Gikan sa Among mga Magbabasa

Negatibong mga Pagbati Ako maoy 12-anyos ang edad nga dalagita, ug nalingaw gayod ako sa mga serye sa mga artikulong “Mahimo Nimong Buntogon ang Negatibong mga Pagbati.” (Oktubre 8, 1992) May problema ako sa akong mga higala ug sa mga kauban sa klase. Ang hinungdan niining tanan mao ang negatibong paagi sa akong paglantaw sa mga butang. Ang artikulo nakatudlo kanako sa pagbaton ug mas positibong panglantaw.

A. C., Italya

Human nakadawat ug terapiya sa nangaging duha ka tuig tungod sa usa ka grabeng suliran sa emosyon ug sa hormones, ako nahibalo gikan sa kasinatian nga ang inyong mga sugyot misaler. Sa duha ka adlawng miagi nabughat ako ug buot nang mohunong sa pagsulay sa pagpauli sa lawas. Gisultihan ako sa akong mapailobon kaayo nga bana sa pagbasa pag-usab sa mga artikulo. Kini nasudlan sa tanang pagdasig nga akong gipangandoy ug naghatag kanako sa kusog sa pagpaningkamot pag-usab.

J. L., Inglaterra

Makauulawng mga Ginikanan Salamat kaninyo sa artikulong “Mga Batan-on Nangutana . . . Unsa Kaha Kon ang Akong Ginikanan Nagpakaulaw Kanamo?” (Oktubre 22, 1992) Kini nakadasig kaayo ug dako kanako. Gidid-an ako sa akong amahan karong bag-o sa pagtambong sa Kristohanong mga tigom. Apan, ang pagbasa sa inyong artikulo nakatabang kanako sa pagsabot nga wala ako mag-inusara niining kahimtanga ug nga ako makasalig sa tabang ni Jehova.

K. L. R., Pransiya

Usa ka dili-aktibong Kristohanon ang akong amahan. Ang akong inahan gipalagpot gikan sa kongregasyon ug supak sa kamatuoran. Kas-a wala niya ako pakan-a kapin sa 36 ka oras tungod kay migula ako sa pagsangyaw. Iya usab akong gibunalan. Usahay mohilak ako tungod sa espirituwal nga kahimtang sa akong mga ginikanan. Busa dili ninyo mahanduraw kon unsa ang nahatag nga pagdasig sa inyong artikulo kanako ug nakalig-on sa akong pagtuo. Ako determinadong magpabilin sa mga prinsipyo sa Bibliya.

E. J., Nigeria

Ako usab adunay gipalagpot nga amahan ug pipila ka mga igsoon nga gibadlong o gipalagpot. Gitawag ako sa uban nga sama kanila, apan ako karon minyo na ug nakatapos sa akong unang tuig ingong bug-os panahong magwawali. Oo, ikaw makapamatuod sa imong kaugalingon nga lahi ka.

D. R., Tinipong Bansa

Pagpaniid sa Kalibotan Salamat kaninyo sa pagpatik sa mugbong mga balita diha sa “Pagpaniid sa Kalibotan.” Sanglit ako may malig-on, walay-bikil nga kinabuhi, kinahanglang pasaligan ko kanunay ang akong kaugalingon nga kini mao na gayod ang kataposang mga adlaw. Ang “Pagpaniid sa Kalibotan” maoy usa ka dakong tabang sa pagkombinsir kanako kon unsa ka masakiton ug ka daotan kining daang kalibotan. Palihog sa pagpadayon sa pagpatik niini sa regular.

M. G., Tinipong Bansa

Sulat Alang sa mga Ginikanan Ang artikulong “Usa ka Sulat Alang Kang Mama ug Papa” (Oktubre 8, 1992) nakapatubod ug luha sa akong mga mata. Kini nakapaamgo kanako sa kalisod nga naagoman sa akong mga ginikanan sa pagpadako sa ilang walo ka anak. Busa sa edad 42, ako nakasulat nag akong kaugalingong sulat sa pagpasalamat sa akong Mama ug Papa.

J. D., Tinipong Bansa

Ang pagbasa niadto masakit kaayo tungod kay wala ako hatagi sa akong mga ginikanan sa mga butang nga gilista sa maong batan-ong lalaki. Apan sa gibasa ko kini pag-usab, akong naamgohan kon unsa ka dako ang nahimo ni Jehova, ang atong langitnong Amahan, alang kanako ug sa daghan pang uban. Iya akong gitudloan sa paghigugma ug gihatagan ako ug disiplina dihang gikinahanglan ko kana. Busa, iya akong gihatagan ug igong kahupayan gikan sa masakit nga panahon sa pagkabata nga akong naagoman.

C. A., Tinipong Bansa