaka wangu ni mwaya kumweko ni Jehovha. Ngako hi txi laphisa mbilu, hi na vayilela kumaha txisungo txo va i singa txa txinene. w23.08 22 ¶8-9

Mbimo yimwani u nga tipfa u di godhote ngu konaha ka tiphazamo tako. Kambe ku khumbula ati u nga thembisa Jehovha mbimo yi u nga ti ningetela ti na kuvhuna ku u simama u txi wonisana ni siduko. Mbimo yi u tiningetelako ka Jehovha, awe wo ti lamba upune. Eto tiwomba to u na lamba totshe ati ti si tsakisiko Jehovha. (Mat. 16:24) Ngu toneto, mbimo yi u no wonisana ni siduko kha ti na mbi lava u heta mbimo ngu kupimisa ti to u na maha txani. Nguku awe u nava u txi tiziva ati u fanelako ku ti maha, i ku kusimama u di thembekile ka Jehovha. U na simama u di tiemisete ku tsakisa Jehovha. Ka mhaka yoneyo, u na fana ni Jobe. Hambi mbimo yi a nga txi wonisana ni sikarato sa hombe, ene a wombile tiya: “Kha ni na mbi dhuka ni leka ditshuri dangu.”—Jobe 27:5. w24.03 9 ¶6-7

Jehovha, “Txizimu txa lirando” txi ni nathu! (2 Vak. 13:11) Txona txa khatala ngu mmweyo ni mmweyo wathu. Athu hi nga tsaniseka ti to “lirando la MKOMA li ranganyeta avale va mthembako.” (Mas. 32:10) Mbimo yi hi yako hi alakanyisisa ngu lirando li Jehovha a nga hi komba, hi na ya hi tshuketa ngutu kwakwe ni ku i na va wa ditshuri kwathu. Athu hi nga maha mkombelo ka Jehovha mbimo yotshe ni ku m’gela ti to ha li lava ngutu lirando lakwe. Hi nga tshumela hi gela Jehovha totshe ati ti hi karatako hi txi tsaniseka ti to ene wa hi pfisisa ni ku wa ti lava ngutu ku hi vhuna. (Mas. 145:19) Kufana ni ku ku txi titila hi tshuketako hatxikho hi ora mndilo, hi lava kutshuketa ka lirando la Jehovha. Tula mbilu yako kasiku u pfa lirando la Jehovha ka wutomi wako. Niku ngako hi txi pfa lirando lonelo, hotshethu hi nga womba hi txi: “Na m’randa MKOMA.”—Mas. 116:1. w24.01 31 ¶19-20

Jesu a mahile to engeteleka kupinda kugela vathu to ditina da Txizimu i Jehovha. Vajudha a va Jesu a nga txi bhula na vo, se va txi di ziva ditina da Txizimu. Kambe Jesu a ve wo khata ku “zivisa ati Txizimu txi ku ngu tona.” (Joh. 1:17, 18) Ngu txikombiso, mibhalo ya Txihebheru yi womba ti to Jehovha Txizimu txa wumbilu ni ku pfela. (Eks. 34:5-7) Jesu a ti vekile hakubasani mbimo yi a nga womba-womba ngu txikombiso txa mwanana wo mwalala. Mbimo yi hi gondako mayelano ni tate “a txi wona mwanana wakwe a di kule,” e mu yela e m’bharasara ni ku m’divalela ti txi huma mbiluni, athu ha wu pfisisa kwati wumbilu ni mpfela wusiwana wa Jehovha. (Luka 15:11-32) Jesu a hi mahile hi pfisisa kwati ati Tate wakwe aku ngu tona. w24.02 10 ¶8-9

Jehovha a thavelela va va ku kukaratekani. Hi nga mu etetelisa kutxani Jehovha ko kombisa wumbilu ni kuthavelela vamwani? Nzila yimwani yo kombisa toneto ngu sakulela tifanelo timbiluni kwathu ati ti tsimbitisanako ni kuthavelela vamwani. Ngu tihi tifanelo toneto? Nji txani txi no hi vhuna ku hi simama hi kombisa lirando ni ku ‘zumba hi txi thavelelana ditshiku ni ditshiku?’ (1 Vat. 4:18) Hi fanete hi sakulela tifanelo tiya ta lisima to fana ni wunene, moya wa wumbilu ngu vanathu. (Vakl. 3:12; 1 Pedro 3:8) Tifanelo tiya ti na hi vhunisa kutxani? Ngaku hi di ni wumoya wa wumbilu ngu vanathu ni ku khatala ngu vona ti txi huma mbiluni, eto ti na hi susumetela ku hi va thavelela ngaku va txi wonisana ni sikarato. Jesu a wombile to: “Txisofu txi womba-womba ti ti nga tala mbiluni, m’thu wamnene a humisa sa sinene ngu ka thomba yakwe ya yinene.” (Mat. 12:34, 35) Kuthavelela vanathu ava va ku ni txilaveko, i nzila ya lisima yo kombisa lirando lathu ngu vona. w23.11 10 ¶10-11

Hi fanete hi kombela txivhuno ngaku hi txi lava kupfisisa wuprofeti wa mu ka Bhiblia. Wona txikombiso txiya: Alakanya ngako u txiya pfuxela wukhalo wu u si wu ziviko, kambe mngana wako wu u endako nayo wa kuziva kwati. Ene wa kuziva kwati amu mi yako kona ni tinzila ta wukhalo wonewo. Kha ti kanakanisi ti to u na tsaka ngu kuenda ni mngana eneyo. Ngu ha ku fanako Jehovha wa fana ni mngana wule wako, Ene wa wu ziva kwati wumangwana wathu. Ti to hi pfisisa kwati wuprofeti ti lava hi kombela txivhuno ka Jehovha ngu kutiveka hahatshi. (Dhan. 2:28; 2 Pedro 1:19, 20) Ku fana ni mveleki mmwani ni mmwani, Jehovha a lava ti to vanana vakwe va va ni wumangwana wo tsakisa. (Jer. 29:11) Jehovha a ni wusikoti wa hombe ngutu ku hambana ni vaveleki vathu, Ene a nga hi gela ngu ta wumangwana ni nzila yi ti no maheka ngu yona. Se ene a bhate wuprofeti wa mu ka Dipswi dakwe, kasi ku hi ziva simahakalo sa lisima si sise humelela.—Isaya 46:10. w23.08 8-9 ¶3-4