Padayong Tagbawa ang Imong “Espirituwal nga Panginahanglan”

1. Unsay atong pangunang mga panginahanglan? (Mateo 5:3)

GILALANG ta ni Jehova nga may pangunang mga panginahanglan. Pananglitan nagkinahanglan tag pagkaon, sinina, ug puy-anan, ug kon mawad-an tag bisan usa lang ani, lisod na kaayong mabuhi. Pero gawas pa niining mga butanga, gilalang pod ta ni Jehova nga may espirituwal nga panginahanglan. (Basaha ang Mateo 5:3.) Aron tinuod tang magmalipayon, importante nga nahibalo ta ana nga panginahanglan ug padayon natong tagan-an ang atong kaugalingon niana.

2. Unsay gipasabot sa pagkahimong “mahunahunaon” sa “espirituwal nga panginahanglan”? Iilustrar.

² Unsay gipasabot sa pagkahimong “mahunahunaon” sa “espirituwal nga panginahanglan”? Sa orihinal nga pinulongan, kini nga ekspresyon naghatag ug ideya nga ang usa nagpakilimos alang sa espiritu. Haom gyod kaayo ni nga deskripsiyon. Ma-imagine nato ang usa ka makililimos nga luoy kaayog sinina ug nagyaka na lang sa kilid sa karsada. Luya na kaayo siya kay walay kaon, nabulad sa kainit, nagkurogkurog sa katugnaw, ug gilikayan sa mga tawo kay lago na kaayog hitsura. Ang makililimos nahibalo nga nagkinahanglan siyag tabang aron moarang-arang ang iyang kahimtang. Sa samang paagi, kadtong mga nagpakilimos alang sa espiritu, sa ato pa kadtong mga mahunahunaon sa ilang espirituwal nga panginahanglan, nahibalo nga nagkinahanglan sila sa tabang sa Diyos. Maong maningkamot sila nga pahimuslan ang daghang espirituwal nga tagana nga ginahatag ni Jehova para niadtong mga nahigugma niya.

3. Unsay atong hisgotan niining artikuloha?

³ Niining artikuloha, hisgotan nato kon unsay atong makat-onan sa babayeng taga-Fenicia nga nagpakiluoy pag-ayo kang Jesus nga tabangan siya. Kini nga babaye nagpakitag tulo ka hiyas nga angay pong sundogon niadtong mga mahunahunaon sa ilang espirituwal nga panginahanglan. Dayon hisgotan nato ang maayong mga ehemplo sa espirituwal nga mga lalaki sama ni apostol Pedro ug Pablo ug ni Haring David.

MAAYONG EHEMPLO SA PAGPAUBOS, PAGLAHUTAY, UG PAGTUO

4. Unsay gihangyo sa babayeng taga-Fenicia kang Jesus?

⁴ Dihay higayon nga may babayeng taga-Fenicia nga miduol kang Jesus. Ang iyang anak “nag-antos pag-ayo kay . . . gidemonyohan.” (Mat. 15:​21-28) Maong miadto siya kang Jesus aron magpakiluoy ug mangayog tabang. Matikdi ang pipila ka nindot nga mga hiyas nga gipakita niini nga babaye.

5. Unsang mga hiyas ang gipakita sa babaye, ug unsay gihimo ni Jesus? (Tan-awa sab ang hulagway.)

⁵ Ang babaye mapainubsanon kaayo. Nganong makaingon ta ana? Kay wala siya masuko dihang mora siyag gipakasama ni Jesus sa itoy, nga komon nga binuhi sa mga Hentil. Kon ikaw tong babaye, unsa kahay imong reaksiyon sa giingon ni Jesus? Mainsulto ba ka ug moundang na lang sa pagpangayog tabang? Dili kana ang gihimo sa babaye. Hinuon, nagpaubos siya ug padayong milahutay. Wala gyod siya mohunong sa pagpangayog tabang kang Jesus. Ngano? Kay lig-on kaayo ang iyang pagtuo kaniya, nga tungod ana napalihok si Jesus nga tabangan siya. Bisag miingon na si Jesus nga gipadala siya ngadto lang sa “nawalang mga karnero sa nasod sa Israel,” iya gihapong gipagawas ang daotang espiritu gikan sa anak niini nga babaye.

6. Unsay atong makat-onan sa babayeng taga-Fenicia?

⁶ Aron matagan-an nato ang atong espirituwal nga panginahanglan, angay natong sundogon ang mga hiyas nga gipakita sa maong babaye. Kinahanglan nga mapainubsanon ta, molahutay, ug magpakitag lig-ong pagtuo. Kadto lang mga mapainubsanon ang molahutayg hangyo sa Diyos alang sa tabang. Kinahanglang lig-on pod ang atong pagtuo kang Jesu-Kristo ug mosalig ta niadtong iyang gigamit sa paggiya nato. (Mat. 24:​45-47) Malipay gyod si Jehova ug si Jesus nga tagan-an ang atong espirituwal nga mga panginahanglan kon atong ipakita kini nga mga hiyas. (Itandi ang Santiago 1:​5-7.) Karon atong susihon kon unsay ginahimo ni Jehova aron matagan-an ta sa atong espirituwal nga pagkaon, sinina, ug puy-anan. Hisgotan pod nato ang ehemplo ni apostol Pedro ug Pablo ug ni Haring David aron mahibaloan nato kon unsay kinahanglan natong himoon aron mabatonan ni nga mga tagana.

SAMA KANG PEDRO—PAHIMUSLI ANG ESPIRITUWAL NGA PAGKAON

7. Unsang asaynment ang nadawat ni Pedro, pero unsa poy kinahanglan niyang himoon? Ipatin-aw. (Hebreohanon 5:14–6:1)

⁷ Hunahunaa ang pananglitan ni apostol Pedro. Usa siya sa pinakaunang mga Hudiyo nga mituo nga si Jesus ang Mesiyas—kinsa gigamit ni Jehova sa pagpakaon sa iyang katawhan sa espirituwal pinaagig “mga pulong nga motultol sa kinabuhing walay kataposan.” (Juan 6:​66-68) Sa wala pa mobalik sa langit ang nabanhawng si Jesus, iyang gihatagag asaynment si Pedro: “Pakan-a ang akong gagmayng mga karnero.” (Juan 21:17) Gituman gyod na ni Pedro, ug gigamit pa gani siya ni Jehova sa pagsulat ug duha ka basahon sa Bibliya. Pero kinahanglan pong pakan-on ni Pedro ang iyang kaugalingon sa espirituwal. Pananglitan, iyang gitun-an ang mga sulat ni Pablo nga nahimo nang bahin sa Kasulatan. Bisag “lisod sabton” ang ubang butang nga gisulat ni Pablo, padayong nagkugi si Pedro sa pagtuon. (2 Ped. 3:​15, 16) Misalig siya nga tabangan siya ni Jehova nga masabtan ug mapadapat ang “gahing pagkaon” nga gipasulat sa Diyos kang Pablo.—Basaha ang Hebreohanon 5:14–6:1.

8. Unsay gihimo ni Pedro dihang nakadawat siyag bag-ong direksiyon gikan kang Jehova?

⁸ Gipamatud-an ni Pedro ang iyang pagtuo kang Jehova pinaagi sa pagsunod sa mga direksiyon nga iyang nadawat. Pananglitan, samtang didto siya sa siyudad sa Jope, nakakita si Pedro ug panan-awon diin giingnan siya sa anghel nga ihawon ug kaonon ang mga hayop nga hugaw sumala sa Moisesnong Balaod. Nakuratan ug di gyod katuo si Pedro adto nga sugo, maong sa primero miingon siya: “Dili ko, Ginoo, kay wala pa gyod ko sukad makakaon ug bisan unsang gidili ug hugaw.” Pero giingnan siya sa anghel: “Ayaw nag tawgang hugaw ang mga butang nga gihinloan na sa Diyos.” (Buh. 10:​9-15) Nasabtan ni Pedro ang gipasabot sa panan-awon ug iyang giusab ang iyang panghunahuna. Nganong nahibalo ta ana? Kay human dayon sa panan-awon, dihay miabot nga tulo ka lalaki nga gipadala sa Hentil nga si Cornelio. Ilang giingnan si Pedro nga moadto sa balay sa ilang agalon. Tingali dili gyod unta mosugot si Pedro nga moadto, kay para sa mga Hudiyo, hugaw ang mga Hentil. (Buh. 10:​28, 29) Pero kay nasabtan ni Pedro ang panan-awon, gituman dayon niya ang bag-ong direksiyon nga gihatag ni Jehova. (Prov. 4:18) Iyang gisangyawan si Cornelio ug ang iyang panimalay, ug nalipay kaayo siya kay mituo sila, nakadawat sa balaang espiritu, ug nagpabawtismo.—Buh. 10:​44-48.

9. Unsay duha ka kaayohan kon maningkamot ta nga mokaon ug gahing espirituwal nga pagkaon?

⁹ Sama kang Pedro, kinahanglang regular natong tun-an ang Pulong sa Diyos. Pero dili ta angayng makontento lang sa mga kamatuoran nga sayon sabton. Kinahanglang mokaon pod tag gahing espirituwal nga pagkaon—kadtong mga kamatuoran nga dili tingali sayon sabton. Tinuod, nagkinahanglag dugang panahon ug paningkamot aron mas masabtan nato ang Pulong sa Diyos, pero dili gyod ta magmahay. Ngano? Kay makahatag ni natog kaayohan. Una, madugangan ang atong makat-onan bahin kang Jehova, nga mas makapalalom sa atong gugma ug pagtahod niya. Ug ikaduha, mas madasig ta nga sultihan ang uban bahin sa atong makapahingangha kaayo nga Diyos. (Roma 11:33; Pin. 4:11) Ang ehemplo ni Pedro nagtudlo pod natog laing leksiyon: Dihang makadawat tag kausaban sa atong pagsabot sa Pulong sa Diyos, kinahanglang mopahiuyon dayon ta. Pinaagi lang ana nga makapabilin tang himsog sa espirituwal ug padayong magamit ni Jehova.

SAMA KANG PABLO—PADAYONG ISUL-OB ANG BAG-ONG PERSONALIDAD

10. Unsay kinahanglan natong himoon aron masul-ob ang bag-ong personalidad? (Colosas 3:​8-10)

¹⁰ Aron mapalipay ang Diyos, naa pa tay kinahanglang himoon. Si apostol Pablo miingon nga kinahanglan natong ‘hukason ang daang personalidad’ ug isul-ob ang “bag-ong personalidad.” (Basaha ang Colosas 3:​8-10.) Pero dili kanunayng sayon ang pagsul-ob sa bag-ong personalidad. Hunahunaa si Pablo. Sukad niadtong batabata pa siya, naningkamot na siya nga mapalipay ang Diyos. (Gal. 1:14; Filip. 3:​4, 5) Pero kay wala man siya makasabot kon unsa gyoy katuyoan sa Diyos, wala niya masimba si Jehova sa saktong paagi. Ang iyang kawalay-alamag sa mga pagtulon-an sa Kristo ug ang iyang garbo nakapahimo niyang “bagis” nga tawo, nga daghan kaayog negatibong kinaiya.—1 Tim. 1:13.

11. Unsang kahuyangan ni Pablo ang gipaningkamotan niyang masuklan? Ipatin-aw.

¹¹ Sa wala pa mahimong Kristohanon si Pablo, dali ra kaayo siyang masuko. Pananglitan, ang basahon sa Buhat nag-ingon nga si Pablo suko kaayo sa mga tinun-an ni Jesus ug nanghulga pa gani sa pagpatay nila. (Buh. 9:1) Pero dihang nahimo na siyang Kristohanon, seguradong naningkamot siya nga hukason ang iyang daang personalidad ug wad-on ni nga kinaiya. (Efe. 4:​22, 31) Apan dihang wala magkauyon si Pablo ug Bernabe, “naglalis sila pag-ayo.” (Buh. 15:​37-39) Nagpakita ni nga wala pa gyod diay mawala ni Pablo kini nga kinaiya. Bisan pa ana, naningkamot gihapon siya nga masuklan ni. Padayon niyang ‘gimakmak ang iyang lawas,’ sa ato pa, gisuklan niya ang iyang mga kahuyangan aron mapalipay si Jehova.—1 Cor. 9:27.

12. Unsay nakatabang kang Pablo nga magbag-o?

¹² Milampos si Pablo sa paghukas sa iyang dili maayong mga kinaiya ug sa pagsul-ob sa bag-ong personalidad tungod kay wala siya mosalig sa iyang kaugalingong paningkamot. (Filip. 4:13) Sama kang Pedro, misalig siya sa “kusog nga ginahatag sa Diyos.” (1 Ped. 4:11) Pero naa gihapoy mga panahon nga nasipyat si Pablo, nga tungod ana naguol kaayo siya. Unsay nakatabang niya? Gihinumdoman ni Pablo ang tanang gihimo sa iyang langitnong Amahan para niya, ug nakatabang na niya nga padayong maningkamot nga magbag-o.—Roma 7:​21-25.

13. Unsaon nato pagsundog si Pablo?

¹³ Sama kang Pablo, bisag unsa na ta ka dugay nga nag-alagad kang Jehova, kinahanglan nga padayon tang maningkamot nga hukason ang daang personalidad ug isul-ob ang bag-ong personalidad—ang espirituwal nga sinina nga gikan sa Diyos. Kon usahay mobalik ang atong kahuyangan, sama anang dili ta kapugong sa atong kasuko o makasulti tag sakit, dili ta angayng maghunahuna nga dili na gyod ta mabag-o. Hinuon, padayon tang maningkamot nga bag-ohon ang atong panghunahuna ug kinaiya. (Roma 12:​1, 2; Efe. 4:24) Pero samtang ato nang himoon, naa tay angayng hinumdoman: Ang espirituwal nga sinina gikan kang Jehova dili sama sa literal nga sinina nga puwedeng i-adjust aron mohaom sa atong sukod. Hinuon, kita ang kinahanglang mag-adjust o magbag-o aron masunod nato ang mga sukdanan sa Diyos.

SAMA KANG DAVID—AYAWG BIYA SA ESPIRITUWAL NGA PROTEKSIYON NI JEHOVA

14-15. Giunsa pagpanalipod ni Jehova ang iyang katawhan sa espirituwal? (Salmo 27:5) (Tan-awa sab ang hulagway.)

¹⁴ Aron tinuod tang magmalipayon, dili lang espirituwal nga pagkaon ug sinina ang atong gikinahanglan. Nagkinahanglan pod tag espirituwal nga proteksiyon, nga samag naa ta sa luwas nga puy-anan. Unsa kini, ug unsay atong himoon aron makapabilin niini nga proteksiyon?

¹⁵ Gihisgotan ni Haring David kini nga proteksiyon nga gikan kang Jehova. (Basaha ang Salmo 27:5.) Si Jehova manalipod sa iyang katawhan gikan kang bisan kinsa o bisan unsa nga makahatag ug permanenteng kadaot sa ilang pagtuo kaniya. Unsaon na niya paghimo? Si Jehova nagsaad nga walay hinagiban nga buhaton batok sa iyang katawhan ang molampos. (Sal. 34:7; Isa. 54:17) Bisag gamhanan si Satanas ug ang iyang mga sakop, dili sila makahatag natog kadaot hangtod sa hangtod. Bisag patyon pa ta nila, banhawon ta ni Jehova. (1 Cor. 15:​55-57; Pin. 21:​3, 4) Tabangan pod ta ni Jehova nga maatubang ang atong mga kabalaka aron dili ta mohunong sa pag-alagad. (Prov. 12:25; Mat. 6:​27-29) Ug ingong atong mahigugmaong Amahan, gihatagan ta niyag espirituwal nga pamilya nga andam motabang nato ug mga ansiyano nga nag-atiman nato. (Isa. 32:​1, 2) Diha sa mga tigom, kanunay tang mapahinumdoman kon unsay angay natong himoon aron padayon natong madawat ang proteksiyon ni Jehova.—Heb. 10:​24, 25.

16. Giunsa pagpanalipod ni Jehova si David?

¹⁶ Dihang gituman ni David si Jehova, naprotektahan siya gikan sa dili maayong mga resulta sa tinuyong pagpakasala. (Itandi ang Proverbio 5:​1, 2.) Pero dihang gisupak niya ang mga sugo sa Diyos, wala siya proteksiyoni ni Jehova gikan sa pait nga mga resulta sa iyang gihimo. (2 Sam. 12:​9, 10) Diha poy mga higayon nga nag-antos si David bisag wala siyay gihimong daotan. Nianang mga higayona, iyang gisulti sa Diyos ang tanan niyang kabalaka. Gihupay siya ni Jehova ug gipasaligan sa Iyang gugma ug pag-atiman.—Sal. 23:​1-6.

17. Unsaon nato pagsundog si David?

¹⁷ Masundog nato si David kon pangayoon nato ang giya ni Jehova dihang mohimo tag mga desisyon. Hinumdoman pod nato nga usahay mag-antos ta tungod sa atong sayop nga mga desisyon, dili tungod kay gipasagdan na ta ni Jehova. (Gal. 6:​7, 8) Ug dihang mag-antos ta bisag dili nato sayop, atong isulti kang Jehova ang tanan natong gibati, ug mosalig ta nga hatagan ta niyag kalinaw sa kasingkasing ug hunahuna.—Filip. 4:​6, 7.

PADAYONG TAGBAWA ANG IMONG ESPIRITUWAL NGA PANGINAHANGLAN

18. Unsay gituohan sa kadaghanang tawo karon, pero nganong importante nga padayon natong tagbawon ang atong espirituwal nga panginahanglan? (Tan-awa sab ang mga hulagway.)

¹⁸ Ang atong tinuig nga teksto para sa 2026 nag-ingon: “Malipayon kadtong mahunahunaon sa ilang espirituwal nga panginahanglan.” Importante kaayo nga ato ning hinumdoman ilabina na karon. Ngano? Kay daghang tawo ang dili motuo nga naa silay espirituwal nga panginahanglan. Ang uban pod nahibalo ani, pero ila ning gitagbaw pinaagig bakak nga relihiyon o sayop nga mga pilosopiya sa tawo. Unsay atong himoon aron dili ta maimpluwensiyahan sa ilang panghunahuna? Kinahanglang maningkamot ta nga pahimuslan ang espirituwal nga pagkaon gikan kang Jehova, isul-ob ang bag-ong personalidad, ug magpabilin diha sa proteksiyon ni Jehova hangtod sa hangtod.