Oupwe Mammasa Me Oupwe Tinikken!

“Iei minne oupwe mamasa, pun ousap sinei ranin are ewe fansoun.”​—MATEUS 25:13.

1. Met ewe aposel Jon a mochen epwe feito?

LON EWE saingoon poraus lon ewe Paipel, Jises a pwon: “Ewer, upwe warekai.” Noun we aposel Jon a polueni: “Amen. Kopwe feito, Samol Jises!” Esor an tipemwaramwar pwe Jises epwe feito. Jon emon lein ekkewe aposel mi eisini Jises: “Kopwe pwar ngenikem ineet epwe fis ekkeei mettoch, o meeta esisinen om liwinsefal [nonnom, New World Translation, Kriik, pa·rou·siʹa] pwal sopolon ei fansoun?” Ewer, Jon a meefi lukulukoch lupwen a ekieki ussun an Jises nonnom lon mwach kkan.​—Pwarata 22:20; Mattu 24:3.

2. Met ekkewe lamalam ra ekieki ussun an Jises nonnom?

² Ena esin luku ese kon pwalo iei. Mei wor ren chommong lamalam eu luku ussun an Jises “feffeito,” nge chokisikis lein ekkewe soulang ra wesewesen luku pwe epwe fis. Ra manaueni manauer ussun ita nge Jises esap feito. Alon ewe puk The Parousia in the New Testament: “Ewe apilukulukun Parousia ese kan kku manauen, ekiekin, me angangen ewe lamalam. . . . A fen apwangapwangelo are unusen poutulo atapwalapwalen an ewe lamalam apwonueta wiisan lon pekin aier me lon pekin misineri le esilefeili ewe kapas allim.” Nge esap ina ussun ren aramas meinisin!

3. (a) Ifa an Chon Kraist mi enlet ekiek ussun ewe pa·rou·siʹa? (b) Met sipwe pwungupwung won iei?

³ Noun Jises kewe chon kaeo mi enlet ra mwasangasang le wikitiwiti sopwoloon ei otot mi ngau. Atun ach fori ina ussun lon tuppwol, mi lamot ach eani ekiek mi pwung ngeni mettoch meinisin mi kapachelong lon an Jises nonnom me pwarata pwungun ach ekiek ren foffor. Iei ussun sipwe tufichin ‘likiitu tori sopolon me manau.’ (Mattu 24:13) Atun an aporausa ewe oesini lon Mattu sopwun 24 me 25, Jises a awora fon sipwe tongeni apwonueta alon me kuna feioch seni. Mi mak lon sopwun 25 ekkewe kapas awewe, ese mwaal ka fen sileer, kapachelong ewe kapas awewe ussun ekkewe engol fopwul (ekkewe mi tipatchem are tiparoch) me ewe kapas awewe ussun ekkewe talent. (Mattu 25:1-30) Ifa ussun sipwe tongeni feioch seni ekkena kapas awewe?

Oupwe Mammasa, Ussun Ekkewe Limmon Fopwul!

4. Awewei mwo porausen ewe kapas awewe ussun ekkewe fopwul?

⁴ Neman kopwe mochen alleanisefalli ewe kapas awewe ussun ekkewe fopwul mi mak lon Mattu 25:1-13. A fiffis eu apupulu mi lap an Chon Jus. Ewe mwan apupulu epwe feilo ngeni imwen semen ewe fin apupulu ren an epwe paani atun ar feilo ngeni imwan (are imwen seman). Eli epwe wor chon attik me sou kol atun ei fansoun feffetal, nge esap ffat titchikin kulokun an ewe mwan apupulu feffeito. Lon ewe kapas awewe, engol fopwul ra witiwiti an ewe mwan apupulu feito tori a pwiniitiir. Ren limmon lein ekkewe fopwul, ese nafoch aloloon lamp rer, ina minne ra feilo mooni. Nge ekkewe limmon lusun mi tipatchem. Mei naf minne ra uwei me ir mi tongeni alolosefalli nour kewe lamp atun ar witiwit ika epwe lamot. Ir chok mi nom lupwen a war ewe mwan apupulu. Ina pwata mi mumuta ngeni ir chok le tolong lon ewe fetelap. Lupwen ekkewe fopwul mi tiparoch ra liwinto, ra mmang me rese tongeni tolong.

5. Ikkefa ekkewe wokisin mi affata weween ewe kapas awewe ussun ekkewe fopwul?

⁵ Sia tongeni weweiti pwe chommong kinikinin ei kapas awewe ra liosueta pwal och mettoch. Ren chok awewe, ekkoch wokisin lon ewe Paipel ra awewei pwe Jises a ussun emon mwan apupulu. (Jon 3:28-30) Jises a apasa pwe i a ussun noun emon king nge seman we a fen ammonlata eu kametip fan itan. (Mattu 22:1-14) Me ewe Paipel a apasa pwe Jises a ussun emon mwan pupulu. (Efisus 5:23) Lon pwal ekkoch kinikinin ewe Paipel, ekkewe Chon Kraist mi kepit ra awewe won ussun “puluen” Kraist nge, ewe kapas awewe ese awewe won emon finen apupulu. (Jon 3:29; Pwarata 19:7; 21:2, 9) Iwe, a awewe won engol fopwul, me lon pwal ekkoch wokisin ekkewe mi kepit ra pwal awewe won ussun emon fin apupulu sefo ngeni Kraist.​—2 Korint 11:2.a

6. Met Jises a pese ngenikich le muchuloon ewe kapas awewe ussun ekkewe fopwul?

⁶ Lukun chok ekkewe poraus mi titchik me weween lon pekin oesini, mei wor chommong kapasen emmwen lon ewe kapas awewe sipwe tongeni kaeo. Ren chok awewe, nengeni an Jises kapas: “Oupwe mamasa, pun ousap sinei ranin are ewe fansoun.” Iwe, ewe kapas awewe a pese ngenikich pwe sipwe mammasa me ononoto pwe sipwe esinna ineet epwe arap ngenikich sopwoloon ei otot mi ngau. Ena sopwoloon a feffeito, inaamwo ika sise silei titchikin ranin we. Ina popun sipwe atittina ekiekin ekkewe ruu mwichen fopwul.

7. Ifa ussun limmon lein ekkewe fopwul ra tiparoch?

⁷ Jises a apasa: “Limmon leir ra tiparoch.” Ra tiparoch pokiten rese luku pwe ewe mwan apupulu epwe feito? Ir mi kukkutta minne ra pwisin pwapwa ren? Are ir mi tupulo? Aapw, esap ina. Jises a apasa pwe ekkewe limmon ra “feilo pwe repwe souni emon mwan-apupulu sefo.” Ra silei pwe epwe feito, me ra mochen souni me fiti ewe “fetallap.” Iwe nge, ir mi unusen mmonleta? Ra witiwit tori “lukenipwin,” nge rese fen mmonleta ren an feito lon ese lifilifil menni kulok​—ika a muttir are mmang seni minne ra fen ekieki.

8. Ifa ussun ekkewe limmon fopwul ra tipatchem?

⁸ Ekkewe limmon​—chokkewe Jises a eita ngeni tipatchem​—ra pwal feilewu fan lamp mi ttittin pun ra ekieki pwe ewe mwan apupulu epwap feito. Ra pwal witiwit, nge ir mi iteni “tipatchem.” Ewe kapas lon fosun Kriis mi affou ngeni “tipatchem” mi tongeni wewe ngeni “tumunuoch, mirit, sile.” Ekkewe limmon ra fen anneta pwe ir mi tipatchem ren ar uwei rume mi atufichi ar repwe alolosefalli ekkewe lamp ika epwe lamot. Ren enletin, a kon lamot ngeniir ar repwe mmonleta ngeni warotoon ewe mwan apupulu, ina minne rese fangelo ewe aloloon lamp. Ese lamot mwaal ar mammasa ina ussun, ussun a letelo ren ar nonnom me unusen mmonleta lupwen a war ewe mwan apupulu. Chokkewe mi mmonleta “ra eti i le tolong lon ewe fetallap. Iwe, ra apungalo ewe asam.”

9, 10. Met lamoten ewe kapas awewe ussun ekkewe fopwul, me met sipwe pwisin eisinikich?

⁹ Jises ese mochen awewe won foffor mi fich ngeni eu apupulu, are ewe lamoten ach sipwe alillisoch atun an emon osupwang. Iei ewe poraus mi lamot seni an kapas awewe: “Oupwe mamasa, pun ousap sinei ranin are ewe fansoun.” Kopwe pwisin eisinuk: ‘Ngang ua mammasaochu atun an Jises nonnom?’ Sia luku pwe Jises a nemenem lon lang iei, nge ifa lamoten ngenikich an ewe ‘Noun-Aramas pwa lon kuchuun lang ren manaman, pwal ren ling mi lapalap.’? (Mattu 24:30) A tori “lukenipwin,” me an ewe mwan apupulu waroto mi arapoto, lap seni ewe fansoun ra feilo souni. Ussun we chok, warotoon ewe Noun Aramas mi arapoto lap seni ewe fansoun sia fen poputa le ekieki ussun an feito. (Rom 13:11-14) Ach mammasaochu a ussun chok me loom, are a lapelo atun ewe fansoun a akkarap ngenikich?

¹⁰ Ika sipwe alleasochisi ewe alluk le “mammasaochu,” mi lamot ach okkononoto. A poolo aloloon lamp an ekkewe limmon fopwul me ra feilo mooni. Ekiekin emon Chon Kraist ikenai mi pwal tongeni rikilo me esap mmonleta ren warotoon Jises. A ina met a fis ngeni ekkoch ekkewe Chon Kraist lon ewe aewin senturi. Epwe pwal tongeni fis ikenai. Iwe, sipwe eisinikich, ‘A ina met a fiffis ngeniei?’​—1 Tesalonika 5:6-8; Ipru 2:1; 3:12; 12:3; Pwarata 16:15.

Oupwe Tinikken Atun Arapotoon ewe Sopwoloon

11. Menni kapas awewe Jises a awewe won mwirin, me a ekis wewe ngeni menni kapas awewe?

¹¹ Lon ewe eu kapas awewe, Jises ese chok pese ngeni noun kewe ar repwe mammasa. Mwirin an awewe ngeniir porausen ekkewe fopwul mi tipatchem me tiparoch, a apasawu porausen ekkewe talent. (Alleani Mattu 25:14-30.) Lapalapan ei kapas awewe a ussun chok ewe kapas awewe ussun ekkewe paun, ewe Jises a awewe won pokiten chommong ra luku pwe “muun Kot epwe chok muttir pwapwalo.”​—Luk 19:11-27.

12. Awewei mwo ewe kapas awewe ussun ekkewe talent.

¹² Lon ewe kapas awewe ussun ekkewe talent, Jises a awewe won emon mwan, a korato ulumon noun slave mwen an epwe sailo. A ngeni emon limu talent, ngeni pwal emon ruu talent, me eu chok ngeni ewe emon​—“ngeni akaemon leir usun chok pwisin ar tufich.” Ese mwaal a wewe ngeni talent mi silifer, aucheaan mi wewe ngeni ukuukun peioffun emon chon angang mi angang 14 ier​—moni watte! Lupwen ewe mwan a liwinto, ekkewe slave ra repotei minne ra fen fori atun ewe “fansoun langattam” ewe mwan ese nom. Ekkewe ruuemon slave ra fen achommongalo ewe moni won fan ruu. Ewe mwan a apasa ngeniir “mi murinno,” me a pwon ngeniir pwe epwe alapalo wiiser kewe, me a pwal apasa: “Kopwe tolong lon chengelin om masta.” Ren an apasa pwe ewe masta a tipepochokkul, ewe slave a fen angei eu talent nge ese fen anganga ewe moni. A aopalo, nge ese fen walo ren chon iseis moni pwe epwe wor winnan. Ewe masta a apasa pwe atewe emon slave mi “ingau me liseangas” pokiten ese fen alisata an ewe masta business. Iwe, a angei seni ewe talent me ewe slave a poutawu lukun “ikewe epwe wor kechiu me akarungi.”

13. Ifa ussun Jises a ussun ewe masta lon ewe kapas awewe?

¹³ Pwal eu sipwe kutta minne ei kapas awewe a liosueta. Ren chok awewe, ewe mwan mi sailo ekis a liosueta an Jises feilo seni noun kewe chon kaeo, feita lang, me witiwit ie ren fansoun langattam tori a nemenem ussun king.b (Kol Fel 110:1-4; Fofor 2:34-36; Rom 8:34; Ipru 10:12, 13) Pwal eu, sipwe tongeni miritiiti eu lesen are kapasen emmwen kich meinisin sipwe achocho le apwonueta. Ifa ena lesen?

14. Ewe kapas awewe ussun ekkewe talent a menlapei menni poraus mi lamot?

¹⁴ Ika sia apilukuluku ewe manau lon lang sise tongeni malo seni are manau esemuch lon paratis won fonufan, a ffat seni an Jises kapas awewe pwe sipwe achocho ngeni fofforun Chon Kraist. Seni ei kapas awewe sia kaeo ewe lamoten ach sipwe tinikken. Seni ewe ranin Pentekos 33 C.E., ekkewe aposel ra isetiu ewe leenien appiru mi murinno. Sia alleani: “Ren chommong kapas [Piter] a pwarata ngenir, o a pwal fonour, o a apasa, ‘Oupwe pwisin amanauakemi seni ei tappin aramas mi pwor.’” (Fofor 2:40-42) Mi watte uwaan an angang! Lupwen ekkewe ekkoch ra fiti ekkewe aposel lon ewe angangen afalafal, ra pwal tinikken, me ewe kapas allim a “mamarita lon fonufan meinisin.”​—Kolose 1:3-6, 23; 1 Korint 3:5-9.

15. Ifa ussun sipwe apwonueta alon ewe lesen lon ewe kapas awewe ussun ekkewe talent?

¹⁵ Chechchemeni mwo minne Jises a foffos ussun atun an uwawu ei kapas awewe​—eu oesini ussun an Jises nonnom. Mi watte minne a anneta pwe an Jises pa·rou·siʹa a fiffis iei me sia arap ngeni muchuloon we. Chechchemeni mwo ifa ussun Jises a rifengenni “ewe sopolon” me ewe angang ekkewe Chon Kraist ra wiisen apwonueta: “Ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.” (Mattu 24:14) Atun ach ekieki ena poraus, sia nikinikin menni lein ekkewe slave? Kopwe eisinuk: ‘Epwe wor popun mi anneta pwe ngang ussun ewe slave mi aopalo minne a fen angei, neman ua fori ina ussun atun ai forfichi pwisin ai we angang? Are a ffat pwe ngang ussun ekkewe slave mi murinno me tuppwol? Ngang ua fen unusen fangelo manauei ngeni kalisitaan an ewe Masta business fansoun meinisin?’

Mammasaochu me Tinikken Atun An Nonnom

16. Ifa ewe lesen ka fen angei seni ekkewe ruu kapas awewe?

¹⁶ Ewer, lukun chok weween minne ra liosueta me oesini won, ekkeei ruu kapas awewe ra ngenikich kapasen pesepes seni auen Jises. Iei an we poraus: Oupwe mammasa; oupwe tinikken, lap seni meinisin atun a pwalo esissinnen an Kraist pa·rou·siʹa. A fiffis iei. Kich sia wesewesen mamasa me tinikken?

17, 18. Jemes a fonoukich le fori met atun an Jises nonnom?

¹⁷ Pwiin Jises we, Jemes, ese nom won ewe Chukun Olif ren an epwe rongorong an Jises oesini; nge mwirin a kaeo ussun, me a fokkun amwochu lamotan. A mak: “Oupwe mosonoson [mosonottam, NW] pwi ami, tori warotoon ewe Samol. Nengeni chon malamal, pwe a witiwiti uwan malamal mi auchea, o a mosonoson ngeni ewe uwa, tori fansoun epwe angei ewe uten mwen o pwal ewe uten mwirin. Iwe, ami oupwe pwal mosonoson [mosonottam, NW]. Oupwe apochokkula letipemi, pun warotoon ewe Samol a chok arapoto.”​—Jemes 5:7, 8.

¹⁸ Jemes a alukuluku aramas pwe Kot epwe apwungu ekkewe mi aeamwaalli ar wouoch, me a pesei Chon Kraist le mosonottam atun ar witiwiti minne Kot epwe fori. Ika emon Chon Kraist ese mosonottam, eli epwe mochen eriaffou aramas pokiten ar ingau me sotun le pwisin siwili minne mi ngau. Esap ita ina ussun pun ewe fansoun kapwung epwe feito. Ina met a ffatelo ren an Jemes we poraus ussun ewe chon atake.

19. Mei fet ewe mosonottam emon chon atake lon Israel epwe eani?

¹⁹ Emon chon atake lon Israel mi amorafeili pwikil epwe witiwit, akkom ren pukutaan ewe pwikil, mwirin ren an maarita, me saingoon, ren ewe ras. (Luk 8:5-8; Jon 4:35) Epwe witiwit fitu maram me fan ekkoch atun an witiwit epwe meefi lolilen. Epwe naf ewe ut mi pungutiu akkom? Nge ifa ussun ewe ut a pungutiu mwirin? Epwe wor man are molumol mi tongeni ataielo ffotan? (Alollo ngeni Sowel 1:4; 2:23-25.) Iwe nge, emon chon atake lon Israel mi chuen tongeni eani lukuluk won Jiowa me rokopwallin an kewe kokkot won fonufan. (Tuteronomi 11:14; Jeremaia 5:24) An ewe chon atake mosonottam a tongeni wewe ngeni an meefi lukulukoch pwe ewe atake epwe uwaoch. A luku pwe minne a witiwiti epwe feito. Epwe fokkun fis!

20. Ifa ussun sipwe mosonottam me ren an Jemes we fon?

²⁰ Neman emon chon atake epwe ekis silei ineet atun epwe fis ewe ras, nge ekkewe Chon Kraist lon ewe aewin senturi rese tongeni alleani ineet epwe fiffis an Jises nonnom. Epwe fokkun feito. Jemes a mak: “Warotoon [Kriik, pa·rou·siʹa] ewe Samol a chok arapoto.” Lupwen Jemes a makkei ekkena kapas, esissinnen an Jises nonnom esaamwo pwalo won unusen fonufan. Nge a pwalo iei! Iwe, epwe ifa ussun ach ekiek lon ei fansoun? Ewe esissin a pwalo. Sia kuna. Sia tongeni apasa ren lukulukoch, ‘Ua kuna pwonuetaan ewe esissin.’ Sia pwal tongeni apasa ren lukulukoch, ‘Jises a nonnom me ewe fansoun mi lamot seni meinisin a chok arapoto.’

21. Sia apposa letipach le fori met?

²¹ Pokiten ena fansoun mi arapoto, mei wor popun sipwe lefareni me apwonueta alon ekkewe lesen lon an Jises kewe kapas awewe. A apasa: “Oupwe mamasa, pun ousap sinei ranin are ewe fansoun.” (Mattu 25:13) Iei ewe fansoun sipwe achocho lon angangen Chon Kraist. Amwo sipwe pwarata iteiten ran ach weweiti alon Jises we. Sipwe mammasa! Sipwe tinikken!

[Footnote]

En Mi Chechchemeni?

◻ Ifa ewe poraus mi lamot ka fen angei seni ewe kapas awewe ussun ekkewe fopwul mi tipatchem me ekkewe mi tiparoch?

◻ Menni fon mi lamot Jises a ngonuk lon ewe kapas awewe ussun ekkewe talent?

◻ Ifa ussun om mosonottam atun an Jises pa·rou·siʹa a ussun ewe mosonottam a nom ren emon chon atake lon Israel?

◻ Met popun ach ei fansoun a amwarar me weires?

[Ekkewe sasing lón pekin taropwe 29]

Ikkefa ekkewe lesen kopwe angei seni ekkewe kapas awewe ussun ekkewe fopwul me ekkewe talent?