Ámúrinnééló Tufichich lón ewe Angangen Afalafal ren Ach Chúngú Aramas

Pwata A Lamot: Jesus a áfánni emén me emén aramas me a pwári an chúngúúr fán tong. Áwewe chék lón eú atun Jesus mi weweiti án emén mi selingepúng meefi sáw ina pwata atun an echikara a iir chék pwe ekkewe pwiin aramas resap pwal katol. (Mark. 7:31-35) A pwári an chúngú néún kewe chón káé ren an silei pwe mi chék kaúk ar tufich pwal an ese ngeniir chómmóng pwóróus fán eú chék. (Joh. 16:12) Pwal mwo seni lón leenian lón láng, Jesus a pwári an chúngú aramas. (2 Tim. 4:17) Kich chón tapweló mwirin Jesus, sipwe mochen áppirú i. (1 Pet. 2:21; 1 Joh. 3:16, 18) Pwal eú, epwe lapóló ach lipwákéch lón ach angangen afalafal ika sia pwári ach chúngú ewe chón imw me áfánni nónnómun, met a pwapwaiti me met a aúreki. Epwe kon mochen aúseling ika pwe a meefi pwe sise chék chúri ren ach sipwe chék aronga eú pwóróus are likitatiw puk nge sia enletin chúngú.

Usun Ach Féri:

Kopwe mmólnéch. Kopwe emelimel, chiechiéch me kosap niwokkus.
Kopwe nennengenifichi nónnómun. Mi wor met mi pwári pwe mi wor néún ewe aramas semirit? Pwe mi pwapwaiti atake are wor néún man? Pwe mi wor met a lúkú lón an lamalam? Eli ka tongeni siwili óm kapasen lepoputáán pwe epwe weneiti nónnómun.
Eisini meefian, me aúselingéch nge kosap atai an pwóróus. Kopwe chék ánnefota pwe kopwe pwári pwe en mi aúseling. Kilisou ngeni ren meefian me apúnga ika mi fich. Túmúnú pwe kesap ánicho.
Kopwe tipemecheres. Ika mi fich iwe kopwe siwili óm afalafal pwe epwe weneiti an ewe aramas kewe aúrek. Eli epwe mecheres óm kopwe féri ena pokiten néúch kewe tract, brochure, me puk ra pwóróus usun sókkópaten mettóch. Ika pwe ka feiló atun eú fansoun ese fich, áwewe chék atun an osukosuk, ka tongeni áfánni ena me amwochcha óm afalafal.

Sótuni fán ei Maram:

Asóssót atun famili fel are pwal atun ewe angangen afalafal ren óm ekis kaúló me chienom we me asóssót ika ifa usun oupwe tipemecheres le siwili ámi afalafal pwe epwe weneiti met ewe chón imw a erá.
Atun ekkóch ekkewe mwich fán iten angangen afalafal, ewe Chón Kraist mwán chón emmwen a tongeni kapas usun are pwomweni ekkewe alen ach sipwe chúngú aramas.