Ka Fen Äiti ngeni Emön Ka Kerän Chuuri ewe Kkotun Käeö?

Lupwen sia kapas eis ngeni ekkewe chon imw ika ra mochen käeö Paipel, ekkoch leir rese mochen, nge ekkoch ra erä ra fen käeö lon ar lamalam. Pokiten ra chök silei ewe napanapen käeöön Paipel lon ar lamalam, rese küna apwapwaan me watteen ewe pworaus mi enlet repwe käeö seni ach ei kkotun käeö. Ina popun lupwen sia kerän chuuriir, sisap chök kapas eis ika ra mochen käeö Paipel, nge sipwe fen awora fitu minich le äiti ngeniir ewe kkotun käeöön Paipel. Äwewe chök, kosap chök ereni emön pwe en emön kuk mi angöch me ereni pwe kopwap liwinto fän och möngö, nge kopwe fen ännen ngeni lon chök ena atun! Ka tongeni föri ena lon fitu minich ren om eäni ei afalafal.

“Om lükü epwe wor ewe fansoun lupwen epwe pwönütä ekkeei kapas? [Älleani Aisea 33:24 me mut ngeni an epwe pölüweni.] Ua mochen äiti ngonuk och pworaus mi amwarar usun ei mettoch.” Ngeni ewe chon imw ewe puk, me äiti ngeni par. 22 lon pekin taropwe 38. Älleani ewe kapas eis fan, me tingorei an epwe kütta pölüwan lupwen ka älleani ewe parakraf. Mwirin, eäni ewe kapas eissefäl me aüseling ngeni meefian. Älleani pwal eü wokisin seni Paipel. Nikiti eü kapas eis kopwap pölüweni lupwen ka liwin. Akkota ineet oupwe chufengensefäl. Iwe iei, ka fen poputääni eü käeöön Paipel!