Tabangi Silang Nagatambongan sa mga Tigom
1 Si David mipatugbaw sa kinasingkasing nga tinguha sa dihang siya miingon: “Taliwala sa nagkatigom nga katilingban ako magadayeg kang Jehova.” (Sal. 26:12) Gipaila ni David nga ang nagkatigom nga katilingban maoy mga magsisimba ni Jehova. Aduna ba kita ing sama nianang kinasingkasing nga tinguha? Atong ikapakita kana nga atong ginabuhat pinaagig regular nga pagtambong sa mga miting ug pagdasig sa uban sa pagtambong.—Heb. 10:24, 25.
2 Lagmit diha sa inyong kongregasyon adunay pipila kinsa nagatambongan na sa mga tigom pero dili pa mga magmamantala sa maayong balita. Ang kinaulahiang tigtambongan sa mga tigom alang niining nasora nagapakita nga adunay labaw sa 15,000 mas ang nagatambong sa miting publiko kay sa mga magmamantala nga nakig-anib. Unsa may atong mahimo sa pagbulig niini kanila nga mahimong takos sa pag-ambit diha sa ministeryo? Ang uban niini maoy mga anak sa mga Saksi ni Jehova, apan daghan ang bag-ohang mga interesado. Kita ba makatabang niini kanila? Ang uban basin mga tawong wala pa magtuon. Samtang makigsulti ka kanila diha sa mga tigom, hayan imong makaplagan nga ang pipila malipay nga ikaw magdumalag pagtuon sa Bibliya uban kanila.
3 Ang gugma sa mga igsoon alang sa mga bag-ohan dili ikalimod. Ingon sa gisulti sa usa ka batan-ong lalaki human sa iyang unang miting: “Ako natingala nga silang tanan kaila sa usag usa ug ang hawanan buhi uban sa mahigalaong panagsultihanay.” Kini nagpagusto kaniyang mopadayon sa pagtambong.
MGA PAAGI SA PAGBULIG
4 Ang atong gugma alang sa uban ikapakita pinaagig pagpakigsulti kanila sa dili pa o human sa mga tigom. Ang maong maidlot nga interes gipakita ni Pablo sa Roma kapitulo 16, diin siya nagpadalag mga pangumosta ngadto sa mga indibiduwal, nga nagbutyag nga siya nakaila pag-ayo kanila ug nabalaka kanila. (Roma 16:1-16) Ang iyang mga komento nagbutyag nga siya migahin ug panahon ug may interes sa pagkaila kanila. Iyang nasabtan ang ilang mga suliran ug makabulig kanila sa espirituwal. Ang pag-abot sa mga tigom nga sayo pa magtaganag maayo kaayong higayon nga mas nga masinati sa uban ug sa paglig-on kanila. Nganong dili maninguhang makugihon nga makaabot 15 ngadto sa 20 minutos sa dili pa magsugod ang mga miting ug magpabilin kadiyot human niana aron ikaw bug-os pang makaambit sa paglig-on sa uban.
5 Atong mapalig-on ang bag-ong mga nagatambong sa tigom pinaagig pagpakita kanila kon unsaon sa pag-andam alang sa mga miting, sa paghatag ug mga komento, ug sa pag-apil sa Teokratikanhong Ministeryong Tunghaan sa dihang sila takos na. Ang pipila mapuslanong mga sugyot ngadto sa bag-ohan mahimong dakong tabang sa paglig-on kaniya nga buhaton kini.—Tan-awang Giya sa Tunghaan, mga tun-anan 4, 7, ug 18.
6 Ingong bahin sa nagkatigom nga katilingban ni Jehova, kita mouswag sa espirituwal, ug ang mas malig-ong bugkos sa panaghiusa moresulta. (Gal. 6:10) Busa, tugoting magapadayon sa atong mahigugmaong mga panikaysikay sa pag-abag sa mga bag-ohan sa pagdayeg ug pagpasidungog kang Jehova.