Kopwe Auxiliary Pioneer?
1. Pwata ewe fansoun Áchechchem eú fansoun mi múrinné ach sipwe alapaaló ach angangen afalafal?
1 Atun ewe Áchechchem ina eú fansoun mi múrinné ach sipwe alapaaló ach angangen afalafal. Ina ewe fansoun sipwe ekilonei án Jiowa we tong mi lapalap ren an fangóló néún we usun eú méén kepich. (Joh. 3:16) Ei mettóch a efisi ach kilisou seni lón letipach, alóllóólu ach mochen ereni ekkewe ekkóch usun Jiowa me met a féfféri fán iten aramas. (Ais. 12:4, 5; Luk. 6:45) Pwal eú, iei ewe fansoun sipwe pwapwa le fiti ewe angangen etiwa chienach kewe me ekkewe aramas lón ach leenien afalafal pwe repwe fitikich lón ewe Áchechchem. Mwirin, sipwe achocho le ámááraatá an ekkewe chón fiti mochen káé. En mi mochen alapaaló óm angangen afalafal ren óm fiti ewe angangen auxiliary pioneer fán ekkeei maram March, April are May?
2. Pwata March eú maram mi kkóló échún le auxiliary pioneer?
2 Popun March eú Maram mi Kkóló Échún: March epwe kkóló échún le auxiliary pioneer. Chókkewe mi fiti repwe tongeni filatá ika repwe tikeri 30 are 50 awa. Ika pwe án ewe elter mi wisen sáifetál chuuri mwichefel a weneiti March, iir kewe mi fiti auxiliary pioneer lón ena atun repwe tongeni fiti unusen ewe mwich fán iten ekkewe regular me special pioneer. Ewe angangen eineti ekkewe taropween etiwetiw fán iten ewe Áchechchem epwe ttam lap seni lón ekkewe ier pún epwe poputá lón March 1, 2013, nge ewe Áchechchem epwe fis March 26. Pwal eú, a wor nimu weekend fán March. Iwe kopwe ekilonei ika en mi tongeni pwapwaiti ei maram mi kkóló échún.
3. Met sipwe féri pwe sipwe alapaaló ach angangen afalafal?
3 Féri Kókkót Iei: Iei ewe fansoun kopwe nengeniéchú óm schedule me ppii met sókkun siwil kopwe féri fán iten óm kopwe pioneer. A lamot an ewe famili álillisfengen. Ina minne atun ámi Famili Fel, oupwe awora fansoun le pwóróusfengen usun met ámi famili epwe achocho ngeni me féri eú kókkót. (SalF. 15:22) Ika kosap tongeni fiti auxiliary pioneer, kosap lichippúng. En mi tongeni ekkesiwili óm kókkót pwe kopwe tongeni attamaaló óm fansoun afalafal? En mi tongeni apachaatá eú rán lón eú wiik pwe kopwe afalafal?
4. Ikkefa ekkewe mettóch mi múrinné sipwe kúna seni ach alapaaló ach angang fán March, April me May?
4 Atun sia alapaaló ach angang fán ekkeei maram March, April me May, iwe, ach pwapwa me menemenéch a lapóló pún sia angang ngeni Jiowa me fang ngeni ekkewe ekkóch. (Joh. 4:34; Föf. 20:35) Ach achocho le pennúkúóló pwisin mochenich epwe apwapwaai Jiowa, ina met a kon lamot. (SalF. 27:11)