Ié Kewe Ra Féfféri Letipen Jiowa Lón Ei Fansoun?
1. Ineet sipwe poputá le káé ewe brochure Ié Kewe Ra Féfféri Letipen Jiowa Lón Ei Fansoun? me ifa usun sipwe kúna álillis seni?
1 Poputáán wiiken October 28, sipwe káé ewe brochure Ié Kewe Ra Féfféri Letipen Jiowa Lón Ei Fansoun? lón Án ewe Mwichefel Káéén Paipel. Ei minefé brochure mi fen katowu lón ewe Mwichelap lón Summer, “Tümwünü Lelukom!” a ffér pwe epwe emmweni ekkewe chón káé Paipel ngeni ewe mwicheich. Ach káé ei brochure epwe alapaaló ach kilisou pwe sia chóni án Jiowa we mwicheich me epwe pwal álisikich pwe sipwe sileéchú ei pisek mi aúchea fán iten ewe angangen afalafal.—Kölf. 48:13.
2. Ifa usun napanapen káéén ewe brochure lón ewe mwichefel?
2 Napanapen ewe Káé: Mi lamot ngeni ewe mi wisen emmweni ewe káé an epwe akkóta an fansoun pwe epwe naf fán iten eú me eú lesen. Atun epwe poputááni káéén eú me eú ekkewe 28 lesen, epwe álleani itelapen ewe lesen mi napanapen kapas eis. Mwirin, epwe etiwa ewe chón állea an epwe álleani ewe parakraf lepoputáán. Mwirin, ewe chón emmwen epwe eisini chón mwich ewe kapas eis i a fen ammólnatá fán iten ena parakraf. Iwe, iteiten kinikin mi poputá ren ekkewe kapas mi kon chól makkan, epwe állea me pwal pwóróusfengen wóón. Mwirin álleaan ewe kinikin, ewe chón emmwen epwe etiwa meefien chón mwich ren ifa usun ewe kinikin a pélúweni ewe kapas eis mi weneiti itelapen ewe lesen. Ewe brochure a pwal masou ren chómmóng lios me chón mwich ra pwal tongeni uwawu meefier wóón. Ika a naf ewe fansoun, epwe állea ekkewe menlapen wokisin. Me mwen an epwe mwet ngeni ewe lesen mwirin, ewe chón emmwen epwe eáni ekkewe kapas eis mi nóm fachikin fán iten enniwili. Ika mi wor pwóór “Alapaaló Óm Silei,” ewe chón állea epwe pwal álleani me ewe chón emmwen epwe etiwa meefien ekkewe chón mwich ren ifa usun ewe chón káé Paipel epwe kúna álillis seni an apwénúetá ewe kapasen pesepes. Ika mi naf ewe fansoun lemuchulóón ewe káé, ewe chón emmwen mi tongeni áeá itelapen ewe lesen fán iten enniwili. Nge sipwe ekieki pwe esap weween pwe iteiten epwe iei ewe napanapen káé ngeni aramas lón imwer.
3. Ifa usun sipwe unusen kúna álillis seni ach káé ewe brochure?
3 Ren ach sipwe unusen kúna álillis, sipwe ammólnaéchú me mwen sipwe fiti mwich. Achocho le uwawu meefiach. Atun ewe pwóróusfengen, ekieki ifa usun ewe lesen a álilliséch ngeni ekkewe chón káé. Amwo itá ach káé ewe mineféén brochure epwe elipwákéchúkich le álisi ekkewe ekkóch ar repwe fitikich le féfféri letipen Kot pwe pwal iir repwe tongeni eáni ápilúkúlúkún nónnóm tori feilfeiló.—1 Joh. 2:17.