Ang Yuta Usa ka Walay Kataposang Panulondon sa mga Maaghop
“ANG langit mao ang akong trono,” nagaingon si Jehova, “ug ang yuta mao ang akong tumbanan.” Mahitungod sa iyang tumbanan, si Jehova nagsaad: “Himoon ko ang dapit sa akong mga tiil nga mahimayaon.” (Isaias 66:1; 60:13, Rotherham) Kini iyang buhaton alang sa mga maaghop kinsa magapanunod niana. Ilalom sa ilang mapabilhong pag-atiman, ang yuta mahimong usa ka dapit nga samag paraiso nga katahom ug kahimayaan kang Jehova nga Maglalalang niini.
Apan ang pipila molalis: ‘Ang mga maaghop ba ang magapanunod sa yuta? Ang mga tawong maaghop maoy mga tawong mahuyang! May igo ba silang kusog sa paggahom ibabaw sa yuta?’ Ang pulong “maaghop” sa Kasulatan nagpunting sa mga tawong malumo, malulot, malumog-buot apan may kusog samag asiro. Kadto maoy pulong nga gigamit diha sa usa ka ihalas nga mananap nga namanso apan kusgan gihapon.
Ang kang Vine nga diksiyonaryo sa Gregong mga pulong nagbatbat sa maaghop: “Kini maoy kinaiyanhong grasya sa kalag; ug ang pagbuhat niini maoy una ug panguna ngadto sa Diyos. Kini ang kalumo sa espiritu nga gidawat nato ang Iyang mga pakiglabot kanato nga maayo, nga walay paglalis o pagsukol.” Ang mga maaghop dili modugang, mokuha, mosambog, o motuis sa Pulong sa Diyos—sama sa gihimo sa pipila karong adlawa aron madawat ang ilang mga imoralidad.—Deuteronomio 4:2; 2 Pedro 3:16; Pinadayag 22:18, 19.
“Si Moises mao ang labing maaghop nga tawo sa ibabaw sa yuta.” (Numeros 12:3) Apan mahuyang ba siya? Siya miatubang sa gamhanang Paraon sa Ehipto ug mihangyo nga tugotan niya ang naulipong mga Hebreohanon sa paglakaw. Gahig-ulo si Paraon, ang iyang tubag maoy dili! Apan si Moises, nga wala mahadlok, nagsigeg balik, gipahayag ang mga hampak nga moabot diha sa mga Ehiptohanon. (Exodo, mga kapitulo 7–11) Maaghop, oo; apan mahuyang ba? Dili gayod!
Maaghop si Jesu-Kristo, apan mibarog siya sa relihiyosong mga panatiko sa iyang adlaw, bisag nahibalo nga siya ilang sakiton ug patyon. “Ania na kita,” miingon si Jesus sa iyang mga tinun-an, “nagapaingon sa Jerusalem, ug ang Anak sa tawo igatugyan ngadto sa hataas nga mga saserdote ug sa mga eskriba, ug ilang pagahukman siya ngadto sa kamatayon ug igatugyan ngadto sa mga tawo sa kanasoran, ug siya ilang pagabugalbugalan ug pagalud-an ug pagalatigohon ug pagapatyon.” (Marcos 10:33, 34) Kining tanan ilang gibuhat ngadto kaniya, apan wala gayod siya matarog diha sa iyang integridad sa Diyos. Maaghop, oo; apan mahuyang ba? Dili gayod!
Busa diha sa gitawag sa Kasulatan nga mga maaghop ihatag ni Jehova nga Diyos ang yuta. Ug sukwahi sa mga teoriya sa mga siyentipiko ug sa mga pagtulon-an sa bakak nga relihiyon, ang yuta magpabilin “sa walay kataposan, o hangtod sa kahangtoran.” (Salmo 104:5) Si Jehova “wala maglalang niini nga walay kapuslanan.” Iyang “giumol kini aron pagapuy-an.” (Isaias 45:18) Ug pagkahamili unya sa kinabuhi! Ang Diyos “magapahid sa tanang mga luha gikan sa ilang mga mata, ug ang kamatayon mawala na, wala na usab unyay pagminatay ni paghilak ni kasakit. Kay ang unang mga butang nangagi na.”—Pinadayag 21:4.
Mangawala na unya ang mga tighugaw nga nakapahimo sa yuta nga masakiton! Unya, “ang mga maaghop magapanunod sa yuta, ug sila makakaplag tumang kalipay tungod sa kadagaya sa pakigdait.” (Proverbio 2:21, 22; Salmo 37:11) Ikaw usab mahimong makatagamtam sa kinabuing dayon diha niana nga Paraiso kon ikaw may igong kaisog aron mahimong takos ingong usa niadtong gitawag sa Kasulatan nga maaghop.