Eú Manaw Riáfféú A Poputá

LÚKÚN ewe leeni Eten, a wor chómmóng án Atam me Efa osukosuk. Ra angang weires ren ener mwéngé, esor ekkewe irá mi lingéch mi wor uwar, nge ra chék kúna chómmóng irá félúfél me petewel ar ra mámmááritá. Iei sópwólóón án Atam me Efa álleasolapa Kot me pwal úkútiw seni ar chiechi ngeni.

Nge ewe mettóch a kon lap, Atam me Efa rese chúen tongeni manaw fóchófóch. Chechchemeni pwe Kot a éúréúrer pwe ika ra ocheei féún ewe efóch irá, repwe máló. Iwe, lón ewe ránin ar ra ocheei, ra poputá le chinnapeló me máló. Umwesiir ar rese aúselinga Kot!

Néún Atam me Efa kewe meinisin ra uputiw mwirin án Kot atowu semer kewe me iner seni ewe leeni Eten. Weween pwe néúr kewe repwe pwal chinnapeló me máló.

Ika pwe Atam me Efa ra chék álleasochisi Jiowa, manawer me pwal manawen néúr kewe epwe pwapwa. Repwe nóm tori feilfeiló fán pwapwa wóón fénúfan. Ese wor emén epwe chinnapeló, semmwen me máló.

Kot a mochen pwe aramas repwe nóm fán pwapwa tori feilfeiló, iwe a pwonei pwe eú rán epwe ina usun. Sap minne fénúfan chék epwe lingéchúló, nge pwal aramas meinisin repwe péchékkúl. Iwe, aramas meinisin wóón fénúfan repwe chiechifengen me pwal chiechi ngeni Kot.

Nge Efa ese chúen emén chiechien Kot. Iwe, a weires an epwe néúnatiw néún kewe, pún a fiti metek. An álleasolapa Jiowa a efisi ngeni chómmóng osukosuk, ika met?

Atam me Efa ra néúnatiw chómmóng át me nengngin. Lupwen néúr we mwánichi a uputiw, ra eita ngeni Kain. Ra eita ngeni ewe arúúeménún át Epel. Met a fis ngeniir? En mi silei?