A Wor Chienen Josia mi Múrinné

Óm ekiek nge a weires óm kopwe féri minne mi pwúng?— Chómmóng aramas ra ekieki pwe a weires. Ewe Paipel a erenikich pwe a fókkun weires ngeni emén át itan Josia an epwe féri minne mi pwúng. Nge a wor chienan kewe mi múrinné ra álisi. Sipwe káé usun Josia me chienan kana.

Amon, ewe kingen Juta, ina i semen Josia. Amon emén mi fókkun ngaw me a fel ngeni ekkewe ululun. Atun semen Josia we a máló, Josia a wiliti kingen Juta. Nge a chék walu ierin! Óm ekiek nge Josia a ngaw usun chék seman we?— Aapw, ese!

Pwal mwo nge lekúkkúnún Josia, a mochen álleasochisi Jiowa. Ina popun a filatá an epwe chék chiechi ngeni ekkewe mi tongei Jiowa. Me ra álisi Josia le féri minne mi pwúng. Ié kana chienen Josia?

Emén me leir Sefanaia. I emén soufós mi éúréúra aramasen Juta pwe ika ra fel ngeni ululun, iwe epwe fis ngeniir mettóch mi ngaw. Josia a aúseling ngeni Sefanaia me fel ngeni Jiowa nge esap ululun.

Jeremaia, pwal i emén chienen Josia. A arapakkanfengen ieriir me kanefengen imwer kewe atun ra mámmááritá. Ra fókkun chiechiéch pwe atun Josia a máló, Jeremaia a makkeei eché kél mi kkóló aúchean usun úkúkún an pwosiiti Josia. Jeremaia me Josia ra álillisfengen le féri minne mi pwúng me álleasochisi Jiowa.

Met ka tongeni káé seni pwóróusen Josia?— Inaamwo ika atun Josia mi chék kúkkún, nge a mochen féri minne mi pwúng. A silei pwe mi lamot an epwe chiechi ngeni chókkewe mi tongei Jiowa. Mi lamot kopwe filatá chiechiom iir mi tongei Jiowa me tongeni álisuk le féri minne mi pwúng!