Josef A Sótuni Pwiin Kewe

JOSEF a mochen silei ika pwiin kewe 10 watte ra chúen kirikiringaw me sorongaw. Ina popun a apasa: ‘Ámi spai. Ámi oua etto pwe oupwe kútta ngawen fénúem ei.’

Ra apasa: ‘Aapw, esap ám spai. Ám mwán mi wenechar. Ám meinisin pwipwi. Ám engol me rúúemén me lóóm. Nge emén ese chúen nóm, iwe ewe setúpútúr a nónnóm ren semem we leimw.’

Josef a tipin lúkúlúkúmmang ngeniir. A waalong pwiin we emén itan Simeon lón imwen fétek, nge a mut ngeni ekkewe lusun ar repwe angei och mwéngé me pwal liwiniti imwer. Nge a ereniir: ‘Ika oupwe liwin, oupwe fókkun wato pwiimi we kúkkún.’

Lupwen ra liwiniti fénúer Kanaan, ekkewe pwipwi ra apwóróusa ngeni semer we Jakop mettóch meinisin minne a fis. Jakop a fókkun letipechou. A kétá: ‘Josef ese chúen nóm, iwe iei, Simeon ese pwal chúen nóm. Usap mut ngenikemi ámi oupwe uwei nei we setúpútúr, Peniamin.’ Nge lupwen ener mwéngé epwele iteló, Jakop a mut ngeniir ar repwe uwei Peniamin ngeni Isip pwe repwe tongeni angang ener mwéngé.

Iwe iei, Josef a kúna pwiin kewe ar ra fetáleto. A fókkun pwapwa le kúna pwiin we kúkkún, Peniamin. Pwúngún, ese wor emén leir a silei pwe ei aramas mi wis tekia, iei i Josef. Iwe iei, Josef a féri och mettóch pwe epwe sótuni pwiin kewe 10 mi inefesen.

A ereni néún kewe chón angang pwe repwe amasoua ar kewe tuuk ren mwéngé. Nge a ereni ekkewe chón angang pwe repwe pwal waalong an we kap silifer mi kkóló aúchean lón án Peniamin we tuuk lemonomon. Lupwen iir meinisin ra ló, iwe ra fen fetáleló ekis wóón ewe al, Josef a tiinaaló néún kewe chón angang pwe repwe tapwer. Lupwen ekkewe chón angang ra toriir, ekkewe chón angang ra apasa: ‘Pwata oua soláái án néúm we meilap we kap silifer?’

Ekkewe pwipwi meinisin ra apasa: ‘Ause soláái an na kap. Ika oua kúna ewe kap an a nóm ren emén leim, ena emén epwe ninniiló.’

Iwe, ekkewe chón angang ra kútta lón ekkewe tuuk meinisin, iwe ra kúna ewe kap me lón án Peniamin we tuuk, usun ka kúna me ikkeei ie. Ekkewe chón angang ra apasa: ‘Ámi kana lusun, oupwe tongeni liwiniti fénúemi, nge Peniamin epwe etikem.’ Met ekkewe 10 pwipwi mi inefesen repwe féri iei?

Iir meinisin ra eti Peniamin le liwinló ngeni imwen Josef we. Josef a ereni pwiin kewe: ‘Ámi oua tongeni liwinló ngeni fénúemi, nge Peniamin epwe nónnóm ikkeei, epwe nei chón angang.’

Iwe iei Juta a fósetá, a apasa: ‘Ika ua liwinló ngeni fénúem, nge ese nóm rei ewe át, semei epwe máló pún a fókkun tongei. Ina popun, kese mochen kopwe néúniei chón angang, nge mut ngeni ewe át an epwe liwiniti fénúem we.’

Josef a kúna pwe napanapen pwiin kewe a siwil. Rese chúen kirikiringaw me sorongaw. Sipwe ppii met Josef epwe féri iei.