Josaia A Aúcheani án Kot Allúk

Josaia a kingen Juta atun a wanú ierin. Lón ena fansoun, ekkewe aramas ra féri sókkun angangen magic me fel ngeni uluulun. Atun a 16 ierin, a sótun káé ifa ussun epwe fel ngeni Jiowa lón ewe napanap mi pwúng. Atun a 20 ierin, a poputá le ataieló ekkewe uluulun me ekkewe róngen asor lón unusen ewe leeni. Me atun a 26 ierin Josaia, a akkóta pwe án Jiowa we imwenfel epwe fférsefál.

Lón ewe imwenfel, ewe souasor mi lapalap itan Hilkia, a kúna ewe scroll mi masou ren án Jiowa Allúk, eli ena scroll makkeien Moses. Néún ewe king we seketeri itan Safan a uweato ewe scroll ren Josaia me a álleanaawu ewe Allúk fán léúwommóng. Atun Josaia a aúseling, a mirititi pwe ekkewe aramas ra chék álleasolapa Jiowa ren fite fite ier. King Josaia a ereni Hilkia: ‘Jiowa a fókkun song rech. Kopwe feiló me fós ngeni. Iwe Jiowa epwe erenikich met a lamot sipwe féri.’ Jiowa a pélúweni ren ewe finesoufós Hulta: ‘Ekkewe aramas lón Juta ra likitieiló. Repwe kúna kapwúng nge esap atun Josaia a king, pokiten a tipetekison.’

Atun King Josaia a rong ewe pwóróus, a feiló ren ewe imwenfel me kérato ekkewe aramas seni Juta pwe repwe chufengen. Iwe a álleanaawu án Jiowa Allúk fán léúwommóng ngeni meinisin ekkewe aramas. Josaia me ekkewe aramas ra pwonei pwe repwe álleasochisi Jiowa ren unusen letiper.

Ewe mwúún Juta ese féri apwapwaan ewe Pasofer ren fite fite ier. Nge atun Josaia a álleani ewe Allúk a kúna pwe úrúrún repwe féri apwapwaan ewe Pasofer iteiten ier, iwe a ereni ekkewe aramas: ‘Ousipwe féri ewe Pasofer fán iten Jiowa.’ Iwe Josaia a ammólnatá chómmóng asor me akkóta pwe epwe wor chón kél lón ewe imwenfel. Iwe ekkewe aramas ra féri ewe Pasofer. Mwirin ena ra féri ewe Ránin Chulapen Pilawa Ese Lefen, nge a fis lón úkúúkún fisu rán. Seni fansoun Samuel we, ese fis eú sókkun Pasofer lón ewe esin napanap Josaia a féri. Josaia a fókkun aúcheani án Jiowa Allúk. Ka pwapwaiti óm káé ussun Jiowa?