Kosap Tipimwáál Ngeni Jiowa

1, 2. Pwata sisap tipi ngeni Jiowa osukosuken ei fénúfan? Áweweei.

ANCHANGEI pwe en emén mwán mi pwapwa lón óm pwúpwúlú ren fite fite ier. Nge eú rán, ka liwiniti imwom, ka kúna pwe pisekum meinisin ra fitikoko, ekkewe sea me cheepel ra ta, ekkewe sepi me kap ra mék, me ewe tile a sáretá. Imwom we ka fókkun aúcheani a tatakkisiló. Iwe, kopwe mwittir tipi ngeni pwúlúwom we me apasa: “Pwata pwúlúwei we a féri ei?” Are kopwe fen eis: “Epwe ié ei a atai imwei ei?” Ese mwáál kopwe eáni ena oruuen kapas eis. Pwata? Pún ka silei pwe pwúlúwom we mi áchengicheng esap tongeni atai imwemi we.

² Lón ei fansoun, sia pwal kúna pwe ach ei fénúfan a ngawóló ren limengawen konik, ásepwál me fénú, angangen akkachofesá, me manaw mi limengaw. Kich chón káé Paipel sia silei pwe Jiowa esap tongeni efisatá meinisin ekkena osukosuk. A féri ei fénúfan pwe epwe eú paratis mi ling. (Ken. 2:8, 15) Jiowa i emén Kot mi tong. (1 Joh. 4:8) Ach káé ewe Paipel a fen álisikich le silei ika ié we wesewesen populapen chómmóng osukosuk wóón fénúfan. Iei i Satan ewe Tefil, “ewe samolun ei fanüfan.”​—Joh. 14:30; 2 Kor. 4:4.

3. Ifa usun sia tongeni eáni ekiekmwáál?

³ Iwe nge, sisap tongeni tipi ngeni Satan meinisin ach riáfféú. Pwata? Pún ekkóch ach osukosuk a fis pokiten ach pwisin mwáálliló. (Álleani Tuteronomi 32:4-6.) Inaamwo ika sia silei ena mettóch, nge pokiten sise unuséch sia tongeni eáni ekiek mwáál me ló, ló, ló, epwe tongeni emmwenikich ngeni feiengaw. (SalF. 14:12) Ifa usun? Iwe, itá sipwe pwisin tipi ngenikich are Satan ach osukosuk, nge sia fen poputá le tipi ngeni Jiowa. Sia pwal mwo nge tongeni lingeringeriiti pwisin Jiowa.​—SalF. 19:3, NW.

4, 5. Ifa usun emén Chón Kraist a tongeni “tip ngeni” Jiowa?

⁴ Mi fókkun tufich ach sipwe “tip ngeni ewe Samol mi Lapalap”? Enlet, a lamotongaw ach sipwe féri ena. (Ais. 41:11) Epwe met lamoten ach sipwe song ngeni Jiowa? Sise fókkun tongeni win ika sipwe fiu ngeni i. Eli sise apasawu ach ngúnúngúnúngawa Jiowa. Nge Än Salomon Fos 19:3, NW, a apasa pwe emén aramas mi umwes a “efisi an sópwongaw, nge mwirin letipan a lingeringeriiti Jiowa.” Ewer, emén a tongeni lingeringeriiti Jiowa lón letipan. Ei esin ekiek a pwal tongeni pwá lón minne a féri. Emén a tongeni amwéchú an song ngeni Jiowa. Iwe, eli epwe áimuoló pwisin i seni ewe mwichefel me esap unusen álisatá ekkewe kókkót fán iten fel ngeni Jiowa.

⁵ Met a tongeni amwékútúkich ach sipwe “tip ngeni ewe Samol mi Lapalap”? Ifa usun sipwe túmúnú ach sisap tup lón ena ssár? A lamot sipwe silei pélúwen ekkena kapas eis pún a wesewesen kkúú ach riri ngeni Jiowa!

MET EPWE AMWÉKÚTÚKICH LE TIPIMWÁÁL NGENI JIOWA?

6, 7. Pwata ekkewe chón Israel lón fansoun Moses we ra poputá le ngúnúngúnúngawa Jiowa?

⁶ Met a tongeni efisi pwe letipen emén néún Jiowa chón angang mi tuppwél epwe poputá le ngúnúngúnúngawa Kot? Sipwe pwóróus wóón nimu mettóch me nengeni ekkewe pwóróus lón Paipel mi menlapei ifa usun ekkóch aramas lóóm ra tup lón ena ssár.​—1 Kor. 10:11, 12.

⁷ Án aramas fós ese múrinné a tongeni etipetipakich. (Álleani Tuteronomi 1:26-28.) Jiowa a kerán angasaaló ekkewe chón Israel seni ar fétek lón Isip. Fán an manaman a efisi ekkewe engol riáfféú wóón ena mwú mi kirikiringaw, iwe mwirin a nieló Farao me an we mwichen soufiu lón ewe Setipar. (Eks. 12:29-32, 51; 14:29-31; Kölf. 136:15) Iwe néún Kot kewe aramas ra mmólnetá le tolong lón ewe Fénúen Pwon. Nge, lón ena fansoun, ra poputá le ngúnúngúnúngawa Jiowa. Met a efisi ar repwe lúkúlúkúmmang? Ra meefi niwokkus lupwen ra rongorong ekkewe pwóróus mi eniweniw usun ewe fénú seni ekkóch spai mi titiiló pwe repwe operi ewe fénú. (Num. 14:1-4) Iwe, met a fis mwirin? Ese mumutá ngeni meinisin ena táppin aramas ar repwe tolong lón ena “fanü mi mürina.” (Tut. 1:34, 35) Fán ekkóch, sipwe itá mut ngeni pwóróus ese múrinné seni aramas ar repwe apwangapwangaaló ach lúkú me sipwe poputá le ngúnúngúnúngawa féfférún Jiowa ngenikich?

8. Lón fansoun Aisea we, met a efisi án néún Kot kewe aramas poputá le tipi ngeni Jiowa ar osukosuk?

⁸ Riáfféú me weires ra tongeni elichippúngúkich. (Álleani Aisea 8:21, 22.) Lón fansoun Aisea we, ewe mwúún Juta a nóm fán watteen weires. Ekkewe chón oputer ra pwellifeiliir. A watte osupwangen mwéngé. Chómmóng ra echik. Nge, lap seni ena, ra fókkun apwangapwang lón ar riri ngeni Jiowa. (Amos 8:11) Iwe nge, rese kútta án Jiowa álillis, ra fen mwo nge poputá le “otteki” ar king me ar we Kot. Ewer, ra tipi ngeni Jiowa ar kewe osukosuk. Ika sia riáfféú ren chómmóng osukosuk lón manawach, neman sipwe tongeni ekieki lón letipach, ‘Pwata Jiowa ese álisiei lón ei fansoun ua fókkun osupwangen an álillis?’

9. Pwata ekkewe chón Israel lón fansoun Isikiel we ra eáni ekiek mi mwáál?

⁹ Sise silei unusen pwóróusen minne a fis. Pokiten ekkewe chón Israel lón fansoun Isikiel we rese silei unusen pwóróusen minne a fis, iwe ra meefi pwe napanapen án Jiowa féri mettóch ‘ese pwung.’ (Is. 18:29) Usun itá ekkena aramas ra wisen apwúngú Kot, weween ra meefi pwe ar ekiek usun met mi pwúng a fen tekia seni án Kot ekiek. Iwe ra apwúngú Jiowa me ren ar pwisin weweiti met a fis nge rese fen silei unusen minne a fis. Fán ekkóch sise unusen weweiti eú pwóróus lón Paipel are ekkewe mettóch a fiffis lón manawach, iwe itá sipwe meefi pwe án Jiowa féffér ngenikich ‘ese pwung’?​—Hiop 35:2.

10. Ifa usun emén a tongeni áppirú minne Atam a féri?

¹⁰ Sia tipi ngeni ekkóch pwisin ach tipis are féffér mi mwáál. Seni lepoputáán uruwoon aramas, Atam a tipi ngeni Kot pwisin an tipis. (Ken. 3:12) Inaamwo ika Atam a pwisin filatá an epwe atai allúkún Jiowa me a fókkun silei pwúnúngawan, nge a chúen tipimwáál ngeni Jiowa. Usun itá a erá pwe Jiowa a ngeni emén pwúlúwan mi ngaw. Iwe, seni ena fansoun, ekkewe ekkóch ra pwal áppirú án Atam tipi ngeni Kot pwisin mwáállir. Sipwe pwisin eisinikich, ‘Pokiten ua lichippúng ren pwisin ai kewe mwáál iwe ua poputá le ekieki pwe án Jiowa kewe allúk ra kon tichik?’

11. Ifa ewe lesen sia tongeni káé seni Sona?

¹¹ Sia kon ekieki chék pwisin kich. Ewe soufós Sona a song lupwen Jiowa a pwáraatá úméúméch ngeni chón Ninifa. (Sona 4:1-3) Pwata? A kon lólilen ika aramas repwe ekieki pwe i emén soufós chofona lupwen minne a oesini ese pwénúetá. Sona a kon ekieki chék pwisin itéchún, nge itá epwe fen tongei ekkewe chón Ninifa mi aier. Ifa usun kich, sia kon pwal ekieki pwisin meefiach, iwe sia song ngeni Jiowa pokiten ese mwittir amóeló ei ótót mi ngaw? Ika sia fen afalafala fite fite ier usun ránin Jiowa we epwele war, nge lupwen aramas ra esiitakich ren an esaamwo pwénúetá met sia afalafala, iwe eli sipwe tongeni letipengaw ngeni Jiowa.​—2 Pet. 3:3, 4, 9.

IFA USUN SIPWE TÚMÚNÚ SENI ACH TIPIMWÁÁL NGENI JIOWA

12, 13. Ika sia poputá le tipemwaramwareiti féfférún Jiowa kewe, met a lamot sipwe túmúnúéchú?

¹² Met sipwe tongeni féri ika letipach ese unuséch a poputá le tipemwaramwareiti ekkóch féfférún Jiowa kewe? Chechchemeni pwe ese pwúng ena ekiek. Me ren eú afféún Paipel itan Byington a afféúni Än Salomon Fos 19:3 lón ei itiitin: “An emén mwán umwes a aosukosuka manawan me a lingeringeriiti Jiowa.” Iwe iei, sipwe nengeni nimu mettóch epwe álisikich ach sisap tipi ngeni Jiowa osukosuken manawach.

¹³ Túmúnúéchú óm riri ngeni Jiowa. Ach akkamwéchú ach ririéch ngeni Jiowa epwe túmúnúkich seni ach song ngeni i. (Álleani Än Salomon Fos 3:5, 6.) Mi lamot sipwe lúkúlúk wóón Jiowa. A pwal lamot ach sisap ekieki pwe sia tipachem lap seni Kot are sipwe kon ekieki chék met a lamot ngenikich pwisin. (SalF. 3:7; SalAf. 7:16) Ika ina, iwe, epwe álisikich ach sisap tipi ngeni Kot ekkewe mettóch mi ngaw a fis lón manawach.

14, 15. Met sipwe féri pwe án ekkóch fós ese múrinné resap etipetipakich?

¹⁴ Kosap mut ngeni fós ese múrinné an epwe etipetipaók. A wor chómmóng popun ekkewe chón Israel lón fansoun Moses we repwe itá lúkúlúk wóón án Jiowa tufichin emmweniireló ngeni ewe Fénúen Pwon. (Kölf. 78:43-53) Nge lupwen ra rongorong án ekkewe engol spai rese tuppwél apwóróusa usun ngawen ewe fénú, iwe rese chúen “chechemeni an [Kot] manaman.” (Kölf. 78:42) Ika sia ekilonei án Jiowa kewe féffér, chechchemeni meinisin ekkewe mettóch mi múrinné a féri fán itach, iwe sipwe apéchékkúla ach riri ngeni i. Mwirilóón, sisap mut ngeni án ekkóch aramas ekiek ese múrinné an epwe áimukicheló seni Jiowa.​—Kölf. 77:11, 12.

¹⁵ Pwal och, ach ekiekingaw ngeni chienach kewe chón lúkú a tongeni kkúú ach riri ngeni Jiowa. (1 Joh. 4:20) Lupwen ekkewe chón Israel ra ngúnúngúnúngaw usun seikitáán Aaron lón ewe wis souasor mi lap, me ren Jiowa ra ngúnúngúnúngawa pwisin i. (Num. 17:10) Pwal ina chék usun, ika sia poputá le ngúnúngúnúngawa chókkewe Jiowa a néúnéú le emmweni an we mwicheich wóón fénúfan, iwe usun sia ngúnúngúnúngawa pwisin Jiowa.​—Ipru 13:7, 17.

16, 17. Met a lamot sipwe chechchemeni lupwen sia nóm fán osukosuk?

¹⁶ Chechchemeni pwe esap efisien Jiowa ach kewe osukosuk. Inaamwo ika ekkewe chón Israel lón fansoun Aisea we ra kul seni Jiowa, nge i a chúen mochen álisiir. (Ais. 1:16-19) Ese lifilifil met sókkun osukosuk sia nóm fan, nge sia kúna ourur ren ach silei pwe Jiowa a tongekich me a mochen álisikich. (1 Pet. 5:7) A pwal mwo nge pwon ngenikich pwe epwe apéchékkúlakich pwe sipwe tongeni akkamwéchú ach tuppwél.​—1 Kor. 10:13.

¹⁷ Inaamwo ika Hiop a tuppwél ngeni Jiowa nge a kúna pwúngúngaw. Lupwen sia kúna riáfféú, mi lamot sipwe chechchemeni pwe esap efisien Jiowa ach kewe riáfféú. Jiowa a oput féfférún pwúngúngaw, me a tongei minne mi pwúng. (Kölf. 33:5) Amwo sipwe usun chék chienen Hiop we itan Elihu, ewe a mirititi pwe “ese fokun tufich ngeni Kot pwe epwe föri föför mi ngau, ese fokun tufich ngeni Ewe mi Unusen Manaman pwe epwe föri mine a mwäl.” (Hiop 34:10) Jiowa ese efisatá ach kewe osukosuk nge a fen awora ngenikich “lifang mi mürina meinisin me feiöch mi unusöch meinisin.”​—Jas. 1:13, 17.

18, 19. Pwata a lamot sisap tipemwaramwareiti Jiowa? Áweweei.

¹⁸ Sisap tipemwaramwareiti Jiowa. Kot mi unuséch me an ekiek a tekia seni ach ekiek. (Ais. 55:8, 9) Ina popun, ika sia tipetekison me sia silei pwe ach tufich mi chék aúkúk, iwe itá ikkena met repwe álisikich le mirititi pwe sise weweiti mettóch meinisin. (Rom 9:20) Lap ngeni fansoun meinisin, sise silei unusen pwóróusen minne a fis. Ese mwáál, ka fen kúna pwúngún ei mwitún, a erá: “Eman mi akomwen fos lon kapwüng, aramas ra ekieki pwe a pwüng tori ewe chon pälüeni a feito o pälüeni an kapas.”​—SalF. 18:17.

¹⁹ Ika emén chiechiom ka fókkun lúkúlúk wóón a féri och mettóch kese kon lien weweiti, kopwe mwittir tipi ngeni pwe a féri och féfféringaw? Are kopwe eáni ekiekéch usun i, ákkáeúin ika ka sileéchú ren fansoun langattam? Ika sia tipemecheres le tongei chiechiach kewe rese unuséch, iwe itá epwe fen watte ach tongei me lúkúlúk wóón Semach we lón láng pún an kewe féffér me an ekiek ra kon tekia seni ach!

20, 21. Pwata a lamot ach sisap tipi ngeni Jiowa ach kewe osukosuk?

²⁰ Chechchemeni wesewesen popun a fis ach kewe osukosuk. Pwata a lamot ena? Eli sia fen pwisin efisi ach kewe osukosuk, iwe mi lamot sipwe mirititi ena. (Kal. 6:7) Sisap tipi ngeni Jiowa ach kewe osukosuk. Pwata ese pwúng ena ekiek? Ekieki mwo ei kapas áwewe: Ika emén chón únteng tarakú epwe kon spiito atun a kerik me wóón ewe al mi apwórópwór, iwe, mwirin a ákseten, itá epwe tipisin ewe chón féri ena tarakú? Aapw! Pwal ina chék usun ren Jiowa, a férikich me a nóm rech ewe tufichin pwisin filatá. Nge a pwal awora ekkewe emmwen ren ifa usun sipwe féri ekkewe kefil mi éch. Ina popun, pwata sipwe tipi ngeni ewe Chón Férikich pwisin ach kewe mwáál?

²¹ Mi pwúng pwe esap meinisin ach osukosuk a fis pokiten pwisin ach kewe mwáál. Ekkóch ra fis pokiten serengaw. (SalAf. 9:11, NW) Iwe nge, sisap fókkun ménúki pwe Satan ewe Tefil, i populapen minne mi ngaw. (1 Joh. 5:19; Pwär. 12:9) I ewe chón koputach, nge esap fen Jiowa!​—1 Pet. 5:8.

TÚMÚNÚ ÓM RIRI MI AÚCHEA NGENI JIOWA

22, 23. Met sipwe chechchemeni ika sia letipechou pokiten ach kewe osukosuk?

²² Lupwen ka nóm fán weires me riáfféú, chechchemeni pwóróusen Josua me Kalep. Ekkeei rúúemén mwán mi tuppwél rese usun ekkewe engol spai, pún iir ra apwóróusa pwóróus mi múrinné usun ewe Fénúen Pwon. (Num. 14:6-9) Ra pwáraatá ar lúkú Jiowa. Ikaamwo ina, nge iir me rúúemén ra kapachelong lein ekkewe chón Israel mi nómofetál lón ewe fénúpéén úkúkún 40 ier. Itá Josua me Kalep ra song me ngúnúngúnúngaw pwe ese pwúng met a fis ngeniir? Aapw. Ra lúkúlúk wóón Jiowa. Iwe met, Jiowa mi efeiéchúúr? Ewer! Iir me rúúemén ra tolong lón ewe Fénúen Pwon, nge lap ngeni ekkena chón Israel ra máló lón ewe fénúpéén. (Num. 14:30) Pwal ina chék usun, sipwe angei án Jiowa feiéch ika “sisap achanü” le féri letipan.​—Kal. 6:9; Ipru 6:10.

²³ Ika ka letipechou pokiten óm kewe osukosuk, án ekkewe ekkóch apwangapwang, are pokiten pwisin óm apwangapwang, met kopwe féri? Nefótófót wóón napanapen Jiowa kewe mi amwarar. Anchangei ekkewe mettóch mi amwarar Jiowa a fen pwon ngonuk pwe epwe fis lón mwachkkan. Kopwe pwisin eisinuk: ‘Met epwe fis ngeni manawei ika use silei Jiowa?’ Kopwe akkamwéchú óm pacheéch ngeni i, me kosap mut ngeni letipom an epwe song me tipimwáál ngeni Jiowa!