Gikan sa Among mga Magbabasa
Kabataan ug Gubat Uban ang hilabihan nga kasubo, akong gibasa ang seryeng “Kon Unsay Nahimo sa Gubat Ngadto sa Kabataan.” (Oktubre 22, 1997) Ako usab usa ka anak sa gubat. Panahon sa Gubat sa Kalibotan II, migugol akog upat ka tuig ug tunga sa mga kampo konsentrasyon sa Hapones sa Ngawi ug Bandung. Sa pangedarong diyes-anyos, gibulag ako gikan sa akong pamilya ug mihago ug pito ka adlaw kada semana ilalom sa kainit sa adlaw—nga kulang sa pagkaon ug nag-antos gumikan sa beriberi ug disenteriya. Bisan pa niana, ang akong mga kasinatian morag sayon ra kon itandi sa dili mahubit nga kapintasan nga nasinati sa minilyon ka kabataan karong panahona. Hinaot nga dili gayod kita mobatig kaluya nga gihatagan ni Jehova ug panahon ang mga tawo sa tibuok kalibotan, lakip ang kabataan sa gubat, nga makabaton ug kahibalo sa iyang makapahupayng mga saad!
R. B., Tinipong Bansa
Banga sa Mantika sa Kinupsan Gibati nako ang hilabihang kasubo ug kaluoy sa akong kaugalingon. Sa miaging tuig nakadesidir ang akong bana nga dili siya gusto ug usa ka Kristiyanong asawa, ug gipapahawa niya ang akong anak nga lalaki ug ako gikan sa nindot nga balay nga matod niya iyang gipalit alang kanako. Nahimo akong kabos. Morag walay paglaom ang akong kinabuhi, ug nangayo akog tabang kang Jehova. Buweno, nakakuha akog usa ka pagtulon-an gikan sa artikulong “Usa ka Pagtulon-an Gikan sa Usa ka Banga sa Mantika sa Kinupsan.” (Oktubre 22, 1997) Nagpahinumdom kini kanako nga magmakontento sa pagkaon ug panapot ug ibutang ang mga intereses sa Gingharian nga una.
K. P., Tinipong Bansa
Mga Suliran sa Managsoon Ang artikulong “Mga Batan-on Nangutana . . . Nganong ang Akong Igsoong Lalaki Nakaangkon sa Tanang Pagtagad?” (Oktubre 22, 1997) tukmang miabot sa dihang gikinahanglan namo kini. Mitabang kini kanamo sa pagkaamgo nga ang dili parehas nga pagtratar wala magkahulogan ug inhustisya. Amo karong nasabtan nga ang among mga ginikanan dunay maayong katarongan sa paghatag sa among mga igsoon ug dugang pagtagad. Mouyon gayod kami sa artikulo.
B. K., H. K., ug G. U. O., Nigeria
Polusyon sa Kalangas Nagtrabaho ako sa usa ka dakong pabrika sa daghang tuig, ug pipila sa akong mga kauban ug ako nag-antos sa mga epekto sa kalangas didto. Akong gidala sa trabahoan ang Nobyembre 8, 1997, nga gula (“Kalangas—Atong Labing Grabeng Tighugaw?”), ug ang tagdumala nakadesisyon sa paghimog kinahanglanong mga panagana aron sa pagpanalipod sa kahimsog sa tanang mamumuo.
R. P., Italya
Naaborido ako sa daghang tuig tungod sa kalangas nga gihimo sa akong silingan. Nagpadagan siyag usa ka negosyo hangtod sa lalom nga kagabhion. Usahay masuko ko pag-ayo. Apan nalig-on ako sa pagkasayod nga dunay Kristohanong mga igsoong lalaki ug babaye nga nabiktima usab sa kalangas apan nagsagubang pinaagi sa pagpugong-sa-kaugalingon.
T. O., Hapon
Duna koy silingan nga nagtugaw kanako pinaagig pagtawag sa telepono sa sayong mga oras sa kabuntagon. Kining mga artikuloha naghatag kanakog nindot nga mga sugyot kon unsaon nako pag-atubang kining butanga sa usa ka mahigalaon, Kristohanong paagi.
J. R., Inglaterra
Magellan Nagpabili ug nalingaw gayod ako sa artikulo maylabot kang Ferdinand Magellan nga nag-ulohang “Ang Tawo nga Nagbukas sa Kalibotan.” (Nobyembre 8, 1997) Sa dihang migula ang artikulo, nagtuon kami bahin niya sa akong kinto-grado nga klase. Mas daghan kog nakat-onan bahin niya gikan sa artikulo kay sa nakat-onan nako gikan sa akong libro sa social studies. Akong gihatagan ang akong magtutudlo sa akong personal nga kopya sa magasin, ug nalingaw siya niini! Mga pipila ka adlaw sa ulahi, mibalik kanako ang magasin, ug duna kiniy mubong sulat nga nagpasalamat kanako pag-usab.
B. V., Tinipong Bansa
Nindot ang paghanduraw kon sa unsang paagi si Ferdinand Magellan, nga usa ka determinadong tawo, nakabuntog sa pagkamabatokon ug nagkadaiyang mga kalisod aron matuman ang usa sa kinadak-ang mga kalamposan sa kasaysayan. Salamat sa pagsulat sa usa ka makalingaw nga topiko.
M. E., Italya