Mga Binhi nga Namunga Daghang Tuig sa Ulahi

Ang mosunod nga sulat nadawat ingong resulta sa artikulong “Ang mga Hagit ug mga Panalangin sa Pagmatutog Pito ka Anak nga Lalaki,” diha sa “Pagmata!” sa Enero 8, 1999.

Minahal nga Brader ug Sister Dickman,

Mao pa lamay pagkahuman sa akong pagbasa sa inyong estorya, ug kinahanglan akong mosulat kaninyo. Ako nakaila sa inyong pamilya katuigan kanhi sa Mississippi. Sa pagkatinuod, ako nagtungha kauban sa inyong mga anak nga lalaki, ug ako mag-adtoan sa inyong balay ug makigdula uban sa mga lalaki nga subsob kaayo. Apan dili kini ang mga butang nga dulot kaayong nakapadayeg sa akong linghod nga hunahuna. Bisan sa maong linghod nga panuigon, ako nakadayeg pag-ayo sa kamatuoran nga ang mga lalaki wala mosaludo sa bandera sa eskuylahan tungod sa ilang Kristohanong tanlag. Bisan kon ako usa ka membro sa Grandview Baptist Church, sa dihang ang usa sa inyong mga lalaki mipatin-aw kanako sa iyang baroganan, ako nahibalo nga kadto maoy husto.

Usa kanila mihatag kanakog libro nga Gikan sa Paraisong Nawala Ngadto sa Paraisong Nabatonan Pag-usab,a o akong gikawat kadto. Dili na ako makahinumdom kon asa sa duha, apan akong gibasa ang tibuok libro. Nianang panahona, kadto mao lamay usa ka libro sa mga sugilanon alang kanako. Wala ako makaamgo nga ang mga binhi sa kamatuoran natanom nga wala motubo sa katuigan.

Ang akong pamilya mibalhin sa Amihanan sa 1964, ug ako mihunong na sa pag-adto sa simbahan. Ang pagkasalingkapaw sa relihiyon nagpahigawad kanako, busa sa daghang tuig dili ko buot nga malangkit sa organisadong relihiyon.

Katuigan sa ulahi, sa dihang misugod ako sa paghunahunang seryoso mahitungod sa katuyoan sa kinabuhi, akong naamgohan nga buot ko ang usa ka relasyon uban sa Maglalalang. Buot ko nianang relasyona nga walay pagkasalingkapaw sa relihiyon. Kadtong mga binhi sa kamatuoran nga natanom katuigan kanhi misugod sa pagturok; ako wala pa makaamgo niana.

Ako kanunayng naghunahuna sa kamatuoran nga ako dili buot moadto sa langit; ako buot mopuyo dinhi mismo sa yuta. Akong gibati nga kining planetaha mismo maoy kahibulongan kaayong pagkalalang, busa nganong laglagon sa Diyos kini? Ako usab wala maghunahuna nga si Jesus maoy Diyos. Kon siya maoy Diyos, nan ang iyang halad mao untay usa ka panglimbong. Kining mga hunahunaa, pagbati, ug mga kombiksiyon, kon tingali tawgon ninyo kini nga “mga kombiksiyon,” dili mahimong ipahiuyon sa kon unsay akong nakat-onan diha sa Baptist Church. Busa misugod ako sa pag-ampo, nag-ampo sa tinuoray, ug si Jehova milihok dihadiha. Ang mga Saksi anaa sa akong pultahan human sa duha ka adlaw, ug ang pagtuon sa Bibliya gisugdan gilayon. Bisan kon wala gayod akoy kontak sa mga Saksi ni Jehova gikan sa panahon nga akong nasinati ang inyong pamilya hangtod nga ako misugod sa pagtuon, wala gayod mawala ang akong pagtahod sa inyong mga anak nga lalaki ug sa ilang kaisog sa pagbarog kon unsay husto. Sa dihang ang akong pagtuon misugod ug ako misugod sa pagkuhag kahibalo, ang tanan nasabtan nako. Mikabat ug usa ka tuig ug tunga sa paghimo sa akong kinabuhi nga hapsay. Ako sa ngadtongadto nabawtismohan sa 1975.

Bisan kanus-a nga atong hisgotan ang impormasyon mahitungod sa kon sa unsang paagi ang atong panggawi makahatag ug pamatuod nga wala nato gani mahibaloi kana, akong mahunahunaan ang inyong pamilya. Sa dihang atong tagdon ang kahinungdanon sa pagtisok ug daghang binhi sa Gingharian tungod kay wala kita mahibalo kanunay kon asa o kon kanus-a kana mogamot, akong nahibaloan sa personal nga kasinatian kon unsa ka tinuod kini.

Buot kong magpasalamat kaninyo sa pagkahimong usa sa katawhan ni Jehova ug pagkahimong lig-on sa inyong mga pagtuo balik kaniadto. Kamo sa pagkawalay-kasayoran nakatabang sa usa nga makakaplag sa kamatuoran. Ang inyong panggawi ug kombiksiyon, ug nianang sa inyong mga anak, nagpasidlak sa kamatuoran. Abi nakog dili ko na masayran kon unsay nahitabo kaninyo o mapasalamatan pa kamo. Sa makausa pa, salamat.

Dagayang Kristohanong gugma,

L. O.

[Footnote]