“Hinaot Unta ang Tanan mga Manalagna!”

SI Papa Juan Paulo II nagpahayag sa mosunod nga mensahe ngadto sa usa ka katigoman sa mahigugmaon-sa-Bibliya nga mga Katoliko: “Akong gipaabot ang mga pangomosta sa tanang entrante sa Asembliya Heneral sa Katolikong Pederasyon sa Kalibotan Alang sa Biblikanhong Apostolada ug akong ginapasalig kanila ang espirituwal kong pakigsuod. Ako nalipayng nahibalo nga kining asembliyaha nadasig sa mga pulong ni Moises nga kini ang gihimong ulohan niini, ‘Hinaot unta ang tanan mga manalagna’ (Num 11:29), ug gipadapat kining mga pulonga ngadto sa mga buluhatong pagatumanon niini.”—L’Osservatore Romano, Agosto 24, 1984.

Katolikong Buluhaton sa Pagtudlo sa Bibliya

Ang Ikatulong Asembliya Heneral sa Katolikong Pederasyon sa Kalibotan Alang sa Biblikanhong Apostolada gihimo sa Bangalore, India, sa Agosto 1984. Nagtigom ang mga delegado gikan sa 53 ka nasod. Ang Pederasyon gitukod sa Roma sa 1969. Kadto tulo ka tuig tapos gisugo ni Papa Paulo VI ang usa ka Alemang kardinal sa Roma sa pagtuon sa mga panginahanglan sa Iglesya Katolika sa mga butang maylabot sa Bibliya. Pagkakaron, si Msgr. Ablondi, obispo sa Leghorn, Italya, mao ang presidente.

Sa pag-awhag sa Pederasyon nga sublion ang mga tumong niini, si Papa Juan Paulo miingon diha sa iyang mensahe: “Ang Pederasyon komitido sa pagtabang sa mga Katoliko sa tibuok kalibotan nga daling makabasa sa Pulong sa Diyos. . . . Sa pagkamatuod ang tanang kalihokan ug tanang pagpamatuod diha sa Iglesya angay magagikan sa buhing Pulong . . . Ang ‘matagnaong katungdanan’ sa Katawhan sa Diyos kinahanglang pagatumanon ingong matuod nga pag-alagad sa Pulong. . . . Pinaagi sa pag-apil sa buluhaton sa paghubad, pagpatik ug pagpalapnag sa Pulong, ang usa nagabuhat sa pagtagbaw sa mga panginahanglan niadtong gigutom ug giuhaw sa Pulong sa Diyos (itandi sa Amos 8:11). Kini mapadapat usab ngadto sa buluhaton sa paghugpong sa usa ka adlaw sa mga tawong nagpahinungod sa ilang kaugalingon ngadto sa pagtudlo ug pagsangyaw sa Balaang Kasulatan.”

Nahiuyon sa iyang tema, sa kataposang deklarasyon niini kining Katolikong Biblikanhong asembliya mipahayag: “Ang Pederasyon nasayod nga kon ang tanang Katawhan sa Diyos magatuman sa ilang matagnaong bahin, kinahanglang sila makabaton sa Pulong sa Diyos (ilang personal nga kopya sa Bibliya diha sa ilang kaugalingong pinulongan). Sila may katungod nga mabansay sa kahibalo sa Kasulatan . . . Kining Asembliyaha nagalig-on nga ang buluhaton sa Iglesya nga mao ang pagwali sa maayong balita nasentro sa Bibliya.”

Usa ka Lisod Kaayong Kahimtang

Busa, ang mga Katoliko karon gidasig dili lamang sa pagbasa sa Bibliya kondili pag-apil nga aktibo sa buluhatong pagwali nga nasentro sa Bibliya. Kini dalayegon. Apan kini nagabutang kanila sa lisod kaayong kahimtang.

Sa usa ka butang, ang Iglesya Katolika nagatudlong ang tradisyon labaw kay sa Bibliya. Sa unsang paagi ang usa ka Katoliko madahom nga mahimong madasigong magtutudlog Bibliya ug sa samang panahon magpabiling maunongon sa iyang iglesya? Pananglitan, iyang mabasa sa Bibliya: “Ang kalag nga makasala mamatay.” (Ezekiel 18:4, 20, Revised Standard Version, Katolikong edisyon; itandi ang Douay Version.) Apan ang iyang iglesya nagatudlo nga ang kalag dili mamatay ug ang tanang kalag atua sa impiyerno, limbo, purgatoryo, o langit. Unsay iyang itudlo—ang Katolikong doktrina o ang Bibliya?

Dugang pa, ang Iglesya Katolika nagauyon sa pagpatik ug mga edisyon sa Bibliya nga may mga nota ug mga komento nga makadaot lamang sa pagsalig sa magbabasa diha sa Bibliya ingong dinasig nga Pulong sa Diyos. Pananglitan, sa introduksiyon niini, “Unsaon Pagbasa ang Imong Bibliya,” ang The New American Bible, nga may pagbendisyon ni Papa Paulo VI diha sa pasiuna, nagaingon: “Sa unsang paagi mahibaloan sa usa kon kaha siya nagabasa sa kasaysayan o sa usa ka matang sa masambingayong pamulong? . . . Nagtuo ang kadaghanang siyentipiko nga sa usa ka paagi ang tawhanong espisye naugmad gikan sa ubos nga mga matang sa kinabuhi. Kining kahibaloa nakatabang sa mga Kristohanon sa pagpalandong sa ‘paagi’ sa pagpanglalang sa Diyos ug pagsabot nga ang Genesis 2 ug 3 dili pagtulon-an sa Antropolohiya, kondili usa ka pasumbingay, nga nagatudlo kanato sa pagtulon-ang ang sala mao ang gamot sa tanang daotan.”

Busa, sa dili pa sila makaabot sa unang mga panid sa Genesis, ang mga magbabasa niining Katolikong Bibliya gisultihang sila dili magabasag kasaysayan kondili sa usa ka pasumbingay. Kini katumbas sa pag-ingong gigamit ni Jesus ang pasumbingay ingong patukoranan sa Kristohanong monogamiya sa iyang gigamit ang panig-ingnan ni Adan ug Eva. (Mateo 19:3-9; Genesis 1:27; 2:24) Gawas pa, kon ang katawhan wala magbaton sa usa ra ka ginikanan, mapakyas ang Kristohanong doktrina sa halad lukat ni Kristo.—Mateo 20:28; Roma 5:12, 17-19; 1 Corinto 15:45.

Kining samang Katolikong Bibliya nagpasobra pa sa pagsabwag ug pagduhaduha diha sa kamatuoran sa mga pulong ni Jesus sumala sa nahitala sa Bibliya. Ubos sa “Unsaon Pagbasa ang Imong Bibliya,” kini nagaingon: “Kinahanglang atong ibutang sa hunahuna nga dili katuyoan sa mga magsusulat sa Ebanghelyo ang pagsulat sa kasaysayan diha sa siyentipikanhong diwa . . . Nalangkit ba si Jesus sa maong mga pakigkabildo? Siya mitubag ba sa tukma sumala sa giasoy diha sa Bibliya? Kana wala matino.”

Sa unsang paagi ang sinserong mga Katoliko malaomang mobasa sa Bibliya uban ang pagtuo ug “ipahinungod ang ilang kaugalingon ngadto sa pagtudlo ug pagwali sa Balaang Kasulatan” ngadto sa uban dihang ang ilang iglesya nagauyon sa pagpatik nianang mga pahayag nga makagun-ob sa pagtuo? Ug ang susamang makadaot nga mga komento hikaplagan diha sa The Jerusalem Bible, ug sa ubang Katolikong Bibliya ug mga ensiklopedia. Sa bug-os walay pagdapigdapig igadugang nga daghang Protestanteng komentaryo sa Bibliya sama ra ka makapagun-ob sa pagtuo sa Bibliya.

Ang Tanang Matuod nga Kristohanon MAOY mga Manalagna

Ang The New American Bible tukmang nagaingon: “Ang manalagna nagkahulogang ‘usa nga nagapahayag ilis sa lain,’ ilabina ilis sa Diyos. Kini wala gayod magkahulogang siya magatagna sa umaabot!” Si Papa Juan Paulo II miingon: “Ang ‘matagnaong katungdanan’ sa Katawhan sa Diyos kinahanglang pagatumanon ingong matuod nga pag-alagad sa Pulong.” Apan sumala sa atong nakita, imposibleng ang usa ka Katoliko mahimong matuod nga propeta, o saksi, alang sa Pulong sa Diyos, ang Bibliya, nga walay pagluib sa doktrina sa Iglesya Katolika, nga gipasukad ilabina sa tradisyon.

Sa kataposang deklarasyon niini, ang Katolikong Pederasyon sa Kalibotan Alang sa Biblikanhong Apostolada nagpahayag sa panginahanglan sa edukasyon sa Bibliya, ilabina taliwala sa mga batan-on ug sa mga kabos, sa baratohong mga Bibliya ug sa mga basahong tun-anan sa Bibliya, sa mga hubad sa Bibliya ug sa mga maghuhubad sa Bibliya, ug sa tibuok-panahong mga magbubuhat. Kini dugang mipahayag nga ang tanang Kristohanon angay magwali ug magtudlo, magsunod sa Bibliya sa kinabuhi, ug “makasabot sa mga ilhanan sa mga panahon.”

Maikag kang mahibalo nga ang Diyos dunay usa ka katawhan sa yuta, nga tanan maoy mga manalagna, o mga saksi sa Diyos. Ngani, sila nailhan sa tibuok kalibotan ingong mga Saksi ni Jehova. Tungod sa gugma sa Diyos ug sa iyang Pulong, sila nagabuhat sa tibuok-yutang edukasyonal nga buluhaton sa Bibliya taliwala sa batag tigulang, dato ug kabos. Sila dunay ginatos ka libong tibuok-panahong boluntaryong mga magbubuhat, nga ang pipila kanila nagahubad ug nagapatik sa mga Bibliya ug mga basahong tun-anan sa Bibliya nga gipanagtag nga barato, o wala ganiy bayad. Sila gibuligan sa minilyong mga magbubuhat nga dili tibuok panahon. Si bisan kinsa kanila malipay sa pagtabang kanimo sa “pagsabot sa mga ilhanan sa mga panahon” ug pagdawat sa kahibulongang paglaom nga anaa sa Pulong sa Diyos, ang Bibliya.

[Blurb sa panid 8]

“Dili katuyoan sa mga magsusulat sa Ebanghelyo ang pagsulat ug kasaysayan,” nagaingon ang The New American Bible

[Letrato sa panid 9]

Ang matuod nga mga Kristohanon maoy mga manalagna sa pagkaaging sila nagatudlo sa uban sa Pulong sa Diyos

[Credit line sa panid 7]

UPI/Bettmann Newsphotos