Gikan sa Among mga Magbabasa

Mga Depekto Ang artikulong “Mga Batan-on Nangutana . . . Nganong Kinahanglan Nakong Antoson ang Akong Depekto?” (Mayo 22, 1993) realistikanhong nagdumala niining sulirana. Baldado ang akong duha ka bitiis ug sensitibo kaayo ako kon tan-awon ako sa mga tawo nga may kaluoy. Mahiubos kaayo ko sa dihang may tawo nga mohatag kanako ug amot​—nga daw ako usa ka makililimos! Nakapahupay kanako nga si Jehova dili magtan-aw sa pisikal nga kahimtang apan “nagtan-aw kon unsa ang kasingkasing.”​—1 Samuel 16:7.

A. A. A. S., Brazil

Mosupak ako sa inyong pag-isip sa paralisis sa utok ingong sakit (disease). Ang paralisis sa utok maoy kahimtang nga gipahinabo sa kadaot sa utok, kasagaran mahitabo sa wala pa, panahon sa, o human sa pagkahimugso. Dili kini nagauswag ni mananakod. Dili kini usa ka sakit ug angayng dili isipon nga ingon.

L. Z., Tinipong Bansa

Pasayloa kami kon nakapasakit ang among pagpili sa mga pulong. Gigamit namo ang pulong “sakit” (disease, sa Ingles) sa linangkob kaayo nga diwa nga gihatag sa “Webster’s New Collegiate Dictionary,” nga mao, “usa ka kondisyon . . . nga nagdaot sa pagtuman sa usa ka hinungdanong buluhaton.”​—ED.

Pag-abis sa Kinatawo sa Babaye Salamat sa pagyagyag kon unsa ka demonyohanon ug daotan nga buhat ang pag-abis sa kinatawo sa babaye! (“Minilyon Nagaantos​—Matabangan ba Sila?” Abril 8, 1993) Bisan kon usa lang ka bata ang maluwas gikan sa kasakit niining hilom, mangil-ad nga krimen, nan ang pagpublikar sa artikulo maoy bililhon.

J. C., Tinipong Bansa

Nakahilak ako sa paghunahuna nga ang mga ginikanan nagpahinabog pag-antos sa maong walay-panalipod nga mga bata. Ang mga balita nga sama niini wala ipublikar sa among mantalaan, busa nagpasalamat ako kaninyo sa pagpanunot namo sa panahon.

C. C. G. M., Brazil

Homwork Salamat kaayo sa artikulong “Mga Batan-on Nangutana . . . Unsay Akong Mahimo Mahitungod sa Daghan Kaayong Homwork?” (Abril 8, 1993) Gibasa nako ang artikulo sa panahon nga ako nabalaka kaayo sa daghang homwork. Wala na ako ing panahon sa pagpahulay o pag-andam alang sa Kristohanong mga tigom. Gipadapat ko na karon ang inyong mga sugyot.

M. H., Tinipong Bansa

Pagbalhin Malipay akong magpasalamat sa artikulong “Mga Batan-on Nangutana . . . Angay ba Akong Mobalhin Ngadto sa Mas Mauswagong Nasod?” (Abril 22, 1993) Ako 16 anyos ug naghunahuna nga mobalhin sa usa ka nasod diin ako may mas maayong mga kahigayonan sa kinabuhi. Apan human mabasa ang artikulo, akong gibati nga dili hinungdanon kon asa kita magpuyo. Kon atong unahon ang Gingharian ni Jehova sa atong kinabuhi, segurado kitang mouswag [sa espirituwal] sanglit si Jehova magatabang kanato.

V. L. A., Brazil

Panglugos Nagsagol ang akong gibati sa dihang nadawat nako ang Marso 8, 1993, nga isyu sa “Panglugos​—Makalilisang nga Kaagi sa Usa ka Babaye.” Abi ninyo, ang akong inahan, nga usa ka bug-os-panahong ebanghelisador sa daghang tuig, maoy biktima sa mangilngig nga pag-atake ug pagsulayng lugoson diha sa iyang balay. Ang pagbasa sa mga artikulo nakatabang sa pag-alim.

P. G., Tinipong Bansa

Ako maoy luyoluyong direktor sa lokal nga “Pag-alagad Alang sa Kapintasan sa Pamilya ug Pag-atake sa Sekso.” Usa sa inyong batan-ong mga ministro nagpabasa kanamo sa Pagmata! sa dihang iyang gihisgotan ang isyu sa pag-abuso sa bata. (Oktubre 8, 1991) Kami karon nagsuskriber. Buot kong masayran ninyo nga nadani kaayo ako sa inyong mga isyu mahitungod sa kapintasan ug panglugos sa panimalay. Maayo silang pagkasulat ug bug-os kaayong gidukiduki.

D. G., Tinipong Bansa