‘Mga Ilhanan Gikan sa Langit’—Usa ka Hinungdan sa Kasubo?

“Ang epektibo kaayong armas mahimong ikabutang na sa kawanangan sa tuig 2000, armas nga makaatake sa mga satelayt ug mga estasyon sa kawanangan ug sa mga target dinhi sa Yuta.”

ANG pahayag sa ibabaw gihimo sa presidente sa International Academy of Astronautics. Ang armas sa kawanangan dili ra kay estorya. Usa sa gamhanan kaayong mga nasod milampos sa pagsulay sa usa ka batok-satelayt nga armas.

Sa usa ka pakigpulong nga gihatag niadtong Marso 23, 1983, ang presidente sa Tinipong Bansa misugyot sa paggamit sa armas nga ipasukad sa kawanangan ingong usa ka paagi sa depensa. Kana magkinahanglang ang ubay-ubayng satelayt ibutang sa orbito​—mga satelayt nga may katakos sa pagtiktik sa kaawayng mga missile ug paagi sa pagguba kanila. Sa opisyal gitawag Strategic Defense Initiative, ang proyekto gianggaag Star Wars.

Usa ka siyentipikanhong magasin nagbatbat niana ingong “dakong paglaom sa kaugmaon,” nga “magkunhod sa makalilisang nga hulga sa nukleyar nga armas.” Ang lain pa, ang magasing Nature, miingon: “Ang paggamag usa ka sistemang star wars naghimo sa purohan sa pagkunhod sa gidaghanon sa nukleyar nga armas nga labi pang halayo; kon ang imong kaaway dunay kalasag kinahanglan nimo ang dugang mga pana.” Sa susama, usa ka artikulo sa Scientific American mibatbat sa “kalit nga pag-us-os sa tibuok-yutang kasegurohan” nga gipahinabo sa nukleyar nga panahon ug misugyot nga kon “ang dili-mapugngang bangga sa armas sa kawanangan” mosunod man ugaling, kana dugang magkunhod sa “lebel sa kasegurohan.”

Makapasubong mga Palaaboton Gitagna

Ang kawalay-kasegurohang nasinati sa atong kaliwatan gitagna sa Bibliya sa miingon kining ang mga tawo “panguyapan tungod sa kahadlok ug pagpaabot sa mga butang mahitabo sa gipuy-ang yuta; kay ang mga gahom sa kalangitan pagauyogon.” (Lucas 21:​26) Daghang butang ang nagpahinabo sa katawhan nga “panguyapan tungod sa kahadlok” bahin sa kaugmaon sa yuta.

Pananglitan, ang usa ka tem sa lima ka siyentipiko karong bag-o misulat bahin sa ulohang “Ang mga Epekto sa Nukleyar nga Gubat Diha sa Klima” ug miingon: “Ang bag-ong mga kaplag sa among grupo, nga gipamatud-an sa mga magbubuhat sa Uropa, sa T. B. ug sa U.S.S.R., nagasugyot nga ang dugayg-tagal nga mga epekto sa dakong gubat nukleyar diha sa klima lagmit labi pang grabe ug halayog-abot kay sa gituohan. Tungod sa epekto sa maong gubat ang dagkong mga bahin sa yuta mapailalom sa dugay nga kangitngitan, dili-kasagarang ubos nga mga temperatura, mabangis nga mga hangin, makahilong aso ug malahutayong radyasyon . . . Bisan sa mga rehiyong halayo sa away ang mga makalabang-buhi mameligro sa gutom . . . ug sa ubang daotang sangpotanan.”​—Scientific American, Agosto 1984.

Ang maong tibuok-yutang epekto sa nukleyar nga gubat kasagarang gitawag nukleyar nga tingtugnaw. Dili katingad-anan, bisan ang katawhan sa habagatang hemispera mobatig kalisang bisan pag halayo sila sa teritoryo sa gamhanan kaayong mga nasod. Sa usa ka editoryal nga nag-ulohang “Armageddon,” ang South African Medical Journal miingon: “Ang bug-os dakong posibilidad sa tibuok-yutang thermonuclear nga gubat mohimo sa tanang laing riyesgo sa panglawas sa tawo nga mawalay-bili. . . . Diha sa labaw kay sa limitadong pagbayloayg nukleyar nga armas, ang medikal nga mga serbisyo nga atong nasayran dili na unya maglungtad. . . . Sa pagkakaron, lagmit may malangkobong kaamgohan sa kapeligrohan sa nukleyar nga katalagman kay sukad masukad.”

Ang makapasubong mga pagdahom sa pakyawng paglaglag dili limitado sa hulga sa nukleyar nga gubat. Ang kinaiyanhong kosmikong mga katalagman, sa usa o laing matang, maoy kanunayng topiko diha sa mga libro ug magasin. Ang pagdahom nga ang dako kaayong butang mahibangga sa yuta mao ang tema sa bag-ong kulbahinam nga pelikula, ang Meteor. Labi pang bag-o, ang usa ka Aprikanhong mantalaan misukna: “Unsa ka luwas ang tawhanong kinabuhi gikan sa pagkalaglag pinaagi sa laag nga mga asteroid o kometa?” Ug ang pagkalaglag sa yuta tungod sa pagbuto sa usa ka dakong bituon, nga magabugag dako kaayong dosis sa radyasyon nganhi sa atong yuta, gipahayag usab nga posibilidad.

Kana bang mga pagbanabana angay makapasubo? Komosta ang tinuod nga hulga sa nukleyar nga gubat ug ang sangpotanan niini? May pasikaranan ba sa pagtuo nga ang yuta ug ang tawhanong kinabuhi magpadayon?

Mga Hinungdan nga Magmalaomon

Ang mga panagna sa masa nga pagkapuo kadaghanan gipasukad sa pagtuo nga bisan pag may Maglalalang, siya walay katakos sa pagmentenar sa iyang uniberso. Apan makataronganon ba kana? Mahitungod sa katakos sa Diyos nga Labing Gamhanan sa Tanan, ang salmista sa Bibliya nadasig sa pagsulat: “Dayega siya, adlaw ug bulan. Dayega siya, kamong tanang bituon sa kahayag. Dayega siya, kamong mga langit sa mga langit . . . Kay siya mismo ang nagsugo, ug sila nangalalang. Ug siya nagapatindog kanila sa walay kataposan, sa panahong walay katinoan. Usa ka lagda ang iyang gihatag, ug kini dili mahanaw.”​—Salmo 148:​3-6.

Apan, tingali mahibulong ka, ‘Unsang pasalig ang ginahatag sa Bibliya nga ang yuta, usab, mobarog sa walay kataposan?’ Matikdi: “Siya [Diyos] nagtukod sa yuta diha sa iyang tinong mga dapit; kini dili matarog sa panahong walay katinoan, o sa walay kataposan.” (Salmo 104:5) Busa ang balaang saad mao: “Ang mga maaghop magapanunod sa yuta, ug sila makakaplag sa ilang dakong kalipay sa kadagaya sa pakigdait. Ang mga matarong mismo magapanunod sa yuta, ug sila mopuyo niana sa walay kataposan.” (Salmo 37:​11, 29) Sa pagkamatuod, si Jesu-Kristo mikutlo gikan sa Salmo 37, nga niana nagpakita nga siya hugot nagtuo sa walay-kataposang kaugmaon sa tawo diha sa yuta.​—Mateo 5:5.

Gitagna pa ni Jesus ang kaliwatang sugod makakita sa pagkatuman sa mga saad sa Diyos. Duyog sa pagtagna sa presenteng-adlaw nga ‘dagkong mga ilhanan gikan sa langit,’ siya miingon nga ang mga kanihit sa pagkaon, mga kamatay, mga linog, pagkamalapason, ug ubang katalagman mahimong bahin sa kataposang mga adlaw niining sistema sa mga butang. (Lucas 21:​10, 11; Mateo 24:​6-12) Tinong hinungdan sa kasubo, tingali makahinapos ang usa. Apan patalinghog kang Jesus: “Inigsugod sa pagkahitabo niining mga butanga,” matud niya, “bumarog kamo nga malig-on ug ihangad ang inyong mga ulo, tungod kay nagakahiduol na ang inyong kaluwasan. . . . Inigkakita ninyo nga mahitabo kining mga butanga, hibaloi nga ang gingharian sa Diyos haduol na.”​—Lucas 21:​28-31.

Nganong adunay ingong pagkamalaomon? Kay nasayod si Jesus nga dili kinahanglang ang iyang matuod nga mga sumusunod makasinati sa malangkobong “kahadlok ug pagpaabot sa mga butang mahidangat sa gipuy-ang yuta.” (Lucas 21:​26) Hinunoa, sila masaligong makahangad sa ilang mga ulo tungod kay ang kaluwasan gikan sa tanang hulga sa katalagman haduol na unya. Kanang kaluwasana dili moabot pinaagi sa ginamag-tawo politikanhong mga kagamhanan. Apan kini moabot pinaagi sa pagbalda sa “gingharian sa Diyos.” Kana ang hinungdan gitudloan ni Jesus ang iyang mga sumusunod sa pag-ampo: “Amahan namo sa mga langit, balaana ang imong ngalan. Paanhia ang imong gingharian. Mamatuman ang imong kabubut-on, ingong natuman sa langit, dinhi usab sa yuta.”​—Mateo 6:​9, 10.

Apan tingali mahibulong ka: ‘Kanus-a moabot kining gisaad nga kaluwasan?’ Mahitungod sa kaliwatang mosugod sa pagkaagom sa ‘dagkong mga ilhanan gikan sa langit,’ si Jesus miingon: “Sa pagkamatuod magaingon ako kaninyo, Kining kaliwatana dili gayod moagi hangtod ang tanang butang mahitabo.” Busa, ang pipila sa kaliwatan sa 1914 nga nakasaksi nianang “mga ilhanana” mahimong buhi pa iniggahom sa bug-os sa Gingharian sa Diyos sa kahikayan sa yuta.​—Lucas 21:32.

Mahiapil Ka ba sa mga Makalabang-buhi?

Ikaw makalabang niining panahon sa kahadlok tungod kay si Jesus miingon: “Nan, magpadayon kamo sa pagtukaw, nga sa tanang panahon mangaliyupo aron kamo makalampos sa pag-ikyas niining tanang butang nga mahitabo, ug sa pagbarog atubangan sa Anak sa tawo.” (Lucas 21:​36) Oo, mahimong “molampos ka sa pag-ikyas.” Apan sa unsang paagi?

Nahauna, kinahanglang makabaton kag kahibalo sa kabubut-on ug katuyoan sa Diyos. Gikinahanglan niini ang ugdang nga pagbasa ug pagtuon sa Bibliya. Mosangpot ang kahibulongang mga panalangin, kay miingon si Jesus: “Malipayon kadtong mahunahunaon sa ilang espirituwal nga mga panginahanglan.” Kon hunahunaon mo kini, unsa ang labawng hinungdan sa pagkalipay kay sa tinong paglaom sa kinabuhing walay kataposan? Si Jesus miingon diha sa pag-ampo sa Diyos: “Kini nagkahulogan sa kinabuhing walay kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Mateo 5:​3; Juan 17:3.

Apan ang kahibalo sa Bibliya mismo dili igo aron ang usa ka tawo makalabang-buhi niining panahona sa kahadlok. Matud ni Jesus: “Malipayon kadtong nagapatalinghog sa pulong sa Diyos ug nagabantay niini!” Oo, kinahanglan ang pagbantay, o pagkinabuhing nahiuyon sa Pulong sa Diyos. Sa laing mga pulong, kinahanglan kita magpadayon sa pagbuhat sa kabubut-on sa Diyos. Ang Bibliya nagasaad: “Siya nga nagabuhat sa kabubut-on sa Diyos magapabilin sa walay kataposan.”​—Lucas 11:​28; 1 Juan 2:17.

Ang mga tigpanagtag niining magasina malipay sa pagtabang kanimo. Sila malipay sa pagpasundayag sa unsang paagi makatuon ka sa Bibliya diha sa imong balay. Ang mabatonang mohatag-kinabuhing kahibalo mahimong mosangpot sa imong pagkabatog kinabuhing walay kataposan sa Paraiso sa yuta. (Salmo 37:​29) Sa pagkamatuod, adunay pasikaranan sa paglantaw nga malaomon sa umaabot.

[Mga Letrato sa panid 6]

Unsa ang imong kaugmaon—Usa ka napaig nga yuta? Kun usa ka paraiso?

[Mga Letrato sa panid 8]

Si Jesus nagtudlo nga ‘ang mga maaghop magapanunod sa yuta’