Jises A Filaatá Saul

Saul i emén chón Rom a uputiw lón Tarsus. I emén Farisi mi watte an silei ussun ewe Allúkún Jus, me a oput ekkewe Chón Kraist. A kan átekinawu ekkewe Chón Kraist mwán me fefin seni lón imwer kewe me otururelong lón kalapus. A pwal mwo nge útá me kakkatol án ewe mwichen aramas mi fókkun song manei ngeni Stifen faw tori an máló.

Nge Saul ese menemenéch ren an aresini ekkewe Chón Kraist lón chék Jerusalem. A pwal tingorei ewe souasor mi lapalap an epwe tiinaaló i ngeni ewe telinimw Tamasikos pwe epwe kútta ekkewe Chón Kraist ikena ie. Atun Saul a arap ngeni ena telinimw, och saram a ttinetiw wóón, me a turuló lepwúl. A rong och méngúngú a apasa: ‘Saul, pwata ka eriáfféwúmwááliei?’ Saul a eisini: ‘En ié?’ A pélúweni: ‘Ngang Jises. Kopwe feiló Tamasikos, me kopwe silei met a lamot kopwe féri.’ Mwittir chék, Saul a chuun, me chienan kewe ra kémwéch péún me panaló lón ewe telinimw.

A wor emén Chón Kraist mi túppwél itan Ananaias lón Tamasikos. Jises a ereni lón eú lángipwi: ‘Kopwe feiló ngeni ewe al itan Wenewen, me kútta emén mwán itan Saul.’ Ananaias a apasa: ‘Samol, úa rong meinisin pwóróusen ena mwán! A kan oturaalong noum kewe chón káé lón kalapus!’ Nge Jises a ereni: ‘Kopwe feiló ren. Úa filaatá Saul an epwe afalafala ewe kapas allim ngeni chómmóng mwú.’

Iwe, Ananaias a kúna Saul me a ereni: ‘Pwii Saul, Jises a tiinieito pwe úpwe ánnelói mesom.’ Mwittir chék, Saul a kúnasefál. A káé ussun Jises me a wiliiti emén chón tapweló mwirin. Iwe a papatais me wiliiti emén Chón Kraist me a poputá le afalafal lón ekkewe sinakok, fengen me chienan kewe Chón Kraist. Ka tongeni anchangei úkúúkún máirúún ekkewe chón Jus atun ra kúna án Saul asukula ekkewe aramas ussun Jises? Ra erá: ‘Esap pwe iei i ewe mwán a kan soun eriáfféwú néún Jises kewe chón káé?’

Ren úkúúkún úlúngát ier, Saul a afalafal ngeni ekkewe aramas mi nóm lón Tamasikos. Ekkewe chón Jus ra oput Saul me ra akkóta pwe repwe nieló. Nge chienan kewe Chón Kraist ra silei ussun ena, me ra álisi an epwe sú. Ra waalong lón eú pasikit me senieitiw lón asammwachoon etippen ewe telinimw.

Atun Saul a feiló Jerusalem, a sótun fiti ekkewe Chón Kraist ikena. Nge ra niwokkusiti. Mwirin emén Chón Kraist mi kirekiréch itan Parnapas a uwealó Saul ren ekkewe aposel me a alúkúlúkú ngeniir pwe Saul a wesewesen siwil. Saul a poputá le fiti chón ewe mwichefel lón Jerusalem le afalafala ewe kapas allim fán tinikken. Ló, ló, ló, a silleló me ren aramas pwe i Paul.