Mga Armamento—Unsay Bili Niini?

Ang badyet sa militar karon sa mga kanasoran makalibog sa hunahuna. Sukwahi usab kini sa maayong kabuot, dihang imong makita kining galastohana sa mga armamento nga maoy gihatagag pangunang pagtagad kay sa dakong mga panginahanglan sa katawhan. Ang Bibliya nagtagna alang ning “panahon sa kataposan” nga adunay “hari” (o nagamandong gahom) nga mogamit sa “bulawan” ug “bililhong bato” niini (ang mga kahinguhaan kun bahandi niini) sa paghimaya sa “diyos sa mga kuta” (militarismo). Misunod ang ubang mga gahom. Kining binuta nga panaad sa mga armamento nagahikaw sa mga lungsoranon bisan gani sa normal nga tagana sa mga kinahanglanon. Ang kanihit ug ang paglinya kanunay sa mga tindahan naandan na.—Daniel 11:35-38.

Tagda ang gastos niining kusog nga paggasto alang sa mga armamento, sumala sa gitaho sa Pranses nga basahong Plus, Marso 30, 1985, gipatik sa Montreal, Canada.

◻ Sa kada segundong molabay, makagasto ang mga nasod sa kalibotan ug kapin sa $37,000 (U.S.) sa mga armamento.

◻ Kapin sa 50 milyones ka tawo ang ginaempliyo sa direkta o dili-direktang paagi sa paggamag mga armas.

◻ Sa Tinipong Bansa sa Amerika, 62 sentabos sa kada dolyar gigasto alang sa pagdukiduki sa nalangkit sa militar nga pagdukiduki, ug 27 porsiento sa tanang mga gasto sa mga kagamhanan maoy alang sa mga katuyoan sa pagdepensa; gani sa Switzerland, kapin sa 25 porsiento sa tanang gasto sa kagamhanan gigamit alang sa depensa.

◻ Tali sa 12 ka dakong nagabaligyag armas nga mga nasod, ang Unyon Sobyet ug ang Tinipong Bansa ang nakakuhag 73 porsiento sa tanang mga halin sa armas, ang Pransiya mokabat ug 9 porsiento, ug ang Canada sa 1984 nakabaligya sa gawas sa nasod ug duolan sa $1.3 bilyones sa mga gamit sa militar.

Ang mga nasod nga may dakog utang ug naglisod sa pagbayad sa mga hinulam gikan sa ubang mga yuta mao ang dakog gasto sa mga armamento.

◻ Kapin sa $350 bilyones nga nautang sa mga nasod sa Latin Amerika sa mga bangko sa Kasadpan, hapit $90 bilyones ang gigamit alang sa galastohan sa militar.

◻ Ang Peru, nga may utang nga duolan sa $13 bilyones, migasto ug $4 bilyones sa armas sa 1983.

◻ Ang mga nasod sa Sentral Amerika nga naginubatay nakakita sa ilang gasto sa militar nga mitubo sa 50 porsiento tali sa 1979 ug 1983.

◻ Kon tagdon ang ekonomikanhong situwasyon sa walay prenong implasyon diha sa ubang mga yuta, ang usa ka tuig nga palas-anong gasto sa kada tawo aron masustentohan ang militar makalipong: Argentina, $210; Chile, $120; Venezuela, $67; Mexico, $19; Brazil, $17.

Handurawa kon unsa ka dako sa panalangin ug sa dakong kahupayan ang mahitabo kon kining mabug-at nga palas-anong gasto sa militar mahunong! Apan, ang mga nasod dili mohunong sa ilang kaugalingong pagbuot. Si Jehova ang Makagagahom nga Diyos lamang ang makahunong kanila, ug iyang himoon kana. Ania ang iyang kasaligang saad: “Nagapahunong siya sa mga gubat hangtod sa kinatumyan sa yuta,” oo, “Taposon niya ang gubat sa tibuok kalibotan,” gani “sunogon niya sa kalayo ang mga sakyanan sa gubat.”—Salmo 46:9; The Psalms for Today, ni R. K. Harrison.

Kasaligan ug tinuod kining mga pulonga tungod kay “ang Diyos nga nagahatag ug pakigdait” dili mamakak!—Roma 16:20; Hebreohanon 6:18; Pinadayag 21:1-5.