Unusen Férfichi Angangen Pwáraatá
1. Ifa ewe leenien áppirú mi múrinné aposel Paulus a isetiw lón an angangen afalafal?
1 Iei án Paulus kapasen fén ngeni Timoty: “Kopwe unusen apwönüetä wisom.” (2 Tim. 4:5) Paulus a tongeni apasa ena seni wenecharen letipan pún a fen aunusaaló an we angangen misineri fán úlúngát, lefilen ekkewe ier 47 ngeni 56. Fán fitu ewe puken Föför a apasa pwe Paulus a “fokun pwäri” ewe Mwúún Kot. (Föf. 23:11; 28:23) Ifa usun sipwe pwal ina usun ikenái?
2. Ifa usun sipwe tongeni unusen férfichi ewe angangen afalafal imw me imw?
2 Imw me Imw: Ren ach sipwe chuuri ekkewe chón imw resaamwo rong ewe kapas allim, eli a lamot sipwe chuuriir lón fansoun mi sókkópat. Neman ewe mékúren famili epwe nóm lefááf are lón Ammól me Ráninfel. Achocho le fós ngeni emén lón eú me eú ekkewe imw are liwiniti ekkewe imw rese nóm chón. Nge met kopwele fér ika óm achocho ese sópwéch? Neman óm mak ngeni are kéri wóón phone epwe uwaéch.
3. Ineet fansoun a suuk ngonuk pwe kopwe afalafal sereseréch me ikewe aramas ra soun nóm ie?
3 Afalafal Sereseréch me Ikewe Aramas Ra Soun Nóm Ie: Néún Jiowa kewe chón angang ikenái ra esilei ewe “tipachem” mi enlet ngeni meinisin mi mochen aúseling. Fán ekkóch a tongeni fis wóón ekkewe “al” are lón “ekewe lenien amwicheich.” (SalF. 1:20, 21) Atun sia féfféri ach kewe angang rán me rán, sia kan ekieki pwe sipwe afalafal ngeni ekkewe ekkóch? Mi pwá pwe sia ‘awora unusen ach fansoun le afalafala ewe kapas’? (Föf. 18:5) Ika ina, iwe sia apwénúetá wisach le unusen férfichi ewe angangen “pwärätä.”—Föf. 10:42; 17:17; 20:20, 21, 24.
4. Ifa usun iótek me ekilon ra álisikich le unusen férfichi ewe angangen pwáraatá?
4 Nge fán ekkóch, eli sia pireir le afalafal pokiten sia nisássáw are meefi pwe sia lipwákingaw. Nge ren enletin, Jiowa a weweiti aúkúkúch. (Kölf. 103:14) Iwe, ika sia meefi ena mettóch, sipwe tingorei Jiowa pwe sipwe pwora le afalafal. (Föf. 4:29, 31) Pwal och, atun sia pwisin káé me ekilonei ewe Kapasen Kot, sia tongeni nefotofot wóón ach áfánni kkólóón aúchean ewe pwóróus allim. (Fil. 3:8) Ina met epwe amwékútúkich le esilefeili ewe pwóróus allim fán tinikken.
5. Ifa usun sipwe kapachelong lón pwénútáán án Sowel na oesini?
5 Án Sowel we oesini a áiti ngenikich pwe me mwen warotoon ránin Jiowa we mi lap me eniwokkus, néún kewe aramas repwe “fetan puropur,” resap mut ngeni och mettóch epwe eppetiir lón ar angangen afalafal. (Sowel 2:2, 7-9, KG) Amwo sipwe unusen férfichi ei angangen pwáraatá ewe esap chúen fissefál lón mwachkkan!