Ifa Ukuukun Watteen Ami Tong?
“Kopwe tongei chon orum usun chok pwisin en.”—MATTU 22:39.
1. Ika sia tongei Jiowa, met popun sipwe pwal tongei chon oruch?
LUPWEN aramas ra eisini Jises menni alluk a lap seni meinisin, a polueni: “Kopwe tongei Jiowa om Kot ren unusen letipom, o ren unusen ngunum, o ren unusen ekiekum.” Mwirin, a fos ussun pwal eu alluk mi ekis wewe chok me ewe aewin: “Kopwe tongei chon orum usun chok pwisin en.” (Mattu 22:37, 39) Ewer, tong fan iten chon orur ina esissinen emon Chon Kraist. Pwungun pwe, ika sia tongei Jiowa sipwe pwal tongei chon oruch. Pwata? Pokiten kich sia pwaralo ach tongei Kot ren ach alleasochisi an we Kapas, me an we alluk ngenikich pwe sipwe tongei chon oruch. Iwe, ika sise tongei pwiich kewe, ach tongei Kot ese pwal enlet.—Rom 13:8; 1 Jon 2:5; 4:20, 21.
2. Sipwe tongei chon oruch ren met sokkun tong?
2 Lupwen Jises a apasa pwe sipwe tongei chon oruch, ese chok fos ussun chiechi. Nge a pwal fos ussun eu sokkun tong mi sokko seni ewe a nonnom lefilen famili are lefilen mwan me fefin. A fos ussun ewe sokkun tong Jiowa a pwaralo ngeni noun kewe chon angang mi fen fangelo manauer me ewe esin tong ra pwaralo ngeni i. (Jon 17:26; 1 Jon 4:11, 19) Jises a miritiiti pwe emon Chon Jus mi eani ewe wiis sou mak a kapas ren tipatchem lupwen atewe a tipeeu ngeni an Jises kapas pwe aramas repwe tongei Kot ‘ren unusen letiper o ren unusen ar wewe o ren unusen ar tufich.’ (Mark 12:28-34) Mei pwung alon atewe. Meefiach me ekiekich ra riri ngeni ewe tong emon Chon Kraist epwe amaaraata fan iten Kot me chon orun. Ekiekich a emmweni ewe tong sia meefi lon letipach.
3. (a) Ifa ussun Jises a asukula emon mwan ‘a sileefichi ewe Alluk’ ren an epwe awatteelo an ekiek ussun io kewe chon orun? (b) Ifa ussun an Jises kapas awewe epwe weneiti Chon Kraist ikenai?
3 Luk a makkei pwe lupwen Jises a apasa pwe sipwe tongei chon oruch, “emon sou alluk” a eis: “Io mi chon ori?” Jises a polueni ren eu kapas awewe. Emon mwan chon sola ra awata me a pout seni noun moni. A nom unukkun efoch aal me a nukunuma. Emon samol fel a feito akkom, mwirin, emon re Lifai. Ra chok amonungau seni. Iwe, emon re Sameria a feito. Lupwen a kuna ewe mwan a feiengau a fokkun kirokiroch ngeni. Iwe, menni lein ekkewe ulumon wesewesen chon orun ewe mwan mi feiengau? A ffat poluen ena kapas eis. (Luk 10:25-37) Neman ewe sou alluk epwe mairu lupwen Jises a era pwe ewe re Sameria a tongei chon orun lap seni ewe samol fel me ewe re Lifai. Pwungun pwe, Jises a sotun alisi ewe mwan pwe epwe alapalo an tongei chon orun. Chon Kraist repwe pwal pwaralo ena sokkun tong. Ekieki mwo chokkewe repwe tongei.
Tong Lon Ewe Famili
4. Ikkewe Chon Kraist repwe akkom pwaralo tong ia?
4 Chon Kraist ra tongei chon ar kewe famili—emon fefin a tongei puluwan, emon mwan a tongei puluwan, sam me in ra tongei nour kewe. (An Salomon Afalafal 9:9; Efisus 5:33; Taitos 2:4) Pwungun pwe ei esin tong a nonnom lon lape ngeni ekkewe famili meinisin. Iwe nge, porausen mufesen, an mwan are fefin eriaffou puluwer, me ar tumunungau are eriaffou mwaalli semirit a pwarata pwe ewe famili a osukosuk ikenai me eli ekkewe ririin tumunu ewe famili me loom ese chuen naf. (2 Timoti 3:1-3) Ika ar famili epwe sopwoch, mi lamot ngeni Chon Kraist eu sokkun tong a nom ren Jiowa me Jises.—Efisus 5:21-27.
5. Sam me in ra kutta alillis seni io ren ar repwe tumunu nour kewe, me met mwiriloon?
5 Sam me in Chon Kraist ra eani ewe ekiek pwe nour kewe ra ussun chok eu liffang seni Jiowa repwe wiisen tumunuochu, me repwe kutta alillis seni Jiowa ren ar repwe apwonueta wiiser. (Kol Fel 127:3-5; An Salomon Fos 22:6) Iei ussun ra amaaraata an Chon Kraist tong, me ena tong epwe tumunu nour kewe seni etipetipangauen fonufan. Ina popun, chommong sam me in Chon Kraist ra meefi ena esin pwapwa a nom ren emon inelap lon Netherlands. Mwirin noun we at a papatais—emon lein ekkewe 575 ra papatais lon ena fonu lon ewe ier—a makkei: “Iei, ai angang lon ewe 20 ier a fen lo a uwaoch. Unusen ewe fansoun me angang—pwal metek, achocho, me riaffou—ua fen monukiirelo.” A ifa me watteen an pwapwa lupwen noun we a pwisin filata le angang ngeni Jiowa. Chommong ra fen kaeo ifa ussun repwe tongei Jiowa seni semer kewe me iner mi kapachelong lein ekkewe 31,089 chon afalafal lon Netherlands lon ewe ier.
6. Ifa ussun ewe sokkun tong Kraist a eani epwe apochokkula ekkewe ririin pupulu?
6 Paul a apasa pwe tong a “ririfengenni o aunusochualo mettoch meinisin,” me a tongeni tumunu eu pupulu pwal mwo nge atun fansoun osukosuk. (Kolose 3:14, 18, 19; 1 Piter 3:1-7) Lupwen emon mwan won Rurutu, eu fonu kukkun 450 mwail seni Tahiti, a poputa le kaeo ewe Paipel ren Chon Pwarata Jiowa, puluwan we a fokkun song. Lo, lo, lo, neminnan a su seni ewe mwan, feilo Tahiti, me a uwei nour kewe meinisin. Nge atewe a chuen tongei puluwan we me a tittiilo moni me kokkori won phone ren an epwe eis ika neminnewe me nour kewe ra osupwangen och mettoch. Iei ussun a sotun apwonueta wiisen emon chon Chon Kraist. (1 Timoti 5:8) A ikkiotek pwe i me chon an famili meinisin repwe nomfengen sefal, me lo, lo, lo, puluwan we a liwinto. Lupwen ewe fefin a nom sefal lon imwer, ewe mwan a sotun fori mettoch meinisin ren “tong, likiitu, me umoumoch.” (1 Timoti 6:11) Lon 1998, atewe a papatais me a fokkun pwapwa lupwen puluwan we a apasa pwe a mochen kaeo lon ewe Paipel. Ena Bible Study eu me lein ekkewe 1,351 a fiffis lon ekkewe leeni ewe Tahiti Branch a wiisen tumunu.
7. Me ren emon mwan lon Tois, met a fen apochokkula an pupulu?
7 Lon Tois emon mwan a oputa an puluwan we kaeo ewe Paipel me a luku pwe Chon Pwarata Jiowa ra fen otupu i. Iwe, mwirin, atewe a makkei echo taropwe ngeni ewe emon a fos akkom ngeni puluwan: “Kilisou ren om fos ngeni puluwei we ussun Chon Pwarata Jiowa. Akkom, use saani pokiten unusen ewe poraus mi ngau ua fen rong ussur. Nge, iei, mwirin ai fiti puluwei we ngeni ekkoch ekkewe mwich, ua silei pwe ua fen mwaallilo lon ai ekiek. Ua silei pwe ua rongorong ewe enlet, me pokiten ena enlet am pupulu a pochokkulelo.” A kapachelong chommong famili lein ekkewe 162,932 Chon Pwarata Jiowa lon Tois me ekkewe 1,773 won ekkewe fonu fan tumunuun ewe Tahiti Branch.
Tongei Pwiich Kewe
8, 9. (a) Io a asukulakich pwe sipwe tongei pwiich kewe, me tong a amwokutukich le fori met? (b) Awewei mwo ifa ussun tong epwe alisata an pwiich kewe mochen alillisfengen.
8 Paul a ereni ekkewe Chon Kraist lon Tesalonika: “Kot a fen aiti ngenikemi pwe ami oupwe tongfengen lefilemi.” (1 Tesalonika 4:9) Ewer, chokkewe mi ‘kaeo seni Jiowa’ ra tongefengenniir. (Aisea 54:13) Ar tong a pwalo ren foffor, ussun chok Paul a affata lupwen a apasa: “Oupwe angangfengen lefilemi ren tong.” (Kalesia 5:13; 1 Jon 3:18) A ina met ra fori lupwen ra chuuri ekkewe mi semmwen, pesei chokkewe mi letipengau, me apochokkula ekkewe mi apwangapwang. (1 Tesalonika 5:14) Ach pwaralo tong ussun emon Chon Kraist a alisata nonnomun me watteeloon ach paratis lon pekin ngun.
9 Lon ewe Ancón Mwichefel—eu me lein ekkewe 544 mwichefel lon Ecuador—ekkewe brother ra pwaralo tong lon och lapalap mi murinno. Pokiten eu watten osukosuken moni, ese chuen wor angang me peiof. Iwe, ina popun ekkewe chon afalafal ra ekiekin amomo mongo ngeni ekkewe chon atau lupwen wesin ar atau le pwin. Meinisin ra angangfengen, kapachelong ekkewe semirit. Ra kan poputa kulok 1:00 ulungach pwe ewe mongo epwe fen kuk me wes mwen kulok 4:00 lupwen ekkewe chon atau repwe liwinto. Ra fen nounou ewe moni tolong fan iten osupwangen emon me emon. Ar alillisfengen a pwaralo ewe esin tong a nonnom lein Chon Kraist.
10, 11. Ifa ussun sipwe tongeni pwarata tong ngeni pwiich kewe sise fen chuchuuri?
10 Iwe nge, ach tong esap chok pwalo ngeni ekkewe Chon Kraist sia fen silei. Ewe aposel Piter a apasa: “Oupwe tongei ewe mwichen pwipwi meinisin.” (1 Piter 2:17) Sia tongei pwiich kewe meinisin pokiten ir pwal chon fel ngeni Jiowa Kot. Fansoun osukosuk mi tongeni awora eu fansoun sipwe pwaralo ei tong. Ren chok awewe, atun ewe 2000 service ier, nooter watte ra ataielo Mozambique, me eu maun lon Angola a awoungaualo chommong. Chommong lein ekkewe 31,725 lon Mozambique me ekkewe 41,222 lon Angola ra fen feiengau. Iwe, Chon Pwarata lon South Africa ra fen tiinalo chommong pisek ren ar repwe alisi pwiir kewe lon ekkena fonu. Ar tipemecheres le liffangelo seni ar “pisekisek” a pwarata ar tongei pwiir kewe mi osupwang.—2 Korint 8:8, 13-15, 24.
11 Tong a pwal pwalo lupwen pwiich kewe lon chommong fonu ra asor fan iten kautaan Kingdom Hall me Assembly Hall lon ekkewe fonu mi ekis woungau. A ina ussun met a fen fis lon Solomon Islands. Inaamwo ika a wor fitikoko lon ena leeni nge, lon ewe ier, chochoon ekkewe chon afalafal a lapelo won 6-percent me a tori 1,697. Ra osupwangen eu Assembly Hall. Inaamwo ika chommong chon wiliposun ena fonu ra su seni fonuer pokiten ewe fitikoko lon ena leeni, nge pwiich kewe seni Australia ra feito ren ar repwe aueta ewe imw watte. Lo, lo, lo ekkewe chon alillis ra pwal su nge mwen ar feilo ra fen aiti ngeni pwiich kewe seni ena fonu ifa ussun repwe awesalo ewe longolong. Kinikinin ewe imw mi ffor seni mecha ra fen tinato seni Australia, me wesiloon ewe imw—lupwen aramas ra fen likitalo ar angang won chommong imw—epwe awora eu minen alingalo iten Jiowa me pwaralo ewe tong a nonnom lefilen pwipwi.
Ussun Chok Kot, Sia Tongei Ewe Fonufan
12. Ifa ussun sipwe appiru Jiowa lon ach ekiek ussun chokkewe rese eani ach luku?
12 Sipwe chok tongei aramasach me pwiich kewe? Aapw, sisap ina ussun ika kich chon “appiru Kot.” Jises a apasa: “Pwe a chok iei usun an Kot tongei fonufan, pwe a fangelo Noun we Alaemon pwe iteiten aramas meinisin mi luku i esap poutmwalilo, nge epwe kuna manau esemuch.” (Efisus 5:1; Jon 3:16) Sipwe ussun chok Jiowa Kot, sipwe pwarata tong ren ach kewe foffor ngeni meinisin—esap ngeni chok ir kewe mi eani ach luku. (Luk 6:35, 36; Kalesia 6:10) Ewe foffor mi lap seni meinisin mi pwarata tong ina ach afalafala ewe kapas allim ussun ewe Muu me ach ereni aramas ussun an Kot fofforun tong mi lap seni meinisin. Ika aramas repwe auseling, repwe tongeni kuna ar amanau.—Mark 13:10; 1 Timoti 4:16.
13, 14. Ikkefa ekkoch porausen pwiich kewe mi pwaralo tong ngeni chon lukun, ikaamwo a weires ngenir le fori?
13 Ekieki mwo porausen fomon special pioneer lon Nepal. Ra wiisen afalafal lon eu telinimw a nonnom notou eerun ewe fonu. Lon ekkewe limu ier a lo, ra pwaralo ar tong ren ar mosonottam le afalafala aramasen ewe telinimw me ekkewe kukkun sopw lukun ewe telinimw. Ren ar repwe tori ekkewe leeni meinisin, ra chok wawa paisiken me fan ekkoch ewe pwichikkar a lap seni 100 degree. Ar tong me “likiitu lon fofor murinno” a uwaoch lupwen eu mwichen book study a poputa lon eu me lein ekkewe kukkun sopw. (Rom 2:7) Fan March 2000, 32 ra feito auselinga ewe public talk lupwen ewe circuit overseer a chuuriir. Lon ewe ier, a tori 430 chon afalafal lon Nepal—a lapelo won 9 percent. Jiowa a fokkun efeiochu ewe achocho mi fiti tong pwiich kewe ra pwaralo lon ena fonu.
14 Lon Colombia, ekkoch mi eani ewe wiis special pioneer ren fitu maram ra feilo afalafal ngeni eu einangen aramas itan Wayuu. Ren ar repwe fori ei angang, ra wiisen kaeo eu minefoon fos. Ar tong a uwaoch pun 27 ra feito auselinga eu afalafal inaamwo ika a punguwatte. Ei esin achocho mi fiti tong a fen alisata lapeloon chon afalafal lon Colombia won 5-percent me chochoon ekkewe chon afalafal a tori 107,613. Lon Denmark emon pwiich we chinnap fefin a mochen afalafala ewe kapas allim ngeni aramas nge ese tongeni fetal. Nge neminnan ese achanu. A chok mak taropwe ngeni aramas. Iei, a fen mammak ngeni 42 aramas me a kakkaeo ngenir 11 leir. Neminnan emon me lein ekkewe 14,885 chon afalafal lon Denmark lon ewe ier.
Tongei Chon Oputok
15, 16. (a) Me ren Jises, epwe ifa ukuukun watte ach tong? (b) Met pwiich kewe ra fori lupwen emon a apasa och poraus mi mwaal ussun Chon Pwarata Jiowa?
15 Jises a ereni emon mwan mi sileifichi ewe Alluk pwe ewe Chon Sameria emon chon orun. Lon an we Afalafal Won Ewe Chuuk, Jises a pwal apasa: “Oua fen rong pwe a apasa, ‘Kopwe tongei chon orum, o oput chon oput en.’ Nge ngang upwe apasa ngenikemi, Oupwe tongei chon oput ami, o iotekini ir mi eriaffoukemi, pwe oupwe noun Sememi we mi nonnom lang, pun a atota an akkar won ir mi ingau pwal ir mi murinno o a apungatiu ut won ir mi pung pwal ir kewe rese pung.” (Mattu 5:43-45) Pwal mwo nge atun emon a u ngenikich sipwe chuen chok ‘pworacho ngeni ar ingau ren ach fofor murinno.’ (Rom 12:19-21) Ika mi tufich, sipwe alisir ren minne mi kon auchea me rech, ewe enlet.
16 Lon Ukraine eu poraus lon ewe simpung Kremenchuk Herald a apasa pwe Chon Pwarata Jiowa eu lamalam mi efeieingau. Ina popun a lamot ach sisap tunalo ei poraus pun lon Iurop aramas ra pwal fos ussun Chon Pwarata Jiowa ina ussun ren ar repwe etipetipa aramas le aweiresi are pinei ach angang. Iwe, pwiich kewe ra feilo churi ewe editor ren ar repwe tingor pwe epwe makkei eu minefon poraus mi awenachara minne a mwaal me lon ewe aewin poraus. Iwe, a tipeeu ngeni me a fori nge a pwal apachata och fos a era pwe ewe aewin poraus mi alongolong won poraus mi enlet. Pwiich kewe ra feilo churisefalli me ra aiti ngeni pwal och poraus. Lo, lo, lo, ewe editor a weweiti pwe ewe aewin poraus a mwaal me a makkei lon an we simpung eu esilesil pwe ese pwung ewe aewin poraus. Ar kapas wenechar me kirokiroch ina ewe alen tong mi uwani uwa mi murinno.
Ifa Ussun Sipwe Amaaraata Tong
17. Ifa ewe poraus a affata pwe neman esap mecheres ach tongei aramas fansoun meinisin?
17 Sam me in ra muttir poputa le tongei nour we mi upufo. Nge ach pwaralo tong ngeni ekkewe mi watte ese pwal ina ussun. Neman ina ewe popun ewe Paipel a akkapasa pwe sipwe tongefengennikich—ina och mettoch sipwe angang won. (1 Piter 1:22; 4:8; 1 Jon 3:11) Jises a silei pwe ach tongei aramas epwe sossot lupwen a apasa pwe sipwe omusalo pwiich we fan “fik allea ngeni fisu.” (Mattu 18:21, 22) Paul a pwal apasa pwe sipwe ‘omusamusfengen lefilach” me “songommangfengen lefilach.’ (Efisus 4:32; Kolose 3:12, 13) Ina popun a mak: “Kukkutta tong”! (1 Korint 14:1) Ifa ussun sipwe tongeni fori?
18. Met epwe alisata ach tongei aramas?
18 Akkom, sipwe chechchemeni ach tongei Jiowa Kot. Ei tong epwe alisata ach tongei chon oruch. Pwata? Pun lupwen ach kewe foffor ra pwaralo tong, ra alingalo me mwareiti Semach lon lang. (Jon 15:8-10; Filipai 1:9-11) Oruuan, sipwe sotun eani an Jiowa ekiek ussun met a fen fis. Iteiten fansoun sia tipis, sia tipis ngeni Jiowa; iwe nge, Jiowa a chok okkomusakichelo me a chuen tongeikich. (Kol Fel 86:5; 103:2, 3; 1 Jon 1:9; 4:18) Ach eani an Jiowa ekiek epwe amecheresi ach tongei aramas me omusalo ar kewe tipis ngenikich. (Mattu 6:12) Aulungatin, sipwe tongeni fori ngeni aramas minne sia mochen ar repwe fori ngenikich. (Mattu 7:12) Sise unusoch me a lamot an aramas omusalo ach kewe tipis fan chommong. Ren chok awewe, lupwen sia apasawu och mettoch aramas ra kilas ren, sia anean pwe repwe weweiti pwe sise mochen akilasa letiper me chechchemeni pwe meinisin repwe pwal mwaallilo ren ar fos fan ekkoch. (Jemes 3:2) Ika sia mochen pwe aramas repwe eani foffor mi fiti tong ngenikich, sipwe pwal eani foffor mi fiti tong ngeniir.
19. Ifa ussun sipwe kutta alillisin ngun mi fel lupwen sia mochen amaaraata tong?
19 Aruaanun, sipwe tongeni kutta alillisin ngun mi fel, pun tong eu me lein uwaan ewe ngun. (Kalesia 5:22, 23) Fan chommong chiechi, chiechi lefilen chon eu famili, me tong lefilen mwan me fefin, epwe chok pwisin fisita. Nge mei lamot alillis seni an Jiowa we ngun mi fel ika sipwe amaaraata ena esin tong a nom ren Jiowa, ewe sokkun tong a wewe ngeni ewe minen aririfengenni me aunusochualo mettoch meinisin. Sipwe tongeni kutta alillisin an we ngun mi fen ren ach akkalleani ewe Paipel. Ren chok awewe, ika sia kaeo manauen Jises, sipwe kaeo ussun an kewe foffor ngeni aramas, me sipwe tongeni appiru i. (Jon 13:34, 35; 15:12) Pwal och, sia tongeni tingorei Jiowa ren an we ngun mi fel, akkaewin lupwen a piita och mettoch a aweiresi ach eani ewe foffor mi fiti tong. (Luk 11:13) Saingon sipwe pwal tongeni fokkun fitipach ngeni chon ewe mwichefel. Ach nonnom ren pwiich kewe mi eani tong epwe alisata ach amaaraata tong.—An Salomon Fos 13:20.
20, 21. Ifa ussun Chon Pwarata Jiowa ra pwaralo ar tong atun ewe 2000 service ier?
20 Lon ewe ier ekkewe chon afalafala ewe kapas allim won unusen fonufan a fen tori 6,035,564. Chon Pwarata Jiowa ra eani 1,171,270,425 awa lon ar angangen kukkutta aramas mi mochen rongorong ewe kapas allim. Tong a alikiituur fan pwichikkar, ran, me patapat atun ar apwonueta ei angang. Tong a amwokutuur le fos ngeni chiener chon sukul me chon angang are fos ngeni aramas rese pwal sisiler won aal are lon pwal ekkoch leeni. Chommong lein ekkewe aramas ra fos ngenir rese aucheani ewe poraus nge fen ekkoch ra song. Iwe nge, mei wor ekkoch mi mochen auseling me pwiich kewe ra fen feilo chuurisefalliir fan 433,454,049, me ra kaeo ngeni 4,766,631.
21 Mwa met me watteen an Chon Pwarata Jiowa pwaralo ar tongei Kot me chon orur! Ena tong esap patapatelo. Sia lukulukoch pwe lon ewe 2001 service ier, ewe pwarata ngeni aramas epwe pwal lapelo. Amwo an Jiowa feioch epwe sopwosopwolo me nonnom ren noun kewe chon angang mi tuppwol me achocho atun ekkewe ‘mettoch meinisin minne ra fori, ra chok fori ren tong’!—1 Korint 16:14.
En Mi Tongeni Awewei?
• Sia appiru io lupwen sia tongei chon oruch?
• Epwe ifa ukuukun watteen ach tong?
• Ikkefa ekkoch porausen an aramas pwaralo tong?
• Ifa ussun sipwe amaaraata an Chon Kraist tong?
[Chart on page 14-17]
2000 SERVICE YEAR REPORT OF JEHOVAH’S WITNESSES WORLDWIDE
(See hard copy)
[Pictures on page 11]
An Chon Kraist tong mi tongeni aririfengenni eu famili
[Pictures on page 13]
Tong a amwokutukich le fos ngeni aramas ussun ach apilukuluk