Kaya Nimong Suklan ang Negatibong mga Pagbati

1-2. Nganong may mga panahon nga naguol si apostol Pablo, ug nganong makasabot tingali ta sa iyang gibati? (Roma 7:​21-24)

UNSAY imong mahunahunaan bahin kang apostol Pablo? Tingali makaingon ka nga maayo kaayo siyang manudlo, dili siya mahadlok mosangyaw sa mga tawo, ug siya ang pinakadaghag nasulat nga basahon sa Bibliya. Ug sakto ka. Pero bisag unsa ka maayo si Pablo, parehas ra pod siya nato nga maguol usahay ug may negatibong mga pagbati.

² Basaha ang Roma 7:​21-24. Mabasa nato sa sulat ni Pablo sa mga taga-Roma nga naa siyay mga pagbati nga maka-relate kaayo ta. Bisag matinumanon siya nga Kristohanon, naa siyay gisuklan nga mga kahuyangan. Gusto kaayo niyang himoon kon unsay makapalipay sa Diyos, pero usahay mosulod gihapon sa iyang hunahuna ang sayop nga mga tinguha. Gawas pa ana, naa poy mga panahon nga maguol si Pablo tungod sa nangagi niyang mga sala ug sa balikbalik nga problema nga iyang ginaatubang.

3. Unsay atong hisgotan niining artikuloha? (Tan-awa sab ang “Termino Gipatin-aw.”)

³ Bisag naay negatibong mga pagbatia si Pablo, wala siya magpadaog ani. Niining artikuloha, hisgotan nato ang mosunod nga mga pangutana: Nganong mibati usahay si Pablo nga “makaluluoy” siya? Giunsa niya pag-atubang ang iyang negatibong mga pagbati? Ug unsay atong himoon aron masuklan nato ang negatibong mga pagbati?

KON UNSAY HINUNGDAN SA NEGATIBONG MGA PAGBATI NI PABLO

4. Unsay usa sa mga hinungdan sa negatibong pagbati ni Pablo?

⁴ Mga sala nga iyang nahimo sa una. Sa wala pa mahimong Kristohanon si Pablo, nga kaniadto nailhang si Saulo, nakahimo siyag mga butang nga iyang gimahayan sa ulahi. Pananglitan, dihang gibato ang matinumanong si Esteban hangtod namatay, nagtan-aw ra si Saulo ug miuyon pa gani sa gibuhat kang Esteban. (Buh. 7:58; 8:1) Nangunay pod siya sa grabeng pagpanglutos sa mga Kristohanon.—Buh. 8:3; 26:​9-11.

5. Unsay gibati ni Pablo sa iyang mga nahimo sa una?

⁵ Dihang nahimo nang Kristohanon si Pablo, naa gihapoy mga panahon nga makonsensiya ug maguol siya tungod sa iyang grabeng pagpanglutos kaniadto sa mga tinun-an sa Kristo. Tingali misamot pa gyod ang iyang kakonsensiya paglabay sa panahon. Pananglitan, sa iyang unang sulat para sa mga taga-Corinto niadtong mga 55 C.E., siya miingon: “Dili ko angayng tawgon nga apostol, kay gilutos nako ang kongregasyon sa Diyos.” (1 Cor. 15:9) Mga lima ka tuig sa ulahi, sa iyang sulat para sa mga taga-Efeso, siya miingon nga siya “ubos pa kay sa kinaubsan sa tanang balaan.” (Efe. 3:8) Ug sa sulat ni Pablo para kang Timoteo, siya miingon nga kaniadto siya “tigpasipala, maglulutos, ug bagis.” (1 Tim. 1:13) Ma-imagine ba nimo kon unsa kaha ka bug-at ang gibati ni Pablo dihang mobisita siyag kongregasyon ug makita niya ang mga igsoon nga iyang gilutos sa una o ang ilang mga pamilya?

6. Unsa pay laing nakapabug-at sa gibati ni Pablo? (Tan-awa sab ang footnote.)

⁶ Tunok sa unod. Naa pay nakadugang sa kasakit nga gibati ni Pablo, ug miingon siya nga sama nig “tunok sa unod.” (2 Cor. 12:7) Wala niya isulti kon unsa gyod ni, pero base sa iyang giingon, posibleng nagtumong ni sa problema sa panglawas o emosyon, o uban pa—nga nakahatag niyag grabeng kaguol.b

7. Nganong lisod usahay para kang Pablo ang paghimo kon unsay maayo? (Roma 7:​18, 19)

⁷ Iyang mga kahuyangan. Naglisod gyod si Pablo sa iyang mga kahuyangan. (Basaha ang Roma 7:​18, 19.) Bisag gusto niyang himoon kon unsay maayo, miangkon siya nga dili ni kanunayng sayon. Kinahanglan gyod niyang suklan ang iyang tendensiya nga mohimog dili maayo. Pero naningkamot pag-ayo si Pablo nga madaog ang iyang mga kahuyangan. (1 Cor. 9:27) Maong puwerte gyod tingali niyang guola dihang mapakyas siya ug mobalik na pod ang iyang kahuyangan!

KON GIUNSA PAGWALA NI PABLO ANG NEGATIBONG MGA PAGBATI

8. Base sa mga sulat ni Pablo, giunsa niya pag-atubang ang iyang mga kahuyangan?

⁸ Klaro diha sa mga sulat ni Pablo nga iya gyong gipamalandong kon sa unsang paagi masuklan niya ug sa mga Kristohanon ang sayop nga mga tinguha, sa tabang sa balaang espiritu sa Diyos. (Roma 8:13; Gal. 5:​16, 17) Gihisgotan niya ang dili maayong mga binuhatan ug kinaiya nga angayng likayan sa mga Kristohanon. (Gal. 5:​19-21, 26) Seguradong gipamalandong ni Pablo ang iyang kaugalingong mga kahuyangan, nangitag mga tambag diha sa Kasulatan, ug mihimo siyag praktikal nga mga paagi aron masuklan ang iyang sayop nga mga tinguha. Makita gyod nato nga kon unsay iyang gitambag sa uban, iya pong gipadapat sa iyang kaugalingon.

9-10. Unsay nakatabang kang Pablo nga masuklan ang negatibong mga pagbati? (Efeso 1:7) (Tan-awa sab ang hulagway.)

⁹ Bisag naay mga panahon nga nabug-atan si Pablo sa iyang gibati, nakapabilin gihapon siyang positibo. Pananglitan, nalipay siya dihang nakadungog siyag maayong mga balita gikan sa lagyo nga mga kongregasyon. (2 Cor. 7:​6, 7) Nalipay pod siya kay daghan siyag nasuod nga mga higala. (2 Tim. 1:4) Ug labaw sa tanan, nahibalo siya nga giuyonan siya ni Jehova. Malipayon gyod si Pablo kay nakahimo siya sa pag-alagad sa Diyos “uban sa hinlong konsensiya.” (2 Tim. 1:3) Bisan gani dihang napriso siya sa Roma, iyang gidasig ang mga Kristohanon nga ‘maglipay diha sa Ginoo.’ (Filip. 4:4) Kon nagpadala pa siya sa iyang negatibong mga hunahuna, dili unta siya makasulat ug makapadasig nga mga pulong. Pero kay gisuklan man dayon ni Pablo ang iyang negatibong mga pagbati, nakapabilin siyang positibo ug malipayon.

¹⁰ Ang lain pang nakatabang kang Pablo mao ang paghunahuna nga ang lukat personal gyod nga regalo sa Diyos para niya. (Gal. 2:20; basaha ang Efeso 1:7.) Tungod ana, kombinsido siya nga gipasaylo na siya ni Jehova pinaagi kang Jesu-Kristo. (Roma 7:​24, 25) Bisan pa sa iyang mga kahuyangan ug sa iyang mga sala sa una, si Pablo malipayon gihapong ‘nakahimog sagradong pag-alagad’ sa Diyos.—Heb. 9:​12-14.

11. Nganong makadasig nato ang ehemplo ni Pablo?

¹¹ Sama kang Pablo, mabug-atan tingali ta kay morag walay kahumanan ang atong pagpaningkamot nga masuklan ang sayop nga mga tinguha. Gusto gyod natong mapalipay si Jehova, pero naa tingali mga panahon nga dili maayo ang atong mahunahunaan, masulti, o mahimo. Tungod ana, basin makaingon pod tag, “Makaluluoy kaayo ko!” Ang sister nga si Elizac nga mga 20 anyos, naa poy ginasuklan nga kahuyangan. Siya miingon: “Dihang maghunahuna ko bahin sa situwasyon ni Pablo, mahupayan ko kay dili ra diay ako ang mibatig ingon ani. Nagpakita lang ni nga si Jehova nahibalo sa gibati ug giatubang sa iyang mga alagad.” Sama kang Pablo, unsay atong mahimo aron makabaton tag hinlong konsensiya ug malipay gihapon sa pag-alagad bisan pag naa tay negatibong mga pagbati?

KON UNSAON NGA MASUKLAN NATO ANG NEGATIBONG MGA PAGBATI

12. Nganong ang maayong espirituwal nga rutina makatabang nato nga masuklan ang negatibong mga pagbati?

¹² Ayaw pasagdi ang imong espirituwal nga rutina. Ang maayong espirituwal nga rutina makatabang nato nga mahimong mas positibo. Puwede nato ning ipakasama sa mga butang nga kanunay natong ginahimo aron OK ang atong panglawas. Pananglitan, maayo ang atong pamati kon mag-exercise ta pirme ug sakto ang atong kaon ug tulog. Ingon ana pod ang maayong espirituwal nga rutina. Kinahanglang regular tang magbasa sa Pulong sa Diyos, mangandam ug mokomento panahon sa mga tigom, ug moapil sa lainlaing paagi sa pagministeryo. Kon ato nang himoon, mas masuklan nato ang negatibong mga pagbati ug mahimo tang mas malipayon.—Roma 12:​11, 12.

13-14. Unsang mga kaayohan ang naeksperyensiyahan sa mga igsoon tungod sa ilang maayong espirituwal nga rutina? Paghatag ug pananglitan.

¹³ Konsideraha pananglitan si John nga nasakit ug cancer sa edad pa lang nga 39. Sa primero, nahugno gyod siya. Nakapangutana siya, ‘Nganong naingon ani man tawon ko nga kabata pa man nako?’ Adtong panahona, tulo ka tuig pa lang ang iyang anak. Unsay nakatabang kang John nga madaog ang iyang negatibong mga pagbati? “Bisag luya kaayo ko, naningkamot ko nga mapadayon ang espirituwal nga rutina sa among pamilya,” siya miingon. “Motambong gyod mi sa mga tigom, mosangyaw pirme, ug mag-family worship kada semana bisan dihang lisod ning himoon.” Dihang gihinumdoman ni John ang nahitabo, siya miingon: “Sa primero, makalitan gyod ka ug puro lang negatibo ang imong mahunahunaan. Pero sa ngadtongadto, mahupay ka sa gugma ug kusog gikan kang Jehova. Gipalig-on gyod ko ni Jehova, ug segurado ko nga mao pod nay iyang himoon para nimo.”

¹⁴ Si Eliza, nga gihisgotan ganina, miingon: “Dihang motambong ko sa mga tigom ug mag-personal study, mapahinumdoman ko nga gimahal gyod ko ni Jehova ug maminaw siya sa akong mga pag-ampo. Malipay gyod kong maghunahuna ana.” Mao pod nay gibati ni Nolan, usa ka tigdumala sa sirkito sa Africa, ug sa iyang asawa nga si Diane. Si Nolan miingon: “Wala namo pasagdi ang among espirituwal nga rutina bisan dihang guol kaayo mi. Nakita namo nga gitabangan gyod mi ni Jehova nga mahimong positibo ug malipayon. Ginahinumdoman namo pirme nga tabangan ug panalanginan gyod mi ni Jehova. Wala mi kabalo kon unsaon na niya paghimo, pero segurado mi nga iya gyod nang himoon.”

15. Unsa pay kinahanglan natong himoon aron masuklan ang negatibong mga hunahuna? Iilustrar.

¹⁵ Bisag naa tay maayong espirituwal nga rutina, usahay magbalikbalik gihapon ang atong negatibong mga hunahuna, maong naa pa tingali tay kinahanglang himoon. Hunahunaa ni nga ilustrasyon: Ibutang ta nga nagsakit ang imong likod maong nagpahilot ka. Pero nabantayan nimo nga bisag sige na kag pahilot, wala gihapon mawala ang sakit. Unsay imong himoon? Tingali mag-research ka ug moadto pa gani sa doktor aron mahibaloan nimo kon unsa gyoy hinungdan ani. Sa samang paagi, kon magsigeg balikbalik ang atong negatibong mga pagbati, kinahanglan tingali tang mohimog dugang sa pagtuon sa Bibliya ug pag-research sa atong mga publikasyon. Basin kinahanglan pod tang makig-estorya sa hamtong nga igsoon aron matabangan ta nga masuklan ni. Konsideraha kon unsaon nato ni paghimo.

16. Unsay makatabang nimo nga mahibaloan kon unsay hinungdan sa imong negatibong mga hunahuna? (Salmo 139:​1-4, 23, 24)

¹⁶ Pag-ampo aron mahibalo ka kon unsa gyoy imong gikinahanglan. Si Haring David nahibalo nga nakaila kaayo si Jehova niya, maong iyang gihangyo si Jehova nga tabangan siyang mahibaloan kon unsa gyoy hinungdan sa iyang mga “kabalaka.” (Basaha ang Salmo 139:​1-4, 23, 24.) Puwede pod na nimong himoon. Hangyoa si Jehova nga tabangan kang mahibaloan kon unsay hinungdan sa imong negatibong mga hunahuna ug kon unsay imong mahimo aron masuklan ni. Puwede nimong pangutan-on ang imong kaugalingon, ‘Unsa gyod kahay hinungdan sa akong mga kabalaka? Kanus-a o unsang mga hitaboa ang makapabati nakog ingon ani? Kon motokar ni nga mga hunahuna, ako ba ning ginapaundayonan imbes maningkamot nga suklan ni?’

17. Unsa nga mga topiko ang puwede nimong tun-an aron mapokus ang imong hunahuna sa positibong mga butang? (Tan-awa sab ang hulagway.)

¹⁷ Pag-research sa mga topiko nga makatabang sa imong situwasyon. Makatabang tingali nimo ang pagtuon bahin sa personalidad ni Jehova. Pananglitan, nakatabang kang apostol Pablo ang pagpamalandong bahin sa lukat ug sa pagpasaylo ni Jehova. Puwede pod na nimong himoon. Gamita ang Giya sa Pagpanukiduki Para sa mga Saksi ni Jehova, Watch Tower Publications Index, o uban pang mga publikasyon sa pag-research sa mga topiko sama sa pagpasaylo ni Jehova, sa iyang kaluoy, ug maunongong gugma. Kon makakita na kag mga artikulo nga makatabang nimo, ilista ni ug ibutang sa lugar nga dali nimong makita. Dayon kon mobati na pod kag kaguol o kabalaka, tun-i ang imong nalista nga mga artikulo. Ipadapat sa imong kahimtang ang nindot nga mga punto nga imong nakat-onan.—Filip. 4:8.

18. Unsay gitun-an sa ubang igsoon nga nakatabang nila?

¹⁸ Si Eliza, nga gihisgotan ganina, nagtuon bahin kang Job nga naa sa Bibliya. Siya miingon: “Parehas mi ni Job kay nagsunodsunod pod ang akong mga problema. Pero nadasig ko sa iyang ehemplo, kay bisan adtong guol na kaayo siya ug wala siya mahibalo kon unsay hinungdan sa iyang mga pag-antos, wala gihapon siya mobiya kang Jehova.” (Job 42:​1-6) Si Diane, nga gihisgotan ganina, miingon: “Gitun-an namo sa akong bana ang librong Pakigsuod Kang Jehova. Mapasalamaton kaayo mi nga ginaumol mi ni Jehova. Maong imbes nga sobrang maguol kon makahimo mig sayop, among ginahinumdoman nga si Jehova padayon pang nag-umol ug nagtabang namo nga mahimong mas maayong tawo. Tungod ana mas nasuod mi niya.”—Isa. 64:8.

MAKASALIG KA UG NINDOT KAAYO NGA KAUGMAON

19. Unsay dili nato angayng dahomon, pero sa unsa ta makasalig?

¹⁹ Bisag maayo tag espirituwal nga rutina ug gitun-an nato ang mga topiko nga haom sa atong situwasyon, dili gihapon ta makadahom nga mawala na gyod ang tanan natong negatibong mga hunahuna ug pagbati. Naa gihapoy mga panahon nga mabalaka ug maguol ta. Pero sa tabang ni Jehova, kaya nato ning suklan. Bisag maguol ta usahay, makasalig ta nga mas maglabaw ang atong kalipay kay naa tay hinlong konsensiya ug napalipay nato si Jehova.

20. Unsay paningkamotan natong himoon?

²⁰ Maningkamot gyod ta nga dili magpadaog sa atong negatibong mga pagbati bahin sa atong mga problema, kahuyangan, ug nangaging mga sala. Sa tabang ni Jehova, kaya nato ning suklan nga mga pagbati. (Sal. 143:10) Makasalig ta nga sa umaabot, dili na ta kinahanglang maningkamot pag-ayo aron lang magmalipayon. Hunahunaa kon unsa ka lami ang atong bation kon kada adlaw, momata na ta nga walay bisan unsang kabalaka ug eksayted na pod nga moalagad sa atong mahigugmaong Diyos, si Jehova!