Oupwe Néún Jiowa “Slave”

1. Met chómmóng aramas ra ekieki usun slave, iwe, ifa usun ewe sókkun slave Rom 6:22 a kapas usun a sókkóló?

LUPWEN chómmóng aramas ra ekieki usun emén slave, ra anchangei pwe ina i ewe esin aramas mi nóm fán nemenien néún masta mi kirikiringaw. Nge án emén wiliti néún Kot slave a fókkun sókkóló. Án Kot we Kapas a apasa pwe emén Chón Kraist a filatá an epwe slave ngeni emén Masta mi tong. Ina minne lupwen ewe aposel Paulus a áweweei án Chón Kraist repwe néún Kot “slave,” a apasa pwe repwe angang ngeni Kot pokiten ra tongei I. (Rom 6:22, KG) Met sókkun slave ei? Ifa usun sipwe túmúnú pwe sisap slave ngeni Satan me an ei ótót? Met feiéchún ach tuppwél lón ach slave ngeni Jiowa?

“ÜA TONGEI AI SAMOL”

2. (a) Met epwe amwékútú emén slave chón Israel an epwe mochen sópwósópwóló lón an slave? (b) Met weween an pwangapwang selingen emén mi mochen slave?

² Ewe Allúk Kot a ngeni chón Israel, a áiti ngenikich met Jiowa a mochen néún kewe slave repwe féri. Emén chón Ipru slave epwe ngaseló lón ewe efisuen ierin an slave. (Eks. 21:2) Iwe nge, ika emén slave a wesewesen tongei néún we masta me a mochen sópwósópwóló lón an we angang, án Jiowa we allúk a awora eú kókkót pwe epwe tongeni nómoffóch. Ewe masta epwe anómu néún we slave ren ewe asam me pwangeni selingan. (Eks. 21:5, 6) Pwata epwe féri ena? Lón kapasen Ipru, ika emén a mochen áweweei usun álleasochis epwe áeá eú kapas mi weneiti rongorong are aúseling. Ewe slave a mochen sópweló an álleasochisi néún we masta. Ei kókkót a álisikich le weweiti pwe lupwen sia fangóló manawach ngeni Jiowa, sia pwári pwe sia tipemecheres le álleasochisi i pokiten sia tongei.

3. Ifa ewe popun sia fangóló manawach ngeni Kot?

³ Atun sia papatais usun emén Chón Kraist sia fen fangóló manawach ngeni Jiowa pwe sipwe angang ngeni usun néún slave. Ach fangóló manawach a fis pokiten ach mochen álleasochisi Jiowa me féri letipan. Ese wor emén a aumwesikich ach sipwe féri ei kefil. Pwal mwo ekkewe kúkkún me sáráfé mi papatais, ra féri ena pokiten ra pwisin mochen nge esap pokiten chék ar mochen apwapwaai semer kewe me iner. Ewe popun Chón Kraist ra fangóló manawer, pokiten ra tongei ach we Masta lón láng, Jiowa. Ewe aposel Johannes a apasa: “Wewen ach echeni Kot pwe sia aleasochisi an kewe allük.”​—1 Joh. 5:3.

SIA NGASELÓ NGE SIA CHÚEN SLAVE

4. Met a lamot sipwe féri pwe sipwe “slave fan nemenien pung”?

⁴ A ifa me kilisouch ngeni Jiowa ren an suuki ngenikich alen ach sipwe wiliti néún slave! Ach lúkú ewe méén kepich Kraist a awora a atufichi ngaselóóch seni fétekin tipis. Inaamwo ika sia chúen tipis, nge sia filatá ach sipwe nóm fán án Jiowa me Jesus nemenem. Paulus a áweweéchú ei lón eú me lein makkeian kewe, a apasa: “Oupwe pwan ekieki pwe oua fen mano ngeni tipis, nge oupwe chok fiti God ne manau punun Christ Jesus.” Mwirin iei met a eáni éúréúr: “Ami oua fakkun sinei pwe nupwen oua fangeta inisimi ussun slave pwe oupwe anneasosich ngeni emon, iwe mi ennet pwe ami mi nom fan nemenien ewe masta oua anneasosich ngeni ika ngeni tipis, oupwe mano nesoponon, ika ngeni anneasosich, oupwe chasefan ngeni God. Sipwe kinisou ngeni God, pun noom oua nom fan nemenien tipis, nge ren unusen netipemi oua fen anneasosich ngeni minne mi ennet oua rong me non ewe afanafan. Oua ngaseno seni tipis o oua slave fan nemenien pung.” (Rom 6:11, 16-18, KG) Paulus a fós usun lamoten ach sipwe álleasochis seni ‘unusen netipach.’ Iwe lupwen sia fangóló manawach ngeni Jiowa, sia wiliti “slave fan nemenien pung.”

5. Met kich meinisin sia fiffiu ngeni, iwe, pwata?

⁵ Iwe nge, a wor ekkewe minen eppet sipwe pworacho ngeniir pwe sipwe apwénúetá pwúngún ach fangóló manawach. A wor ruu mettóch sia fiffiu ngeni. Áeúin, kich sise unuséch. Paulus a pwal eáni ei fiu. A apasa: “Seni lon letipei üa pwapwaiti än Kot allük. Nge üa küna pwal eu allük a angang lon inisi, eu allük mi fiu ngeni ewe allük letipei a tipeeu ngeni, o a fötekiniei fän ewe allükün tipis, ewe a angang lon inisi.” (Rom 7:22, 23) Pokiten sise unuséch, a lamot sipwe fiffiu ngeni ach kewe mochenin futuk, ina ach mochen féri ekkewe mettóch Kot a oputa. Ewe aposel Petrus a fénékich, a apasa: “Oupwe manau usun aramas mi ngas, nge ousap aea ämi ngas le pwölüela ämi föför mi ngau, pwe oupwe manau usun nöün Kot chon angang.”​—1 Pet. 2:16.

6, 7. Ifa usun Satan a anapanapa ei fénúfan an epwe luki aramas?

⁶ Ewe oruuen mettóch sia fiffiu ngeni, ina ei ótót mi nóm fán nemenien ekkewe chónláng mi ngaw. Satan, i ewe sou nemenemen ei fénúfan a áeá sókkópaten minen otuputup an epwe atai ach tuppwél ngeni Jiowa me Jesus. A mochen sipwe wiliti néún slave ren an ekketipetipakich ach sipwe fiti an ei ótót. (Álleani Efisos 6:11, 12.) Eú mettóch Satan a áeá pwe sipwe ina usun, ina an anapanapa ei fénúfan pwe epwe luki aramas. Ewe aposel Johannes a éúréúrakich ren an apasa: “Are oua echeni fanüfan, ousap echeni ewe Sam. Pun mettochun lon fanüfan meinisin, mochenian fituk, mochenian lemas me lamalamtekian manauen aramas resap pop seni ewe Sam, nge ra pop seni ei fanüfan.”​—1 Joh. 2:15, 16.

⁷ A chéúfetál wóón unusen fénúfan ewe mochen ach sipwe achommongaaló wéúch. Satan a mochen sipwe lúkú pwe moni a eselipato pwapwa. Ekis meinisin a wor ekkewe watteen sitowa. Ekkewe minen advertise ra etipetipa aramas ar repwe alamota pisek me minen apwapwa lón manawer. Áwewe chék ren ekkewe pekin business mi kan akkóta án aramas sái, ra mochen kopwe sái ngeni ekkewe fénú mi amwarar, nge chienom epwe ewe sókkun aramas mi eáni ekiekin fénúfan. Pwúngún, ekis meinisin sia rongorong kapasen pesepes ach sipwe amúrinnéló manawach, nge lón ewe napanap epwe apwapwaai ei fénúfan.

8, 9. Met sókkun feiengaw sia tongeni kúna, iwe, pwata?

⁸ Lón fansoun ekkewe aposel, Petrus a éúréúra ekkewe Chón Kraist usun chókkewe lón ewe mwichefel mi poputá le eáni ekiekin fénúfan. A erá: “Ra chök pwapwaiti ar repwe momongö o ükün lon ar kametip le rän. Ra eu minen asäw me itengau lupwen ra etikemi le mongö, nge ra pwal pwapwaiti ar kewe föförün likatuputup. Ra lamalamtekia lon ar apasatä kapas mi pön o aea sokun mochenian fituk mi ngau le atupu chokewe mi kärän sü seni ekewe aramas mi manaueni ei manau mi mwäl. Ra pwon ngeniir ar repwe ngasala, nge püsin ir ra nom fän nemenien ekewe föför epwe afeiengauer. Pun eman aramas a nom fän nemenien ewe mettoch a kuf ren.”—2 Pet. 2:13, 18, 19.

⁹ Án emén apwénúetá ewe “mochenian lemas” esap ina met epwe angasaaló. An féri ena epwe fen efisi an epwe wiliti slave ngeni Satan ewe Tefil, ewe sise tongeni kúna mi nemeni ei fénúfan. (1 Joh. 5:19) Sia tongeni wiliti slave ngeni mochenian pisek. Ina wesewesen eú minen efeiengaw mi weires ach sipwe ngaseló seni.

EÚ ANGANG LÓN MANAWACH A ÁMENEMENÉCHÚKICH

10, 11. Ikenái ié kewe Satan a kon mesáániir, iwe, ifa usun sukul tekia a tongeni áweiresiir?

¹⁰ Ikenái Satan a achocho le etipetipa chókkewe ese kon wor ar sile, usun chék met a féri lón Eten. Satan a kon mesááni ekkewe kúkkún me sáráfé le otupuur. Atun emén sáráfé, are pwal mwo emén watte, a filatá an epwe wiliti néún Jiowa slave, Satan ese pwapwa. A mochen pwe meinisin mi fen fangóló manawer ngeni Jiowa resap chúen tongei me tuppwél ngeni Jiowa.

¹¹ Sipwe liwiniti ewe kapas áwewe usun ewe slave a pwangapwang selingan. Ese mwáál a metek selingen ei slave, nge ekiseló chék a wesiló, iwe a wor esissillen an epwe slave tori feilfeiló. Lupwen ekkewe kúkkún me sáráfé ra filatá met repwe féri lón manawer nge mi sókkóló seni met pilóór kewe ra filatá, iwe eli epwe weires me ámmetek ngeniir. Pún Satan a achéúfetálei ewe ekiek pwe ach áeá manawach lón eú angang lón ei ótót a tongeni ámenemenéchúkich. Nge ekkewe Chón Kraist repwe chechchemeni lamoten ar repwe pwákini osupwanger lón pekin lúkú. Jesus a apasa: “Ra feiöch chon silei pwe ra wöüngau lon pekin ngünür,” weween ra mirititi lamoten ar repwe angei ewe sile usun Kot. (Mat. 5:3) Ekkewe Chón Kraist mi fangóló manawer ra akkomwa letipen Kot nge esap Satan. Ra pwapwaiti án Jiowa allúk me ra ekilonei lerán me lepwin. (Álleani Kölfel 1:1-3.) Iwe nge, chómmóng course lón ekkewe sukul tekia ikenái, a lamot sipwe áeá ach watteen fansoun fán iter, iwe ese chúen wor fansoun án emén chón angang ngeni Jiowa epwe ekilon me pwákini osupwangan lón pekin lúkú.

12. Ikenái met sókkun kefil a nóm mwen chómmóng sáráfé?

¹² Emén masta lón ei fénúfan a tongeni féri met epwe áweiresi manawen emén slave Chón Kraist. Lón néún Paulus we áechéén taropwe ngeni ekkewe chón Korint, a apasa: “Ifa usun, en eman amanau lupwen Kot a köruk? Kosap lolilen usun. Nge are kopwe tufichin ngasala, kopwe achocho le alomota ewe tufich.” (1 Kor. 7:21) Án emén ngaseló seni an slave a fen kon éch. Ikenái lón chómmóng fénú a wor allúk pwe ekkewe kúkkún me sáráfé repwe fiti sukul. Nge mwirin ra tongeni pwisin féri ar kefil. Án emén sópweló an sukul pwe epwe tongeni áeá manawan lón eú angang lón ei ótót a tongeni eppeti an epwe angang ngeni Jiowa full-time.​—Álleani 1 Korint 7:23.

SUKUL TEKIA ARE SUKUL SENI KOT?

13. Menni pekin asukul a kon álisi néún Jiowa kewe chón angang?

¹³ Paulus a éúréúra ekkewe Chón Kraist lón Kolose, a apasa: “Oupwe tümwünükemi, pwe esap wor eman epwe liapenikemi ren atuputupun tipachemen fanüfan mi aücheangau, a pop seni sokopaten uruwon lom aramas ra aiti ngeni aramas, pwal seni ekewe ngün mi wor ar nemenem fän läng, nge esap pop seni Kraist.” (Kol. 2:8) Chómmóng sense ra asukula ekkewe “atuputupun tipachemen fanüfan mi aücheangau, a pop seni sokopaten uruwon lom aramas ra aiti ngeni aramas.” Sukul tekia a kan menlapei ekkena mettóch, nge fán chómmóng ese álisi ekkewe chón sukul le silei ekkewe mettóch mi lamot ngeni manawer iteiten rán. Nge néún Jiowa kewe chón angang ra filatá le angei ekkewe pekin sukul mi álisiir le atufichi manawer pwe repwe tongeni eáni eú manaw mi mecheres le angang ngeni Jiowa. Ra lefareni án Paulus we kapasen pesepes ngeni Timoty, ewe a apasa pwe ach tuppwél ngeni Kot ina “eu win mi lapalap are a wor rech menemenöch. Iei mine are a wor anach me üfach sipwe menemenöch ren.” (1 Tim. 6:6, 8) Ekkewe Chón Kraist mi enlet rese éttúres ngeni ar repwe angei néúr degree me eáni itelap mi tekia, nge ra fen achocho ngeni ar repwe angei ekkewe “toropwen allükülük,” weween ekkewe aramas ra álisiir ar repwe wiliti néún Jesus chón káé. Ra féri ei ren ar tinikken úkúkún ar tufich lón ewe angangen afalafal.​—Álleani 2 Korint 3:1-3.

14. Me ren Filipi 3:8, ifa ekiekin Paulus ren feiéchún an slave ngeni Kot me Kraist?

¹⁴ Ekieki pwóróusen aposel Paulus. I a káit me ren ewe senseen allúkún Jus itan Kamaliel. Sia tongeni alélléfengeni ena sókkun asukul ngeni ekkewe sukul tekia ikenái. Nge ifa ekiekin Paulus atun a apépééi ena asukul ngeni feiéchún an slave ngeni Kot me Kraist? A erá: “Ngang üa ekieki pwe mettoch meinisin ra fokun aücheangau fän iten ewe eu mi fokun aüchea seni meinisin, iei ai silei Kraist Jesus ai Samol.” A pwal apasa: “Pun fän itan üa pöütala meinisin, üa ekieki pwe meinisin ra usun chök pipi lon lenien koturula, pwe üpwe eäni Kraist.” (Fil. 3:8) Minne Paulus a eáni ekiek a tongeni álisi ekkewe sáráfé Chón Kraist me semer kewe me iner mi niwokkusiti Kot ar repwe kefiléch lón pekin sukul tekia. (Ppii ekkewe sasing.)

KÚNA FEIÉCH SENI EWE ASUKUL SENI KOT

15, 16. Met sókkun minen káit án Jiowa we mwicheich a awora, me ifa ewe popun a kawor?

¹⁵ Lón chómmóng fénú, met a kan fis lón ekkewe sukul tekia? Esap pwe féffér mi limengaw me únnúpuch a chéúfetál lein ekkewe chón sukul? Esap pwe ra pwal menlapei ewe afalafal usun evolution? (Ef. 2:2) Iwe nge, án Jiowa we mwicheich a sókkóló pwe a awora ewe sókkun asukul mi tekia seni meinisin, nge a fis lón ewe mwichefelin Chón Kraist mi kinamwe. Emén me emén leich sia kúna feiéch seni ewe Sukulen Angangen Chón Kraist mi fiffis iteiten wiik. A pwal wor ekkewe sukul fán iten ekkewe pioneer mwán mi lipich (Sukulen Paipel fán Iten Ekkewe Mwán mi Lipich) me ekkewe pioneer pwúpwúlú (Sukulen Paipel fán Iten Chón Kraist mi Pwúpwúlú). Ekkena sókkun asukul seni Kot ra álisikich le álleasochisi Jiowa, ach we Masta lón láng.

¹⁶ Sia tongeni kúna chómmóng pwóróus mi fókkun aúchea seni ach alamota ekkewe minen álillis mi kawor le kútta pwóróus seni néúch kewe puk. Ewe populapen sia angei ewe asukul seni Paipel pwe sipwe silei ifa usun sipwe eáni ewe sókkun fel Jiowa epwe pwapwaiti. A asukulakich ifa usun sia tongeni álisi ekkewe ekkóch ar repwe chásefál ngeni Kot. (2 Kor. 5:20) Mwirin, epwe álisiir ar repwe pwal asukula ekkewe ekkóch.​—2 Tim. 2:2.

TFEIÉCHÚN EKKEWE SLAVE

17. Ach filatá le angei ewe asukul seni Kot a atoto met sókkun feiéch?

¹⁷ Lón án Jesus we kapas áwewe usun ekkewe féún moni, ewe masta a apúnga ekkewe rúúemén slave mi tuppwél ren ar angang. Ei mettóch a apwapwaar me néúr we masta. A pwári an pwapwa rer ren an ngeniir pwal och angang. (Álleani Mateus 25:21, 23.) Ach filatá le angei ewe asukul seni Kot a atoto pwapwa me feiéch. Ekieki pwóróusen Michael. I a fókkun angangéch lón sukul iwe néún kewe sense ra etiwa an epwe fiti ar we mwich pwe repwe pwóróusfengen wóón an epwe fiti sukul tekia. Ra máirú pwe Michael a filatá an epwe angei och sókkun sukul mi awora ekkewe course mi mwochomwoch fán iten káéén eú angang mi mwittir atufichi an epwe pioneer. Itá a meefi pwe a eáni eú kefil mi mwáál? Iei met a apasa, “A fókkun aúchea ewe asukul seni Kot ua angei seni ai pioneer, nge iei seni ai wiseni ewe wis mwán mi ásimaw lón mwichefel. Ekkewe feiéch ua pwapwaiti ra wesewesen lululó seni ewe moni eli upwe angei ika ua fiti sukul tekia. Ua fókkun pwapwa pún use filatá le fiti sukul tekia.”

18. Met a amwékútuk le filatá le angei ewe asukul seni Kot?

¹⁸ Ewe asukul seni Kot a asukulakich met letipen Jiowa me álisikich le slave ngeni. A anómu mwach ewe ápilúkúlúkún ach sipwe ‘ngasala seni ach ngauala me tala’ me mwirin sipwe “eti nöün Kot kewe lon ar ngasala me ling.” (Rom 8:21) Nge ewe a lap seni meinisin, sipwe pwáraatá pwe sia wesewesen tongei ach we Masta lón láng, Jiowa.​—Eks. 21:5.