Eáni Leenien Áppirú Ekkewe Soufós Usun Amos
1. Met popun pwóróusen Amos a tongeni eú minen apéchékkúl ngenikich?
1 Ka fen meefi pwe ka lipwákingaw lón ewe angangen afalafal pokiten ka feito seni eú famili mi osupwang? Ika ina, ka tongeni kúna péchékkúl seni án Amos we leenien áppirú. I emén chón masen siip me chón atake lón ekkóch fansoun, iwe nge Jiowa a apéchékkúla i pwe epwe wisen esilei eú pwóróus mi aúchea. (Am. 1:1; 7:14, 15) Pwal ina chék usun lón ach ei fansoun, Jiowa a kan néúnéú chókkewe mi tekisosson. (1 Kor. 1:27-29) Ikkefa ekkóch lesen fán iten ach we angangen afalafal sia tongeni káé seni ewe soufós Amos?
2. Pwata sipwe tongeni tipeppós fán koput lón ewe angangen afalafal?
2 Tipeppós fán Koput: Atun Amasia, emén mi feffel ngeni ululun kow nge i emén souasor lón ekkewe engol einangen ennefenin mwúún Israel, a rongorong án Amos oesini, iwe a appélúwa ren an usun itá apasa: ‘Ke le liwin! O sú senikem! A wor pwisin ám lamalam!’ (Am. 7:12, 13) Atun Amasia a waalong an tingor ngeni King Jeropoam pwe epwe pinei angangen Amos a sorei alon ena soufós. (Am. 7:7-11) Nge Amos ese niwokkus. Lón ei fansoun, ekkóch néúwisin lamalam ra kútta álillis seni mwúún aramas ren ar repwe eriáfféúmwááli néún Jiowa kewe aramas. Iwe nge, Jiowa a anúkúnúkúkich pwe esap wor och pisekin maun epwe sópwéch tori feilfeiló.—Ais. 54:17.
3. Ikkefa ekkewe ruu pwóróus sia esilefeili lón ei fansoun?
3 Esilei án Kot Kapwúng me Ekkewe Feiéch lón Mwachkkan: Ikaamwo Amos a oesini usun kapwúngún ekkewe engol einang lón mwúún Israel, nge a sáingooni ewe puken Paipel mi iteit seni itan we ren an apasa usun án Jiowa we pwon usun ewe angangen fférsefál me watteen feiéch. (Am. 9:13-15) Sia pwal apwóróusa warotoon án Kot we ránin kapwúng. Nge ina kinikinin chék ewe “Pworausen Manau usun ewe Mwü,” mi lamot sipwe esilei. (2 Pet. 3:7; Mat. 24:14) Án Jiowa nieló ekkewe mi ngaw lón Armaketon epwe wáási ewe al ngeni eú paratis wóón fénúfan.—Kölf. 37:34.
4. Pwata sia núkúnúk pwe sipwe tongeni apwénúetá letipen Jiowa?
4 Ach afalafala pwóróusen ewe Mwú lón ei fénúfan mi chómmóng chón oputakich, a wesewesen sótuni ach féri pwúngún ach fangóló manawach me féri letipen Jiowa. (Joh. 15:19) Iwe nge, sia núkúnúk pwe Jiowa epwe elipwákéchúkich le apwénúetá letipan usun chék met a féri ngeni Amos.—2 Kor. 3:5.