Lesen 9

Io Kewe Chiechien Kot?

Jises Kraist chiechien Jiowa mi pacheoch me achengicheng seni meinisin. Mwen an nonnom won fonufan ussun emon aramas, Jises a nonnom lang ussun emon ngun mi fokkun manaman. ( Jon 17:⁠5) Iwe, a feito fonufan ren an epwe asukula aramas ewe enlet ussun Kot. ( Jon 18:37) A pwal fangelo manauan ren an epwe amanaua aramas mi alleasochis seni tipis me malo. (Rom 6:​23) Iei, Jises Kingen an Kot we Muu, ewe muu lon lang epwe wato Paratis ngeni ei fonufan.​​—⁠Pwarata 19:⁠16.

Ekkewe chonlang ir pwal chiechien Kot. Ekkewe chonlang rese fen piin nonnom won fonufan ussun aramas. Kot a foriireta lon lang mwen a forata ewe fonufan. (Hiop 38:​4-7) Mei wor fite milion chon lang. (Taniel 7:​10) Ekkeei chiechien Kot lon lang ra mochen pwe aramas repwe kaeo ewe enlet ussun Jiowa.​​—⁠Pwarata 14:​6, 7.

Mei pwal wor chiechien Kot won fonufan; ir noun kewe Chon Pwarata. Lupwen a fis kapwung, emon chon pwarata epwe pwaralo an sile ussun emon are och mettoch. Chon Pwarata Jiowa ra pwaralo ngeni aramas ar sile ussun Jiowa me an kokkot. (Aisea 43:10) Ussun chok ekkewe chonlang, ekkewe Chon Pwarata ra mochen alisuk le kaeo ewe enlet ussun Jiowa. Ra mochen pwe en kopwe pwal wiliiti chiechien Kot.