Eani Lukuluk Won Alon Jiowa
“Ua luku om kapas.”—KOL FEL 119:42.
EWE sou makkei Kol Fel 119 a aucheani alon Jiowa. Eni iei i Prince Hiskia, noun ewe king seni Jutia. Ekkewe memeef lon ei kol fel a popu seni ngunun Kot ra tipeeu ngeni ekiekin Hiskia, atewe mi “kamwochunuk won ewe Samol mi Lapalap” atun a wiseni ewe wis kingen Jutia. (2 King 18:3-7) Iwe, iei eu mettoch mi enlet: Ewe sou makkei ewe kol a meefi an osupwang lon pekin ngun.—Mattu 5:3.
2 Iei eu poraus mi lamot lon Kol Fel 119, a menlapei aucheaan alon Kot, are an kewe poraus.a Eni fan iten an epwe eu minen achechem, ewe sou mak a atetteli ei kol me ren tettelin ekkewe mesen mak. Ekkewe 176 wokisin ra alongolong won tettelin ekkewe mesen mak lon makken Ipru. Lon ewe akkaewin kapasen Ipru, eu me eu an ewe kol fel 22 wokisin a wor 8 lain mi poputa ren eu chok mesen mak. Ei kol fel a kapas ussun alon Kot, an we alluk, an kewe kapasen achechem, an kewe al, me an kewe afalafal mi pwung. Lon ei lesen me ewe lesen mwirin ei, sipwe kaeo Kol Fel 119 me ekkewe wokisin lon kapasen Ipru mi pwung affoun. Ach ekkekieki ussun kunaen noun Jiowa kewe chon angang lom lom me lon ach ei fansoun epwe apochokkulata ach mirititi ei kol mi popu seni Kot me alapalo ach kilisou fan iten an Kot we Kapas, ewe Paipel.
Sipwe Pwapwa Ika Sipwe Alleasochisi Alon Kot
3 Pwapwa enlet a popu seni ach feffetal lon an Kot we alluk. (Kol Fel 119:1-8) Ika sipwe foffori ena mettoch, Jiowa epwe meefi pwe ‘esor tipisich lon alach kewe.’ (Kol Fel 119:1) Sap minne esor tipisich a wewe ngeni pwe kich mi unusoch, nge a wewe ngeni pwe sia kan achocho ngeni ach sipwe foffori letipen Jiowa Kot. Noa “a fofforoch lein pilon kana” pokiten i emon mwan mi “feffetal ren ewe Kot mi enlet.” Ena mwan mi tuppwol me an we famili ra manau atun ewe Noter pokiten ra aleni ewe alen manau Jiowa a aiti ngenir. (Keneses 6:9; 1 Piter 3:20) Pwal ina chok ussun, ach sipwe kuna amanau seni sopoloon ei ototen fonufan a alongolong won ach ‘akkalleasochisi an Kot kewe alluk,’ weween, ach sipwe foffori letipan.—Kol Fel 119:4.
4 Jiowa esap fokkun likitikichelo ika sipwe ‘mwareiti i ren eu letip mi pwung me akkalleasochisi an kewe alluk.’ (Kol Fel 119:7, 8) Kot ese poutalo ewe sou emmweni ekkewe chon Israel itan Josua, ewe emon mi apwonueta ewe fon pwe epwe ‘alleani lon ewe puken alluk le ran me le pwin pwe epwe tongeni apwonueta mettoch meinisin minne a mak lon.’ A atufichi an epwe sopwoch me mwokutukut ren tipatchem. (Josua 1:8) Atun mwo epwele much manauan, Josua a chuen mwareiti Kot, iwe, a tongeni achema ngeni ekkewe chon Israel: “Ami meinisin oua silei seni lelukemi me letipemi, pwe ewe Samol mi Lapalap a ngenikemi ekewe mettoch mi murina meinisin a pwon ngenikemi. Iteiten ekewe pwon a eani ngenikemi ra pwonueta, nge esap wor eu me leir esap pwonueta.” (Josua 23:14) Ussun chok Josua me ewe sou makkei Kol Fel 119, sipwe tongeni kuna pwapwa me sopwoch ren ach sipwe mwareiti Jiowa me eani lukuluk won alon kewe.
An Jiowa We Kapas A Alimochukich
5 Sipwe tongeni limelimoch lon pekin ngun ika sipwe mammasa me ren alon Kot. (Kol Fel 119:9-16) Epwe ina ussun inaamwo ika semach kewe me inach rese fen isetiu eu leenien appiru mi murinno. Inaamwo ika semen Hiskia a fel ngeni ekkewe uluulun, nge Hiskia a ‘alimochu an we al,’ eni seni etipetipaen ekkewe chon lukun. Met epwe fis ika emon sarafo mi angang ngeni Kot ikenai a tipis watte? Aier, iotek, me alillis seni seman kewe me inan, me pwal seni ekkewe chon Kraist elter repwe tongeni alisi i pwe epwe ussun chok Hiskia me pwal ‘alimochu an we al me mammasa.’—Jemes 5:13-15.
6 Inaamwo ika Rehap me Rut ra manau langattam fansoun me mwen an a mak Kol Fel 119, nge ra ‘alimochu ar we al.’ Reap, i emon fin-lisou seni Kenan, nge a itefoulo pokiten an fel ngeni Jiowa ren luku. Rut, emon fin Moap, a likitalo pwisin an kewe kot, a angang ngeni Jiowa, me a alleasochisi an kewe alluk ngeni Israel. (Rut 1:14-17; 4:9-13) Ekkena ruuemon fefin, esap ir fin Israel, ra ‘mammasa me ren alon Kot’ me ra wiseni ewe wis mi fokkun amwarar ar ra nom lon tettelin mwirimwirin samasamen Jises Kraist kewe.—Mattu 1:1, 4-6.
7 “Ekiekin leluken aramas a ngau seni lekisikisir,” nge ekkewe aluwol me fopwul ra tongeni feffetal won efoch al mi limoch, pwal mwo nge lon ei fonufan mi ingau fan an Satan nemenem. (Keneses 8:21; 1 Jon 5:19) Atun Taniel me chienan kewe ulumon aluwol chon Ipru ir chon siamu lon Papilon, ra ‘mammasa me ren alon Kot.’ Awewe chok, rese alimengaua inisir “ren anen ewe king mongo.” (Taniel 1:6-10) Ekkewe chon Papilon ra ochei ekkewe man mi limengau, ekkewe man mi pinepin me ren ewe Allukun Moses. (Lifitikos 11:1-31; 20:24-26) Rese akusaalo chaan ekkewe man ra nielo fansoun meinisin, me an ekkewe chon Papilon ochei fituken man mi chcha a atai an Kot we alluk ussun chcha. (Keneses 9:3, 4) Iwe, esap eu minen amairu pwe ekkewe fomon chon Ipru rese pwal ani anan ewe king! Ekkena aluwol chon fel ngeni Kot ra akkamwochu ar limoch lon pekin ngun me isetiu eu leenien appiru mi murinno.
Alon Kot kewe Repwe Minen Alillisin Ach Tuppwol
8 A lamot ach aucheani alon Kot kewe fan iten ach sipwe akkamwochu ach tuppwol ngeni Jiowa. (Kol Fel 119:17-21) Ika sipwe ussun chok ewe sou makkei ewe kol fel, sipwe fokkun mochen weweiti “ekkewe mettoch mi amwarar” ussun an Kot kewe alluk. Fansoun meinisin sipwe ‘monneiti an Jiowa afalafal mi pwung’ me pwarata ach ‘tongei an kewe kapasen achechem.’ (Kol Fel 119:18, 20, 24) Ika sia fen koran fangelo manauach ngeni Jiowa, iwe, sia ‘fokkun mochen ewe chonun oup mi enlet seni an we kapas’? (1 Piter 2:1, 2) A lamot ach sipwe weweiti ekkewe popun afalafal seni ewe Paipel pwe sipwe tongeni wewefichiti me apwonueta an Kot we alluk.
9 Eni sia fen acheni an Kot kewe kapasen achechem, nge met epwe fis ika ekkewe “samol” repwe tipimwaal ngenikich? (Kol Fel 119:23, 24) Ikenai, fan chommong ekkewe sou nemenem ra sotun erianikich pwe sipwe atekiatai allukun aramas mwen allukun Kot. Lupwen allukun aramas a u ngeni letipen Kot, met sipwe fori? Ach tongei an Kot we kapas epwe alisikich le akkamwochu ach tuppwol ngeni Jiowa. Ussun chok noun Jises Kraist kewe aposel mi kuna riaffou, sipwe apasa: “Sipwe alleasochisi Kot lap seni aramas.”—Fofor 5:29.
10 Sia tongeni tuttuppwol ngeni Jiowa pwal mwo nge lon ekkewe fansoun mi fokkun weires. (Kol Fel 119:25-32) Ika sipwe amwochu ach tuppwol ngeni Kot, a lamot ach sipwe tipemecheres le etiwa aitien Kot kewe me tingormau ngeni pwe epwe asukulakich. Iwe, a pwal lamot ach sipwe filata “ewe alen tuppwol.”—Kol Fel 119:26, 30.
11 Hiskia, eni ewe emon mi wisen makkei Kol Fel 119, a filata “ewe alen tuppwol.” A fori ena inaamwo ika a nonnom lein ekkewe chon fel mi chofona me chon le imwen ewe king ra esiita i. Ese mwaal, ‘ngunun we a telilo ren chourek’ pokiten ekkena mettoch. (Kol Fel 119:28) Nge Hiskia a eani lukuluk won Kot, i emon king mi murinno, me a foffori “mine a pwung me fan mesen ewe Samol mi Lapalap.” (2 King 18:1-5) Ren ach eani lukuluk won Kot, iwe, sipwe pwal tongeni likiitu fan sossot me akkamwochu ach tuppwol ngeni Kot.—Jemes 1:5-8.
An Jiowa we Kapas a Aworato Pwora
12 Ach alleasochisi emmwenien an Kot we kapas a awora ngenikich pwora mi lamot fan iten ach sipwe atawei ekkewe sossot lon manauach. (Kol Fel 119:33-40) Fan tipetekison sipwe kutta an Jiowa emmwen pwe sipwe tongeni alleasochisi an we alluk “ren unusen letipach.” (Kol Fel 119:33, 34) Ussun chok ewe sou makkei kol fel, epwe iei ussun ach tingorei Kot: “Kopwe emmweni letipei ngeni om afalafal, nge sap ngeni mochenia,” weween, mocheniangau. (Kol Fel 119:36) Ussun chok ewe aposel Paul, sia “manauesini manau mi wenechar lon mettoch meinisin.” (Ipru 13:18) Ika emon poss a mochen ach sipwe fori eu mettoch mi pwor, sipwe achocho le pwora pwe sipwe alleasochis ngeni an Kot kewe emmwen—iwe, fansoun meinisin, Jiowa a kan efeiochu ena foffor. Iwe, a alisikich pwe sipwe nemenifichi ach kewe mocheniangau meinisin. Ina minne, sipwe iotek: “Kopwe okullu mesei pwe usap nengeni ekkewe mettoch mi mwal.” (Kol Fel 119:37) Sisap mocheniaiti mettoch mi lamot-mwaal Kot a oput. (Kol Fel 97:10) Epwe alisikich ach sipwe su seni chowean puk me sasing mi efisata mocheniangauen fitukach me pwal angangen rong.—1 Korint 6:9, 10; Pwarata 21:8.
13 Silei mi enlet ussun an Kot we kapas a apworaikich le afalafala aramas. (Kol Fel 119:41-48) Iwe, a lamot ngenikich pwora pwe sipwe ‘polueni emon mi turunufaseikich.’ (Kol Fel 119:42) Fan ekkoch, sipwe ussun chok noun Jises kewe chon kaeo mi iotek fan riaffou: “Samol, . . . kopwe pwal mut ngeni noum keei chon angang pwe repwe fakkun pworacho le apasata om kapas.” Iwe, ifa mwiriloon? “Ir meinisin ra ur ren ewe Ngun mi Fel, o ra pworacho le apasata ewe kapasen Kot.” Iwe, ewe chok Samol mi Lapalap epwe apworaikich pwe sipwe afalafala an kapas ren pwora.—Fofor 4:24-31.
14 Sipwe eani ewe pwora pwe sipwe afalafal, nge sisap sau ika sipwe aucheani “ewe kapas enlet” me ‘fansoun meinisin sipwe alleasochisi an Kot we alluk.’ (Kol Fel 119:43, 44) Ach tinikken le kakkaeo an Kot we Kapas ewe Paipel epwe alipwakochukich pwe sipwe ‘kapas ussun an kewe kapasen achechem mwen mesen ekkewe king.’ (Kol Fel 119:46) Iotek me an Jiowa we ngun repwe pwal alisikich le apasa minne mi fich lon eu lapalap mi murinno. (Mattu 10:16-20; Kolose 4:6) Paul a pwora le kapas ngeni ekkewe sou nemenem lon ewe aeuin senturi ussun an Kot kkewe kapasen achechem. Awewe chok, a afalafal ngeni Felix, ewe kepinan Rom mi “auseling ngeni ussun luku Kraist Jises.” (Fofor 24:24, 25) Paul a pwal afalafal ngeni Festus ewe Kepina me King Akripa. (Fofor 25:22–26:32) Ren an Jiowa alillis, sipwe pwal tongeni afalafal fan pwora, iwe, sisap “sau ren ewe kapas allim.”—Rom 1:16.
An Kot We Kapas A Aururuukich
15 An Jiowa we Kapas a awora kapasen auruur mi lukuchar. (Kol Fel 119:49-56) Mei wor fansoun lupwen epwe fokkun lamot ngeni emon me emon leich kapasen aururu. Inaamwo ika kich Chon Pwarata Jiowa sia afalafal ren pwora, nge fan ekkoch, ekkewe “chon lukulukumang”—ekkewe mi lamalam tekia ngeni Kot—repwe ‘turunufaseikich’. (Kol Fel 119:51) Iwe nge, atun sipwe iotek, eni sipwe chechemeni ekkoch poraus mi murinno seni an Kot we Kapas, iwe, epwe ina ussun sipwe ‘pwisin kuna aururu.’ (Kol Fel 119:52) Atun sipwe iotek, eni sipwe chechemeni eu alluk are kapasen alongolongun alluk seni Paipel mi aururukich me awora pwora mi lamot ngenikich lon fansoun weires.
16 Ekkewe mi lamalam tekia mi turunufasei ewe sou makkei ewe kol fel, ir ekkewe chon Israel—chon ewe muu mi fen imulo fan iten eu popun mi fel, ar repwe fel ngeni Kot. A ifa me assauer! Iwe nge, sisap ussur nge sipwe apposa letipach pwe sisap riki seni an Kot we alluk. (Kol Fel 119:51) Lupwen a toriir riaffou seni ekkewe chon Nazi me pwal ekkoch lon ekkewe ier, fite ngerou noun Kot kewe chon angang ngeni Kot rese fokkun rikilo seni ekkewe alluk me popun alongolongun alluk lon an Kot we Kapas. (Jon 15:18-21) Iwe, esap chou ngenikich ach sipwe alleasochisi Jiowa, pun an kewe alluk ra ussun chok ekkewe kol mi aururuukich.—Kol Fel 119:54; 1 Jon 5:3.
Sipwe Kilisou Ngeni Alon Jiowa Kewe
17 Sipwe annetata ach kilisou fan iten alon Jiowa ren ach atipeeufengenni manauach ngeni. (Kol Fel 119:57-64) Ewe sou makkei ewe kol fel a ‘pwonei pwe epwe alleasochisi alon Jiowa kewe,’ iwe, pwal mwo nge ‘lukenipwin a pwata pwe epwe apasa an kilisou ngeni Kot pokiten An apwung mi pwung.’ Ika sipwe pwata le pwin, epwe ifa me murinnoon ena fansoun pwe sipwe apasaou ach kilisou ngeni Kot lon iotek! (Kol Fel 119:57, 62) Ach aucheani alon Kot epwe amwokutukich pwe sipwe kutta ekkewe afalafal seni Kot me pwapwaesini ach ‘chiechi ngeni ekkewe mi niokusiiti Jiowa’—ir kewe mi lingemwareiti Kot. (Kol Fel 119:63, 64) Io epwe tongeni kuna chiechi mi murinno seniir me won ei fonufan?
18 Lupwen sipwe iotek ren unusen letipach me fan tipetekison sipwe tingorei Jiowa an epwe asukulaakich, sipwe ‘apotetei mesan’ ren ach pwapwaesini an achenikich. A akkaeuin lamot ngenikich ach sipwe iotek lupwen ‘selin ekkewe aramas mi ingau ra serakich.’ (Kol Fel 119:58, 61) Jiowa a tongeni fichielo ekkewe selin eppet an ekkewe mi oputakich me angasakichelo pwe sipwe tongeni sopweelo le afalafala ewe Muu me foffori ewe angangen foralo chon kaeo. (Mattu 24:14; 28:19, 20) A kan fiffis ena mettoch lon ekkewe fonu ikewe a pinepin ach angang ie.
Eani Lukuluk Won Alon Kot
19 Ach luku Kot me alon kewe a alisikich le mokurechou fan osukosuk me sopweelo le foffori letipan. (Kol Fel 119:65-72) Inaamwo ika ekkewe mi lamalam tekia ra ‘tipimwaal ngeni i ren ar kapas chofona,’ nge ewe sou makkei ewe kol fel a kolu: “A fen murinno ngeniei pwe ua kuna riaffou.” (Kol Fel 119:66, 69, 71) Epwe ifa ussun epwe murinno ngeni emon lein noun Jiowa kewe chon angang an epwe kuna riaffou?
20 Ese mwaal lupwen sipwe kuna riaffou, sipwe siongau ngeni Jiowa, iwe, epwe efisi ach sipwe arap ngeni Kot. Eni sipwe alapalo ach fansoun kakkaeo an Kot we Kapas me alapalo ach achocho le apwonueta alon lon manauach. Iwe, mwiriloon, epwe lapelo pwapwaan manauach. Nge met epwe fis ika ach kewe foffor fan osukosuk epwe pwarata ekkoch lapalap ese och, awewe chok ren songokai are lamalam tekia? Ren iotek me alillis seni an Kot we Kapas me an we ngun, sipwe tongeni pworacho ngeni ekkena apwangapwang me alapalo ach ‘pwisin pwilitalong ewe lapalap mi fo.’ (Kolose 3:9-14) Pwal eu, ach luku epwe pochokkulelo lupwen sipwe likiitu fan riaffou. (1 Piter 1:6, 7) Paul a kuna feioch seni an kewe riaffou pun ra alapalo an apilukuluk won Jiowa. (2 Korint 1:8-10) Sia mut ngeni ekkewe riaffou mi tottorikich pwe repwe aochukichelo?
Eani Lukuluk Won Jiowa Iteiten Fansoun Meinisin
21 Alon Kot a awora eu popun mi pwung ach sipwe eani lukuluk won Jiowa. (Kol Fel 119:73-80) Ika sipwe wesewesen lukuluk won ewe Chon Forikich, esap wor popun ach sipwe sau. Iwe nge, pokiten fofforun ekkewe ekkoch aramas, ina epwe lamot ngenikich aururu me eni sipwe mochen eani ei iotek: “Kopwe asaua ekkewe aramas mi lukumang.” (Kol Fel 119:76-78) Lupwen Jiowa a kan asaua ena sokkun aramas, epwe pwarata ar kewe foffor mi ingau me pwal epinalo itan we mi pin. Sia tongeni luku pwe ekkewe chon eriaffou noun Kot kewe aramas resap wesewesen kuna och feioch. Awewe chok, ese fis fan eu me lom—me esap pwal fokkun fis—pwe repwe arosaalo Chon Pwarata Jiowa meinisin, ir kewe mi lukuluk won Jiowa ren unusen letiper.—An Salomon Fos 3:5, 6.
22 Alon Kot a apochokkulata ach lukuluk won i lupwen a torikich riaffou watte. (Kol Fel 119:81-88) Pokiten ekkewe mi lukulukumang ra eriaffou i, ewe sou makkei kol fel a meefi “usun chok eu rume unuch lon atuatun ekkei.” (Kol Fel 119:83, 86) Lon fansoun Paipel, aramas ra anonno konik, wain, me met kan lon ekkewe rume mi for seni unuchen man. Lupwen ra po, ekkeei rume repwe nnurulo ika repwe ittiu lon eu ruum mi ur ren otuotun ekkei. Kese mwo meefi “ussun chok eu rume unuch lon atuatun ekkei” lon fansoun weires are riaffou? Ika a ina ussun, kopwe eani lukuluk won Jiowa me iotek: “Kopwe akamwochu manauei ren om tong enlet, pwe upwe alleasochisi ekkewe afalafal seni lon auom.”—Kol Fel 119:88.
23 Minne sia fen kaeo lon ei aeuin esopun Kol Fel 119 a aiti ngenikich pwe Jiowa a pwarata tong enlet ngeni noun kewe chon angang pokiten ar lukuluk won alon we me ra pwapwaesini an kewe alluk, an kewe kapasen emmwen, me an kewe kapasen achechem. (Kol Fel 119:16, 47, 64, 70, 77, 88) A pwapwa pwe ir mi pacheoch ngeni i ra mammasa me ren alon we. (Kol Fel 119:9, 17, 41, 42) Iei, atun ka ekiekin kaeo lusun ei kol fel mi apochokkul, kopwe tongeni pwisin eisinuk, ‘Ua wesewesen mut ngeni alon Jiowa an epwe asarama ai we al?’
[Footnotes]
a Ei poraus a kapas ussun an Jiowa we poraus, nge sap unusen masouen ewe Paipel—an Kot we Kapas.
Ifa Ussun Kopwe Polueni?
• Pwapwa enlet a popu seni met?
• Ifa ussun alon Jiowa a alimochukich lon pekin ngun?
• Ifa ussun alon Kot a aworato pwora me aururu aramas?
• Pwata sipwe luku Jiowa me alon kewe?
[Ekkewe kapas eis fan iten ewe lesen]
1. Met ka silei ussun io a makkei Kol Fel 119 me ifa lapalapan kewe?
2. Ifa itelapen Kol Fel 119, me ifa anapanapen ewe kol?
3. Awewei mwo me eani kapas awewe mi affata weween an emon esor tipisin.
4. Ach pwapwa me sopwoch a alongolong won met?
5. (a) Awewei mwo ifa ussun sipwe tongeni limochulo lon pekin ngun. (b) Ifa ewe alillis epwe tongeni kawor ngeni emon sarafo mi tipis watte?
6. Io kkewe fefin mi ‘alimochu ar al me mammasa me ren alon Kot’?
7. Ifa ussun Taniel me pwal ulumon atin Ipru ra isetiu eu leenien appiru mi murinno ussun ewe mettoch akkamwochu limochuch lon pekin ngun?
8. Ifa ewe ekiek me sile a lamot ngenikich ika sipwe mirititi me apwonueta an Kot we alluk?
9. Met sipwe fori ika an Kot we alluk a u ngeni minne aramas repwe kutta senikich?
10, 11. Awewei mwo ifa ussun sipwe tongeni akkamwochu ach tuppwol ngeni Jiowa fan sossot mi fokkun weires.
12. Ifa ussun sipwe tongeni pwisin apwonueta Kol Fel 119:36, 37?
13. Ifa ussun noun Jises kewe chon kaeo mi kuna riaffou ra angei ewe pwora mi lamot ngeniir fan iten ar repwe pworacho le afalafal?
14. Met a alisikich pwe sipwe afalafal fan pwora, ussun chok Paul?
15. Ifa ussun an Kot we Kapas a aururuukich lupwen aramas ra turunufaseikich?
16. Met noun Kot kewe chon angang rese fori inaamwo ika ra kuna riaffou?
17. Ach aucheani alon Kot a amwokutukich ach sipwe fori met?
18. Ifa ussun Jiowa a polueni ach kewe iotek lupwen ‘selin ekkewe mi ingau ra serakich’?
19, 20. Pwata epwe tongeni murinno ach sipwe kuna riaffou?
21. Met a fis lupwen Kot a asaua ekkewe mi lukulukumang?
22. Ifa ussun ewe sou makkei ewe kol fel a “ussun chok eu rume seni unuchan man lon atuatun ekkei”?
23. Met sia fen kaeo seni Kol Fel 119:1-88, me met sia tongeni pwisin eisinikich atun sia ekiekin kaeo Kol Fel 119:89-176?
[Lios lon pekin taropwe 22]
Rut, Reap, me ekkewe atin Ipru chon eolo lon Papilon ra ‘mammasa me ren alon Kot’
[Lios lon pekin taropwe 23]
Fan pwora Paul a ‘kapas ussun an Kot kewe kapasen achechem mwen mesen ekkewe king’