Mga Saksi ni Jehova sa Tibuok Kalibotan—Thailand

“ANG nasod sa mga may kagawasan.” Mao kana ang kahulogan sa ngalang Thailand. Ang nagkalainlaing relihiyosong mga ideya gituohan sa iyang kapin sa 57,000,000 ka buotan, kugihang mga molupyo. Bisag daghan ang Buddhismo, ang mga relihiyon sa Kakristiyanohan ginabatasan usab niining nasora sa habagatan-sidlakang Asia. Kining tanang katawhan kinahanglang makadungog sa maayong balita sa Gingharian sa Diyos.​—Mateo 24:14.a

Mga Kagiw Nakadungog sa Maayong Balita

Diha sa nagkatag nga mga kampo sa tanang kabungtoran sa Thailand sa kadaplinan sa utlanan sa Myanmar, ang kamatuoran sa Bibliya ginasangyaw taliwala sa kapin sa 10,000 ka Karen nga mga kagiw. Ang mga membro sa usa ka pamilyang Karen nga nagpuyo nianang lugara maoy mga Saksi ni Jehova. Sila nagpakaylap sa maayong balita taliwala sa mga kagiw. Sa unsang paagi nasugdan ang ilang buluhaton?

Sa mga katuigang nanglabay usa ka bayong mibulag sa iyang pakig-anib sa Anglikanong Iglesya ug nahimong usa sa mga Saksi ni Jehova. Sa hulhog sa ilang ministro, ang iyang mga paryente misupak kaniya. Bisan pa, siya mapailobong nag-antos, ug ang pagsupak sa iyang pamilya hinayhinay nga nawala. Ang mga klero sa Anglikanong Iglesya nagpadayon sa ilang pagyubit hangtod sa miaging mga duha ka tuig sa dihang sila gipalagpot gikan sa ilang katungdanan tungod sa imoral nga buhat. Sukad niadto ang iglesya wala nay magbalantay, ang mga membro sa pamilya ug ubang mga paryente sa Saksi nakurat ug walay mahimo. Napulog-usa kanila mibulag gikan sa iglesya ug mihangyo sa mga Saksi ug pagtuon sa Bibliya uban kanila.

Maayo ang pag-uswag niini nga pagtuon, lakip sa ubang mga kagiw nga nagkigbahin. Ang kamatuoran mikaylap dayon, nga misangpot sa pagbawtismo sa 17 ka bag-ong mga Saksi diha sa nag-agos nga suba sa kampo sa kagiw. Pagkamalipayong tan-awon sa dihang ang 88-anyos nga apohang babaye gibawtismohan uban kanila!

Video Nakapukawg Kadasig

Dako ang potensiyal sa pag-uswag taliwala sa mga kagiw. Sa 1993 nga pagsaulog sa Memoryal, 57 ka tawo ang mitambong. Sa panahon sa pagduaw sa magtatan-aw sa sirkito sa Mayo niadtong tuiga, 67 ang nagkatigom sa usa sa iyang pakigpulong. Ug duolan sa 250 ang nagtigom sa pagtan-aw sa video sa Watchtower Society nga Jehovah’s Witnesses​—The Organization Behind the Name.

Ang asawa sa usa ka pastor sa Baptist sa kampo sa kagiw mitambong sa pakigpulong publiko sa Bibliya nga gihikay sa mga Saksi ug nakamatikod nga gibatbat ang mga teksto sa Bibliya. Iyang gisultihan ang iyang bana nga siya gipul-an na sa pagpamati sa balik-balik nga mga sermon sa ilang simbahan. Ang iyang bana misupak, nga miingon nga kon ang iyang asawa moadto sa mga tigom sa mga Saksi ni Jehova, ang tanang ubang mga membro mosunod. Sa dihang siya mitambong pag-usab sa mga tigom, gigukod siya sa iyang bana nga nagdalag kutsilyo ug gisunog ang iyang mga nota sa tigom ug ang literatura sa Bibliya. Bisan pa niana, sa dihang gipasalida ang video, siya mitambong pag-usab. Sa ulahi gisultihan niining babayehana ang iyang bana sa iyang nakita. Uban sa nabag-ong tinamdan, gusto usab makita sa bana ang video ug nagbasol nga gisunog niya ang iyang mga nota ug literatura sa Bibliya.

Busa ingon niini nga ang mga tawo nakadungog sa maayong balita sa Thailand. Sila sa ingon nagabaton sa espirituwal nga kagawasan diha sa “nasod sa mga may kagawasan.”​—Juan 8:32.

[Footnote]

[Kahon sa panid 24]

LARAWAN SA NASOD

1993 Tuig sa Pag-alagad

KINATAS-ANG GIDAGHANONG NAGSANGYAW: 1,434

PROPORSIYON: 1 ka Saksi sa 40,299

TUMATAMBONG SA MEMORYAL: 3,342

ABERIDS NGA PAYUNIR NGA MGA MAGMAMANTALA: 232

ABERIDS NGA MGA PAGTUON SA BIBLIYA: 1,489

GIDAGHANON SA NABAWTISMOHAN: 92

GIDAGHANON SA MGA KONGREGASYON: 39

SANGANG BUHATAN: BANGKOK

[Hulagway sa panid 25]

Mga magwawali sa Gingharian madasigong nagsangyaw sa maayong balita

[Hulagway sa panid 25]

Unang sangang buhatan, 1947

[Hulagway sa panid 25]

Pamilyang Bethel atubangan sa bag-ong sangang buhatan sa Bangkok, gipahinungod niadtong Pebrero 8, 1992