Ámúrinnééló Tufichich lón ewe Angangen Afalafal ren​—Ach Féri Rekotun ewe mi Mochen Aúseling

“Kopwe püsin tümwünük, kopwe pwal tümwünü mine ka afalafal won.” (1 Tim. 4:16) Ei kapasen fén seni ewe aposel Paulus ngeni Timoty mi pop seni Kot a pwáraatá pwe sipwe achocho le angangéchúló, ese lifilifil ika a fen fansoun langattam are sia kerán poputá. Ren an epwe wor álillisich le féri ena, epwe kawor eú mineféén minen álillis epwe nóm lón Ach Angangen Afalafala ewe Mwú, itelapan “Ámúrinnééló Tufichich lón ewe Angangen Afalafal.” Iteiten lesen epwe áweweei eú tufich mi lamot, me awora ekkóch minen álillis ren ifa usun sipwe angang wóón. Unusen na maram a wor pesepes pwe meinisin repwe mwo chék áeá ena tufich. Lemuchúlóón ena maram, eú kinikin lón ewe Káitin Chón Afalafal epwe suuki ngenikich ach sipwe uwawu meefiach wóón ifa usun sia kúna álillis seni ach akkangang wóón ena tufich. Lón ei maram a wor pesepes le féri rekotun ekkewe ra mochen aúseling.

Pwata A Lamot: Ren ach sipwe apwénúetá wisach ei, a lamot sipwe féri pwal och mettóch me lúkún ach sipwe chék afalafal. A lamot sipwe liwiniti chókkewe mi pwári ar mochen aúseling me asukuler, ina usun sipwe ámááraatá ewe enlet sia fen fótukatiw. (Mat. 28:19, 20; 1 Kor. 3:6-9) A lamot sipwe awora fansoun le chuursefáli ewe aramas me pwóróus usun an kewe aúrek nge epwe riri ngeni met sia fen pwóróus wóón me mwan. Ina minne, atun sia kúna emén a mochen aúseling, a lamot sipwe makkeetiw rekotun.