Ekkekieki Ewe Ngun Me Kuna Manau!
“Nge ekiekin Ngun, iei manau.”—ROM 8:6.
1, 2. Ifa sokkofesenin “fituk” me “ngun” lon ewe Paipel?
TUMUNUN ach uoch mwen Kot leiin eu mwicheichen aramas mi ppwor ese mecheres pokiten ar mochen le pwapwaiti mocheniangauen fituker akkom mwen mettoch meinisin. Iwe nge, ewe Paipel a aiti ngenikich sokkofesennin “fituk” me “ngun,” me a affata sopwongauen ach mut ngeni nemenemen fitukach mi tipis me sopwochun ach mut ngeni etipetipaen an Kot we ngun mi fel.
2 Ren chok awewe, Jises Kraist a apasa: “Ewe ngun mi tongeni amanaua, nge ewe fituk mi chok lipwakingau. Ekkewe kapas, ekkewe ngang ua fen apasa ngenikemi, ir mi ngun pwal manau.” (Jon 6:63) Paul a makkei ngeni ekkewe Chon Kraist lon Kalesia: “Pun ekkewe mochenian fituk ra chok polueni ewe Ngun, o ekkewe mochenian Ngun ra pwal polueni fituk, pun ekkeei ruu pekin ra chok ufengen lefiler, pwe ami ousap tongeni fori minne oupwe mochen.” (Kalesia 5:17) Paul a pwal apasa: “Pun emon mi fotukatiu ngeni pwisin fitukan epwe kini malo seni ewe fituk; nge emon mi fotukatiu ngeni ewe Ngun epwe kini manau esemuch.”—Kalesia 6:8.
3. Met a lamot ika sipwe ngaselo seni mocheniaingau me ekiek mi ngau?
3 An Jiowa we ngun mi fel—an we manaman mi efisi pwonuetaan an we angang—mi tongeni limetawu senikich “mochenia-ngauen fituk” mi limengau me awesalo nemenien fitukach mi tipis. (1 Piter 2:11) Ren ach sipwe ngaselo seni fotekin ekiek mi mwaal, a mmen lamot ewe alillis seni ngunun Kot, pun Paul a makkei: “Iwe, ekiekin fituk iei malo; nge ekiekin Ngun, iei manau o kinamwe.” (Rom 8:6) Ifa weween ekiekin ewe ngun?
“Ekiekin Ngun”
4. Ifa weween “ekiekin Ngun”?
4 Lupwen Paul a mak ussun “ekiekin Ngun,” a nounou eu kapas lon fosun Kriis a wewe ngeni “ifa ussun sia ekieki mettoch, lapalapen ekiekich . . . met sia achocho ngeni, met sia mochen apwonueta, met sia angang ngeni.” Eu verb mi ekis wewe chok me ena kapas a wewe ngeni “ekieki, ifa ussun och mettoch a nemenikich.” Iwe, ach ekieki ewe ngun a wewe ngeni ach nom fan emmwenien, nemenemen, me etipetipaen an Jiowa manaman. Weween pwe sia pukun tipeeu pwe ekiekich, mochenich, me met sia mochen apwonueta repwe unusen nom fan etipetipaen an Kot we ngun mi fel.
5. Ifa ukuukun watteen ach etiwa etipetipaen ngun mi fel?
5 Paul a menlapei ukuukun ach anomukich fan etipetipaen ewe ngun mi fel lupwen a apasa pwe sipwe “angang [chon kichiniwel, New World Translation] lon ewe Ngun.” (Rom 7:6) Pokiten ar luku won an Jises moon kepichilo, Chon Kraist ra fen ngaselo seni nemenemen tipis me ra ussun ita “malo” seni nonnomur chon kichiniwel ngeni tipis. (Rom 6:2, 11) Chokkewe mi ussun ita malo ra wesewesen manau me ra fen ngaselo. Iei ir mi tongeni tapweilo mwirin Jises me “wiliti chon angangen pung.”—Rom 6:18-20.
Eu Siwil Mi Amwarar
6. Ifa ewe siwil aramas mi wiliiti “chon angangen pung” repwe kuna?
6 Ewe siwil seni “chon angangen tipis” ngeni “chon angangen pung” a mmen amwarar. Paul a makkei ei poraus ussun ekkoch mi fen siwil: “Nge iei oua fen limochulo, o oua fen apinipinilo, oua fen kuna pung fan iten ach Samol Jises Kraist, o ren Ngunun ach Kot.”—Rom 6:17, 18; 1 Korint 6:11.
7. Pwata a lamot pwe sipwe eani ekiekin Jiowa?
7 Ren ach sipwe kuna ei siwil mi amwarar, sipwe akkom kaeo ekiekin Jiowa. Loom, loom, ewe soumak kol Tafit a tingormau ngeni Jiowa: “SAMOL, kopwe esinei ngeniei lapalapen om kewe fofor . . . Kopwe emmweniei lon om enlet, o afalafalaei.” (Kol Fel 25:4, 5) Jiowa a auselinga Tafit, me a pwal tongeni polueni ena esin iotek fan iten noun kewe chon angang ikenai. Pokiten an Kot kewe aal me an enlet mi limoch me pin, ach ekkekiekiir epwe alisikich ika a torikich sossot ren mochenien fituk mi limengau.
Lamoten An Kot We Kapas
8. Pwata a lamot pwe sipwe kaeo ewe Paipel?
8 An Kot we Kapas, ewe Paipel, a pop seni ngunun we. Ina popun ena ngun mi fel epwe angang wooch ika sia alleani me kaeo ewe Paipel—iteiten ran ika sia tawe ngeni. (1 Korint 2:10, 11; Efisus 5:18) Ach auralo tupuwach me letipach ren ewe enlet me ekkewe kapasen emmwen lon Paipel epwe alisata ach likiitu fan ekkewe sossot mi tongeni ataielo ach pochokkul lon pekin ngun. Ewer, lupwen sossot mi limengau ra piita, an Kot ngun mi fel a tongeni achema ngenikich ekkewe wokisin me kapasen emmwen mi alukucharalo filiach le eani ewe sokkun foffor a tipeeu ngeni letipen Kot we. (Kol Fel 119:1, 2, 99; Jon 14:26) Ina popun sisap tupulo me aleni eu aal mi mwaal.—2 Korint 11:3.
9. Ifa ussun ach kaeo ewe Paipel epwe apochokkula filiach le tumunuochu ach chiechioch me Jiowa?
9 Atun sia likiitu lon ach kaeo Paipel ren alillisin puken aweween Paipel, ngunun Kot we epwe etipetipa ekiekich me letipach, me ach sufol fan iten an Jiowa kewe alluk epwe lapelo. Chiechioch me Kot a wiliiti minne mi lamot seni meinisin lon manauach. Lupwen sossot a piita, sise ekkekieki ewe pwapwa epwe tongeni torikich pokiten ewe fofforingau. Nge, kamwochunukun ach tuppwol ngeni Jiowa ina met sipwe ekieki loom. Ach aucheani ach chiechi me Kot epwe achungu letipach le u ngeni och ekiek mi ngau a tongeni ataielo ena chiechi.
“Ifa Lapalapen Ai Aucheani Om Alluk!”
10. Pwata ach alleasochisi an Jiowa kewe alluk a lamot ika sia mochen ekieki ewe ngun?
10 Ika sia mochen nonnom fan emmwenien ewe ngun, sile ussun an Kot we Kapas esap naf. King Solomon a wewefichiiti an Kot kewe alluk, nge lupwen a chinnapelo, ese chuen manaueni manauan me ren ekkena alluk. (1 King 4:29, 30; 11:1-6) Ika sia ekkekieki mettochun ngun, sipwe kuna ewe lamoten ach silei met a mak lon ewe Paipel me ach alleasochisi an Kot kewe alluk ren unusen letipach. Weween pwe sipwe tinikken le atittina an Jiowa kewe alluk me sipwe pwal tinikken le manaueni manauach me reer. Ewe soumak kol a eani ena esin ekiek. A kolu: “Ifa lapalapen ai aucheani om alluk! Ua chok ekieki usun ran meinisin.” (Kol Fel 119:97) Lupwen sia ekkekieki ach alleasochisi an Kot kewe alluk, sipwe pwaralo lapalapen Kot kewe lon manauach. (Efisus 5:1, 2) Foffor mwaal esap chuen lukikich iteitan, nge sipwe pwaralo uwaan ngun mi fel, me ach mochen apwapwai Jiowa epwe okullukich seni “foforun fituk” mi limengau.—Kalesia 5:16, 19-23; Kol Fel 15:1, 2.
11. Ifa ussun kopwe awewei pwe an Jiowa we alluk mi pinei lisowu mwaal a wewe ngeni eu minen tumun ngenikich?
11 Ifa ussun sipwe tongeni amaaraata sufol me tong fan iten an Jiowa kewe alluk? Sipwe tongeni atittinafichi aucheaar. Ekieki mwo ifa ussun an Kot kewe alluk ra aukuuku ewe foffor lefilen mwan me fefin ngeni chokkewe mi pupulufengen me a pinei lisowu mwaal me mocheisou. (Ipru 13:4) Och mettoch mi murinno epwe pout senikich pokiten ach alleasochisi ei alluk? Semach mi tong lon lang epwe fori alluk mi pinei senikich och mettoch sipwe feioch ren? Aapwi! Nengeni met a fen tori chokkewe rese mochen manaueni manauer me ren an Jiowa kewe alluk. Fan chommong pwopwoon lipich a emmwen ngeni atai manauen monukol esaamwo uputiu are pupulu ese pwapwa. Chommong ra wiisen tumunu nour kewe nge esor puluwer. Pwal och, chokkewe mi lisowu mwaal mi tongeni uriir ekkewe sokkopaten semmwenin sikepwach. (1 Korint 6:18) Ika emon lein noun Jiowa kewe chon angang a lisowu mwaal, epwe tongeni tatakkis letipan. Mwelien letipan esap kinamwe me a tongeni efisi an ese onnut le pwin me aurek wachemuk. (Kol Fel 32:3, 4; 51:3) A ffat pwe an Jiowa kewe alluk mi pinei senikich lisowu mwaal a ffor fan iten ar repwe tumunukich. Ewer, a mmen watte ekkewe feioch seni ach amwochu ach limoch!
Iotek Fan Iten An Jiowa Alillis
12, 13. Met popun a fich pwe sipwe iotek lupwen sia osukosuk ren ekkewe mochen mi ngau?
12 Iotek seni letipach a lamot ika sipwe ekieki ewe ngun. A fich ach tingor alillisin an Kot ngun mi fel pun Jises a apasa: “Are . . . oua sinei usun liffang mettoch mi murinno ngeni noumi semirit, ifa usun Semach we mi nom lang, esap lapelo an liffang ewe Ngun mi Fel ngenir mi tingorei i?” (Luk 11:13) Ach iotek mi tongeni pwari ukuukun ach osupwangen alillis seni ngun mi fen fan iten ach kewe apwangapwang. (Rom 8:26, 27) Ika sia meefi pwe sia fen feiengau seni mocheniangau are ekiek mi ngau, are ika emon pwiich we mi tong a fos ngenikich, sipwe tipatchem ika sipwe titchik lon ach iotek ussun ach osukosuk me tingor an Kot alillis ren ach sipwe pworacho ngeni ekkena mettoch.
13 Jiowa a tongeni alisikich le ekilapei ekkewe mettoch mi pwung, limoch, murinno, me minne a fich ngeni ach mwareiti. A ifa me murinnoon ach tingor pwe “an Kot kinamwe” epwe tumunu letipach me ekiekich! (Filipai 4:6-8) Amwo sipwe iotek fan iten an Jiowa alillis ren ach sipwe “achocho ngeni minne mi pung, o ngeni ewe manau mi fich ngeni Kot; . . . luku, me tong, me likiitu, me umoumoch.” (1 Timoti 6:11-14) Ren alillisin semach lon lang, ekkewe aurekin manau me sossot resap kon watteelo pwe sise chuen tongeni nemeniir. Nge sipwe pwapwaiti kinamwe seni Kot.
Ousap Aletipechouolo Ewe Ngun
14. Met popun ngunun Kot eu manaman mi tongeni alisata ach limoch?
14 Noun Jiowa kewe chon angang mi asimau ra apwonueta alon an Paul we fon: “Ousap kunuelo ewe Ngun.” (1 Tesalonika 5:19) Pokiten ngunun Kot “ngunun mi fel,” a limoch, pin, esor limengauan. (Rom 1:4) Lupwen a angang wooch, ewe ngun a alisata ach pin, are limoch. A alisikich le manaueni eu manau mi limoch mi esissinnakichelo ren ach alleasochis ngeni Kot. (1 Piter 1:2) Foffor mi limengau a wewe ngeni an emon tunalo ewe ngun me sopwoloon an fori ena a fokkun efeiengau. Ifa ussun?
15, 16. (a) Ifa ussun sipwe tongeni aletipechou ngunun Kot? (b) Ifa ussun sisap aletipechou ngunun Jiowa?
15 Iwe, Paul a makkei: “Ousap pwal aletipechou ewe Ngunun Kot mi Fel, ewe a fen mechenikemilo tori ewe ranin amanau.” (Efisus 4:30) Ewe Paipel a apasa pwe ngunun Jiowa a ussun eu pwon, are ‘esissinnen met epwe feito,’ fan iten ekkewe Chon Kraist mi kepit. Met epwe feito, manau esemuch lon lang. (2 Korint 1:22, NW; 1 Korint 15:50-57; Pwarata 2:10) An Kot ngun mi fel a tongeni emmweni chokkewe mi kepit fengen me chiener kewe mi apilukulukun manau won fonufan, ar repwe ti seniir ekkewe foffor mi tipis.
16 Ewe aposel a ourourakich ussun kapas chofona, sola, eani foffor mi asau, me metekan. Ika sia mut ngeni ekkena mettoch ar repwe lukikich, sia u ngeni ewe fon mi pop seni ngunun Kot lon ewe Paipel. (Efisus 4:17-29; 5:1-5) Pwal mwo chok ekis sipwe aletipechou an Kot we ngun, me ina eu mettoch sise mochen fori. Iwe, ika sia poputa le tunalo ewe fon lon an Jiowa we Kapas, sipwe tongeni poputa le eani ewe sokkun ekiek are foffor mi emmwen ngeni ach tipis watte me poutuloon an Kot chen. (Ipru 6:4-6) Inaamwo ika sisaamwo fori tipis nge, sipwe tongeni feffetal won efoch aal mi emmwen ngeni tipis. Ika sia tuttunalo an emmwen, sipwe aletipechou ewe ngun mi fel. Sipwe pwal u ngeni me aletipechou Jiowa, ewe popun ngun mi fel. Pokiten sia tongei Kot, sise mochen fori ena. Sipwe tingor fan iten an Jiowa alillis ren ach sisap aletipechou ngunun we nge sipwe tongeni asamolu itan we ren ach ekieki ewe ngun.
Ekkekieki Ewe Ngun
17. Ikkefa ekkoch mettoch sipwe tongeni achocho ngeni lon pekin ngun, me pwata ach achocho ngeniir eu aal mi murinno?
17 Sipwe tongeni kuna alillis le ekkekieki ewe ngun ika sipwe filata ekkewe mettoch lon pekin ngun sipwe achocho ngeni me angang ngeni pwe sipwe apwonuureta. Met sipwe achocho ngeni epwe tongeni kapachelong amurinnooloon lapalapen ach kaeo, lapeloon ach angangen afalafal, are ach achocho ngeni ewe angangen pioneer, angang lon Bethel, are ewe angangen misineri. A chok alongolong won met a lamot ngenikich me nonnomun manauach. Iei ussun sipwe ekkekieki mettochun ngun me epwe alisikich le u ngeni apwangapwangen fitukach are ach manaueni manauach me ren ach mochen kutta woun fonufan are ewe mocheniangau mi choufetal lon ei otot mi ngau. Ina ewe aal mi murinno pun Jises a peseikich: “Ousap iseni pisekimi won fonufan, ikewe macholap me paarang ra ani me ie, o chon sola ra atai o solani me ie. Nge oupwe iseni pisekimi lon lang, ikewe macholap me paarang resap ani me ie, o chon sola resap atai are solani me ie. Pun ikewe pisekum a nom ie, ina letipom epwe pwal nom ie.”—Mattu 6:19-21.
18. Met popun ach ekkekieki ewe ngun a fokkun lamot lon ekkeei ranin le sopwoloon?
18 Ach ekkekieki ewe ngun me nennemeni mochenin fonufan a wewe ngeni eu aal mi murinno lon ekkeei “ran le sopolon.” (2 Timoti 3:1-5) Iwe, “fonufan epwe morelo, o pwal an kewe mochenia-ingau; nge i mi fori letipen Kot epwe nonnom feilfeilo chok.” (1 Jon 2:15-17) Ika emon sarafo Chon Kraist a achocho ngeni ewe angangen pioneer, met a achocho ngeni mi tongeni wiliiti eu minen emmwen fan itan lon ekkewe ierin sarafo mi weires. Lupwen a kuna sossot, emonnewe epwe ffatochun kuna met a mochen apwonueta lon an angang ngeni Jiowa. Ena esin aramas mi pochokkul lon pekin ngun epwe ekieki pwe esap och, are a pwal mwo nge tiparoch, ika epwe poutalo mettochun ngun fan iten an epwe wouoch lon fonufan are fan iten och pwapwa epwe tongeni angei seni tipis. Chemeni mwo ifa ussun Moses a aucheani mettochun ngun me a “filata epwe eti noun Kot kewe aramas lon ar riaffou, o esap pwapwaesini pwapwan tipis mi epwe nonnom chok fansoun mochomoch.” (Ipru 11:24, 25) Ika kich sarafo are chinnap, filiach a ussun we chok lupwen sia ekkekieki ewe ngun nge sap fitukach mi tipis.
19. Ikkefa ekkewe feioch sipwe pwapwaesini ika sia ekkekieki ewe ngun?
19 “Ekiekin fituk a chok u ngeni Kot,” nge “ekiekin Ngun, iei manau o kinamwe.” (Rom 8:6, 7) Ika sia ekkekieki ewe ngun, sipwe meefi eu kinamwe mi auchea. Ewe tumun letipach me ekiekich ra kuna seni etipetipaen fitukach mi apwangapwang, a lapelo. Me sipwe angei alillis seni lang fan iten ach sipwe likiitu fan ewe maun lefilen fitukach me ngunuch.
20. Pwata sia sile pwe sipwe tongeni win lon ewe maun lefilen fituk me ngun?
20 Ren ach ekkekieki ewe ngun, sia tumunu ach ririfengen me Jiowa, ewe popun manauach me an we ngun mi fel. (Kol Fel 36:9; 51:11) Setan ewe Tefil me chienan kewe ra unusen achocho le ataielo ach chiechioch me Jiowa Kot. Ra sotun nemeni ekiekich pun ra silei pwe ach fangeta epwe emmwen ngeni ach wiliiti chon oput Kot me ngeni ach malo. Nge sipwe tongeni win lon ei maun lefilen fituk me ngun. A ina kunaen Paul. Lupwen a makkei ussun pwisin an we maun, a akkom eani kapas eis: “Io epwe angasaei seni ei inisin malo?” Iwe, mwirin a pwarata pwe an ngaselo a tufich ren an apasa: “Kilisou ngeni Kot ren Jises Kraist ach Samol!” (Rom 7:21-25) Sia pwal tongeni kilisou ngeni Kot ren Kraist fan iten an awora ewe minen alillis mi tongeni alisikich le nemeni apwangapwangen fitukach me ekkekieki ewe ngun ren eu apilukulukun manau esemuch mi amwarar.—Rom 6:23.
En Mi Chechchemeni?
• Ifa weween ekiekin ngun?
• Ifa ussun sia mut ngeni ngunun Jiowa epwe angang wooch?
• Awewei mwo ewe popun kaeo lon Paipel, alleasochis ngeni an Jiowa kewe alluk, me iotek, ra lamot lon ach maun ngeni tipis.
• Ifa ussun kefilitaan ekkewe mettoch sipwe achocho ngeni lon pekin ngun epwe alisata ach feffetal won ewe alen manau?
[Picture on page 14]
Ach kaeo ewe Paipel epwe apochokkulakich ngeni ekkewe mettoch mi maunei ach pochokkul lon pekin ngun
[Picture on page 15]
A murinno ach tingor alillis seni Jiowa ren ach sipwe pworacho ngeni mocheniaingau
[Pictures on page 16]
Ach filata mettoch sipwe achocho ngeni lon pekin ngun epwe alisata ach ekkekieki ewe ngun