Ra Waalong Josef Lón Imwen Fétek

A CHÉK 17 ierin Josef atun ra waló Isip. Me ikena ie ra améméló ngeni emén mwán itan Potifar. Potifar a angang ngeni ewe kingen Isip, itan Farao.

Josef a achocho le angang ngeni Potifar, néún we meilap. Ina minne, lupwen Josef a wattetá, Potifar a ewisa ngeni an epwe wisen túmúnú unusen imwan we. Ika ina, nge pwata chék Josef a nónnóm lón ei imwen fétek? A nónnóm ikkeei pokiten pwúlúwen Potifar we.

Lupwen Josef a watte, a fókkun átéch, iwe pwúlúwen Potifar we a mochen an epwe annut ren. Nge Josef a silei pwe ei mettóch mi mwáál, iwe ese mochen féri ena mettóch. Pwúlúwen Potifar we a fókkun song. Lupwen pwúlúwan we a etto lón imwer we, a kapas chofona ngeni, me apasa: ‘Ena aramasangaw Josef a sótun annut rei!’ Potifar a lúkú alón pwúlúwan we, iwe a fókkun song ngeni Josef. Iwe, ina met a efisi an kalapus lón ei imwen fétek.

Mwirin ekis fansoun, ewe mwán mi wisen túmúnú ewe imwen fétek a kúna pwe Josef emén mi aramaséch. Iwe, a ewisa ngeni an epwe wisen túmúnú ekkewe lusun chón fétek. Mwirin, Farao a song ren ewe mi wisen túmúnú an we kap me ewe chón um, iwe a uweiirelong lón ewe imwen fétek. Lón eú pwinin, iir me rúúemén ra ttana ekkewe ttan mi kkóló. Nge rese silei weween ar kana ttan. Sorotáán Josef a ereniir: ‘Ou ereniei ámi kana ttan.’ Iwe, wesin ar apwóróusa ar kewe ttan, Josef a áweweei ar kewe ttan ren án Kot álillis.

Josef a ereni ewe mi wisen túmúnú án ewe king kap: ‘Lón úlúngát rán kopwe towu me lón kalapus, iwe kopwe wisenisefál ewe wis, wisen chón túmúnú án Farao we kap.’ Ina popun Josef a pwal apachaalong ei kapas: ‘Ika ka towu, kopwe ereni Farao usi, me pwal álisiei pwe upwe towu seni ei leeni.’ Nge, Josef a ereni ewe chón um: ‘Mwirin chék úlúngát rán Farao epwe túnú úwom.’

Mwirin úlúngát rán a pwénútá alón Josef. Farao a túnú úwen ewe chón um. Iwe nge, ewe mi wisen túmúnú án ewe king kap, a mwusowu me lón kalapus, iwe a poputásefál le angang ngeni ewe king. Nge ewe mi wisen túmúnú án ewe king kap a ménúki Josef! Ese ereni Farao usun, iwe Josef a chék nónnómótiw lón ewe imwen fétek.