Makapangandam Ka ba Karon Alang sa Paglutos?
‘Kon ako ilang gilutos, kamo usab ilang pagalutoson.’—JUAN 15:20.
1, 2. Unsang wala-dahoma nga aksiyon ang gihimo sa pila ka gobyerno batok sa mga Saksi ni Jehova?
HANDURAWANG nagahigda ka sayo sa usa ka buntag. Katulogon ka pang maghunahuna kon mobangon dayon o mopahulay sa dugang pila ka gutlo. Apan nahauna, imong patokaron ang radyo alang sa buntagong balita. Sa kalit, ang magsisibya makapapugwat kanimo nga ikaw bug-os mahigmata. Siya magapahibalo: “Sumala sa usa ka balaod sa gobyerno, ang sektang nailhang mga Saksi ni Jehova gidili sa tibuok nasod.” Alang kanimo wala nay pagpahulay!
2 Kini, o ang susama niini, nasinati sa mga Kristohanon sa pila ka nasod sa presenteng mga panahon. Kadaghanan, may mga pasidaan sa mahimong mahitabo. Apan usahay ang pagdili wala gayod damha. Angay ba kitang matingala niini?
3. Unsang magkatugbang nga mga kasinatian ang naagoman ni Jesu-Kristo sa 33 K.P.?
3 Dili gayod. Nahitabo ang susamang mga butang sa unang siglo. Nahinumdom ka nga si Jesu-Kristo, sa sinugdan sa tingpamulak sa 33 K.P., misulod sa Jerusalem nga nagsakayg asna. Malipayon siyang gidayeg sa katawhan, nga gibuklad pa ang ilang mga biste sa dalan sa iyang unahan. Apan unsay nahitabo sa pila ka adlaw sa ulahi? Si Jesus gihusay atubangan ni Poncio Pilato, ug misinggit ang usa ka panong manggugubot gikan nianang siyudara mismo sa kauhaw sa dugo: “Ilansang siya! . . . Ilansang siya!” (Mateo 21:6-9; 27:22, 23) Ang kahimtang kalit nausab.
4. Ingong mga sumusunod ni Jesus, unsang pagtratar ang atong pagadahomon?
4 Busa, dili angay nga kita matingala kon sa pila ka nasod karong adlawa ang kahimtang mausab ug kalit motungha ang paglutos. Hinumdomi, kon kita matuod nga mga sumusunod ni Jesus, atong pagadahomon ang paglutos. (Juan 15:20) Kini nagapasiugda sa bili sa mga pulong ni Jesus, “Magtukaw kamo.”—Mateo 24:42.
5. Unsang mga pangutana ang angay natong tagdon karon?
5 Sa unsang paagi atong mahimo kini? May paagi ba nga kita makapangandam, kon ugaling mahitabo ang labing daotan?
Andama ang Imong Kaisipan ug Kasingkasing
6, 7. (a) Nganong lisod ang paghimog pisikal nga pagpangandam alang sa paglutos? (b) Unsa ang labi pang hinungdanong pagpangandam alang sa paglutos ang mahimo?
6 Lisod himoon ang pisikal nga pagpangandam alang sa paglutos tungod kay wala ka masayod kon unsa unya ang kahimtang. Hangtod nga mahitabo gayod kana, dili ka mahibalo kon ipatuman bang estrikto o luagluag ang pagdili, o kon unsa ang igadili. Tingali ang idili mao lamang ang balay-balay nga pagsangyaw, o tingali ang relihiyosong mga tigom. Usahay wagtangon ang legal nga organisasyon sa mga Saksi ni Jehova, o prisohon dihadiha ang pila ka indibiduwal. Ikabutang nato sa hunahuna ang nagkadaiyang mga dapit diin ikatago ang mga basahon kon gikinahanglan. Apan gawas niana, kita walay mahimong pisikal nga pagpangandam.
7 Hinuon, makaandam ka sa imong hunahuna ug kasingkasing, ug kini labi pang hinungdanon. Itisok sa imong kaisipan ang hinungdang gitugotan ang paglutos ug kon nganong ikaw tingali pagataralon atubangan sa mga punoan. “Alang sa usa ka pamatuod,” matud ni Jesus. (Mateo 10:16-19) Kon bug-os maandam ang imong kasingkasing sa pagpabiling matinumanon bisan pag unsay mahitabo, ikapadayag ni Jehova ang maalamong paagi sa paglihok kon motungha ang panginahanglan. Busa, sa un-sang paagi kita makapangandam sa atong kaugalingon sa espirituwal nga paagi alang sa paglutos?
Sa Unsang Paagi Nagapakiglabot Ka sa Katawhan?
8. Nganong si Pablo nakaingong siya ‘nagkalipay sa mga pasipala’?
8 Si apostol Pablo miingon: “Igakalipay ko ang mga kahuyangan, mga pagpasipala, mga kawalad-on, mga paglutos ug mga kalisdanan, tungod kang Kristo.” (2 Corinto 12:10) Gikalipay ba ni Pablo nga pasipalahan? Siyempre wala. Apan kadaghanan ang paglutos maglangkit sa pagkagipasipalahan, ug kon kadto ang gikinahanglan sa pagdayeg sa ngalan sa Diyos, nan si Pablo nalipay sa pag-agwanta niadto.
9. Sa unsang paagi kita makapangandam karon sa ag-agwanta sa “mga pasipala . . . tungod kang Kristo?
9 Kita, usab, makatinong sa usa ka panahon kinahanglang atong agwantahon ang “mga pasipala . . . tungod kang Kristo.” Tingali kita sa binaba, o bisan sa lawasnon pagadagmalan. Moagwanta ba ta? Aw, unsay atong pag-isip sa atong kaugalingon karon? Seryoso ba kaayo ang atong pag-isip sa atong kaugalingon ug mosanong dayon sa tinuod o gihanduraw nga mga pasipala? Kon mao, nganong dili maningkamot sa pag-ugmad sa “hataas-nga-pailob, . . . kalumo, pagpugong-sa-kaugalingon”? (Galacia 5:22, 23) Kini ekselente unyang pagbansay alang sa Kristohanong pagkinabuhi karon, ug kini makaluwas sa imong kinabuhi sa mga panahon sa paglutos.
Unsay Imong Pag-isip sa Pag-alagad sa Kanataran?
10. Unsa ang tukmang Kasulatanhong reaksiyon dihang idili ang atong buluhatong pagsangyaw?
10 Kadaghanan, ang unang butang piotan kon may pagdili mao ang publikong pagwali sa “maayong balita.” Apan hinungdanon ang pagwali ug paghimog mga tinun-an niining kataposang mga adlaw. Sa unsang laing paagi mahibalo ang katawhan sa Gingharian sa Diyos? Busa, ang tukmang reaksiyon sa maong pagdili mao ang pagsanong nga gipahayag sa mga apostol, sa gisulayan sa Hudiyong relihiyosong mga pangulo ang pagdili sa ilang buluhaton sa pagwali. (Buhat 5:28, 29) Kon ilalom sa pagdili, tingali masirhan ang pila ka dapit nga pagasangyawan. Apan, sa usa ka paagi, ang buluhaton kinahanglang buhaton. Magbaton ka kaha sa kusog sa pagpadayon sa pagwali dihang ginalutos?
11, 12. Sa unsang paagi imong matino kon ikaw may kalig-ong gikinahanglan sa pagpadayon sa pagsangyaw dihang pagalutoson?
11 Aw, unsay imong pag-isip sa buluhaton sa pagwali karon? Ginatugotan mo ba ang ginagmayng kababagan sa pagbalda ug paghimo kanimong dili regular sa pag-alagad sa kanataran? Kon mao, unsay imong buhaton kon ilalom sa pagdili? Mahadlok ka ba sa mga tawo karon? Andam ka bang mosangyaw sa balay-balay sa inyo mismong kalye? Mahadlok ka bang mosangyaw nga magainusara? Sa pila ka nasod, ang duha ka tawong magkuyog sa pagsangyaw kadaghanan makaawhag sa dakong pagtagad. Busa, sa dapit nga luwas ang pagbuhat niana, nganong dili mosangyaw nga magainusara matag karon ug unya? Kana maoy maayong pagbansay.
12 Nagaapil ka ba sa pagtanyag ug magasin sa dalan? May kaisog ka ba ug inisyatibo sa pagmugnag kahigayonan sa dili-pormal nga pagsangyaw? Nagasangyaw ka ba sa komersiyal nga mga teritoryo? Mahadlok ka bang moduol sa mga tawong dato o impluwensiyal? Kon makig-ambit ka lang sa pila ka matang sa pagsangyaw, unsay imong buhaton kon, ilalom sa pagdili, kanang matanga sa pagsangyaw dili na posible?
13. Unsay imong mahimo karon mahitungod sa imong ministeryo aron labawng maandam sa pagsangyaw sa mga panahon sa paglutos?
13 Nakaamgo ka bang ikaw may kahuyangan sa usa ka bahin? Karon mao ang panahon sa pagbuntog niana. Pagtuon sa pagsalig kang Jehova ug mahimong mas kuwalipikado ingong ministro. Unya labaw kang masangkapan sa pagsangyaw karon ug maandam sa paglahutay sa mga panahon sa paglutos.
Kasaligan Ka Ba?
14, 15. (a) Unsang matang sa unang-siglong mga Kristohanon ang may maayong impluwensiya sa kalig-on sa misilaob ang paglutos? (b) Sa unsang paagi ang alagad ni Jehova karong adlawa mahisama niadtong lig-ong unang mga Kristohanon?
14 Sa tibuok Kristohanong Gregong Kasulatan, gihisgotan ang mga indibiduwal si kinsa maoy mga torre sa kalig-on sa kongregasyon. Pananglitan, si Onesiporo maisogong mitabang kang Pablo sa napriso siya sa Roma. (2 Timoteo 1:16) Si Febe girekomendar tungod sa iyang pagbudlay sa kongregasyon sa Cencrea. (Roma 16:1, 2) Kadtong maong mga lalaki ug mga babaye mao gayoy maayong impluwensiya sa kalig-on sa misilaob ang paglutos. Sila ‘nagtukaw, nagbarog nga malig-on sa pagtuo, nagpakalalaki, nagmakusganon.’—1 Corinto 16:13.
15 Ang tanang Kristohanon, ilabina ang mga ansiano, angay maningkamot nga mouswag ug mahimong sama sa lig-ong unang mga Kristohanon. (1 Timoteo 4:15) Pagtuon sa pagtago sa mga butang kompedensiyal ug paghimog mga desisyong gipasukad sa Kasulatanhong mga prinsipyo. Bansaya ang imong kaugalingon sa pag-ila sa Kristohanong mga hiyas diha sa uban aron imong mailhan kon kinsa ang kasaligan kon ilalom sa pagpiot. Panlimbasog, uban sa kusog ni Jehova, nga mahimong haligi sa inyong kongregasyon, usa ka tawong nagatabang sa uban inay kanunayng nagakinahanglag tabang. —Galacia 6:5.
Ikasabot Ka ba sa mga Tawo?
16, 17. Sa unsang paagi ang pagpadapat sa Colosas 3:12, 13 makatabang karon sa pag-andam alang sa paglutos?
16 Si apostol Pablo midasig kanato: “Isul-ob ninyo ang pagkamabination, kalulot, pagkamapaubsanon sa hunahuna, kalumo, ug hataas nga pailob. Magpadayon kamo sa pag-inantosay sa usag usa ug pagpinasayloay sa usag usa.” (Colosas 3:12, 13) Sayon ba kini alang kanimo? O ikaw ba daling masilo o mawad-ag kadasig? Kon mao, kini ang laing natad diin mahimo ang pagpangandam.
17 Sa kayutaan diin gidili ang mga tigom, ang mga Kristohanon regular nga magtigom nga tinagdiyutay. Sa maong mga kahimtang, labi pang madayag ang ilang mga kahuyangan. Busa nganong dili ka magbansay karon sa pag-antos sa mga kahuyangan sa uban, maingon nga sila tinong nagaantos sa imoha? Ayaw pagkahimong hinawayon sa uban ug sa ingon makapaluya sa labihan kanila. Usab, bansaya ang imong kaugalingon ug ang imong mga anak sa pagtahod sa butang sa ubang tawo samtang magatambong sa mga Pagtuon sa Basahon sa Kongregasyon. Kon ilalom sa paglutos, ang maong pagtahod mopausbaw sa madaitong mga relasyon.
Maukit-ukiton Ka Ba?
18. Nganong usahay mas luwas ang pagkahibalo lamang sa butang kinahanglang imong mahibaloan?
18 Sa kinaiyanhon, ang pila kanato maukit-ukiton kaayo. Kita dili makaantos nga dili mahibalo. Ikaw ba ingon niana? Kon mao, palandonga kini: Usahay, dihang gidili ang buluhaton sa mga Saksi ni Jehova, sulayan sa mga awtoridad ang pagsusi sa ilang mga kahikayan sa organisasyon ug sa mga ngalan sa responsableng mga magtatan-aw. Kon usa ka nga nasayod niining mga butanga, mahimong ipailalom ka sa lawasnong pagdagmal sa paningkamot sa pagpugos kanimo nga ibutyag kana. Ug kon imong ibutyag kana, maapektahang seryoso ang buluhaton sa imong mga kaigsoonan. Busa, usahay labing luwas nga mahibalo ka lang sa gikinahanglan nimong mahibaloan ug kutob ra dinha.
19. Unsa karon ang makatabang kanimo sa paglikay sa pagbutyag sa mga butang kompedensiyal dihang pagalutoson?
19 Makabansay ka ba karon alang niana? Oo. Pananglitan, kon may usa ka kaso sa hudisyal nga komite sa kongregasyon, ang mga indibiduwal angay matagbaw sa butang nakita sa mga ansiano nga angay isulti ug dili mangukit-ukit sa pagsusi sa mga detalye. Ang mga asawa ug mga anak sa mga ansiano angay dili mosulay sa pagpugos nga ilang ibutyag ang sekretong mga butang. Sa tanang paagi, atong tun-an nga dili ‘manghilabot sa butang wala kitay labot.’—2 Tesalonica 3:11.
Estudyante Ka ba sa Bibliya?
20, 21. Sa unsang paagi ang makugihong pagtuon sa Bibliya karon motabang kanimo dihang idili ang buluhaton?
20 Ang Bibliya mao ang pasikaranan sa espirituwal nga kusog sa Kristohanon. Kini mohatag kaniyag mga tubag sa iyang labing hinungdanong mga pangutana ug mohatag kaniyag higayong matugkad ang kaalam sa Diyos mismo. (2 Timoteo 3:14-16) Ginaila kini sa tanang Kristohanon sa prinsipyo, apan unsang bahin ang tinuod ginadula sa Bibliya diha sa imong kinabuhi? Ginatun-an mo ba kining regular ug ginatugotan kining mogiya kanimo sa tanang imong ginabuhat?—Salmo 119:105.
21 Kadaghanan, ang pagbaton sa atong mga basahon sa Bibliya grabeng piotan kon ginadili ang buluhaton. Usahay, bisan ang mga Bibliya lisod hikaplagan. Sa maong mga kahimtang, ipahinumdom kanimo sa balaang espiritu ang mga butang imong natun-an sa nangagi. Apan dili kini magpahinumdom kanimo sa mga butang wala nimo hikat-oni! Busa, kon mas daghan ang imong ginatun-an karon, mas daghan ang mapondo sa imong hunahuna ug kasingkasing nga ipagawas sa balaang espiritu sa mga panahon sa panginahanglan.—Marcos 13:11.
Nagaampo Ka Ba?
22. Sa unsang paagi ang ‘pagkamalahutayon sa pag-ampo’ makatabang sa pagpangandam alang sa paglutos?
22 Kini pangutana nga hinungdanon kon mamalandong kita sa paglutos. Ang Bibliya nagatambag: “Magmalahutayon kamo sa pag-ampo.” (Roma 12:12) Ang pag-ampo maoy direktang komunikasyon kang Jehova nga Diyos. Pinaagi niana kita makapangayog kusog sa pag-agwanta sa mga kalisdanan ug paghimog hustong mga desisyon, ingon man pag-ugmad sa personal nga relasyon uban kang Jehova nga Diyos. Bisan pag kuhaon sa mga magsusupak ang atong mga basahon, atong mga Bibliya, ug atong pagpakig-uban sa ubang mga Kristohanon, dili gayod nila makuha ang atong pribilehiyo sa pag-ampo. Sa labing lig-ong prisohan, ang usa ka Kristohanon makahimo sa pagpakigsulti sa Diyos. Nan, ang pagpahimulos sa bug-os sa pribilehiyo sa pag-ampo usa ka maayong paagi sa pagpangandam alang sa bisan unsa nga tingali mahitabo sa umaabot.
May Pagsalig Ka ba sa Awtoridad?
23. Nganong ugmaron ang pagsalig sa tinudlong mga ansiano ug sa “matinumanon ug maalamong ulipon”?
23 Ang pag-ugmad niini nga pagsalig hinungdanon usab. Ang mga ansiano sa kongregasyon maoy usa ka bahin sa tagana sa Diyos sa pagpanalipod kanato. Ang mga ansiano kinahanglang molihok sa paaging angayan sa pagsalig, ug kinahanglang ang uban sa kongregasyon makatuon sa pagsalig kanila. (Isaias 32:1, 2; Hebreohanon 13:7, 17) Labing hinungdanon, angay kitang makatuon sa pagsalig sa “matinumanon ug maalamong ulipon.”—Mateo 24:45-47.
24. Unsay mahimo sa pagpangandam sa pagsukol sa bakak nga mga atake sa mga kaaway sa katawhan ni Jehova?
24 Ang mga kaaway tingali mosabwag ug kabakakan mahitungod sa organisasyon sa Diyos. (1 Timoteo 4:1, 2) Sa usa ka nasod, ang pila ka Kristohanon gilimbongan sa pagtuo nga ang Nagamandong Lawas sa mga Saksi ni Jehova mibulag sa Kristiyanidad, samtang sila mismo nagpabilin pang matinumanon niana. Ang usa ka maayong paagi sa pagpangandam sa pagsukol sa mga atakeng sama niini mao ang pag-ugmad ug lig-ong gugma sa imong mga igsoon ug pagkakat-on sa pagsalig sa kahikayan sa mga butang ni Jehova.—1 Juan 3:11.
Ikaw Mahimong Mananaog
25. Unsay motabang kanato nga magmadaogon dihang pagalutoson?
25 Ang tigulang nga si apostol Juan, tapos sa pag-antos sa paglutos, nagsulti kanato: “Ang tanang butang nga igaanak gikan sa Diyos modaog sa kalibotan. Ug kini ang pagdaog nga nagadaog sa kalibotan, ang atong pagtuo.” (1 Juan 5:4) Dili ka makadaog sa imong kaugalingong kusog. Si Satanas ug ang iyang kalibotan labi pang kusgan kay kanimo. Apan sila dili mas kusgan kay kang Jehova nga Diyos. Busa, kon atong sugton ang mga sugo sa Diyos, nga magaampong ituboy kita sa iyang espiritu ug magasalig sa bug-os kaniya alang sa kusog sa pag-agwanta, nan kita magmadaogon.—Habakuk 3:13, 18; Pinadayag 15:2; 1 Corinto 15:57.
26. Bisan pag ikaw wala karon magaantos sa paglutos, unsay angay nimong buhaton?
26 Sa tanang kayutaan, adunay pila ka Kristohanon nga ginalutos, pinaagi kaha sa mga kapikas sa kaminyoon o sa laing paagi. Sa pila ka kayutaan, ang tanang alagad sa Diyos nagaantos tungod sa opisyal nga mga lihok sa lokal nga gobyerno. Apan bisan kon, sa pagkakaron, sa personal wala ka magaantos sa pagsupak o sa talagsaong kalisod, hinumdoming kana mahimong mahitabo sa bisan unsang panahon. Si Jesus miingong ang paglutos sa mga Kristohanon mahimong bahin sa ilhanan sa panahon sa kataposan; busa, angay natong kanunayng dahomon kana. (Mateo 24:9) Busa nganong dili mag-andam karon alang niana? Ihukom nga, bisan pag unsay anaa sa unahan, ang imong kagawian sa kanunay mohatag ug pagdayeg sa imong langitnong Amahan, si Jehova nga Diyos.—Proverbio 27:11.
Unsa ang Imong mga Tubag?
◻ Unsang matang sa pagpangandam ang imong mahimo karon?
◻ Unsay imong mahimo karon sa pag-ugmad sa kusog nga gikinahanglan sa pagpadayon sa pagsangyaw dihang pagalutoson?
◻ Sa unsang paagi ang pagpadapat karon sa Colosas 3:12, 13 makatabang inigkahitabo sa paglutos?
◻ Nganong ugmaron ang imong pagsalig sa tinudlong mga ansiano ug sa “matinumanon ug maalamong ulipon”?
◻ Sa unsang paagi ikaw mahimong mananaog dihang pagalutoson?