Padayon sa Paglakaw Diha sa Kahayag ug Gugma
Pangunang mga Punto Gikan sa Unang Juan
SI Jehova mao ang Tuboran sa kahayag ug gugma. Kita kinahanglang molantaw sa Diyos alang sa espirituwal nga kahayag. (Salmo 43:3) Ug lakip ang gugma sa mga bunga sa iyang balaang espiritu.—Galacia 5:22, 23.
Ang kahayag, gugma, ug ubang mga butang ang gihisgotan sa unang dinasig nga sulat ni apostol Juan, tingali gisulat diha o duol sa Efeso sa mga 98 K.P. Ang pangunang katarongan sa pagsulat niana mao ang pagpanalipod sa mga Kristohanon gikan sa apostasiya aron matabangan sila nga makapadayon sa paglakaw diha sa kahayag. Sanglit ginaatubang nato ang mga hagit sa atong gugma, pagtuo, ug integridad sa kamatuoran, ang pagkonsiderar niining sulata sa pagkamatuod makahatag kanatog kaayohan.
‘Lakaw Diha sa Kahayag’
Gitin-aw ni Juan nga ang matinumanong mga Kristohanon kinahanglang molakaw diha sa espirituwal nga kahayag. (1Ju 1:1–2:29) Siya miingon: “Ang Diyos kahayag ug wala gayoy kangitngit [walay daotan, imoral, dili-tinuod, o dili-balaan] diha kaniya.” Tungod kay ang mga dinihogan-sa-espiritu nga mga Kristohanon ‘nagalakaw diha sa kahayag,’ sila may “gipakig-ambitan” uban sa Diyos, ni Kristo, ug sa usag usa. Sila nahinloan na gikan sa sala pinaagi sa dugo ni Jesus.
Dinihogan man kita nga mga Kristohanon nga adunay langitnong paglaom o kon kita nagapaabot sa walay kataposang kinabuhi dinhi sa yuta, kita magpadayon sa pagpahimulos gikan sa halad ni Jesus kon atong higugmaon ang atong mga igsoon dili ang kalibotan. Likayan usab nato nga kita maimpluwensiyahan sa mga apostata, sama sa “antikristo,” nga naglimod sa Amahan ug sa Anak. Ug pasagdi nga dili kita makalimot nga ang kinabuhing dayon pagatagamtamon lamang sa mga tawo nga nagapabilin sa kamatuoran ug nagabuhat sa pagkamatarong.
Ang mga Anak sa Diyos Nagapasundayag sa Gugma
Sunod gipaila ni Juan ang mga anak sa Diyos. (3:1–4:21) Alang sa usa ka butang, ilang gihimo ang butang matarong. Ilang ginasunod usab ang sugo ni Jehova nga Diyos ‘nga sila magbaton ug pagtuo sa ngalan sa iyang Anak, si Jesu-Kristo, ug maghigugmaay sa usa ug usa.’
Ang indibiduwal nga adunay “kahibalo sa Diyos” nahibalo mahitungod sa katuyoan ni Jehova ug kon sa unsang paagi gipakita niya ang Iyang gugma. Kini angay makatabang sa tawo sa pagpasundayag sa gugma. Sa pagkamatuod, “siya nga wala mahigugma wala makaila sa Diyos, tungod kay ang Diyos gugma.” Ang balaang gugma gipakita sa dihang ang Diyos “nagpadala sa iyang Anak ingong halad-pasig-uli alang sa atong mga sala.” Kon kita gihigugma ni Jehova sa mao nga sukod, kita obligado sa paghigugma sa usa ug usa. Oo, ang bisan kinsa nga magaangkon nga nahigugma sa Diyos kinahanglang mahigugma usab sa iyang espirituwal nga igsoon.
Ang Pagtuo ‘Nagadaog sa Kalibotan’
Ang gugma maoy nagapalihok sa mga anak sa Diyos sa pagbantay sa iyang mga sugo, apan pinaagi sa pagtuo nga ilang ‘gidaog ang kalibotan.’ (5:1-21) Ang atong pagtuo sa Diyos, sa iyang Pulong, ug sa iyang Anak naghimo kanato sa ‘pagdaog sa kalibotan’ pinaagi sa pagsalikway sa sayop nga hunahuna ug mga paagi niini ug sa pagtuman sa mga sugo ni Jehova. Gihatagan sa Diyos ang ‘mga magdadaog sa kalibotan’ ug paglaom nga kinabuhing walay kataposan ug mopatalinghog sa ilang mga pag-ampo nga uyon sa iyang kabubut-on. Tungod kay ang bisan kinsa nga “gianak gikan sa Diyos” dili man mobuhat ug kasal-anan, si Satanas dili makapanghawid nga hugot sa maong tawo. Ang mga dinihogan ug ang mga alagad ni Jehova nga adunay yutan-ong mga paglaom kinahanglang mahinumdom nga ‘ang kalibotan anaa sa gahom sa usa nga daotan.’
[Kahon/Hulagway sa panid 29]
Usa ka Halad-Pasig-uli: Si Jesus “mao ang halad-pasig-uli alang sa atong mga sala [kadtong sakop sa iyang dinihogang mga sumusunod], ug dili ra sa atong mga sala kondili sa mga sala usab sa tibuok kalibotan,” ang nahibilin sa katawhan. (1 Juan 2:2) Ang iyang kamatayon mao ang “makapasig-uli” (Grego, hi·la·smosʹ, nga nagpasabot sa “mga paagi sa paglukmay,” usa ka “pagdihog”) apan dili sa diwa sa pagpuypoy sa masakit nga mga pagbati sa kabahin sa Diyos. Hinunoa, ang halad ni Jesus nagalukmay, o nagatagbaw, sa mga gipangayo sa hingpit nga balaang hustisya. Sa unsang paagi? Pinaagi sa pagtaganag matul-id ug makataronganong basehanan sa pagpasaylo sa sala, aron ang Diyos, “matarong gihapon bisan sa pagpahayag nga matarong ang [makasasala sa kinaiyanhon] tawo nga may pagtuo kang Jesus.” (Roma 3:23-26; 5:12) Pinaagi sa pagtaganag mga paagi aron mabug-os ang katagbawan alang sa mga sala sa tawo, ang halad ni Kristo naghimo niini nga mapuslanon, o makaayo, alang sa tawo sa pagpangita ug makadawat ug kapasig-ulian sa matarong nga relasyon uban kang Jehova. (Efeso 1:7; Hebreohanon 2:17) Unsa ka dako sa pasalamat natong tanan alang niini!