Gilutos Tungod sa Pagsulti sa Kamatuoran
ANG mga Saksi ni Jehova dili mosuportar sa mga pagtuo ug mga tulomanon sa Kimbilikiti kay kini supak sa Kasulatanhong mga prinsipyo. Ang mga Saksi napahigawas na tungod sa kamatuorang makita sa Pulong sa Diyos ang Bibliya. (Juan 8:31, 32) Busa, dili sila motugot nga ang ilang mga anak lalaki tulion sumala sa mga rituwal sa pagpasakop sa Kimbilikiti. Ang mga Saksi dili usab mohatag ug pagkaon, salapi, o mga manggad nga pangayoon panahon sa mga rituwal sa pagpasakop, ug ang ilang mga babaye dili moapil sa pinugos nga mga sesyon sa pagpangisda nga organisahon alang sa samang katuyoan.
Makaiikag, maylabot sa pagpatay sa mga Saksing gihisgotan ganina, ang piskal sa estado miingon niini sa iyang rekomendasyon ngadto sa korte: ‘Ang pipila ka Warenga nga sa nangagi miapil sa mga rituwal sa Kimbilikiti ug nasayod sa mga sekreto karon nakig-uban na sa mga Saksi ni Jehova. Ilang gibutyag ang mga sekreto, ilabina ang maylabot sa dili paglungtad sa espiritung gitawag si Kimbilikiti. Busa, ilang giyagyag ang kabakakan sa mga halad nga gipangayo sa samang espiritu si kinsa, sumala sa mga Saksi ni Jehova, maoy dako kaayong limbong nga giorganisar sa tigulang nga mga tawo nga nagadumala sa mga seremonyas.’
Inigdawat sa mga tawong iya sa tribong Rega sa tinuod nga mga pagtulon-an sa Bibliya, ang patuotuo ug kahadlok sa kamatayon mapulihan sa kamatuoran ug sa paglaom sa pagkabanhaw. (Juan 5:28, 29) Ang mga panginsulto sa ilang mga inahan, mga asawa, ug mga igsoong babaye pulihan sa pagtahod sa kababayen-an.—Efeso 5:21–6:4; 1 Timoteo 5:1, 2.
Sa dakong kasukwahi, ang daghang iglesya ug misyon sa Kakristiyanohan nagatugot sa ilang mga membro sa pagtuman sa relihiyon sa tribo ilalom sa nipis nga takoban sa gitawag Kristiyanidad. Ngani, daghang pari ug hatag-as nga mga pari sa Kimbilikiti ginaisip nga maunongon, respetadong mga sakop sa nagkadaiyang iglesya. Pagkalahi ang tinamdan ni apostol Pablo! Siya misulat: “Ayaw kamo pagpakigyugo uban sa mga dili-magtutuo. Kay unsa may pakigkombuyahan sa pagkamatarong ug sa pagkamalapason? O unsa may pakig-ambitan sa kahayag ug sa kangitngit? . . . Ug unsa may pakig-uyonan sa templo sa Diyos ug sa mga diyosdiyos?”—2 Corinto 6:14-16.
Subsob kaayo, kadtong may lig-ong kalangkitan sa Kimbilikiti ug sa ortodoksong mga iglesya nagapukaw ug kasamok alang sa mga Saksi ni Jehova. Ang maong mga magsusupak sama gayod sa mga tigbuhat ug mga diyosdiyos sa karaang Efeso. Nasabot nila nga nameligro ang ilang negosyo tungod kang Pablo, si kinsa mipamatuod nga ‘ang mga binuhat sa mga kamot dili mga diyos.’ (Buhat 19:23-28) Ang samang prinsipyo mapadapat sa kamatuorang ang espiritung Kimbilikiti wala maglungtad.
Gibati sa mga Saksi ni Jehova nga obligasyon ang pagpahayag nianang kamatuorana. Siyempre, tungod sa pagsulti sa kamatuoran, may panahong pagaantoson nila ang mga paglutos. Apan unsay atong makat-onan gikan sa ilang matinumanong pagkamainantoson?