Ebolusyon ug Ikaw

SULOD sa ika-19 nga siglo, ang The Origin of Species nakakombinsir sa daghang tawo nga ang tawo nagpadayong buhi nga walay pagbalda sa Diyos ug magpadayong buhi. Kay nasibot sa siyentipikanhong mga kauswagan, daghan ang mibati nga ang Diyos dili na kinahanglan ug nga ang siyensiya makaluwas sa tawhanong rasa. Ang librong Age of Progress nagpaila nga ang ika-19 nga siglo “napabaskog sa usa ka pagtuo nga ang tawhanong paningkamot nga gipadapat nga makataronganon makabalhin sa kalibotan.”

Bisan pa niana, sa hinapos niadtong sigloha bisan si Charles Darwin natarog sa iyang pagkamalaomon. Sumala sa usa ka historyano, si Darwin nabalaka nga ang teoriya sa ebolusyon “nagpatay sa Diyos ug nga ang sangpotanan alang sa umaabot sa tawo maoy dili makalkulo.” Si Alfred Russel Wallace, usa ka mas batang kontemporaryo ni Darwin, nahinumdom: “Sa kataposan nakong pakig-estorya kang Darwin [sa dayon nang mamatay si Darwin] siya nagpahayag ug mangiob kaayong panud-ong bahin sa umaabot sa katawhan.”

Unsay Nahimo sa Tawhanong Paningkamot?

Ang kasaysayan sa ika-20ng siglo nakapadayag na nga ang masulob-ong kapanahonan misunod gayod. Ang mga kalamposan sa teknolohiya sukad sa panahon ni Darwin nagtabon lamang sa tin-awng napamatud-an nga labing masulob-on, labing mabangisong yugto sa tibuok nga kasaysayan sa tawo. Nagpuyo kita taliwala sa gibatbat sa historyanong si H. G. Wells nga “tinuod nga kawalay-kasibot.”

Sukad kana gipahayag ni Wells (mga 75 ka tuig kanhi), ang kalibotan nagpadayon sa pagkaagom sa dugang nga kawalay-kasibot. Walay bisan unsang nasulayan sa mga siyentipiko, mga ekonomista, sosyal nga mga ahensiya, tawhanong mga kagamhanan, o mga relihiyon niining kalibotana ang nakapauswag sa kahimtang o nakapugong sa kaylap nga kawalay-kasibot. Ang mga kahimtang nagpadayon sa pag-us-os.

Busa, sa pagkamatuod kinahanglang isukna kini: Unsay nahimo sa tawhanong paningkamot? Ang siyensiya ug teknolohiya ba nakapatungha ug mas maayong kalibotan? “Inigpakli nato sa mantalaan ug tan-awon kon unsay nagakahitabo,” matud sa biyologong si Ruth Hubbard, “ang mga suliran dili siyentipikanhon. Kini sila mga suliran sa sosyal nga organisasyon, sa mga butang nga dili na magamhan, sa mga tawong nagatinguha sa ganansiya ug wala magpakabana sa tawhanong mga panginahanglan.” Si Hubbard midugang: “Sa pagkatinuod wala ako maghunahuna nga sa makataronganong pagpahat sa mga kahinguhaan, ang siyensiya lagmit magsulbad sa bisan hain o sa daghan sa mga suliran nga labing nagsakit sa katawhan sa kalibotan.”

Tinuod, unsay kapuslanan kon ang tawo makaadto sa bulan apan dili makasulbad sa pangunang mga suliran sa tawhanong pamilya? Ang pag-imbento sa mas malaglagong mga hinagiban, sama sa bomba atomika, nagtapos ba sa mga gubat ug etnikong kabangisan? Ang mga kalamposan ba sa siyensiya nakapakunhod ug dako sa krimen, panagbulag sa pamilya, mga sakit nga gipasa sa pakigsekso, imoralidad, mga pinaangkan, kahiwian diha sa dagkong mga katungdanan, kakabos, kagutmanan, kawalay-puy-anan, pag-abusar sa droga, polusyon? Wala, ang siyensiya, sa kasukwahi, nakapagrabe sa pipila niining mga butanga. Sa pagtalikod sa Diyos ug pagpuli sa ebolusyon ug siyensiya, ang tawhanong pamilya wala makatabang sa kahimtang niini apan nakadaot hinuon niini.

Dili katingad-an, daghan ang naghunahuna pag-usab sa teoriya nga ang tawo naggikan sa samag-aliwas nga mga linalang, ingong kaatbang sa pagkaadunay Diyos nga maoy naglalang sa unang mga tawo. Usa ka surbi sa Gallup sa Tinipong Bansa nagpadayag nga 9 porsiento lamang sa mga Amerikano ang nagtuo nga ang tawo nakasinati sa ebolusyon nga walay balaang pagbalda; 47 porsiento nagdawat sa ideya nga ang Diyos naglalang sa tawo diha sa iyang presenteng dagway.

Kon Unsay Gitagna sa Bibliya

Samtang ang The Origin of Species mitagna nga ang tawo mouswag padulong sa kahingpitan, ang Bibliya mitagna nga ang kalibotan uyogon sa usa ka moral nga krisis. (Mateo 24:​3-12; 2 Timoteo 3:​1-5) Mitagna usab ang Bibliya nga ang maong krisis modangat sa usa ka tayuktok, nga human niana ang panulondon sa matinumanong katawhan mao ang usa ka paraiso, nga libre na sa tanang suliran karong adlawa.​—Salmo 37:​10, 11, 29; Isaias 11:​6-9; 35:​1-7; Pinadayag 21:​4, 5.

Kining paglaoma nakapahinabo sa daghan sa pagsusi sa Bibliya uban ang dulot nga kaikag. Tinuod kaha nga ang katuyoan sa kinabuhi maoy dili lamang pakigbisog aron mabuhi? Naa kaha sa Bibliya ang yawi dili lamang ngadto sa kagahapon sa tawo kondili sa iyang umaabot usab, lakip ang imong umaabot? Mapuslanon gayod kaayo nga susihon kon unsay tinuod nga gitudlo sa Bibliya mahitungod sa Diyos ug sa iyang katuyoan alang niining yutaa ug sa katawhan niini. Kon buot nimo ang dugang impormasyon, ang mga Saksi ni Jehova malipay nga motabang kanimo.

[Kahon sa panid 9]

Natabangan ang minilyon sa pagsusi pag-usab sa ebidensiya dapig sa Diyos sa kalalangan, pinaagi sa paggamit sa librong Life​—How Did It Get Here? By Evolution or by Creation?a Sa pagkakaron, mga 30 ka milyong kopya ang napatik diha sa 27 ka pinulongan. Usab, ang magasing Pagmata! padayong nagpatik ug impormasyon mahitungod sa gipakita sa mga kamatuoran sa tinuod nga siyensiya kon bahin sa kamatuoran sa teoriya sa ebolusyon.

[Footnote]

[Hulagway sa panid 8, 9]

Sukwahi sa teoriya sa ebolusyon, gitagna sa Bibliya ang moral nga krisis karon ug ang solusyon niini​—usa ka paraiso nga walay suliran

[Picture Credit Line sa panid 8]

Letrato sa U.S. Coast Guard

[Picture Credit Line sa panid 8]

Gikuraw nga bata: Letrato sa WHO ni P. Almasy

[Picture Credit Line sa panid 8]

Tuo: Letrato sa U.S. National Archives