Ewe Sáingoon King Mi Múrinné Lón Israel

A CHÉK walu ierin Josia lupwen a seikitá pwe epwe kingen mwúún ekkewe ruu einangen Israel mi nóm éér. A fókkun kúkkún, nge a fen emén king. Ina popun lepoputáán an nemenem, ekkóch ekkewe aramas mi watte seni ra álisi le nemeni ewe mwú.

Fisu ier mwirin an Josia wiliti king, a poputá le kútta Jiowa. A áppirú án ekkewe king leenien áppirú mi múrinné choweán Tafit, Jehosafat me Hiskia. Iwe lupwen Josia a chúen alúwél, a féri eú mettóch mi pwári an pwora.

Ekkewe chón Israel ra fókkun ngaw ren langattam fansoun. Ra fel ngeni ekkewe kot chofona me chapetiw ngeni ekkewe ululun. Iwe Josia a ló, fitifengen me chienan kewe mwán me ra poputá le limetawu lamalam chofona seni ewe fénú. Iei eú angang mi watte pún chómmóng aramas ra fel ngeni ekkewe kot chofona. En mi tongeni kúna Josia me chienan keei mwán me ikkeei ie ar ra atai ekkewe ululun.

Mwirin, Josia a ewisa ngeni úlúmén mwán ar repwe wisen emmweni ewe angangen fférsefálin án Jiowa we imwenfel. Ra ioni seni ekkewe aramas moni me ngeni ekkeei mwán pwe repwe méén ngeni angangen ewe imwenfel. Lupwen ra angang wóón ewe imwenfel, ewe souasor mi lap Hilkia a kúna och mettóch mi fókkun lamot me ikena ie. Ina ewe puken allúk Jiowa a ewisa ngeni Moses an epwe makkeei me lóóm lóóm. A fen péútúló ren fitu fitu ier.

Ra waló ena puk ren Josia me ereni emén pwe epwe álleani ngeni. Lupwen Josia a rongorong, a silei pwe ekkewe aramas rese akkapwénúetá án Jiowa kewe allúk. A fókkun letipechou pokiten ei mettóch, iwe a kamwei úfan we usun ka kúna me ikeei ie. A apasa: ‘Jiowa a song rech, pún semelapach kewe rese apwénúetá ekkewe allúk mi makketiw lón ei puk.’

Josia a ereni ewe souasor mi lap Hilkia pwe epwe kútta met Jiowa epwe féri ngeniir. Hilkia a feiló me eisini ewe finesoufós itan Hulta. Iwe, neminna a ereni ei pwóróus seni Jiowa pwe epwe uwei ngeni Josia: ‘Jerusalem me meinisin ekkewe aramas repwe kapwúng pún ra fel ngeni ekkewe kot chofona me ewe fénú a fen uren féfféringaw. Nge pokiten en Josia ka féri minne mi múrinné, iwe ei kapwúng epwap fis mwirin óm máló.’