Án Farao Kewe Ttan

MWIRIN ruu ier, Josef a chúen chék nónnóm lón ewe imwen fétek. Ewe mi wisen túmúnú án ewe king kap ese chechchemeni i. Lón eú pwinin, Farao a ttana ruu ttan mi kon kkóló, iwe, a resin ekieki ika met weweer. En mi kúna an na annut me ikkeei? Sorotáán ewe soran, Farao a kérato néún chón angang mwán mi tipachem, iwe, a ereniir ekkewe mettóch a ttana. Nge rese tongeni ereni weween an kewe ttan.

Iwe, me ikena ie, ewe mi wisen túmúnú án ewe king kap a kerán chemeni Josef. A ereni Farao: ‘Le atun ai we nónnóm lón kalapus, a wor emén mwán mi tongeni áweweei ekkewe ttan.’ Farao a erá pwe Josef epwe towu me lón kalapus iei chék.

Farao a apwóróusa ngeni Josef an kewe ttan: ‘Ua kúna fúmén kou mi kitinnup me éch. Mwirin, ua kúna fúmén kou mi fókkun kichúchú. Iwe, ekkewe mi kichúchú ra ocheei ekkewe mi kitinnup.

‘Lón oruuen ai we ttan, ua kúna fúfóch fóchun uwaan wit mi éúmmong pwal maw ra chék pwuku seni efóch. Mwirin ua kúna fúfóch fóchun uwaan wit mi éúkúkkún me pwas mi pwuku seni efóch. Iwe, ekkewe mi éúkúkkún ra poputá le oromaaló ekkewe fúfóch mi múrinné.’

Josef a ereni Farao: ‘Eú chék weween ekkena ruu ttan. Ekkewe fúmén kou mi kitinnup me ekkewe fúfóch fóchun uwaan wit mi éúmmong ra wewe ngeni fisu ier, iwe ekkewe fúmén kou mi kichúchú me ekkewe fúfóch fóchun uwaan wit mi éúkúkkún, ra wewe ngeni pwal fisu ier. Fisu ier epwe uwa chómmóng irá lón Isip. Nge, mwirin fisu ier epwe fókkun uwangaw irá.’

Ina minne Josef a ereni Farao: ‘Kopwe fili emén mwán mi tipachem pwe kopwe ewisa ngeni an epwe ionfengeni mwéngé lón ekkewe fisu ier epwe uwa chómmóng irá. Iwe ekkewe aramas resap echik atun ekkewe fisu ierin uwangawen iráán mwéngé.’

Farao a sani ewe kókkót. A filatá Josef an epwe wisen ioni ewe mwéngé, iwe epwe pwal isoniir. Josef a wiliti ewe nampa ruu sou nemenem lón Isip fán Farao.

Walu ier mwirin, atun an a fis ewe lengita, Josef a kúna ekkóch mwán ar ra fetáleto. En mi silei ika ié kana? Iir pwiin kewe 10 watte! Semer we Jakop a tiiniireló Isip pún epwele it ener mwéngé me lón fénúer we Kanaan. Josef a esilla pwiin kewe, nge iir rese esilla. Ka silei pwata? Pún Josef a fen wattetá, iwe úfan kewe ra pwal sókkóló.

Josef a chechchemeni pwe leátin we, a ttana pwe pwiin kewe ra etto pwe repwe chapetiw ngeni. En mi chechchemeni óm álleani ena pwóróus? Iwe, Josef a mirititi pwe Kot a tiinaaló ngeni Isip ren eú popun mi aúchea. Óm ekiek nge met Josef epwe féri? Sipwe ppii.