Ifa Usun Kopwe Asukula Ekkewe Minefö le Afalafal
1. Ifa meefiom lon ewe äeüin fansoun ka afalafal?
1 Ka chechchemeni ewe äeüin fansoun ka afalafal imw me imw? Eli, ka meefi niuokkus. Ika oua angangfengen me nöüm we sense are pwal emön chon afalafal lon ena atun, ese mwääl ka kilisou ren an älisuk. Nge, pokiten ka fen silei met kopwe föri iei, ka tongeni äiti ngeni ekkewe minefö ifa usun repwe afalafal.
2. Met a lamot ngeni ekkewe mineföön chon afalafal ar repwe silei?
2 Mi lamot ngeni ekkewe mineföön chon afalafal ar repwe silei ifa usun repwe poputä le pworausfengen me chon imw, nöünöü nöür Paipel lupwen ra afalafal, chuursefäli aramas me poputä le käeö ngeniir. Repwe pwal käeö ekkewe sokkopaten napanapen afalafal, usun chök afalafal woon al me chuuri aramas lon ar leenien angang. Ka tongeni älisiir le angangöchülo lon ekkeei mettoch ren om kapasen pesepes me leenien äppirü.
3. Ifa usun sipwe älisi ekkoch ren ach leenien äppirü?
3 Asukuler Ren Om Leenien Äppirü: Jises a äiti ngeni nöün kewe chon käeö ifa usun repwe afalafal. (Luk 8:1; 1 Pit. 2:21) Lupwen oua angangfengen me emön mineföön chon afalafal, ammolnatä eü afalafal mi chök mecheres epwe tongeni äppirü, eli kopwe eäni ewe afalafal a mak lon nöüch kewe puk. Mwirin, kopwe fos ngeni fitu imw akkomw pwe i epwe tongeni rongorong met ka apasa. Iwe, lupwen oua lo seni ewe imw, ka tongeni eisini met meefian ren om afalafal. Epwe älisi le küna lamoten ämi angangfengen me ämecheresi an epwe etiwa om pesepes ika i a wisen afalafal.
4. Ifa usun sipwe älisi chienach we minefö mwirin ach aüseling ngeni än afalafal?
4 Awora Kapasen Pesepes: Jises a öüröüra nöün kewe chon käeö ifa usun repwe afalafal. (Mt. 10:5-14) Ka pwal tongeni ina usun le älisi ewe minefö. Aüselingöch lupwen a wisen afalafal. Iwe, lupwen oua lo seni ewe imw, awora kapasen apünga mi titchik fän kirekiröch me wenechar, inaamwo ika ka küna pwe mei wor ekkoch mettoch mi lamot epwe aöchüolo lon an afalafal. Kosap mwittir apwüngü ren met epwe angang woon, nge akkomw ppi ika a fen öchülo an afalafal lon pwal ekkoch imw pun eli a chök niuokkus atun a kerän afalafal. Pwal chechchemeni pwe ese löllö tufichin emön me emön chon afalafal me a sokkopat napanapen ach afalafal nge mi chök pwüng.—1 Kor. 12:4-7.
5. Met sipwe tongeni apasa lupwen sia mochen awora pesepes ngeni ewe mineföön chon afalafal?
5 Fän ekkoch ewe mineföön chon afalafal epwe kütta emmwen sonuk. Nge ika ese, kopwe pwisin mwöküt le älisi. Ifa usun sipwe älisi fän süföl? Ekkoch chon afalafal mi lipwäköch ra tongeni eisini, “Ua tongeni älisuk?” are, “Met om ekiek usun om na afalafal?” Sia pwal tongeni apasa, “Atun ua kerän afalafal, a weires ngeniei ai upwe . . . , nge iei ei mettoch . . . a älisiei.” Fän ekkoch, a öch ika oua kütta älillis seni Ach Angangen Afalafala Ewe Mwu. Pwe ewe mineföön chon afalafal esap kon osukosuk, kopwe älisi an epwe angang woon eü chök mettoch.
6. Lon ach angangen afalafal, ifa usun “mächä a akeni mächä”?
6 Mächä a Akeni Mächä: Paul a apöchökküla Timoti, ewe chon afalafal mi lipwäköch, an epwe akkamürinnölo me akkalapalo an angangen asukul. (1 Tim. 4:13, 15) Inaamwo ika a fansoun langattam om fiti ei angang, nge a chüen lamot kopwe achocho le aöchüolo napanapen om afalafal. Käeö seni ekkewe chon afalafal oua kan mwimmwin, pwal mwo nge ekkewe minefö. Mwittir älisiir ren kirekiröch, nge äkkäeüin ekkewe minefö, pwe repwe wiliti chon afalafal mi lipwäköch.—SalF. 27:17.