Gipamatay Tungod sa Ilang Pagtuo!
SAYO kaayo kadto sa buntag sa Dominggo. Giliyokan sa usa ka magubtanong panon sa mga 500 ka tawo ang usa ka balay sa balangay sa Pangi, sa probinsiyang Kivu, Zaire. Ang mga Kristohanong malinawong natulog sa balay nahipugwat tungod sa langas nga panon ug sa kusog nga pagdukdok sa pultahan. Ang sangpotanan? Pito ka Kristohanong lalaki ang gipanglabnot pahigawas, sa walay-kaluoy gikulata ug gipugos sa pagbaktas ug pito ka kilometros (4 milya) ngadto sa balangay sa Kilungulungu sa pusod sa lasang.
Didto kadtong mahigugmaog-kalinaw Kristohanong mga lalaki gihiwaan sa ilang tutunlan ug ang usa giputolputol. Ang ilang mga lawas gilubong sa gipamad-ang suba tapos sampongi ang tubig aron dili moagos alang sa okasyon. Sa kaulahian ang dike gipaagos ug ang suba miagos ibabaw sa ilang tingob nga lubnganan nga walay gibiling timaan sa makalilisang nga hitabo!
Nganong Gipamatay ang mga Inosente?
Kadtong pagpamatay sa matinumanong mga Saksi ni Jehova mao ang tayuktok sa sunodsunod nga paglutos nga misugod sa 1978 sa tibuok bahin sa rehiyong Kivu nga dinha nagdominar ang tribong Rega. Nganong nahitabo man ang pagpamatay? Tungod kay ang mga Saksi ni Jehova dili motuman sa “Kimbilikiti.” Ang mga pangulo niining relihiyon sa katigulangan sa mga Warega nagtuo nga ang mga Saksi nagahawas sa kinadak-ang hulga sa tibuok gambalay sa ilang tribo ug busa kinahanglang puohon.
Sukad 1978 hangtod 1983 ang ubay-ubayng Kingdom Hall sa mga Saksi ni Jehova gisunog sa panatikong mga sakop niining kultoha. Gibaharan pa nila ang daghang Saksi, gigukod sila pahilayo sa ilang mga balay, ug giilog ang ilang mga katigayonan. Subsob gihimo ang paningkamot sa pagpatay sa mga Saksi pinaagi sa mga barang ug mga pandaot. Sanglit walay mausa nianang mga lakanga ang milampos, ang mga maglulutos miliso ngadto sa mapintas nga pagpamatay.—Itandi ang Numeros 23:23.
Ang Makalilisang nga Hitabo
Apan, tan-awon natog maayo kadtong makapasubong mga hitabo sa Dominggo, Agosto 14, 1983. Sa pagtan-aw sa l983 Yearbook of Jehovah’s Witnesses, pagkahaom ang teksto ug komento niadtong adlawa! Sa adlaw una patya ang pito ka matinumanong Kristohanong lalaki, ang kadaghanang sakop sa gamayng kongregasyon sa mga Saksi ni Jehova sa Pangi nangabot gikan sa palibot nga mga balangay aron motambong sa ilang kasagarang tigom sa Sabado. Silang tanan nagpabilin sa tibuok gabii aron makatambong sa ilang tigom sa pagsimba sa buntag sa Dominggo. Pito ka tawo ang miestar sa balay ni Kalumba Malumalu, usa ka bug-os-panahong ministro ug ang nagdumalang magtatan-aw sa kongregasyon. Kana mitotal sa 11, apil si Igsoong Malumalu, iyang asawa, ug 2 ka gagmayng bata. Ang lima pa miestar sa balay ni Igsoong Kikuni Mutege.
Human sa tigom sa Sabado, gigugol sa mga Saksi ang masadyaong gabii libot sa usa ka daoban, nga nanganta sa mga kanta sa Gingharian ug naghinugilon sa mga kasinatian. Nakamatikod silang nangagi ang ginagmayng mga pundok sa mga tawo nga maoy talagsaon, nga silang tanan nagpaingon sa balangay nga duha ka kilometros (1.2 milya) gikan sa Pangi. Unsaon pagkahibalo sa mga Saksi kon unsay kahulogan sa maong panagtigom sa ilang mga kaaway?
Sa mga alas singko sa pagkabuntag ang balay sa nagdumalang magtatan-aw gilibotan sa usa ka panon nga gipangunhan sa Pangulo sa Pundok si Mulamba Musembe. Gimando nga si Igsoong Kampema Amuri ug Waseka Tabu mokuyog kanila ngadto sa Pangulo sa Katigoman (Katunda Banangozi) aron tumanon ang “Salongo” (obligadong trabaho sa komunidad sa pagmentenar sa mga dalan, mga taytayan, ug susama). Matinahorong gisaysay ni Igsoong Kampema nga nahimo na ang kahikayan uban kang Pangulo Katunda sa pagbuhat sa trabaho sa sunod adlaw. Apan giisip sa Pangulo sa Pundok nga kadtong tubaga dili matinahoron ug gimando nga si Igsoong Kampema kulatahon. Kadto gisundan sa usa ka mando sa pagkulata sa ubang kaigsoonan.
Niadtong puntoha naamgohan sa magubtanong panon nga si “Pastor” Kalumba Malumalu (nagdumalang magtatan-aw) mibalik ngadto sa iyang balay. Mao nga silang tanan mihasmag sa balay hangtod nga naguba nila ang usa ka bungbong. Niana daghan kanila midali sa pagsulod sa pagpangita kang Igsoong Malumalu. Sa misangpot nga sambunot ang mga igsoong babaye nangabun-og, apan sila ug ang ilang mga anak nakadangop ngadto sa lokal nga hepe sa kapolisan alang sa panalipod.
Kasamtangan, duha ka igsoong lalaki nga nagpuyo sa laing balay nakaeskapo. Usa kanila (Hemedi Mwingilu) mitago sa usa ka balay nga wala mahuman ug nakasaksi sa hitabo. Ang laing igsoon (Lulima Kazalwa) mikalagiw ngadto sa lasang.
Sa kataposan, pito ka igsoong lalaki ang gidakop, gikulata, ug gidala nga ginapos ang ilang mga kamot. Sulod sa enterong lima ka kilometros (3 milya) nga pagbaktas ngadto sa lasang duol sa Kilungulungu, sila gidagmalan ug gibukbok sa mga nagdakop kanila. Bisan tuod ang mga igsoon may diyutay na lang panimuot sa ilang pag-abot didto, sila determinadong dili mokompromiso sa ilang pagtuo—ug kana bisag dayag nga haduol na ang ilang kamatayon. Ilang giatubang ang kamatayon nga maisogon ug may dignidad, sama sa gibuhat sa daghang ubang Kristohanon sa karaan ug modernong mga panahon.—Mateo 24:9; Pinadayag 2:10.
Ang laing igsoong lalaki, si Amisi Milende, gipatay wala madugay tapos niadto. Siya didto niadto sa biyahe ngadto sa Kama, apan ang mga lalaki nga gisugo didto nagdakop kaniya ug nagdala kaniya nga ginapos ngadto sa Binyangi (15 kilometros [9 milya] gikan sa Pangi) aron moatubang kang Kibonge Kimpili, ang laing Pangulo sa Pundok. Samtang nagpaabot sa pag-abot sa Pangulo, gidasig niadtong madasigong Saksi ang usa sa iyang mga ig-agaw sa espirituwal nga paagi ug giingnan niya ang iyang mga maglulutos nga bisan pag siya hapit nang mamatay, siya magpaabot lamang kang Jehova nga Diyos aron banhawon siya niining yutaa nga mahimong paraiso. Kadtong matinumanong batan-ong lalaki gipatay sa daghang lalaki. Ang kaugalingon niyang uyoan konsabo niadto; siya napungot pag-ayo tungod kay ang duha niya ka anak lalaki nangahimong Saksi ni Jehova sa tabang ni Igsoong Milende. Sa pagkamatuod, kining duha ka anak lalaki, si Malala Ramazani ug Akilimali Walugaba, nahiapil sa pito ka laing Saksi nga gipatay!
Komosta ang mga Nahibilin?
Kadtong makalilisang nga mga hitabo misangpot sa pagpatay sa walo ka lalaki nga nagbilin sa mga balong babaye ug mga ilo. Ang mga nahibilin ug ang ubang lokal nga Saksi ug mga tawong interesado nahimong tumong sa misamot nga pagdumot. Busa sila sa kataposan mikalagiw ngadto sa Kindu, ang kinadul-ang dakong lungsod, ug giatiman pag-ayo sa mga sakop sa tulo ka kongregasyon sa mga Saksi ni Jehova didto. Ang sangang buhatan sa Watch Tower Society sa Kinshasa mitabang usab niining mga nagbangotan pinaagi sa pagpadala kanilag sinina, mga habol, ug salapi. Kining mahigugmaong tabang gipabilhan pag-ayo ug misangpot sa dakong pamatuod alang sa dili-matinuohong mga sakop sa pamilya ug sa ubang maniniid. (Juan 13:34, 35; Santiago 1:27) Ang mga awtoridad sa gobyerno mibalda usab. Gisikop ang mga mamumuhat ug daotan ug gikiha sila.
Kining makapakurat kaayong mga hitabo mopatunghag daghang pangutana. Unsang matang sa relihiyon ang Kimbilikiti? Unsa ang kinaiya sa mga pagtuo ug mga tulomanon nga makatukmod sa maong matang sa paglutos? Ug nganong ang mga Saksi ni Jehova lamang ug walay laing relihiyon ang tumong sa maong pagdumot?
[Hulagway sa panid 3]
Balangay sa Pangi
[Hulagway sa panid 4]
Dalan paingon sa dapit gipatyan