Setembro

Jehovha a ningile Jesu mtamo wo gumisa sotshe sikarato sa vathu. Ngu kuthumisa sidiwukiso Jesu a kombisile mtamo wakwe ngu kuxula sikarato a si hi nga si na kusikota ku si xula ngu mtamo wathu. Ngu txikombiso, ene a ni mtamo wo hi khulula ka ditshina di di vangako sikarato i ku txionho txi hi nga tshapeliswa ngu Adhamu atxi txi vanga malwati ni lifo. (Mat. 9:1-6; Var. 5:12, 18, 19) Sidiwukiso sakwe si kombisile ti to ene a nga sikota kuhanyisa “otshe malwati” ni kuwusa ava va nga fa. (Mat. 4:23; Joh. 11:43, 44) Ene a ni mtamo wo lawula diphuho da hombe ni wo khulula vathu ka mimoya yo biha. (Marku 4:37-39; Luka 8:2) Hi nga tsaniseka ti to Mfumo wa Txizimu wu na tisa makatekwa aya wu nga ma thembisa. Sidiwukiso si Jesu a nga si maha ha mafuni hawa i ti kova txibaka dwe, a na ta maha to tala kupinda tiya ka mbimo yi yi tako kota Mkoma wa Mfumo wa Txizimu. w23.04 3 ¶5-7

Ngako dibanza dano di di ni vahuweleli vo tala va txi guleta ngutu mawoko aha ko dako di si wonwi, Ti nga maha u godhola, u pimisa kuzumba u si xamuli. Kambe u nga godholi, duketa kuxamula. Lulamisela tixamulo ta tinginyana ka mitshangano yimwani ni yimwani. Se hambi i di to khu ningetwi ka dikhambi do khata u nava ni mikhanjo yimwani yo u xamula mbimo yi mitshangano yi tsimbilako. Mbimo yi u lulamiselako gondo ya Muwoneleli, wona nzila yi paragrafu yimwani ni yimwani yi yelanako ngu yona ni msungo mhaka wa gondo. Ngako u txi maha toneto, yi na mbi guma gondo yotshe u sa xamula. To engetela, lulamisela ka paragrafu yi ku ku ni timhaka to tshima ngutu ati ti karatako ku ti txhamusela. Nguko ti nga maha i di vadotho ava va no xamula ka paragrafu yoneyo. Se u nga maha txani i di ti to khu wu mani mkhanjo wo xamula? Tshuketela mtsimbitisi wa gondo yi si se khata mitshangano u m’gela paragrafu yi u tsakelako kuxamula. w23.04 21-22 ¶9-10

Josefa a amukete sileletelo mayelano ni mwaya wakwe kudingana makhambi mararu. Ka otshe makhambi awa, ene a engisile ngu txikuluveta hambiku mbimo yimwani ti nga txi lava e maha kutxitxa ko kari. (Mat. 1:20; 2:13-15, 19-21) Ngu kulondisa mkongomiso wa Jehovha, Josefa a vhikete Mariya, e mu seketela ni kutshumela e mu khatalela. Alakanya nzila yi simaho sa Josefa si nga vhuna ngu yona Mariya to e mu randa ni ku m’xonipha ngutu. Anu vavamna, mi nga etetela txikombiso txa Josefa ngu kulondisa txialakanyiso txa mu ka Bhiblia mayelano ni kukhatalela timwaya tanu. Ngako u txi thumisa txialakanyiso txiya hambi i di ti to ti na lava u maha kutxitxa ko kari, u na va u txi kombisa lirando ka msikati wako ni ku u nava u txi tsanisa wukati wanu. Mwanathu wa txisikati wa khe Vanuatu, awu a ku ni kona mu ka 20 wa malembe a ti txhadhile a womba tiya: “Mbimo yi mwamna wangu a thumisako mkongomiso wa Jehovha, na m’xonipha ngutu, ni tipfa ni di vhikelekile ni ku na si themba sisungo asi a si mahako.” w23.05 21 ¶5

Bhabhilona va ti fanete kuva “vathu vo sawuleka” ka Txizimu txawe. (Dhewut. 7:6) Eto kha ti wombi ti to vona va sa fanela kumaha to kari kasiku ve tsakisa Jehovha. Vajudha vo tala va veleketwe Bhabhilona, ni ku ti ti komba nga kutala kwawe va ti tolovete mapimiselo ni mahanyelo a kona khe. Mfumeli Nehemiya a xamate ngutu mbimo yi a nga tumbula to vanana ava va nga velekwa Israyeli va si ti koti kuwomba-womba lidimi la Vajudha. (Dhewut. 6:6, 7; Neh. 13:23, 24) Aku Dipswi da Txizimu di nga ti bhatwe ngu Txihebheru, va ndi na ti kotisa kutxani kuranda ni kukhozela Jehovha kuve va si li pfisisi lidimi lile? (Ezra 10:3, 44) Se ti txi lava Vajudha vale ve maha kutxitxa ko kari, kambe ti ndi na va hehukela va di khe Israyeli i ku ha wukhozeli wa ditshuri wu nga txi wusetwa kona.—Neh. 8:8, 9. w23.05 15 ¶6-7

Txo mbi tsakisa, ngu ti to ti si nga ni mhaka ni ti to hi ni txivangelo txo tsana, hotshethu hi nga manwa ngu to mbi ti rinzela. Ngu txikombiso, “mbimo ni mhaka yi yi nga mbi rinzelwa” si nga hi dyela mbimo ayi hi ndi no yi thumisa kasi kuhokelela makungo athu. (Ekl. 9:11, NM) Hi nga manana ni sikarato asi si nga hi mahako hi godhola mwendo kuguma mtamo. (Mav. 24:10) Ngu mhaka ya kwa mbi pelela, hi nga maha tiphazamo ati ti nga mahako ti hi karatela kuhokelela makungo athu. (Var. 7:23) Mwendo hi nga ti pfa hi di karate. (Mat. 26:43) Nji txani txi nga hi vhunako kuxula timhaka to mbi ti rinzela mwendo masiku o mbi tsakisa? Hambi u txo humelelwa ngu to mbi ti rinzela ati ti nga tsulupetako makungo ako u nga godholi. Bhiblia ya womba to hi nga thuka hi wonisana ni sikarato so wuyeletela. Hambi keto, yi tshumela yi womba to hi nga wuka ngu kuvhunwa ngu Jehovha. Ngako u txi simama hambi u txi wonisana ni sikarato, u kombisa to u lava kutsakisa Jehovha. Jehovha wa tsaka ngako a txi ku wona u simama u lwa kasi kuhokelela makungo ako. w23.05 30 ¶14-15

Ku va nyaphandule ti nga vhuna dijovhem ku di gonda kuhanyisana kwati ni vathu vo hambana-hambana ni ku ziva nzila yo thumisa kwati male yi a yi manako a si sakani ngu yona. (Vaf. 4:11-13) Nzila ya yinene yo khata mthumo wa mbimo yotshe nguva nyaphandule wo vhuneta eto ti va vhuni ku ve va va nyaphandule va mbimo yotshe. Kuva nyaphandule ti nga tula yimwani mikhanjo ka mthumo wa mbimo yotshe, ngu txikombiso, kuthuma ka mthumo wo aka ni Bhetele. Vanathu va i ku vavamna mabanzani ti lava ku ve va ni makungo o faneleka kuthumela vanathu kota madhota. Bhiblia yi womba ti to vavamna va va ti karatelako kuva ni wutixamuleli wonewo va ti karatela kuva “ni mthumo wa wunene.” (1 Tim. 3:1) Mwanathu na a si se va didhota, ti lava e khata ngu ku faneleka kuthuma kota dilanda da wuthumeli. Malanda a wuthumeli ma vhuna madhota ti to me khatalela vanathu dibanzani ngu tinzila to hambana-hambana. Madhota kumweko ni malanda a wuthumeli vathu va va tivekako hahatshi va txi thumela vanathu dibanzani ni ku vahuweleli vo hiseka ka mthumo wo txhumayela. w23.12 28 ¶14-16

Josiya i ti ngadi txifanyana mbimo yi a nga khata kutshuketa hafuhi ka Jehovha. Ene a txi lava kugonda ngu Jehovha ni kumaha kuranda kwakwe. Hambiketo, wutomi wu si m’hehukeli mkoma wuwa i nga ti ngadi txifanyana. Ka timbimo toneto vathu va txi khozela sizimu sa walo, se ti lavile e va ni txibindi kasi kuwuseta wukhozeli wa ditshuri. A si se tshanganisa 20 wa malembe, ene a khatile kufuvisa wukhozeli wa makuhu khe Jerusalema. (2 Mak. 34:1, 2) Hambi u di ngadi jovhem, u nga etetela Josiya ngu kutshuketa ka Jehovha ni kugonda ngu tifanelo takwe. Eto ti nga kususumetela ku tiningetela ka Jehovha. Toneto ti nga gwesa ngu nzila muni wutomi wako? Luka, awu a nga bhabhatiswa a di ni 14 wa malembe a womba tiya: “Kukhukhela konku ku ya masoni na thangetisa mthumo wa Jehovha ka wutomi wangu, ni ku na zama ku m’tsakisa.” (Marku 12:30) Nawe u nga va ni makatekwa yo tala ngako u txi maha ati ti fanako! w23.09 11 ¶12-13

Mbimo yi Paulo a nga bhala dipasi diya, dibanza da Tesalonika di si se vhala dilembe di di simekilwe. Se vavamna ava va nga di sawutwe kuthangela va si nga ni experiyensiya, ni ku ku ti lava va mahile tiphazamo. Hambiketo, ti txi lava ve xonipwa. Aku xanisa ya hombe yi yako yi txi tshuketela, hi na lava madhota kasiku me hi ninga mkongomiso wo pinda awu hi wu manako nyamsi. Ti nga maha ti si koteki kumana mkongomiso wo ta ngu mzinda mwendo ngu Bhetele ngu kukongoma, se nda lisima kukombisa lirando ni txixonipho madhota i di nga di konku. Hi lava kusimama hi di tsani, hi si veki mapimo ka tiphazamo tawe, kambe hi veka mapimo ka ti Jehovha, ngu kuthumisa Jesu a no kongomisa vavamna vava vo thembeka. Kufana ni ku txigoko txi vhikelako msungo wa disotxhwa, themba yathu ya kuhanyiswa ya vhikela mialakanyo yathu. Athu ha ti ziva ti to asi mafu yawa ma si ningelako nyamsi hi nga sa txilo. (Vaf. 3:8) Themba yathu ya hi vhuna kusimama hi thutha ni kutsana. w23.06 11-12 ¶11-12

Ava va engisako txirambo txa “wamsikati wa txiphuku-phuku” va nga ti sawulela. Vona va nga sawula kutumela txirambo mwendo ku txi lamba. Ku ni sivangelo so tala si hi mahako hi vayilela wugango. Bhiblia yi txhamusela “wamsikati wa txiphuku-phuku” a txi womba mapswi yawa: “Mati o piwa ma lombela.” (Mav. 9:17) Nji txani “mati o piwa?” Bhiblia yi fananisa timhaka ta mataho ka va va nga tekana ni mati o tshamba. (Mav. 5:15-18) Wamwamna ni wamsikati ava va nga txhadha va tumelelwa ku ve ti dila ngu timhaka ta mataho. Se ngu kuhi kuhambana ni “mati o piwa?” Mati o piwa ku wombwa wugango. Timhaka tiya ti maheka kusisalani kufana ni dikhamba adi di pako kusisalani. “Mati o piwa” ma ti komba ma txi lombela ngako ava va mahako toneto va txi alakanya ti to kha va na mbi thuka ve tumbulwa. Kambe vo ti kanganyisa nguko Jehovha wa wona totshe. Kha txi ngaho txo panda ngutu kupinda kuluzekelwa ngu wuxaka wako ni Jehovha. Ina taho to “lombela” ka toneto? —1 Vak. 6:9, 10. w23.06 22 ¶7-9

U nga maha txani ngaku u txi pfisisa to mikombelo yako hi nga ngadi yo huma mbiluni? Mwendo khu ngadi u pateka ka mthumo wo txhumayela, kufana ni kale? U nga pimisi ti to khu ngadi ni moya wo sawuleka wa Jehovha. Kota vathu va kwa mbi pelela, ti tolovelekile ku matipfelo athu me txitxa-txitxa. Ngaku kuhiseka kwako ku txi pumbeka, alakanyisisa ngu txikombiso txa mpostoli Paulo. Ene a txi maha mizamo yo etetela Jesu, kambe mbimo yimwani Paulo a txi ti ziva ti to asi na kuva ni minavelo yo maha ati a ngadi fanete ku timaha. Paulo a di tiemisete ku hetisisa mthumo wakwe, ti si nga ni mhaka ni matipfelo akwe. Ngu ha kufanako, u nga mahe sisungo ngu kuya ngu ti u ti pfisako tona dwe. Tiemisele kumaha ti i ku tona, hambi i si nga ngu mbilu yotshe. Ngaku u txi simama u txi maha ti i ku tatinene, ngu ku tsimbila ka mbimo, matipfelo ako ma nga txitxa me va a manene.—1 Vak. 9:16. w24.03 11-12 ¶12-13

Nathu hi nga kombisa lirando ka vanathu ngu kuva vangana vawe ni kuheta mbimo navo. (2 Vak. 6:11-13) Kutala kwathu hi pfala ka mabanza ya ku ku ni vanathu vo ta ngu makhalo o hambana-hambana ni mazumbelo o hambana. Hi nga tsanisa lirando lathu ni vanathu ngu kuveka mapimo athu ka tifanelo tawe ta tinene. Lirando li nga va la lisima ngutu ka timbimo ta xanisa ya hombe. Hi na ku mana hani kuvhikeleka mbimo yi yi no khata xanisa ya hombe? Wona ti Jehovha a nga leletela vathu vakwe mbimo yi Bhabhilona wa kale a nga xaselwa: “Tsulani koko anu vathu vangu, wulelani tinyumbani kwanu mi ti sekela matimba, baramani ngu mbimonyana kala kuza kuboxa kuhenya.” (Isaya 26:20) Ti woneka nga mapswi yawa ma thuma ni kwathu hi no wonisana ni xanisa ya hombe. w23.07 6-7 ¶14-16

Kombisa ngu simaho sako to wa dinganisela. Ti wotise tiya: ‘Ina vathu va ni wona kota m’thu wo dinganisela, ni wo pfana ni vamwani? Ina va ni ziva kota m’thu wo ti karatisela ni wo banga msungo? Mwendo na engisela vamwani ni ku tumelelana ni ku navela kwawe ngako ti txi koteka? Se ngako hi txi kombisa ku dinganisela ti na ti komba ti to hi etetela Jehovha ni Jesu. Ku dinganisela ti pata ku ti pfananisa ni siemo sathu ngako si txi txitxa. Se ku txitxa kuwa ka siemo ku nga tisa sikarato a si hi nga mbi si rinzela. Hi nga thuka hi manwa ngu malwati ya txitshuketi, hi pwata so ti hanyisa ngu sona hi sa tiemela, mwendo mfumo wa mu hi zumbako kona wu karatisela timhaka, a ti ti nga mahako to wutomi wathu wu hi nemelela. (Ekl. 9:11) Ti nga thuka ti hi karatela ngutu ngako txiavelo txathu txi txi txitxa. Hi nga ti pfananisa ni siemo sa siphya ngu kulondisela mazambo awa a mune: 1) tumela ti to txiemo txi txitxile ngu ditshuri, 2) wona ta mbimo yi yi tako, 3) va na ni mawonelo a manene, ni 4) vhuna vamwani. w23.07 21-22 ¶7-8

Mprofeti Dhaniyeli i ti nga ti jovhem mbimo yi Vabhabhilona va nga mteka kota txibotxhwa txa yimbi va txi m’yisa kule ni mu a nga velekelwa kona. Kambe Dhaniyeli a xamatisile ngutu ava va nga mu ñola. Nguko “m’thu a wona asi si ku masoni kwakwe” se vona va txi wona Dhaniyeli kota “m’thu wo tshura” ni ku a txi ta ngu ka mwaya wu wu nga txi xoniphwa ngutu. (1 Sam. 16:7) Ngu toneto, va m’trenarile ku e thuma ka nyumba ya wukoma. (Dhan. 1:3, 4, 6) Jehovha a txi mranda ngu ti Dhaniyeli a nga ti sawute ku va tona. Ti nga maha Dhaniyeli a ti ni kona mu ka 20 wa malembe mbimo yi Jehovha a nga womba-womba kwati ngu ngene kumweko ni Nowa ni Jobe, i ku vavamna ava va nga heta mbimo va txi sakulela mahanyelo a manene masoni ka Jehovha. (Gen. 5:32; 6:9, 10; Jobe 42:16, 17; Eze. 14:14) Se Jehovha a simamile e randa Dhaniyeli ka wotshe wutomi wakwe.—Dhan. 10:11, 19. w23.08 2 ¶1-2

Mbimo yiu mahako txisungo txo xava nyumba, Kha ti kanakanisi to u na lava kubela u wona totshe mayelano ni nyumba yi u lavako ku yi xava. Nathu hi nga maha ti ti fanako mbimo yi hi gondako Bhiblia. U txo gonda ngu txikuluveta u na ziva dwe “makhato a timhaka ta Txizimu.” (Vaheb. 5:12) Hahanze keto nga ha ti fanako ni ka nyumba, “bela mndani” u wona tithomba ti ti ku ka yona. Ti to u gonda kwati Bhiblia ti lava u wona nzila yi madungula o tala ma pfanako ngu yona. Zama kupfisisa ati u ti kholwako ni ku ngu kutxani u txi ti kholwa. Kasi ku hi pfisisa kwati Dipswi da Txizimu ti lava hi gonda ngu ditshuri do tshima da mu ka Bhiblia. Mpostoli Paulo a kuzetile Makristu kulowe ku me gonda kwati Dipswi da Txizimu kasi ku me ziva “kuanama ni kulapha, kudemba ni kutshima” ka Dipswi da Txizimu. Eto ti ndi na va maha ve va ni “mkoloti wa kutsanisa” likholo lawe. (Vaef. 3:14-19) Ti lava hi maha ati ti fanako. w23.10 18 ¶1-3

Bhiblia yi ni sikombiso sa singi sa vathu va nga kombisa kulaphisa mbilu. Ti nga va tatinene ku ti vekela makungo o gonda ngu sikombiso soneso ka gondo yako upune. Ngu txikombiso hambiku Dhavhidha a nga sawulwa i di ngadi jovhem kasi ku e va mkoma wa Israyeli, ti lavile e ema malembe kasi ku e khata kufuma. Simiyoni ni Ana va simamile va txi khozela Jehovha ngu kuthembeka, va di ngadi va txi emela kuwona Mesiya wu a nga ti thembisilwe. (Luka 2:25, 36-38) Mbimo yi u gondako matimu oneyo, zama kuwona tixamulo ta siwotiso siya: Nji txani txi nga vhuna m’thu wuwa ku eva wo laphisa mbilu? Ngu yihi wuyelo a nga yi mana ngu kuva a di laphisile mbilu? Ni nga m’etetela ngu nzila muni? U nga tshumela u gonda ngu sikombiso sa va va nga mbi laphisa mbilu. (1 Sam. 13:8-14) U nga tshumela u ti wotisa tiya: ‘Nji txani txi nga maha ti to va si kombisi kulaphisa mbilu? Ni ku i ve yihi wuyelo?’ w23.08 25 ¶15

Mpostoli Pedro a di thembekile, kha tumelela txilo ku txi mmaha e leka kulondeta Jesu. Ene a kombisile kuthembeka kwakwe mbimo yi Jesu a nga womba ti valondeteli vamwani va nga mba ti pfisisa. (Joh. 6:68) Jesu a sise txhamusela ti a nga tiwomba, va vangi va to leka ku mlondisa. Kambe Pedro a simamile a di thembekile ngu kuwomba ti to Jesu a ni “mapswi ya wutomi wo mbi guma.” Jesu a txi tiziva ti to Pedro ni valondeteli vakwe vamwani va ndina mleka. Hambi keto Jesu a txi themba ti to Pedro a ndina wuya ni ku simama e va wo thembeka. (Luka 22:31, 32) Jesu a txi ti pfisisa ti to “moya . . . wa ti lava, aniko mmidi wa rereka.” (Marku 14:38) Hambi msana ko Pedro a di lambile Jesu, ene kha m’tsukula. Ti ti komba nga Pedro mbimo yi a ngati ekha Jesu a humelete kwakwe msana kova a di wusilwe. (Marku 16:7; Luka 24:34; 1 Vak. 15:5) Alakanya nzila yi toneto ti nga mtsanisa ngu yona Pedro, msana kova a di mahile tiphazamo to tala! w23.09 22 ¶9-10

Jehovha a divalela sionho sa vale va ku ni likholo kwakwe. Ene a divalela da magwito ni ku kha zumbeli ku alakanyela sionho sa m’thu eneyo. (Mas. 32:1, 2) Ka Txizimu m’thu eneyo mbwo lulama ni ku kha na txisolo ngu kona hawa ka likholo lakwe. Ditshuri ti to, Abrahamu, Dhavhidha, ni malanda mamwani o thembeka a Jehovha va dhanwi to vathu vo lulama, hambiketo va simamile i di vaonhi ni ku va vathu va kwa mbi pelela. Kambe ngu kona ha ka likholo li va nga ti nalo, Jehovha a va woni i di vathu va va si ngako ni txisolo, ngutu-ngutu va txi dinganiswa ni vale va nga ti si mkhozeli. (Vaef. 2:12) Ka dipasi di a nga bhalela Varoma Paulo a txhamusete ti to, ngako hi txi lava ku va vangana va Txizimu hi fanete hi va ni likholo. Se, kufana ni Abrahamu ni Dhavhidha, hi di ni likholo ka Jehovha hi nga sikota ku va vangana vakwe. w23.12 3 ¶6-7

Nyamsi otshe Makristu ma ni lungelo yo ningela magandelo ka Jehovha ngu kuthumisa mbimo yawe, mtamo wawe, ni sotshe si va ku naso kasi kuseketela mfumo wa Txizimu. Hotshethu hi nga kombisa ti to ha ninga lisima lungelo yi hi ku nayo yo khozela Jehovha, ngu kumaha totshe ti hi nga tikotako kasi kuseketela mthumo wakwe. Mpostoli Paulo a wombile ti hi fanelako kusimama hi ti maha ka wukhozeli wathu ka Jehovha. (Vaheb. 10:22-25) Eto ti pata kumaha mkombelo ka Jehovha, kutxhumayela mahungu a manene, ku mbi leka kuxalela mitshangano ni kutsanisana ‘ngutu-ngutu aku yi wonako ditshiku da MKOMA di txi tshuketela.’ Magwito ka dibhuku da Mtuletelo, ngelozi ya Jehovha yi womba ti ti londisako kumbidi kasi ku ti junyatisa: “Txizimu ngu txona u fanelako ku txi khozela.” (Mtu. 19:10; 22:9) Hi navela to hi si thuki hi divala ditshuri diya do tshima mayelano ni Jehovha ni dithempele dakwe da moya, ni kuninga lisima lungelo yi hi ku nayo yo khozela Jehovha Txizimu txathu txo guleka! w23.10 29 ¶17-18

Hotshethu ti lava ‘hi randana.’ Nda lisima ngutu ku khumbula txialakanyiso txa Jesu mbimo yi a nga khene “lirando la wungi wa vathu li na hola.” (Mat. 24:12) Jesu a si wombi to ku tala ka valondeteli vakwe va na ema kukombisa lirando. Ngu toneto, hi fanete ku tiwonela kasiku hi si belelwi ngu mahanyelo a vathu va mafu o mbi kombisa lirando ka vamwani. Nzila yimwani yo wona kutsana ka lirando lathu, ngu xolisisa nzila yi hi angulako ngu yona ka siemo so hambana-hambana sa wutomi. (2 Vak. 8:8) Tximwani txa siemo soneso si bhatwe ngu mpostoli Pedro: “Ngutu-ngutu, khatalelani kurandana nguko lirando la fenengeta mtalo wa sionho.” (1 Pedro 4:8) Tiphazamo ni kwa mbi hetiseka ka vamwani ti nga duka lirando lathu. w23.11 10 ¶12-13

Hi nge sikoti kulondisa mlayo wa Jesu mayelano ni lirando ngaku dibanzani hi txi sawula va hi no va kombisa lirando hi leka vamwani. Ditshuri ti to ti nga maha hi va ni wungana wa hombe ni vo kari kupinda vamwani kufana ni Jesu. (Joh. 13:23; 20:2) Kambe mpostoli Pedro a hi khumbutisile to hi fanete ku tikaratela kuva “ni lirando la txikoma ni txinanda,” hi randa votshe vanathu ngu ku va maha txienge txa mwaya wathu. (1 Pedro 2:17) Pedro a hi kuzetile ti to “hi randana nguku khutala ngu lirando la kuta ngu mndani ka mbilu.” (1 Pedro 1:22) Ka mhaka yiya, kurandana “ni ku khutala,” ti womba kuranda m’thu hambi ti si hehuki kukombisa lirando lonelo. Ngu txikombiso, ngaku m’thu a txi hi henyisa ti nga maha hi lava ku phota hahanze ko kombisa lirando. Kambe Pedro a gondisilwe ngu Jesu ti to kuphota kha ti tsakisi Jehovha. (Joh. 18:10, 11) Pedro a bhate tiya: “Mi nga tshumeteleni wubihi ngu wubihi, hambi txiruko ngu txiruko aniko wombani wunene.” (1 Pedro 3:9) Ngako u di ni lirando lo khutala ngu vamwani u na maha wunene ka votshe ni ku va ninga lisima. w23.09 28-29 ¶9-11

Ha xamala ngutu ngu ku wona to ngu mbimo nyana ya yidotho mwanana wa kula e va wa hombe. Eto ti maheka ngu nzila ya mtumbuluko ha ko kha ti lavi ve maha mizamo. Kambe kukula ngu didhawa da moya ta hambana. (1 Vak. 13:11; Vaheb. 6:1) Kasiku m’thu e va ni wuxaka wo tsana ni Jehovha ti lava e maha mizamo. Hahanze keto ti lava e va ni txivhuno txa moya wo sawuleka kasi ku e va ni tifanelo ta tinene, e kulisa wusikoti ni ku ti lulamisela ka wutixamuleli wu a no va nawo mbimo yi yi tako. (Mav. 1:5) Jehovha a vangile vathu ti to i va wamwamna mwendo wamsikati. (Gen. 1:27) Ditshuri ti to wamwamna ni wamsikati va mahilwe ngu nzila yi yi si faniko, kambe taho timwani ti va hambanisako. Ngu txikombiso Jehovha a vangile wamwamna ni wamsikati va di ni wutixamuleli wo hambana, wusikoti wo hambana mwendo tiningo ati ti ndi no va vhuna kuhetisisa wutixamuleli wawe.—Gen. 2:18. w23.12 18 ¶1-2

Ina Jesu nene a txi tilava ti to vamwani ve thumisa ditina da Tate wakwe? Xamulo i ina. Vathangeli vamwani va titxhetxhe va txi kholwa ti to ngwa mbina txixonipho kuwomba ditina da Txizimu, kambe Jesu kha tumela ti to txihena txonetxo txo mbi seketelwa ka mibhalo txi mtsivela kudhumisa ditina da Tate wakwe. Dikhambi dimwani Jesu a hanyisile wamwamna wu a nga ti ni madhimoni a nga txi hanya ditikoni da Vagerasa. Vathu va to khata kuthava Jesu aha koza ve mkombela ku e khukha ditikoni kwawe. (Marku 5:16, 17) Hambiketo Jesu a txi lava ti to vathu va wukhalo wule ve ziva ditina da Txizimu. Se ene a to gela wamwamna wule ti to e bhulela vathu ati Jehovha a nga ti mmahete i si nga ti ene a nga ti mahile. (Marku 5:16, 17) Jesu a nga txi lava ku hi maha ti to ditina da Tate wakwe di ziwa ha mafuni kotshe! (Mat. 24:14; 28:19, 20) Ngaku hi txi maha txienge txathu ka mhaka yiya hi tsakisa Mkoma wathu Jesu Kristu. w24.02 10 ¶10

I lungelo ya hombe nguto ku maha txienge txa sengeletano ya Jehovha ka masiku yawa o karata. Mbimo yi txiemo txa mafu txi yako txi txi bava, Jehovha a hi ninga mwaya wa moya awu wu ku ni wumwewo. (Mas. 133:1) Ene wa hi vhuna ku hi va ni mwaya awu wu nga tsaka. (Vaef. 5:33–6:1) Wa hi ninga ku pfisisa ni wutxhari awu hi wu lavako kasi ku hi va ni kurula dihikani. Ti lava hi tikaratela kusimama hi thumela Jehovha ngu kuthembeka. Ngu ku txani? Nguku, mbimo yimwani hi nga henyiswa ngu tiphazamo ta vamwani. Mwendo mbimo yimwani ti nga hi karatela kuwonisana ni tiphazamo tathu hipune, ngutu-ngutu ngaku hi txi wuyeletela tiphazamo toneto ta timweto yotshe mbimo. Ti lava hi tsanisela ka mthumo wa Jehovha ngaku, 1) mwanathu a txi hi kanda txizenende, 2) ngako wu hi nga tekana nayo a txi hi godholisa, ni 3) ngako hi txi godholiswa ngu tiphazamo tathu hipune. w24.03 14 ¶1-2

Makhambi mamwani u na pfa ma experiyensia ya vanathu ava va nga sunga kumaha to engeteleka ka mthumo wa Jehovha. Ti nga maha va di yite ka Txikolwa txa va Txhumayeli va Mfumo, mwendo va di rurile va txi ya mu ku ku ni txilaveko. Ngaku txiemo txako txi txi ku tumelela, eyo ku nga va makungo ya u nga vako nawo nawe. Vathu va Jehovha va simama va txi lava kumaha to engeteleka ka mthumo wakwe. (Mith. 16:9) Se ngaku, ngu txivangelo txo kari, ti si koteki ku tivekela makungo onewo? U nga pimisi ti to khu nga wa txilo ka vanathu va va si kotako ku hokelela makungo oneyo. Txa lisima ngutu ngu simama u tsanisela. (Mat. 10:22) U nga divale ti to Jehovha wa tsaka ngu totshe ti u ti mahako ngu kuya ku siemo ni wusikoti wako. Ngu toneto ti no kuvhuna kusimama u londeta Jesu msana ko bhabhatiswa.—Mas. 26:1.w24.03 10 ¶11

Jehovha a thembisa ti to ngaku hi txi tisola ene a na hi divalela. (Mas. 86:5) Se ngaku hi txi tisola ti txi huma mbiluni hi nga tsaniseka ti to Jehovha a womba ditshuri, ene a hi divalete. Khumbula ti to Jehovha wa dinganisela. Ene kha hi kombeli kumaha to pinda ati hi nga tikotako kumaha. Ngako hi txi maha mizamo, Jehovha wa ninga lisima totshe ti hi ti mahako ngu ngene. Hahanze keto, awe u nga alakanyisisa ngu sikombiso sa mu ka Bhiblia sa vathu va va nga thumela Jehovha ngu mbilu yotshe. Alakanyisisa ngu Paulo, a thumile ngu kuhiseka a txi tsimbila mipfhuka yo lapha ni kusimeka mabanza a mangi. Kambe mbimo si txiemo txi nga txitxa ka wutomi wakwe a si swi e txhumayela nga ti a nga txi mahisa tona kale. Ina Jehovha a lekile ku ninga lisima ati a nga txi ti maha? Ahim-him. Paulo a simamile e maha ti a nga txi tikota ni ku Jehovha a mkatekisile. (Mith. 28:30, 31) Ngu ha ku fanako, ati hi tikotako kumaha ka mthumo wa Jehovha ti nga txitxa ngu ku tsimbila ka mbimo. Kambe a txi i ku txa lisima kwakwe txivangelo txi txi hi mahako hi mthumela. w24.03 27 ¶7, 9

Nzila yi Jesu a nga ti womba-womba ngu yona ni Jehovha ngu mkombelo i ve txikombiso txa txinene ka valondeteli vakwe. Ka mthumo wakwe wo txhumayela, mbimo yotshe Jesu a txi maha mkombelo. Ene ati ti vekete mbimo yo khongela nguko mbimo yotshe atxi zumba a di ñolekile ni ku a ti randelwa ngu vathu vo tala. (Marku 6:31, 45, 46) Ene atxi wuka ni mixo ku di ngadi phumile kasiku eya va ka wukhalo wakwe ekha ti to e khongela. Dikhambi dimwani a khongete wusiku wotshe a si se maha txisungo txa lisima ngutu. (Luka 6:12, 13) Ka wusiku wule a si se fa, Jesu a khongete makhambi o tala a txi veka mapimo ka txiavelo txakwe txo karata ngutu. (Mat. 26:39, 42, 44) Kufana ni Jesu ti nga lava hi ti vekela mbimo yo maha mkombelo i nga va ni mixo ngutu mwendo hagari ka wusiku. Hi txi maha toneto hi komba Jehovha to ha yi bonga ningo yiya ya lisima. w23.05 3 ¶4-5

Wona mapswi aya ma ku: “li thetwe” timbiluni kwathu ka mbalo wuwa. Direferensiya dimwani di fananisa mapswi yawa ni “kuthelwa ngu mati.” Txikombiso txonetxo txi veka hakubasani nzila yi Jehovha a va randako ngu yona vasawuleki. Ni ku vona va ti ziva ti to ‘va randeka ka Txizimu.’ (Judha 1) Mpostoli Johani a wombile ti a nga ti ti pfisa tona mbimo yi a nga bhala tiya: “Wonani lirando la kuxamalisa la Tate; a nga hi ninga mathomo a ku hi maha vanana va Txizimu!” (1 Joh. 3:1) Ina Jehovha a randa vasawuleki dwe? Ahim-him, Jehovha a ti kombisile ti to wa hi randa hotshethu. Ngu yihi nzila ya hombe ayi Jehovha a kombisako ngu yona lirando? Mterulo, i ku wona txikombiso txa hombe txa lirando hamafuni kotshe!—Joh. 3:16; Var. 5:8. w24.01 28 ¶9-10

Vhersikulo yi yi ku txitimwi hawa yi kombisa ati ti nga vhuna Dhavhidha mbimo yi a nga txi thava. Hambi mbimo yi wutomi wakwe wu nga ti phangoni, Dhavhidha a txi alakanyisisa ngu ti Jehovha a ndi no maha ngu ngene. Dhavhidha a txi ti ziva ti to Jehovha a ndi na m’hulukisa ngu mbimo ya kona. Nguko Jehovha a ti wombile ti to Dhavhidha a ndi nava mkoma wu a londiselako wa Israyeli. (1 Sam. 16:1, 13) Ka Dhavhidha, totshe ti Jehovha a ndi no ti thembisa, ti txi fana ni ku va ti di mahekile. Ngu tihi ti Jehovha a nga thembisa ku kumahela? Kha hi emeli ti to Jehovha e hi vhikela ka sotshe sikarato. Hambiketo, hi nga tsaniseka ti to txikarato tximwani ni tximwani txi hi nga wonisanako natxo ka mafu yawa, Jehovha a na txi thavisa ka mafu a maphya. (Isaya 25:7-9) Ti hakubasani ti to M’vangi wathu a ni mtamo wo wusa ava va nga fa, kudhaha malwati ni kuthavisa votshe valala vathu.—1 Joh. 4:4. w24.01 6 ¶12-13

Alakanyisisa ngu ku ti ningetela kwako ni bhabhatiso. U tekile mazambo yawa nguko u ti lava ku seketela Jehovha. Alakanya ti ti nga ku vhuna ku u tsaniseka to u mani ditshuri. U gondile ku mziva kwati Jehovha ku mxonipha ni ku mranda. Awe u tsanisile likholo lako ni ku eto ti ku kuzetile ku u ti sola ka sionho sako. Mbilu yako yi ku susumetete ku hambana ni mahanyelo o biha ni ku u hanya ngu kuyelana ni kudhunda ka Txizimu. Awe u ti pfite u di rute mbimo yi u nga ziva ti to Jehovha a ku divalete. (Mas. 32:2) U khatile kuxalela mitshangano ya Wukristu ni ku bhula ni vamwani ngu timhaka to tsakisa ati u nga ti gonda. Kota Mkristu wu a nga ti ningetela ni ku bhabhatiswa, konku u tsimbila ka nzila ya wutomi ni ku u ti emisete kusimama u tsimbila ka yona. (Mat. 7:13, 14) Yana masoni u tsana ni ku randa Jehovha mbimo yotshe u engisa milayo yakwe. w23.07 17 ¶14; 19 ¶19

Kualakanyisisa ngu mkombelo wu u nga wu maha, mbimo si u nga ti ningetela ka Jehovha ti na kuvhuna ku mana mtamo wo wonisana ni txiduko tximwani ni tximwani. Ngu txikombiso, ina u di na navela m’thu wu a nga txhadha? Ti hakubasani to ahim-him. Awe u thembisile Jehovha to u na mbi thuka u di mahile toneto. Ngaku u si tumeleli ti to mialakanyo yo biha yi bela mbiluni kwako, kha ti na mbi lava u ti ninga mthumo wo ti khulula ka yona mbimo yi yi tako. Ngu nzila yoneyo, awe u nava u txo ti khulula ka “nzila ya vaonhi.” (Mav. 4:14, 15) Kualakanyisisa ngu txikombiso txa Jesu, ti nga hi vhuna ngutu ti to u vayilela kumaha ati Jehovha ati nyenyako. (Mat. 4:10; Joh. 8:29) Ditshuri ngu ti to siduko si na ku ninga mkhanjo wo kombisa ti to u ti emisete kusimama u txi londisa Jesu. w24.03 9-10 ¶8-10