Akkota Iei pwe Kopwe Alapaalo Om Angangen Afalafal
1. Met sia tufichin föri atun ewe Ächechchem, me ifa usun sia tongeni mmolnetä ngeni?
1 Iteiten ier, fansoun Ächechchem, sia tufichin “mwareiti” Jiowa. (Kölf. 109:30) Itä kopwe alapaalo om angangen afalafal fän March pwe kopwe tongeni pwäri om kilisou ngeni ewe Chon Awora ewe Möön Kepich? Iei ewe fansoun mi fich kopwele föri om kokkot.—SalF. 21:5.
2. Met ekkoch ra föri atun a esilesil ewe kokkot pwe epwe kisitiw awaan auxiliary pioneer fän ewe April? Nge ämi, met oua föri?
2 Fiti Angangen Auxiliary Pioneer: Lon ewe ier, ekkewe mwichefel ra mwasangasang atun ra silei ewe kokkot pwe ra tongeni auxiliary pioneer fän ewe April, nge epwe kisitiw nöür awa. Emön pwiich a makkeei: “Ua chüen fiti high school, iwe use mwo tufichin regular pioneer. Nge upwe fiti angangen auxiliary pioneer ren ai nöüni 30 awa, nge upwe öttüres ngeni 50 awa fän April.” Emön fin Kraist a angang full time a makkeei: “Ua fokkun tongeni tikeri 30 awa!” Atun a esilesil ei kokkot, emön fin Kraist 80 ierin mi pin pioneer, a erä: “Iei ewe fansoun ua fen mwötöresiti! Jiowa a silei pwe ai fiti pioneer ina ewe fansoun mi kon apwapwa lon manauei!” Ekkoch rese tongeni fiti auxiliary pioneer ra achocho ngeni le alapaalo ar fiti ewe angangen afalafal.
3. Met popun sipwe ekieki le auxiliary pioneer fän March, April, me May?
3 Fän March, epwe ina ewe maram mi fich ngeni angangen auxiliary pioneer pun sipwe tongeni pwisin filatä ika sipwe nöüni 30 are 50 awa. Pwal och, sipwe poputä lon Ammol, March 17 le fiti ewe angangen etiwetiw mi kkolo aüchean le etiwa aramas le fiti ewe Ächechchem lon April 5. Pwapwaan chokkewe mi alapaalo ar fiti ewe angangen afalafal epwe efisi ar mochen auxiliary pioneer fän April me May ren ar nöüni 50 awa.
4. Ifa usun sipwe tongeni alapaalo ach angangen afalafal, me epwe met mwiriloon?
4 Lon ämi Famili Fel epwe fis, a öch oupwe pworausfengen ifa usun emön me emön lon ewe famili epwe tongeni alapaalo an angangen afalafal fansoun ewe Ächechchem. (SalF. 15:22) Tingorei Jiowa an epwe efeiöchü om achocho. (1 Jon 3:22) Ika kopwe alapaalo om angangen afalafal, epwe lapolo om mwareiti Jiowa. Pwal och, epwe lapolo om pwapwa.—2 Kor. 9:6.